Matthieu 24

Yerʉ́zalɛm, yé ógbahɔɔ

1Jɔ̌ʼ Yésʉs á be, nye mû lɨ́ eduho mpáh Nzyɛ̌m, tô kʉ̌l yɨ́, ompʉ́n bé ntɔ̂ʼ sîhlě nko nyé á be yɨ́, le elɛ̂ʼlɔɔ nyé mpʉ súmó á be yɨ́. 2Nó ó Yésʉs á nze lɛ́ɛ e bé ó: «Bɨ̌n bɨ́ bee súmó nyɨ̂ʼ nyɨnyɛ̂h ɛ́? Mě lɛ́ɛ́ bɨ́n lɨ́ otyeetye ó, lʉ́ʉ́ ékóʼ, lé ákóʼó lîʼ wâʼ kʉ́ lʉ́ʉ́, ebě, mɨ́mɛ̂h, mé ónkɛŋɔɔ sí.» 3Nó ó Yésʉs á nze tô lɨ́ Ecwɨ́ʼ lé ólivier, nzě di sí. Ompʉ́n bé, bê nzě tô e né, tó sâ bʉm. Bé e né ó: «Lɛ́yɨ́ɨ́ bɨ́h jɔʼ bísá bîʼ ngá syɛ́ɛ yɨ́. Lɛ́yɨ́ɨ́ bɨ́h ntémé dweʼle ngá lɛ̂ʼle ó, go mû ó kúno ebúla, le ntémé jɔʼ mpóʼo sí yɨ̂ʼ ngá síe yɨ́.»

4Nó ó Yésʉs á lɛ́ɛ e bé ó: «Diʼee gá mekʉá ɨ́ binyâ. Bɨ̌n ámû jaá dímlɔɔ. 5Ebě, bʉr ɨ́ buo buo, bé ónzɨnze e díé lâm, lɨ́ elɨlɛ́ɛ ó: “Mɛm ó dí Mʉ̌r Nzyɛ̌m á lœm múló mé jwɨ́ɨ nyá!” Bé ódímle bʉ̂r ɨ́ buo buo. 6Bɨ̌n bé ójóʼo bʉ̂r lɨ́ elwilwib mílɔ̌b mi mɔ̂m le elɛ́ɛ mílɔ́ɔ́ mí dɔ̂m. Bisɨ́ǎ byaá atɨ̂l bɨ́n mekʉ̌ sí, ebě, yé jala ó, byé nyɛ́ɛ pyâl. Damá jóʼo nó, ntʉ bísɨ́ǎ byaá ngá lɛ̂ʼle ésúʼlá é sí yɨ̂. 7Yɨ̂ʼ kûl, yé ólwímla e yʉ́ʉ́. Nyɨ̂ʼ mpóʼo lwímla e nyʉ́ʉ́. Nza, nye ónyaŋla bígúmo bigúmo, le sí, yé ókubla. 8Bisâ byaá bíbyɛ̂h, byé ónyɛɛ́ syɛ́ɛ. Náǎ yé óbe ó enyɛ̌l e mékpaa, nwɨɨla e mekpaa me mín.

9«Jɔʼ yaá ó bɨ́n ngá tyenɔɔ kwá bʉr o ngá buú lɛ̂ʼle bɨ́n túú bá. Bé ójʉ̂ bɨ́n. Bʉr o bíkúl bíbyɛ̂h, bé óbene bɨ́n ebe bɨ́n dí egúmo e me. 10Nó ó bʉ̂r ɨ́ buo buo, bé óbɨm ébɔ̌ʼ, sâ ébébe yɨ́. Bʉr, bé óbɛ́ma bʉ̂r ó sɔ́má yɔ́ɔ́ e bʉr oswîh. Bé ónwimla páʼ nyɔ́ɔ́. 11Ogwíha o mílɔ̌b o bíbɛr, bé ópyâl ɨ́ buo buo. Bé ntémé, bé óbuú dímle bʉ̂r ɨ́ buo buo. 12Bʉr ɨ́ buo buo, bé óbîr ó, kpɛ̌l, yé á didi páʼ nyɔ́ɔ́ yɨ́, yé tálaa. Bé ósâ nó ebě, bé óbeě mpʉ ébébe mû lɨ́ emamle yɨ́. 13Sâ gwár, mʉr ngá dûhwo, tó pyâl ɨ́ mesíé nyá, ótiʼe. 14Nó Mbɨambɨa Lɔ́ɔ dí edumo e Mpóʼo mé Dâ Nzyɛ̌m wɨ́, wé ólɛ́ɔɔ̌ gúmó yɨ́yɛ̂h ɨ́ sí yɨ̂, lɨ́ esâ ó, kúl yɨ́yɛ̂h jóʼaa bʉr o dí eboʼlǒ lɔ́ɔ waá bá. Píe tɨ̂ʼ ó éswéhlɨ́ é kʉ́ e sí ngá kǎ bɔma yɨ́.»

Mentuhlobʉr

(Marc 13.14-19; Luc 21.20-24)

15Nó ó Yésʉs á lɛ́ɛ e bé ó: «Bɨ̌n bé óbee mʉ̂r bé jɨ́jébé ó, “Mentuhlobʉr” nyá. Nye ótêʼwo bʉ̂r ɨ́ mîh gúmó dí ti yɨ́, mpʉ ngwíha milɔ̌b Daniel á boo lɛ́ɛ yɨ́. (Mʉr dí eláǎ lɔ̌b wɨ̂ʼ nyá, nye gwâ jóʼo wê!) 16Nó ɨ́ jɔʼ bɨ́n óbee nyé ɨ́ gúmo yaá yɨ́, bʉr o ngá bě sí Yʉ́da bá, bé ɨ́ jala le ekpɛ́ɛ, tóŋɔɔ ɨ́ mecwɨ̂ʼ! 17Mʉr ngá be kʉ́ mié nyá, nye ákǎ sulo, ó nye tôʼ kaale bísá bí mbɛ̌r. 18Waá ngá bě pemé nyá, nye ákǎ búlǎ píhe, ó nye tôʼ nʉa kʉ̂r wé. 19Nkoó e baábubúm le baábyɛɛ́ ɨ́ melû maá! 20Jɨʼlaa gá e Nzyɛ̌m ó, kpɛ́ɛ́ wɨ́n, wé ayɨ́ be yɨ́ɛ ɨ́ jɔ̌ʼ kóló, nkʉ̂ ɨ́ móhó sábat! 21Ebě, ɨ́ jɔʼ yaá, mitúú e mindɛ̌l mínɨ́nɨ́ɨ́, myé óbuú pyâl. Táare ɨ́ jɔ̌ʼ Nzyɛ̌m á kuho kʉ́ e sí, nzě kumo ɨ́ báánâ, bʉr, bé apǎ sia e mitúú mbi waá. Gúú túú swîh, wé ákǎ báʼǎ laa míhaá. 22Yé bé Dâ atuŋlo mélû maá nó, lɛ́ɛ́, mʉr ákóʼó tiʼe. Sâ gwár, nye ótuŋlo mé ó, lɨ́ esú é bʉ̂r o nyé á twâr bá.

23«Mʉ̂r lɛ́ɛ́ e bɨ̌n ó: “Beyɨɨ gá, Krîst ó dí wâʼ nyâ!” nkʉ̂ ntɔ̂ʼ ó: “Nye ó kâʼ!” nó, abûʼla gá mʉr waá. 24Ebě, okrîst o bíbɛr, bé ópîpyal, bé le ogwíha o mílɔ̌b o bíbɛr. Bé ósâ mésimá ménɨ́nɨ́ɨ́ le bisá bí ékâm. Yé báná nó, bé ódímle bʉ̂r ó Nzyɛ̌m á twâr bá ɨ́ nzɨ̌ mikóo myɔ́ɔ́. 25Paá bee: me múo sí gwîh bɨ́n syɛ́ɛla yɔ́ɔ́ yaá!

26«Nó, mʉ̂r sí nzě lɛ́ɛ e bɨ̌n ó: “Beyɨɨ gá, nye ó kâʼ ɨ́ lʉá wɨ̂ʼ!” nɛ́ɛ: mʉr atô gâ. Mʉ̂r lɛ́ɛ́: “Beyɨɨ gá, nye ó kâʼ ɨ́ ntɔ́ɔ nyɨ̂ʼ!” nɛ́ɛ: mʉr abûʼla gá nye. 27Ebě, mpʉ̌ ndweh dí edweh, táarě nko dʉ́o dí ejɨma, tó kumǒ nko lé dí edíme yɨ́ ó Mwân mé Mʉr ngá báʼǎ nze yɨ́. 28Gúmó múu dí yɨ́, tɨ̂ʼ ó mébɛn dí eswâl yɨ́.»

Nzéá mé Krîst

29«Píe melû maá, mítúú e mindɛ̌l mínɨ̌ myé óbe sí síe nó, dʉ́o, lé odíme, álomó akǎ pan. Ocwícwén, bé óduma, duho ɨ́ jʉ́o kʉ́. Bisá bí nkûl bínɨ́nɨ́ɨ́ bi dí ɨ́ jʉ́o kʉ́ bí, byé ólwɨ̂ʼlɨ. 30Jɔʼ yaá, dweʼle ngá lɛ̂ʼle ó, nzéá mé Mwân mé Mʉr, wé mû lɨ́ ekúnwo yɨ́, yé ónyɨ̂n ɨ́ jʉ́o kʉ́. Bikúl bí sí yɨ̂ʼ bíbyɛ̂h, byé ótáare éjɨ médwê, le ekâm ékúhó lé. Bé óbee Mwân mé Mʉr lɨ́ enze ɨ́ bidwiné bí jʉ́o, le ánɨ̂nɨ̂n nkul le mentyɛnwa ɨ́ buo buo. 31Jɔʼ yaá, nye ólómo bééngeles bé e sébé dí ɨ́ buú bwaʼ twíí nyá, ɨ́ medumo mé sí mɨ́mɛ̂h menâ. Bé ósyɛŋ baá nyé á twâr bá, táare ɨ́ wɨ́ʼ ódumo ó sí, tó pyâl ɨ́ gúú.»

Kɨkɛna dí edumo e lɨ́ figyê yɨ́

32«Jóʼláá gá lɛ́ʼlá figyê yé mʉr tɨ̂ʼ dí edwe bɨ́n wɨ́: jɔʼ mílɔ́ɔ́ mû sí dwánwo, biká mû lɨ́ enyɛl épâh yɨ́, bɨ̌n bé lɨ́ eboó gʉ́a ɨ́ jɔʼ yaá ó, nkóno, yé mû ó kúno epyâl. 33Mpʉ yaá ntémé ó, jɔʼ bɨ́n óbee bísâ byaá mû lɨ́ epyâl yɨ́, gʉ́ŋáá gá ó, Mwân mé Mʉr mû ó kúno epyâl, kwahaá lɨ́ ebê. 34Mě lɛ́ɛ́ bɨ́n lɨ́ otyeetye ó, mpeʼ bʉ̂r yɨ̂ʼ l'asíe, bisyɛ́ɛla bî, byé ópyâl, bíbyɛ̂h. 35Kʉ́ e sí, byé ólaa. Milɔ̌b myâm míɛ, myé ákóʼó síe.

36«Ɨ́ lɔ̌b móhó waá le jɔʼ yaá, mʉr ngwár, nyé agʉ́a wê. Damá jóʼo bééngeles dí ɨ́ jʉ́o kʉ́ bá, bé agʉ́a. Damá jóʼo Mwân mé Mʉr, nye ntémé, nyé agʉ́a. Nzyɛ̌m Sɔ́ŋ nye omér ó dí egʉ́a. 37Syɛ́ɛla yaá, yé ósyɛ́ɛ ó, nwɨɨla e bisyɛ́ɛla byé á sisyɛ́ɛlɨ ɨ́ jɔʼ mé Nóe bí. Mpʉ yaá ntémé ó Mwân mé Mʉr ngá báʼǎ nze yɨ́. 38Byé nwɨɨla ó, mbi wɨ̂: jɔʼ mpɨ́ɨ á be apǎ mamle yɨ́, bʉr, bé á be ó lɨ́ ede méde le menyoʼ, báŋɔɔ bʉ́bá le ebɛ́lɔɔ bwân, tó pyâl pyáláa ɨ́ dʉ́ó Nóe á ka nî ɨ́ byɛ̂l yɨ́. 39Bé á bé abûʼla ó, sɔ̂ʼ, yé e nkul esyɛ́ɛ nó, tó pyâl ɨ́ jɔʼ mpɨ́ɨ á bana sîl bɨ́bɛ̂h yɨ́. Yé óbe ntémé ó, jwɨʼ gwár, ɨ́ jɔʼ Mwân mé Mʉr ngá báʼǎ nze yɨ́. 40Ɨ́ jɔʼ yaá, ɨ́ bʉrʉ̂m obá ngá be ɨ́ pemé bá, nyʉ́ʉ́ ónʉŋɔɔ, nyʉ́ʉ́ lîʼ. 41Lɨ́ bʉbá obá ngá be lɨ́ esie méde ɨ́ nkoʼ mpwár bá, nyʉ́ʉ́ ónʉŋɔɔ; nyʉ́ʉ́ lîʼ. 42Nó, diʼee gá ɨ́ mpʉ̂n, ebě, bɨ̌n bé agʉ́a dʉ́ó Tî wɨ́n ngá nze yɨ́. 43Ebě, bɨ̌n bé lɨ́ egʉ́a ó, yé bé mʉr mbɛ̌r á si gʉ́a jɔ̌ʼ ndíblʉ̌, wé á be ó, wé ópyâl yɨ́ nó, lɛ́ɛ́, nye á di ó ɨ́ doho, abîr ó, wé túbaa nye mbɛ̌r. 44Sɨ́ǎ yaá ó bɨ́n jálá le edi ɨ́ cǎr yɨ́. Mwân mé Mʉr ámû jaá pyâl bɨ́n metwɨrâ lɨ́ ewala bɨ́n dí abóno nyé lɨ́.»

Bɨ́bla le mbɨambɨa syɛ̂l mesâ

45«Nzé dí twóó túʼǎ, waá dí mʉr ebúʼlɔɔ, waá sɔ́ŋ wé á tyêl ó, yé díʼee lʉ́ bítúʼǎ byé, le ekab byé mede ɨ́ mepʉ́la me dí ejala má nyá? 46Sɔ́ŋ wé ótô ɨ́ tyen, nzě búla nó, metyɛʼ me mpóm, mé e mbi syɛ̂l mesâ, waá njwɨ́ɨ ngá kœb lɨ́ eséǎ syɛ́ɛ́ yaá nyá! 47Mě lɛ́ɛ́ bɨ́n lɨ́ otyeetye ó, nye ódwe nyé nkul jwɨ́ɨ ɨ́ bisá bí mbɛ̌r bíbyɛ̂h. 48Yé ká be ó, nye ó bɨ́bla syɛ̂l mesâ nɛ́ɛ: nye ójwɨʼ ɨ́ lémé wé tʉ́ŋlʉ̌ ó: “Sɔ́ŋ wǎm, nye ó mpʉ̌ sá lɛ́ɛ́, nye álɨ̌ búla.” 49Nye óbɛ̌m táare ébî bʉ̂r ó njoo yé, nzě de méde le menyoʼ, bé e minyʉnyóʼ. 50Sɔ́ŋ syɛ̂l mesâ waá ópyâl nyé ó, dʉ́ó syɛ̂l mesá wé waá dí abûʼla ó, nyě e nkul epyâl yɨ́, le ewala nyé dí agʉ́a lɨ́. 51Nye ódwe syɛ̂l mesâ waá bintɨ́ʼá jwɨʼ gwár e gwár e mpʉ nyé dí edwe báányâ-mikóo byǎ yɨ́: kpáa nyé mimyál mímbá. Gúmo yaá ó bé ngá jóno le epûʼlo médye yɨ́.»

Currently Selected:

Matthieu 24: ozm

Highlight

Copy