Marc 10

Ejwɨ́ɨ́ lé ébâ

(Matthieu 19.1-12)

1Nó ó Yésʉs á duhǒ gúmo yaá, nzě tô sí Yʉ́da, ntɔ̂ʼ ntaa, tô ɨ́ pɨ̌n díbé Yɔrdên kɔ́m nkɛ́ɛ́. Entumo e bʉ̂r ntɔ̂ʼ báʼǎ mâʼlǎ gúmó nyé á be yɨ́. Nye nzě nyɛl édwe bé milɛ́ʼlá ɨ́ mpʉ nyé á pa boo sɨ̂sa yɨ́.

2Nó ó bʉ́ʉ́ óFarizyɛ̂n, bé á nze ó, lɨ́ enzě bóblɔɔ nyê. Bé ntɔ̂ʼ dî e né ó: «Nzê metié gá mɨ́ná, mé kam ó, mʉr bírɨɨ mʉmá wé ɛ́?» 3Nó nyé á yala e bé ó: «Moyɨ̂z á lɛ́ɛ bɨ̌n nyá ɛ́?» 4Bé e né ó: «Moyɨ̂z á si tíʼe ó, mʉr cɛ́maa mekaná mé éjwɨ́ɨ́ lé ébâ, dwe myɛ́l. Jɔʼ yaá ó nyé dí bɛ̌m bwóolo nyé yɨ́.»

5Nó ó Yésʉs á lɛ́ɛ e bé ó: «Moyɨ̂z á tyeele bímpám gá bíná etié énɨ̌ ó, lɨ́ esú lɨ́n, ebě, bɨ̌n bé ɨ́ buú lele míléme. 6Sâ gwár, ɨ́ metááré, “ɨ́ jɔ̌ʼ Nzyɛ̌m á komlo sá yɨ́yɛ̂h yɨ́, nye á komlo bé ó: nyâ, mʉrʉ̂m; nyʉ́ʉ́, mʉmá. 7Sá tɨ̂ʼ ó mʉ́rʉ̂m ólíʼe sɔ́ŋ e nyɔ̌ŋ, tó nara e mʉmá wé yɨ́. 8Bɨ́bɛ̂h obá, bé óbe ó, ebɔ̂b e nzyeŋle, pʉ́m le ebo. Bé akǎ be óbá, njɨ púnó gwár. 9Mʉ̌r sá adɛ́ɛ̌ sá Nzyɛ̌m mû sí nɛr yɨ́.»

10Jɔʼ bé le ompʉ́n bé, bé á be, bé mû tʉ́ŋlʉ̌ mbɛ̌r yɨ́, bê nzě báʼǎ dî nyé tíá ɨ́ lɔ̌b waá. 11Nó nyé á lɛ́ɛ e bé ó: «Mʉ̂r bwóóló mʉ́má wé, bâ waá swîh nó, nyɨ́ sâ médyɛ̂n ɨ́ nkǒ pâʼ mʉ́má esôʼ wé. 12Mʉ́má óbɔ́ʼa e njʉ̂m wé, tô lɨ́ ebá éswîh nó, nyɨ́ sâ médyɛ̂n ntémé ó nɨ̌.»

Yésʉs lɨ́ esʉ bwá ó ntwǒm metyɛʼ me mpóm

(Matthieu 19.13-15; Luc 18.15-17)

13Bʉr ntɔ̂ʼ nze nyé e bwán bɔ́ɔ́, ó nye kɛ́lɨɨ bé mebô. Ompʉ́n bé bɨ́ɛ kʉ́ nzě beně syɛ́ɛla yaá, ntɔ̂ʼ dweŋɔɔ bé mebě. 14Mpʉ̌ Yésʉs á bee nó yɨ́, nye ntɔ̂ʼ jóʼǒ syɛ́ɛla yaá ebébe. Nye e bé ó: «Bírɨ́ɨ́ gá bwá ó ntwǒm, bé ntâʼ nko mé dí yɨ́. Ayɨ́ so gá bê, ebě, Mpóʼo mé Nzyɛ̌m, nye tyélá ó, lɨ́ esú é bʉ̂r o dí enwɨɨla e bé bá. 15Mě lɛ́ɛ́ bɨ́n lɨ́ otyeetye ó, mʉr nyɨnyɛ̂h dí anî ɨ́ Mpóʼo mé Nzyɛ̌m mpʉ mâ ntwǒm nyá, nye ákóʼó nî tɨ̂.» 16Nye nzě beŋle bwá baá bɨ́bɛ̂h, kɛl bé mebô, le esʉ bé metyɛʼ me mpóm.

Kúmá sohó

(Matthieu 19.16-30; Luc 18.18-30)

17Mpʉ nyé á be, nye mû lɨ́ eja nzɨ́ yɨ́, nyʉ́ʉ́ mʉ̂r nzě swǐm kám, bɨʼ mébóó sí ɨ́ mpǒm nyé, ntɔ̂ʼ dî e né ó: «Mbɨambɨa lɛ̂ʼla, me sâʼ wáǎ mbǐ sɔ̂ʼ dí ó, me nʉ́aa twǐʼ njʉ̌m dǐ, jala e nkɔb líʼe nyǎm?» 18Yésʉs nzě yala e né ó: «Go lɨ́ ejébe mé mbɨambɨa mʉr ɨ́ yé? Yé abe e mʉr dí ɨ́ mbɨa, njɨ Nzyɛ̌m nye omér. 19Gʉ́ gʉ́a métié mé Nzyɛ̌m. Mé lɛ́ɛ́ ó:

“Ajʉ̂ mʉ̂r.

Asâ médyɛ̂n.

Adíbe.

Ayala ɨ́ lɔ̌b mɨ́ɔɔ́ gǒ mʉr lɨ́ onzyɛ́h ónzyɛ́h.

Anʉa mʉ̂r sɔ̂ʼ e mikóo.

Dwéʼ sʉ́ŋ e nyʉ̌ŋ dúu.”»

20Mʉ̌r nɨ̌ nzě lɛ́ɛ e né ó: «Lɛ̂ʼla, mɨ́ baʼle métié ménɨ̌ mɨ́mɛ̂h, táare lɨ́ ontwǒm wâm, kumo mûh.»

21Yésʉs nzě dwɛ̂ʼ nyê, kpɛl ntémé nye. Nye e né ó: «Yé lɨ́ esáa gó sâ gwár. Tóʼ. Tó bɛ́mǎ bím bísá gó dí e byé bí. Go e dwé míndyêbndyéb mɔnɨ́ yaá. Jɔʼ yaá ó gó ngá bi ókúm le ogbaa ɨ́ buo buo ɨ́ jʉ́o kʉ́, kwá mé Nzyɛ̌m yɨ́. Píe tɨ̂, go e nzé dû mê!» 22Njóʼá mʉ̂r waá á jóʼo yalá yaá yɨ́, nye kʉ́ nzě tyɛʼ nyʉ̂l, ntɔ̂ʼ búla ɨ́ twíaaa, ebě, nye á bě e okúm le ogbaa le ombeʼ o nyʉ̂l.

23Yésʉs nzě dwɛ̂ʼ ómpʉ́n bé, bé á bɔma nye ɨ́ nká, tyɛ̂b bǎʼ e né bá. Nye ó: «Yé ɨ́ buú kɔbla lɨ́ enî ɨ́ Mpóʼo mé Nzyɛ̌m ɨ́ jɔʼ gó dí le okúm le ogbaa ɨ́ buo buo yɨ́!» 24Ompʉ́n bé, kʉ́ nzě kâm lwǐb yé! Yésʉs ntɔ̂ʼ báʼǎ lɛ́ɛ e bé ó: «Bwán bâm, yé ɨ́ kɔbla lɨ́ enî ɨ́ Mpóʼo mé Nzyɛ̌m! 25Mpʉ yé dí ɨ́ kɔbla ó, chameau láŋaa lɨ́ egʉ́á é ntʉ́á yɨ́, jwɨʼ gwár e gwár yaá ntémé ó dí ɨ́ buú kɔbla ó, kúmá mʉr níʼee ɨ́ Mpóʼo mé Nzyɛ̌m.» 26Bé ntɔ̂ʼ kâm lwǐb yé, minum mimběʼ, laǎ mpʉ bé á nyɛɛ kɨkâm yɨ́. Bé ntɔ̂ʼ díila páʼ nyɔ́ɔ́ ó: «Yé bé nó wá, nzé nyɨɛ ngá koʼo lɨ́ enî ɨ́ twǐʼ njʉ̌m dǐ?» 27Yésʉs dwɛ̂ʼ bê, ntɔ̂ʼ lɛ́ɛ e bé ó: «Bʉr, bé ákóʼó nî tɨ̂ʼ ɨ́ lɔ̌b ménkul mɔ́ɔ́, bé bʉr o tɨ̂. Sâ gwár, Nzyɛ̌m ó dí e nkul esâ bísá bíbyɛ̂h.»

28Pétrus nzě nʉǎ lwǐb. Nye e né ó: «Paá bee: bɨ̌h bɨ́ líʼe bísá bíh bíbyɛ̂h, njɨ lɨ́ edû gô.» 29-30Yésʉs, nye e né ó: «Mě lɛ́ɛ́ bɨ́n lɨ́ otyeetye ó, yé abe e mʉr dí, sí líʼě mbɛ̌r wé, bɨ́ɔɔ́ bé, okɛ́l bé, nyɔ̌ŋ wé, sɔ́ŋ wé, bwán bé, le bipemé byé ɨ́ lɔ̌b nyé dí edû mé le ebúʼlǎ Mbɨambɨa Lɔ́ɔ nyá, mʉr tɨ̂ʼ di, abáʼǎ bi byé nzɔʼ nter báánâ. Nye óbi mímbɛ̌r e bipemé. Nye ókœb bɨ́ɔɔ́ le okɛ́l, le onyɔ̌ŋ, le bwân. Nye ósia ntémé e mitúú ɨ́ lɔ̌b Mbɨambɨa Lɔ́ɔ waá. Nó ɨ́ jɔʼ éswéhlɨ́ é sí yɨ̂ʼ ngá pyâl yɨ́, mʉr waá óbǐ twǐʼ njʉ̌m dǐ. 31Sâ gwár, bʉr ɨ́ buo buo o dí esôʼ bá, bé ódi épíhe. Baá dí epíhe bá, bé ódi ésôʼ.»

Yésʉs lɨ́ eboó lɛ́ɛ̌ pô eswie lé ndu e pahá sóo wé

(Matthieu 20.17-19; Luc 18.31-34)

32Nó bé á be ó, bé mû lɨ́ ebére ɨ́ nzɨ̌, lɨ́ etô Yerʉ́zalɛm, Yésʉs esôʼ, ompʉ́n bé lɨ́ ebɔma nyê, bɨ́ɛ e miléme tyelá kʉ́ ɨ́ bʉ́á. Bʉ́ʉ́ bʉ̂r o b'á be lɨ́ edû bé bá, lɨ́ ejóʼo ntémé bʉ́á. Yésʉs nzě jébe ómpʉ́n bé kám le obá lɨ́ empah, nzě lɛ́ɛ bé sá múo nzě pyâl nyé yɨ́. 33Nye ó: «Paá bee gâ: mɨná mû ó lɨ́ ebére gá Yerʉ́zalɛm. Mwân mé Mʉr óbɛ́mɔɔ kwá ojwɨ́ɨ o mpáh Nzyɛ̌m le olɛ̂ʼla o métié. Bé ótíʼě lɔ̌b wé ó, nye dwêʼ. Nye óbɛ́mɔɔ kwá bʉr o bíkûl e biloo. 34Bé ópya nyé le esyɛɛ nyé metyéelé ɨ́ mîh. Bé óŋmɛ̂h nyé mingáhá, jʉ̂ nyê. Elú élɛ̂l píe tɨ̂, nye ópah ɨ́ soo.»

Tíá mé Jacques bé e Yʉánɛs

(Matthieu 20.20-28)

35Píe tɨ̂, Jacques bé e Yʉánɛs, bwán mé Zebedê, nzě sîhlě bǎʼ e Yésʉs. Bé e né ó: «Lɛ̂ʼla ɛ̌, bɨ̌h gwɨ́m ó, sá yɨ́yɛ̂h bɨ́h ngá dî gó yɨ́, go dwêʼ bɨ̌h yǎ.» 36Nó ó Yésʉs á dî e bé ó: «Bɨ̌n kpɛl ó, me sâʼ bɨ̌n yé?» 37Bê nzě yala e né ó: «Ɨ́ jɔʼ gó óbe, go mû ɨ́ diá kûm yô yɨ́, kamaa ó, bɨ̌h díʼee bǎʼ e go: nyâ, ɨ́ mbó éjʉ̂m; nyʉ́ʉ́, ɨ́ mbó émyɛ̌l.» 38Nó ó Yésʉs á lɛ́ɛ e bé ó: «Bɨ̌n bé agʉ́ǎ sá bɨ́n dí edî yɨ́. Nzê bɨ̌n bé e nkul enkɛ́ɛ mítúú mé mû lɨ́ enzě nkɛ́ɛ mî, nkʉ̂ duŋɔɔ̌ ndubó mítúú mé ngá duŋɔɔ tɨ̂ʼ wɨ́ ɛ́?» 39Bê nzě yala e né ó: «Bɨ̌h bé e nkul esâ.»

Yésʉs, nye e bé ó: «Yé ó nó: bɨ̌n bé ónkɛ́ɛ mítúú mé ngá nkɛ́ɛ mí, le eduŋɔɔ̌ ndubó mé ngá duŋɔɔ wɨ́. 40Sâ gwár, ɨ́ páʼ édi ɨ́ mbó éjʉ́m wâm, nkʉ̂ ɨ́ mbó émyɛ̌l wâm, ntʉ mɛ̂m tíʼé wɨ́nɨ̌ lɔ̌b. Bidiá byaá, byé bónó ó baá Nzyɛ̌m á boo komlo byé lɨ́ esú lɔ́ɔ́ bá.»

41Nó ɨ́ jɔʼ bʉ́ʉ́ ómpʉ́n kám, bé á jóʼo lɔ̌b waá yɨ́, bê nzě jóʼǒ Jacques bé e Yʉánɛs ebébe, nzě dweŋɔɔ bé mebě. 42Yésʉs nzě jébe bɨ́bɛ̂h. Nye ó: «Bɨ̌n bɨ́ gʉ́a ó, bʉr o dí enyɨ̂n ó, bé ó minjwɨ́ɨbʉr bá, bé jwɨ́ɨ́ ó e cére. Bʉr onɨ́nɨ́ɨ́ baá, bé kpɛl ó, bé lɛ̂ʼlaa bʉr mpél yɔ́ɔ́. 43Sâ gwár, mbǐ syɛ́ɛla waá, wé ajala le esyɛ́ɛlɨ páʼ nyɨ́n. Mʉ̂r ngwár ɨ́ sɔ́má yɨ́n sí kpɛl édi njwɨ́ɨ nó, nye díʼee syɛ̂l mesâ wɨ́n. 44Ntémé, mʉ̂r ngwár ɨ́ sɔ́má yɨ́n ókpɛl édi ésôʼ nó, nye díʼee túʼǎ yɨ́n, bɨ̌n óbɛ̂h. 45Ebě, Mwân mé Mʉr mʉr tɨ̂ʼ á bé anze ó, bʉr séaa e né. Nye á nze ó, nyɨɛ séaa e bʉr, le edwě twiʼ yé, lɨ́ enzě táǎ góo, le edwih bʉ̂r ɨ́ buo buo ɨ́ mpila mísyóm, pɛʼ bé ɨ́ fá.»

Yésʉs lɨ́ etǐʼ Bar-Timê

(Matthieu 20.29-34; Luc 18.35-43)

46Nó ó bé á to pyâl ɨ́ Yerikô. Mpʉ bé á di tɨ̂ʼ ɨ́ di di di yɨ́, píe tɨ̂ʼ nɛ́ɛ: Yésʉs, bé le ompʉ́n bé le entumo e bʉ̂r, bê nzě duho ɨ́ nkana yaá. Tɨ̂ʼ lɨ́ eníŋlɨ́ é nkana, yé á be ó e nyʉ́ʉ́ ántím, Bar-Timê, mwân mé Timê, nyɨɛ ndîndǐl ɨ́ nkpâh nkpǎʼ, lɨ́ egwâm bísâ e milaa-nkpǎʼ. 47Jɔʼ nyé á jóʼo, ó Yésʉs, mʉr Nazarɛ̂t ó nɨ̌ yɨ́, nye nzě bʉ̂ bítím ó: «Yésʉs, Mwâ mé David ɔ́, jɨ́ʼɨ́ɨ́ mé ekpaa nkóó ɔ̌!» 48Bʉr ɨ́ buo buo, nzě nkáŋla e nye. Bé ó, nye díblaa num. Nyɨɛ kʉ́ báʼǎ bʉ́lwǎ bʉ́lwáa. Nye e né ó: «Mwâ mé David ɔ́, jɨ́ʼɨ́ɨ́ mé ekpaa nkóó ɔ̌!»

49Yésʉs nzě tyɛ̂b. Nye e né ó: «Jébáá gá nye.» Bê nzě jébe ántím. Bé e né ó: «Talaǎ léme. Gbɔlwáa. Nye lɨ́ ejébe gô!»

50Nye ntɔ̂ʼ myah kʉ̂r wé, ntɔ̂ʼ gbɔlwa sí ɨ́ bʉ̂b, tô nkǒ Yésʉs á be yɨ́. 51Yésʉs nzě dî e né ó: «Gǒ gwɨ́m ó, me sâʼ go yé?» Ántím nzě yala e né ó: «Lɛ̂ʼla, pʉgʉ́ sâ ó, me báʼa bee ʉ!» 52Yésʉs ntɔ̂ʼ lɛ́ɛ e né ó: «Tóʼ. Búʼó yô, yɨ́ tiʼ gô!»

Tyé e tyé yaá, nye ntɔ̂ʼ bánǎ bee, nzě nî ɨ́ sɔ́má mé Yésʉs.

Currently Selected:

Marc 10: ozm

Highlight

Copy