Matthieu 16

Yésʉs lɨ́ ebene ékǎ sâ bé mesimá

1OFarizyɛ̂n, bé le oSadwisyɛ̂n, bê nzě pyâl kwá mé Yésʉs. Bé e né ó, nye sâʼ bé esimá e nkul dí eduho ɨ́ jʉ́o kʉ́ nyɨ́. Sâ gwár, bé á lwib nó ó, lɨ́ ebóblo nyê. 2Yésʉs nzě lɛ́ɛ e bé ó: «[Bɨ̌n sɨ́sá ó, bɨ́n sí bee jʉ́o kaá e kaá ɨ́ bíí kʉ̌ʼ nó, bɨ̌n bé ó: “Dwéhé, yé ókah ómɛ́n.” 3Ɨ́ melɔ́ma mé mɛ́n, bɨ́n béé jʉ́o kaá e kaá nó, bɨ̌n lɛ́ɛ́ ó: “Mpíé ónwɨ́ɨ̌ ndǔm.” Nye ntémé bánǎ nwɨ́ɨ. Bɨ̌n bé náǎ lɨ́ ekʉ́ gʉ́a bísâ bi dí ecémlě dwéhé le mpíé bí. Nzê bɨ̌n bé abe e nkul dwéʼé sá mû lɨ́ esyɛ́ɛ ɨ́ jɔʼ yɨ̂ʼ yɨ́ ɛ́!] 4Bibɨ́bla bi bʉ̂r le odûl bé ónzyɛ̌m oswîh ó dí edǐ bee mésimá. Yé ákóʼó kǎ be le esimá eswîh, alaa ó laá lé á syɛ́ɛ ɨ́ twiʼ mé Yʉ́nas lɨ́.»

Jɔ̌ʼ Yésʉs á sil elwib nó yɨ́, bé le ompʉ́n bé ntɔ̂ʼ kalwo ɨ́ byɛ̂l, tóŋɔɔ.

Metwɨ́ɨ́ mé óFarizyɛ̂n, mé lɨ́ ebol bʉ̂r

5Jɔʼ bé á to kumo ɨ́ lʉ́ʉ́ ébʉ́m é mâŋ yɨ́, ompʉ́n bé ntɔ̂ʼ bee ó, bé á bé anze e biblêr. 6Yésʉs nzě lɛ́ɛ e bé ó: «Bɛɛngɛ́ɛ! Bɨ̌n e báʼ óFarizyɛ̂n le oSadwisyɛ̂n ɨ́ lɔ̌b levure yɔ́ɔ́ bé dí e yé yɨ́.» 7Ompʉ́n bé, bê nzě lɛ́ɛla páʼ nyɔ́ɔ́ ó: «Sá nyê lɛ́ɛ́ yɨ́, nye lɛ́ɛ́ yé ó, ebě, ɨ́ jɔʼ mɨ́nâ nzé gá wâʼ yɨ́, mɨná bé anze gá e biblêr.»

8Mpʉ̌ Yésʉs á gʉ́a jwɨʼ yɔ́ɔ́ yaá yɨ́, nye e bé ó: «Á twâʼwǒ búʼó yɨ́n ɛ̂! Bɨ̌n bé lɨ́ elwǐb mpʉ́nʉ̌ ɨ́ yé? Nzê ebe bɨ̂n nzé kâʼ, abe e biblêr ɛ̌? 9Nzê bɨ̌n dína apǎ gwá gʉ́a ɛ̌? Nzê bɨ̌n bé akǎ símsa bíblêr bitɛ̂n byé á jala e bʉrʉ̂m otɔ́ɔ́sin otɛ̂n bí ɛ́? Bɨ̌n bé á tœ̂ʼ bimpubuʼó bi tɨ̂, lóŋlo mékwám méntíá e byê? 10Nzê bɨ̌n bé akǎ símsa bíblêr nzaangbá byé á jala e bʉrʉ̂m otɔ́ɔ́sin onâ bí ɛ́? Bɨ̌n bé á tœ̂ʼ bimpubuʼó bi tɨ̂, lóŋlo ómpyáa ontíá? 11Bɨ̌n bé lɨ́ ekâr égwá jóʼo mé ɨ́ yé? Me bé alwib e bɨ̌n dumo e biblêr. Bɨ̌n a báʼ óFarizyɛ̂n le oSadwisyɛ̂n ɨ́ lɔ̌b levure yɔ́ɔ́, bé dí e yé yɨ́.»

12Nó yaá ó bé á ka jóʼo nye yɨ́. Nye á bé alwib e bé ɨ́ levure. Nye á lwilwib e bé ó, dumo le oFarizyɛ̂n, bé le oSadwisyɛ̂n, ɨ́ lɔ̌b mílɛ́ʼlá bé á dwidwe bʉr lɨ́ onzyɛ́h ónzyɛ́h mí.

Yésʉs ó dí Mʉ̌r Nzyɛ̌m á lœm múló mé jwɨ́ɨ nyá

13Yésʉs ntɔ̂ʼ tó pyâl ɨ́ nkanǎ Kesáre mé Fílipi. Nye nzě dî le ompʉ́n bé ó: «Bʉr lɨ́lɛ́ɛ́ ó, Mwân mé Mʉr, nye nzé?» 14Ompʉ́n, bé ntɔ̂ʼ yala ó: «Bâʼ bʉ̂r, bé lɛ́ɛ́ ó, go ó Yʉánɛs Ndubʉr. Bʉ́ʉ́, bé ó, go ó Elie. Bʉ́ʉ́ ntémé, bé ó, go ó Jérémie, nkʉ̂ nyʉ́ʉ́ ngwíha milɔ̌b mé Nzyɛ̌m swîh.» 15Nye ntɔ̂ʼ báʼǎ dî e bé ó: «Nó bɨ̌n bɨɛ̌ lɛ́ɛ́ ó, me nzé?» 16Simon Pétrus ntɔ̂ʼ yala ó: «Go ó Mʉ̌r Nzyɛ̌m á lœm múló mé jwɨ́ɨ nyá. Go ó Mwân mé Nzyɛ̌m dí kublakúbla nyá.»

17Yésʉs ntɔ̂ʼ lɛ́ɛ e né ó: «Go ó e metyɛʼ me mpóm, Simon Bar-Yónas. Ntʉ nyʉ̂l bipúno le metiê gwíh gó sâ yaá. Yê bé ó Sɔ́ŋ wǎm dí ɨ́ jʉ́o kʉ́ nyá. Nye ô lɛ́ʼlé gó yǎ. 18Mě lɛ́ɛ́ gó ó, díé lô, lé ó: “ekóʼ: Pétrus”. Nó lɨ́ ekóʼ énɨ̌ kʉ́ ó mé ngá bonǒ Mbɛ̌r-Nzyɛ̌m wâm yɨ́. Wé lwímlá le Sátan lɨ́ ebɨ̌m e dɔ̂m lé nɛ́ɛ: bisá bí dɔ̂m byé, byé ántaa wé ɨ́ nkul. 19Me ódwe gó sab Mpóʼo mé Dâ Nzyɛ̌m. Nó sá gó ngá kamle ɨ́ sí yɨ̂ʼ yɨ́, yé díʼee sâ gwár yé á pa kamlɔɔ kʉ́ yɨ́. Yaá ntémé gó ngá kam ɨ́ sí yɨ̂ʼ yɨ́, yé díʼee ntémé yaá Nzyɛ̌m á boo kam yɨ́.» 20Yésʉs ntɔ̂ʼ gbâ ómpʉ́n bé mpéné ó, bé l'anyamlě lɛ́ɛ mʉ̂r ó, nye ó Mʉ̌r Nzyɛ̌m á lœm múló mé jwɨ́ɨ nyá.

21Táare ɨ́ jɔʼ yaá, Yésʉs nzě gɔ́na le elɛ́ɛ ómpʉ́n bé ó, yé jala ó, nye tôʼ ɨ́ Yerʉ́zalɛm, nye síaa e mitúú ɨ́ buo buo ɨ́ mebó mé ótɔ́má bʉ̂r, le ojwɨ́ɨ o mpáh Nzyɛ̌m le olɛ̂ʼla o métié. Nye ntémé ójʉ́ŋɔɔ. Lɨ́ elú élɛ̂l píe tɨ̂, nye ópah ɨ́ soo. 22Nó Pétrus á nze tô e né ɨ́ bʉm, nzě dwe nyé mebě. Nye e né ó: «Nzyɛ̌m kámlaa sâ yaá yɨ́yɛ̂h lɨ́ edira ɨ́ go!» 23Yésʉs nzě dwira, le elɛ́ɛ e Pétrus ó: «Sátan, duhaa mé ɨ́ mîh. Go ó ebɔ̌ʼ e dí e nkul ebɨma mé ɨ́ léme lɨ́. Mipahlá myô, myé abe myaá mé Nzyɛ̌m, njɨ myaá mi bʉ̂r.»

24Yésʉs nzě lɛ́ɛ le ompʉ́n bé ó: «Mʉ̂r sí kpɛl édû mé nó, nye bénaa nye mʉr tɨ̂. Nye e nkɛ́ɛ́ kolôs yé. Nye e dú mê. 25Ebě, mʉr dí ekpɛl ékamle e twiʼ yé nyá, ódímle yê. Tó kœb ó, waá ngá bîr yé lɨ́ esú lâm nyá, nyɨ́haá ó ngá baʼle yê. 26Mʉ̂r nʉ́á sí yɨ̂ʼ yɨ́yɛ̂h, kǎ tó dímlě twiʼ yé nó, wáǎ nyɔm nyé ngá kǎ lîʼ e wé wɨ́? Yáǎ sɔ̂ʼ mʉ̂r dí e nkul esyɛ́ɛla lɨ́ esú lé ébáʼǎ bǐ twiʼ yé? 27Ebě, Mwân mé Mʉr múo nzě pyâl ɨ́ mentyɛnwa me Sɔ́ŋ wé, bé e bééngeles bé. Jɔʼ yaá ó nyé ngá tíʼe bʉ̂r milɔ̌b, dû mpʉ bísyɛ́ɛla byɔ́ɔ́, byé á be yɨ́. 28Mě lɛ́ɛ́ bɨ́n lɨ́ otyeetye ó, ɨ́ sɔ́má bʉ̂r o dí wâʼ báánâʼ bá, bʉ́ʉ́, bé ádwe, apǎ bee Mwân mé Mʉr lɨ́ enzě tyêl Mpóʼo nyé.»

Currently Selected:

Matthieu 16: ozm

Highlight

Copy