Matthieu 25

Kɨkɛna bíbíŋ méséhe kám

1«Mpóʼo mé Dâ Nzyɛ̌m nwɨɨla ntémé ó e bibíŋ méséhe kám byé á nʉa meláma lɨ́ etó sohɔɔ mʉ̂r á be ó sí to ɨ tyen, lɨ́ etó nʉa mʉ́má nyé ngá bêm nyá. 2Bîʼ bítɛ̂n, byé á be ó bigʉʼlʉgʉ́. Byúú bítɛ̂n, ocwóó. 3Byaá byé á be bigʉʼlʉgʉ́ bí, byé á nʉa mɔ́ɔ́ méláma ó, anʉŋɔɔ múló mé tɨ̂. 4Byaá byé á be ocwóó bí, bíɛ byé á nʉa meláma mɔ́ɔ́ ó, ndu e múlo ɨ́ bintaʼ. 5Nó mpʉ mbêm mʉmá á bea, alɨ̌ búla nko nye á to nʉa mʉma yɨ́, bíbyɛ̂h nzě ntie mîh, ntɔ̂ʼ jáŋɔɔ bíjô.

6«Yé mû témé pum nɛ́ɛ: byé kǎ jóʼǒ njɨ́blɨ́ ó: “Mbêm mʉma, nyɨ́ pyâl ɔɔ! Pyáláá gá mbɛ̌r ɔ́ɔɔ́! Tó soho gá nye!” 7Nó ó bíbíŋ méséhé bínɨ̌ bíbyɛ̂h, byé á nze jɨma, nzě sáŋɔɔ ébɨ̂n mísaŋ kʉ́, meláma mɔ́ɔ́ nkʉ̂ pan. 8Byaá byé á be bigʉʼlʉgʉ́ bí, byé ntɔ̂ʼ táarě njɔʼ, lɨ́ egwâm byaá byúú múlo. Bé e bé ó: “Bɨ́ɔɔ́, bɛ́ʼɛ́ɛ́ gá bɨ̌h múló mɨ́n, ebě, meláma mɨ́h, mé múo nzě díme!” 9Ocwóó ó bʉ́bá bɨ́ɛ, bê nzě lɛ́ɛ e bé ó: “Ajóʼo! Múló mâ, mé ákóʼó jala e bím méláma gá mɨ́ná dí yɨ́. Nó, tóʼ gá nko óbɛ́ma o múlo dí yɨ́, bɨ̌n nkʉ̂ bwâm maá mɨ́n kwɔ́ nyɔ́ɔ́!” 10Jɔʼ bíhaá, byé á be, byé dína lɨ́ etó bwâm múlo yɨ́, mʉr á bêm mʉmá nyá, nye ntɔ̂ʼ pyâl, kœb byaá byé á be ɨ́ cǎr bí. Bibíŋ méséhe byaá, bé e mʉr waá, bé ntɔ̂ʼ nî ɨ́ nzɔɔ ebâ, nyɨɛ ntɔ̂ʼ dible ébê ɨ́ kpɨ̂m. 11Agúm bea nɛ́ɛ: byaá byúú bínɨ̌, byé ntɔ̂ʼ kǎ búla. Byê nzě lɛ́ɛ ó: “Dâ ɛ̌, Dâ ɛ̌, dibɨɨ bɨ́h ebê ʉ!” 12Nó nyé á yala e byé ó: “Mě lɛ́ɛ́ bɨ́n lɨ́ otyeetye ó, mé agʉ́a bɨ́n.”»

13Yésʉs nzě lɛ́ɛ e bé ó: «Nó ó, diʼee gá ɨ́ mpʉ̂n, ebě, bɨ̌n bé agʉ́ǎ móhó, nkʉ̂ ewala mé óbáʼǎ nze lɨ́.»

Kɨkɛna mébɨ́ʼ bímɔnɨ́ bí gʉ̂l

(Luc 19.12)

14«Mpóʼo mé Dâ Nzyɛ̌m nwɨɨla ntémé ó e mʉr á tô ɨ́ tyen nyá. Nye dína apǎ tô, nye á si jébe osyɛ̂l o mésá bé, nzě kab bé mebi mé. 15Nye ntɔ̂ʼ dwe mʉ̂r esôʼ mebɨ́ʼ bímɔnɨ́ bí gʉ̂l metɛ̂n, dwe waá mbá, mebɨ́ʼ bímɔnɨ́ bí gʉ̂l mebá. Waá lɛ̂l nyɨɛ á dweŋɔɔ ó, ebɨ̂ʼ egwár. Nye á dwe bé bǎ ó, lɨ́ edû mpʉ bʉ̂r baá, bé á be e nkul eséa e myé yɨ́. Píe tɨ̂, nye nzě tô ɨ́ tyen. 16Píe tɨ̂, waá á nʉa mebɨ́ʼ bímɔnɨ́ bí gʉ̂l metɛ̂n nyá, nzě tô ɨ́ jɔʼ gwár yaá, tó bul byê. Nye nzě báʼǎ bi mʉ́ʉ́ mébɨ̂ʼ metɛ̂n. 17Waá ntémé á nʉa mebɨ́ʼ bímɔnɨ́ mebá nyá, nzě bi mʉ́ʉ́ mébá. 18Nó ó, waá á nʉa ebɨ́ʼ é bimɔnɨ́ egwár nyá nyɨɛ, á to pû ó bɨ́, nzě sol ébɨ́ʼ é gʉ̂l mé njwɨ́ɨ wé tɨ̂ʼ ɨ́ bɨ́ yaá.

19«Sɔ́ŋ wɔ́ɔ́ á be ɨ́ buú bea gʉ̂ʼ ɨ́ tyen yaá. Jɔʼ nyé á ka búla yɨ́, nye nzě jébe bê, nzě lɛ́ɛ e bé ó, bé ntáa nzě lɛ́ɛ nyé mpʉ bé á séa e mɔnɨ́ yé yɨ́. 20Waá á pa dweŋɔɔ mebɨ́ʼ bímɔnɨ́ metɛ̂n nyá, nze e mɔnɨ́ yaá ti e maá mʉ́ʉ́ métɛ̂n. Nye e né ó: “Dâ ɛ̌, go á dwe me ó mebɨ́ʼ bímɔnɨ́ bí gʉ̂l metɛ̂n. Nó ó, mʉ́ʉ́ métɛ̂n mé á ka baʼa bi má, mé bê.” 21Nó ó njwɨ́ɨ wé á nze lɛ́ɛ e né ó: “Yé ɨ́ mbɨa. Go ó mpǎŋ syɛ̂l mesâ dí mʉr ebúʼlɔɔ nyá, ebě, go á si gwa baʼle sá dí tîtííǎ yɨ́. Me ósâ ó, go bâʼlaa byaá bi dí ɨ́ buo buo bí. Nó ó, ntaá nzě nʉa nkɔ̂b bisʉhʉʉ jwɨʼ gwár e gwár e mpʉ mé dí ɨ́ bisʉhʉʉ yɨ́.”

22«Waá á pa dweŋɔɔ mebɨ́ʼ bímɔnɨ́ mebá nyá, nzě sîhle ntémé. Nye e né ó: “Dâ ɛ̌, go á dwe me ó mebɨ́ʼ bímɔnɨ́ mebá. Nó ó, paá bee: mɨ́ báʼǎ bi mʉ́ʉ́ mébá e tɨ̂!” 23Nó ó njwɨ́ɨ wé á nze lɛ́ɛ e né ó: “Ɨ́ mbɨa! Go ó syɛ̂l mesâ dí mʉr ebúʼlɔɔ nyá, ebě, go á si gwa baʼle sá dí tîtííǎ yɨ́. Me ósâ ó, go bâʼlaa byaá bi dí ɨ́ buo buo bí. Nó ó, ntaá nzě nʉa nkɔ̂b bisʉhʉʉ jwɨʼ gwár e gwár e mpʉ mé dí ɨ́ bisʉhʉʉ yɨ́.”

24«Nó ó, waá á dweŋɔɔ ebɨ́ʼ é bímɔnɨ́ bí gʉ̂l egwár nyá, nzě sîhle ntémé. Nye nzě lɛ́ɛ e né ó: “Dâ ɛ̌, me á be lɨ́ egʉ́a ó, go ɨ́ nyan mʉ̂r. Guá pipim méde ó, gúmó gó á be abe yɨ́. Go ntémé, gǒ kpɛ̌m méde ó, ɨ́ gúmó gó á be abe mempeʼ yɨ́. 25Nó ó mpʉ mé á jóʼo bʉ́á yɨ́, me ntɔ̂ʼ tó sol ébɨ́ʼ é bímɔnɨ́ lô ɨ́ bibwǎh. Nó ó, lé bê. Jaʼ yaá dí yô yɨ́.” 26Nó ó njwɨ́ɨ á nze lɛ́ɛ e né ó: “Gua bɨ́blǎ pwɨ́pwɨ̂h syɛ̂l mesâ yɨ̂! Gó bé ɨ́ gʉ́a ó, mě pǐm ó, ɨ́ gúmó mé á be amyam mempeʼ yɨ́, le ekpɛm méde ɨ́ gúmó mé á be abe mempeʼ yɨ́ nó, 27á go á bé ató tyen mé mɔnɨ́ yâm ɨ́ bâŋ ɨ́ yé? Jɔʼ mé á gwa búla yɨ́, me gwá nzě nʉǎ sâ yaá, yé á be lɨ́ egúmo e me yɨ́, le eběr.” 28Nye nzě lɛ́ɛ e bʉ́ʉ́ ósyɛ̂l bé ó: “Pɛʼɛɛ gá nye ebɨ́ʼ é bímɔnɨ́ énɨ̌. Bɨ̌n a dwé lé mʉr dí e mebɨ́ʼ bímɔnɨ́ kám nyá. 29Ebě, mʉr nyɨnyɛ̂h dí e sɔ̂ʼ nyá, ódweŋɔɔ yʉ́ʉ́, nye nkʉ̂ di le okúm le ogbaa le ombeʼ o nyʉ̂l. Waá nyɨnyɛ̂h dí tʉ̂toʼó nyá, bé ópɛʼ nyé damá jóʼo mâ bím nyé dí e tɨ̂ʼ nyá. 30Nó ó, syɛ̂l mesâ dí ɨ́ dwě ntuʼ nyá, guhaa gá nye lɨ́ edúrʉ́ʉ́ e dí kʉ̌l lɨ́, nko bʉ̂r, bé ójóno le epûʼlo médye yɨ́.”»

Tíʼá mílɔ̌b épíhe

31«Jɔʼ Mwân mé Mʉr ónze ɨ́ mentyɛnwa mé, bé e beéngeles bɨ́bɛ̂h yɨ́, nye ónʉǎ diá ɨ́ mecwɨ́ɨ́ mé jwɨ́ɨ́ yé, maá me dí ɨ́ ntyɛ̌n ntî ntyɛ̌n má. 32Nó ó, bikúl bíbyɛ̂h, byé óswâl ɨ́ míh mé. Nye óbɛ̂ʼ bʉ̂r ɨ́ mpʉ pála bitab dí egbâ mbɔ́ʼ páʼ binteme le ontamakǎ yɨ́. 33Nye ótyêl bínteme ɨ́ páʼ mbó éjʉ́m wé; ontamakǎ bɨ́ɛ, ɨ́ páʼ mbó émyɛ̌l. 34Jɔʼ yaá, njwɨ́ɨ ólɛ́ɛ e baá o dí nye ɨ́ mbó éjʉ́m bá ó: “Ntáʼ gâ, bʉr o Sɔ́ŋ wǎm á sʉ metyɛʼ me mpóm bá. Ntaá nzě nî gá ɨ́ sí nyé á boo komlo bɨ̌n, táare ɨ́ jɔʼ kʉ́ e sí, byé á be apǎ bě kuhá yɨ́. 35Ebě, me á si jóʼo nza; bɨ̌n nzě dwe mé mede. Me á si jóʼo dwéh médíbé, bɨ̌n nzě dwe mé medíbé. Me á be ó njwóo; bɨ̌n nzě nʉa mé ɨ́ mimbɛ̌r mín. 36Me á be ó suswáh; bɨ̌n nzě bôr mé kán. Me á be ó lɨ́ ebíle; bɨ̌n nzě nze mé ɨ́ menɔɔlʉ. Me á be ó ɨ́ mbʉʼ; bɨ̌n nzě naa mê.” 37Nó ó ótîtyěl o bʉ̂r, bé óyala e né, lɛ́ɔɔ ó: “Dâ ɛ̌, ɨ́ yáǎ jɔʼ bɨ́h á bee go lɨ́ ejóʼo nzâ, bɨ̌h dwe gó mede, nkʉ̂ lɨ́ ejóʼǒ dwéh médíbé, bɨ̌h dwe gó medíbé yɨ́? 38Ɨ́ yáǎ jɔʼ bɨ́h á bee go njwóo, bɨ̌h ntɔ̂ʼ nʉa gó ɨ́ mimbɛ̌r míh, nkʉ̂ ntɔ̂ʼ ó suswáh, bɨ̌h bôr gó kán yɨ́? 39Yáǎ jɔʼ bɨ́h á bee go lɨ́ ebíle, nkʉ̂ ɨ́ mbɛ̌r mímbʉʼ, bɨ̌h nzě séa e go yɨ́?” 40Nó ó, njwɨ́ɨ ókǎ yala e bé ó: “Mě lɛ́ɛ́ bɨ́n lɨ́ otyeetye ó, gúmó bɨ́n á sâ mʉr ngwár ɨ́ sɔ́má bɨ́ɔɔ́ bâm bâ nó yɨ́, damá jóʼǒ waá dí agbáŋɔɔ ɨ́ nkɔb nyá, gúmo yaá, bɨ̌n bé á sâ ó me embɨa laá.”

41«Píe tɨ̂, nye ólɛ́ɛ e baá o dí nye ɨ́ páʼ mbó émyɛ̌l ó: “Pʉʼaa gá gúmó mé dí yɨ́, bʉr ó Nzyɛ̌m á boo syɛm bá. Tóʼ gá ɨ́ siʼe dí edúǒ kɔ́m ti e kɔ́m yɨ́, siʼě Nzyɛ̌m á boo tira lɨ́ esú mé sɔ́ŋ meleme, bé e beéngeles bé yɨ́. 42Ebě, me á si jóʼo nza; bɨ̌n bé á bé adwe mé sá éde. Me á si jóʼo dwéh médíbé; bɨ̌n bé á bé adwe mé medíbé mé éde. 43Me á be ó njwóo; bɨ̌n bé á bé anʉa mé ɨ́ mimbɛ̌r mín. Me á be ó suswáh; bɨ̌n bé á bé abôr mé kán. Me á be ó mbêl. Me á be ntémé ó ɨ́ mbʉʼ; bɨ̌n bé á bé anze mé ɨ́ menɔɔlʉ.” 44Jɔʼ yaá ó bé ngá yala e né ó: “Dâ ɛ̌, ɨ́ yáǎ jɔʼ bɨ́h á bee go lɨ́ ejóʼo nzâ nkʉ̂ dwéh médíbé, nkʉ̂ bee gó, gua njwóo, nkʉ̂ suswáh, nkʉ̂ lɨ́ ebíle, nkʉ̂ ɨ́ mbʉʼ, bɨ̌h l'asúʼo gó yɨ́?” 45Nó ó, njwɨ́ɨ ókǎ yala e bé ó: “Mě lɛ́ɛ́ bɨ́n lɨ́ otyeetye ó, gúmó bɨ́n á be asâ mʉr ngwár ɨ́ sɔ́má bʉ̂r bâʼ embɨa yɨ́, damá jóʼo ó, nye á be ó waá dí agbáŋɔɔ ɨ́ nkɔb nyá, gúmo yaá ntémé ó bɨ́n á be asâ me embɨa yɨ́.” 46Bʉr baá, bé ótô ɨ́ ntɨ́ʼá dí kɔ́m ti e kɔ́m yɨ́. Otîtyěl o bʉ̂r bɨ́ɛ, bé ótô ó, tó di ɨ́ twǐʼ njʉ̌m dǐ.»

Currently Selected:

Matthieu 25: ozm

Highlight

Copy