Marc 14

Bʉm éswie mé Yésʉs

1Nzɔɔ Páska óYúden le nyaá bíblêr bi dí abe e levure bí, nye á be ó, kǎ lîʼ mélú mébá ó, nye bwálɔɔ. Nó ojwɨ́ɨ o mpáh Nzyɛ̌m le olɛ̂ʼla o métié, bé á be ó lɨ́ esáa ménzɨ̌ mé émɛ̂r Yésʉs ɨ́ nzɨ̌ mikóo, bé nkʉ̂ jʉ̂ nyê. 2Ebě, bé á lɨlɛ́ɛla páʼ nyɔ́ɔ́ ó: «Mɨná bé ayɨ́ pǎ mɛ̂r gá nye ɨ́ jɔʼ nzɔ́ɔ yɨ̂. Minzɨnzɨ mi bʉ̂r, myé ámû jaá sâ bíntʉ̌.»

Mʉmá lɨ́ elœ̌m Yésʉs lɔbína ɨ́ lʉ̂

(Matthieu 26.9-13)

3Ɨ́ mpʉ̌ Yésʉs á bě Bétanî, ɨ́ mbɛ̌r mé Simon mʉr á be nzɨ̂nzǎm nyá, nyʉ́ʉ́ mʉ́má ntɔ̂ʼ nî ɨ́ jɔʼ bé á be lɨ́ ede yɨ́. Nye á bě e ntǎʼ albâr lwɨ́ŋlá le lɔbína, yé á be ɨ́ buo día yɨ́. Lɔbína yaá, yé á be sɛ́á ó e mikaalé mí nard. Nye ntɔ̂ʼ bʉ̂ ntaʼ yaá, nzě sʉ̌ lɔbína ɨ́ lʉ́ mé Yésʉs. 4Bʉ́ʉ́ bʉ̂r o b'á be tɨ̂ʼ bá, bê kʉ́ nzě beně syɛ́ɛla yaá, ntɔ̂ʼ dwe mʉ́má waá mebě. Bé ó: «Ɨ́ wáǎ nyɔm gó bá ndámǎ lɔbína yɨ̂? 5Yê kʉ jala ó, bɛ́ma ó bɛ́máa e tâŋ minzaŋ mí mɔnɨ́ minter milɛ̂l, ntɔ̂ʼ dwe míndyêbndyéb.»

Bʉr baá ntɔ̂ʼ nkáŋla e mʉmá waá ɨ́ buo buo. 6Yésʉs, nye e bé ó: «Bírɨ́ɨ́ gá nye ɨ́ puuu. Bɨ̌n ntɨ́ʼ nyé ɨ́ yé? Nyɨ́ sâ mé sá dí ɨ́ buú mbɨa yɨ́. 7Ebě, bɨ̌n e baántéʼenteʼe o bʉ̂r ó dí jɔʼ yɨ́yɛ̂h. Jɔʼ yɨ́yɛ̂h bɨ́n kpɛ̂l yɨ́, bɨ̌n bé óbɛ̌m sâ bé membɨa. Tó kœb ó, mɨná bé ákóʼó di gá jɔʼ yɨ́yɛ̂h. 8Nyɨ́ sâ sá nyê bé ɨ́ koʼo lɨ́ esâ yɨ́. Nyɨ́ boó lœm nyʉ̂l nyǎm lɔbína lɨ́ esú é dɨlá yâm. 9Mě lɛ́ɛ́ bɨ́n lɨ́ otyeetye ó, súm yɨ́yɛ̂h ɨ́ sí yɨ̂ʼ yɨ́yɛ̂h bé ngá túnǒ Mbɨambɨa Lɔ́ɔ yɨ́, sá mʉ́má nyâʼ sá yɨ́, yé ólɛ́ɔɔ ntémé. Bʉr bé ósímsa nyé tɨ̂.»

Yʉ́das lɨ́ ekpɛl ébɛ́mǎ Yésʉs kwá ojwɨ́ɨ o mpáh Nzyɛ̌m

(Matthieu 26.14-16; Luc 22.36)

10Nó ó Yʉ́das Iskariôt, nyʉ́ʉ́ mpʉ́n ɨ́ sɔ́má ómpʉ́n kám le obá, á to bee ojwɨ́ɨ o mpáh Nzyɛ̌m, ó nyě bɛ́má ó bé Yésʉs. 11Mpʉ bé á jóʼo nó yɨ́, bé ntɔ̂ʼ buú soho. Bé ntɔ̂ʼ kɛʼ ó, bé ódwe nyé mɔnɨ́, jala e myɛ́na mé. Yʉ́das ntɔ̂ʼ sáǎ mpǎŋ jɔʼ ébɛ́ma bé Yésʉs.

Nkomló méde mé Páska

(Matthieu 26.17-25; Luc 22.7-13)

12Ɨ́ móhó ésóʼ é nzɔ́ɔ bé á de biblêr bi dí abe e levure bí nyɨ́, ɨ́ dʉ́ó bé á jʉjʉ̂ bwá bínteme bí Páska lɨ́, ompʉ́n mé Yésʉs nzě dî e né ó: «Gǒ kpɛl ó, bɨ̌h tôʼ, tó jâm gó mede mé Páska gó ngá de má wó?» 13Nó ó Yésʉs á nze lómo ompʉ́n bé obá, nyé osí lɛ́ɛ bé ó: «Tóʼ gá nkana. Bɨ̌n bé óbɔma e mʉrʉ̂m lɨ́ enkɛ́ɛ̌ káʼ médíbé. Dúʼóó gá nye. 14Súm nyé ngá nî yɨ́, bɨ̌n e lɛ́ɛ́ mʉ̂r mbɛ̌r ó: “Lɛ̂ʼla dí ó: Gúmó bɨ́h le ompʉ́n bâm ngá dě Páska yɨ́, yê wó ɛ́?” 15Nye ólɛ̂ʼle bɨ́n ntɔ́ɔ ɨ́ bwaʼ bwaʼ ɨ́ tólóm mbɛ̌r wé. Bɨ̌n bé ókœb ó, nye mû kʉmsá, le otéble le bidiá. Tɨ̂ʼ ó bɨ́n ngá jâm mɨ́ná gá mede mé Páska yɨ́.» 16Ompʉ́n baá nzě tô, ntɔ̂ʼ pyâl ɨ́ nkana, nzě kœ̌b sá yɨ́yɛ̂h mpʉ nyé á lɛ́ɛ bé yɨ́. Bê nzě jâm méde mé Páska.

Yʉ́das lɨ́ ebɛ́mǎ Yésʉs

17Ɨ́ bíí kʉ̌ʼ nɛ́ɛ: Yésʉs, bé le ompʉ́n kám le obá bé ntɔ̂ʼ pyâl. 18Jɔʼ bé á be ɨ́ téble, bé mû lɨ́ ede yɨ́, Yésʉs ntɔ̂ʼ lɛ́ɛ e bé ó: «Mě lɛ́ɛ́ bɨ́n lɨ́ otyeetye ó, mʉr ngwár ɨ́ sɔ́má yɨ́n, bɨ́h e nɔ́ɔ́ dí ede nyá, óbɛ́ma mê.» 19Nyʉ̂l ntɔ̂ʼ tyɛʼ bê. Mʉr ngúngwár ɨ́ sɔ́má yɔ́ɔ́ nzě dî e né ó: «Yé abe mê, yé abe nó?»

20Nye ntɔ̂ʼ yala e bé ó: «Yé ó mʉr ngwár ɨ́ sɔ́má yɨ́n, bʉr kám le obá, mʉr bɨ́h e né dí etwar épulo ɨ́ sʉ́á gwár nyá. 21Yé ó nó. Mwân mé Mʉr ódwě mpʉ yé á boo be cɛmá ɨ́ lɔ̌b wé yɨ́. Sâ gwár, nkoó, nye ó e mʉr óbɛ́ma Mwân mé Mʉr nyá! Yé á gwa mbɨa mʉr waá ó, mpa nye á bé abyɛ̂l!»

Mede Tî Yésʉs lɨ́ edwe ómpʉ́n bé má

(Matthieu 26.26-35; Luc 22.14-23; 1 Kórɨnt 11.23-26)

22Ɨ́ mpʉ bé á be, bé dína lɨ́ ede yɨ́, Yésʉs ntɔ̂ʼ nʉǎ blêr, dwě Nzyɛ̌m nzyǒo, pɛ̂ʼ yé bipêh, dwe ómpʉ́n byǎ. Nye ó: «Nʉaa gâ. Nyʉ̂l nyǎm ó nyɨ̂.» 23Píe tɨ̂, nye ntɔ̂ʼ nʉǎ bélé ményoʼ, dwě Nzyɛ̌m nzyǒo, ntɔ̂ʼ dwe bé yǎ. Bɨ́bɛ̂h ntɔ̂ʼ de ményoʼ maá. 24Nye e bé ó: «Metié mâm ó mâ: metié lɨ́ eswɨɨ lɨ́ esú ó, Nzyɛ̌m tyélɨɨ saá páʼ nyɔ́ɔ́ e bʉr ɨ́ buo buo má. 25Mě lɛ́ɛ́ bɨ́n lɨ́ otyeetye ó, me ákǎ báʼǎ de ményoʼ mâ, tó pyâl ɨ́ dʉ́ó mé ngá de maá medwán ɨ́ kwár mé Nzyɛ̌m yɨ́.» 26Jɔʼ bé á sil edyɛɛ meswɨ̂ʼlʉ lɨ́ esú é Nzyɛ̌m yɨ́, bé ntɔ̂ʼ mɔǎ sûm yaá, tóŋɔɔ lɨ́ Ecwɨ́ʼ lé ólivier.

27Yésʉs, nye e bé ó: «Ebɔ̌ʼ, lé óbɨma bɨ́n óbɛ̂h ɨ́ miléme, ebě, yê cɛmá ó: “Me ójʉ̂ pála binteme; binteme byaá, byé omyamǎ dwǐʼ e dwǐʼ.” 28Sâ gwár, ɨ́ jɔʼ mé ngá pah yɨ́, me ósámle, tó bóno bɨ́n ɨ́ sí Galilê.» 29Pétrus, nye e né ó: «Bʉr bɨ́bɛ̂h damá bɨm ébɔ̌ʼ ɨ́ miléme, ntɔ̂ʼ sâ syóm, mɛm, me ákóʼó bɨm ébɔ̌ʼ laá.» 30Nó ó Yésʉs á lɛ́ɛ e né ó: «Me lɨ́ elɛ́ɛ gó lɨ́ otyeetye ó, gua, ɨ́ pum wɨ̂ʼ mûh, njʉ́m kúo apǎ kwâʼ nzɔ̂ʼ bá, go ókɛ́la mé nzɔʼ lɛ̂l.» 31Pétrus nyɨɛ báʼǎ tô le elɛ́ɛ dóló ó: «Yé damá pyâl mé ó, mɨná e go dwêʼ sɔ́má, me ákɛ́la gô.» Bʉ́ʉ́ bɨ́bɛ̂h ntémé, bé á lwib ó nó.

Yésʉs lɨ́ ejɨʼla ɨ́ Gétsémane

(Matthieu 26.36-46; Luc 22.40-46)

32Píe tɨ̂, bê nzě pyâl gúmó bé dí ejébě Gétsémane yɨ́. Yésʉs, nye le ompʉ́n bé ó: «Diʼee gá wâʼ sí, jɔʼ mé dína lɨ́ etó jɨʼla e Nzyɛ̌m yɨ́.»

33Nó nyé á nze jébe Pétrus, bé e Jacques ndu e Yʉánɛs, bé e boo nɔ́ɔ́ ntɔ̂ʼ tô. Yésʉs ntɔ̂ʼ táare éjóʼo bʉ́á le esyɛ̌l bá. 34Nye ó: «Lémé wâm, wê le ebúʼ, mpʉ̌ sá lɛ́ɛ́, me ópuro e tɨ̂. Diʼee gá wâʼ ɨ́ doho.»

35Nye nzě bá tô dóló, ntɔ̂ʼ nkɛŋ nyʉ̂l sí, jɨʼla e Nzyɛ̌m ó, yé óbána nó, bé e mitúú myaá, byé dwɛ́haa. 36Nye nzě lɛ́ɛ ó: «Dâ ɛ̌, sɔ̂ʼ, yé akâr gô. Sáʼ ó me l'ayɨ́ bɔma e mitúú mî. Damá jóʼo nó, yé ayɨ́ syɛ́ɛ̌ mpʉ mɛ̂m kpɛl yɨ́, njɨ mpʉ gó kpɛ̂l yɨ́!»

37Nye ntɔ̂ʼ gbɔlwa sí, tó kœb ómpʉ́n bé ɨ́ bijô. Nye e Pétrus ó: «Simon, nzê go ɨ́ jô ɛ̌? Yé abána gó edi ɨ́ doho éwala egwár ɨ́? 38Diʼee gá ɨ́ mpʉ̂n. Jɨʼlaa gâ, bé ámû jaá bóblo bɨ́n, bɨ̌n duma. Sísǐm mʉ̂r, wé lɨ́ egwɨ̂m ésâ bísyɛ́ɛla bimpâ. Nyʉ̂l nyɨɛ, ɨ́ tyɛʼ.»

39Nye ntɔ̂ʼ báʼǎ tô, tó jɨʼla e Nzyɛ̌m mpʉ nyé á nyɛɛ jɨʼla yɨ́. 40Nye báʼǎ búla, nzě báʼǎ kœb bé ɨ́ bijô, ebě, mîh, mé á be ɨ́ buú ntie bê. Mpʉ nyé á jɨm bé yɨ́, bé á bé akǎ gʉ́ǎ sá bé lɛ́yɨɨ nye yɨ́.

41Bɛn lɛ̂l nyé á baʼa nze yɨ́, nye e bé ó: «Nzê bɨ̌n bɨɛ bé ójaá kǎ didi ó, njɨ ɨ́ bijô le egbala ɨ́ jɔʼ yɨ́yɛ̂h ɛ̌? Yɨ́ jala: jɔʼ mû ó sí pyâl. Paá bee gâ: Mwân mé Mʉr, nyɨ́ bɛ́mɔɔ kwá osyɛ̂l o mísyóm! 42Gbɔlwaa gá sí. Mɨná tôʼ gâ. Beyɨɨ gá. Mʉr bɛ́má mé nyá ó dí enzě nɨ̌.»

Yésʉs, nyɨ́ mɛ́rɔɔ

(Matthieu 26.47-27.26; Luc 22.47-23.25; Yʉánɛs 18.2-19.16)

43Yésʉs dína lɨ́ elwib nó nɛ́ɛ: Yʉ́das le entumo e bʉ̂r nzě pyálɔɔ ɨ́ sulûm. Yʉ́das á be ó mʉr ngwár ɨ́ sɔ́má ómpʉ́n kám le obá mé Yésʉs. Bʉr o b'á nze bá, bé á nze ó, bâʼ le opasoŋ; bʉ́ʉ́, e mimbɨ́ŋ. Ojwɨ́ɨ o mpáh Nzyɛ̌m, olɛ̂ʼla o métié, le otɔ́má bʉ̂r o b'Ɨ́zraɛ̂l ó b'á lómo bê. 44Yʉ́das, mʉr á bɛ́ma Yésʉs nyá, á si boo tɨ́e bʉr baá ó: «Bɨ̌n bé ódweʼe nyé ó, mbi wɨ̂: mʉr bɨ́n ngá bee mé lɨ́ edû koo ékœ́h lé nyá, nye ó nɨ̌. Mɛ́rɨ́ɨ́ gá nye ɨ́ kpɨ́ɨ́ɨ́. Bɨ̌n a nzé e né.» 45Mpʉ nyé á pyâl yɨ́, nye ntɔ̂ʼ sîhlě bǎʼ e Yésʉs, ntɔ̂ʼ lɛ́ɛ ó: «Lɛ̂ʼla!» Nye ntɔ̂ʼ dû koo ékœ́h lé ɨ́ swííá. 46Bʉ́ʉ́ bɨ́ɛ ntɔ̂ʼ mɛ̂r nyê. 47Nyʉ́ʉ́ mʉ̂r á bě sûm yaá nyá ntɔ̂ʼ gœ̂m pâsoŋ wé lɨ́ ebɔ́m, tíʼe syɛ̂l mesâ mé njwɨ́ɨ opara egwǎl ɨ́ pyâ. 48Nó ó Yésʉs á nze dî e bé ó: «Bɨ́n nzé mɛ̂r mé le opasoŋ le mimbɨ́ŋ nó, nzê bɨ̂n jóʼó ó, me ó nzilngǎn? 49Mɨná bé á be gá ó, dʉ́ó lɨ́lɛ̂h sûm gwár, mɛm lɨ́ edwe bʉ̂r milɛ́ʼlá tʉ́ŋlʉ̌ mpáh Nzyɛ̌m, bɨ̌n l'amɛ̂r mê. Bɨ̌n mɛ́r mé ɨ́ báánâʼ ó, ebě, sá dí cɛmá ɨ́ Mekaná mé Nzyɛ̌m yɨ́, yé díraa.»

50Píe tɨ̂, bʉr bɨ́bɛ̂h nzě líʼe nyê, ntɔ̂ʼ kpɛ́ɔɔ. 51Yʉ́ʉ́ loʼo yɨ́ɛ, yé á be ó lɨ́ edû nyé e sana kán kʉ́bá ɨ́ nyʉ̂l. Jɔʼ bé á gwa mɛ̂r yé yɨ́, loʼo yaá ntɔ̂ʼ pɔma, kpɛ́ɛ, 52líʼe sána kán wé, tô suswáh ɨ́ kpâ.

Yésʉs ɨ́ mpǒm bʉ̌m nɨ́nɨ́ɨ́

53Bê nzě tô e Yésʉs kwá mé njwɨ́ɨ opara. Bʉ́ʉ́ ójwɨ́ɨ o mpáh Nzyɛ̌m, otɔ́má bʉ̂r o b'Ɨ́zraɛ̂l le olɛ̂ʼla o métié, bé ntɔ̂ʼ gwɨ̂hlǎ sûm yaá. 54Pétrus á be ó lɨ́ edû nyé ká ká píhe, nze ɨ́ nze nze, ntɔ̂ʼ nî tʉ́ŋlʉ̌ ebɛhɛɛ mé njwɨ́ɨ opara, ntɔ̂ʼ di sí bǎʼ e duró lɨ́ edwáblě siʼe, bé e bisója.

55Ojwɨ́ɨ o mpáh Nzyɛ̌m, le bʉr ó bʉ̌m nɨ́nɨ́ɨ́, bé á be ó lɨ́ esáa ékǎn bé búʼó Yésʉs lɔ̌b e tɨ̂ʼ lɨ́, bé nkʉ̂ jʉ̂ nyê. Sâ gwár, bé á bé akœb lê. 56Bʉ́ʉ́ bʉ̂r ɨ́ buo buo, bé á be ó lɨ́ ebúʼo nyé milɔ̌b, sâ gwár, mecwíí mɔ́ɔ́, mé á bé abɔma. 57Nó ó bʉ́ʉ́ bé á tyɛ̂b mitîtyěl, nzě búʼo nyé lɔ̌b ó: 58«Bɨ̌h bé á si jóʼo nye lɨ́ elɛ́ɛ ó, nye ógbɛ́ɛ mpáh Nzyɛ̌m, nyaá bʉ̂r, bé á sumo e mebô nyɨ̂, ntɔ̂ʼ sumo nyaá swîh njɨ ɨ́ melú mélɛ̂l. Nyɨ́haá, abě sumá e mebó mé bʉ̂r.» 59Damá jóʼo ékǎn laá, mecwíí mɔ́ɔ́, mé á be yɨ́ɛ ó abɔma.

60Nó njwɨ́ɨ opara á nze tyɛ̂b témé bʉr baá, ntɔ̂ʼ dî e Yésʉs ó: «Nzê gó abá yala ɛ̌? Wáǎ mbǐ purá bʉ̂r bâ dí epur gó wɨ̂?» 61Yésʉs á jaa di ó, njɨ ɨ́ mes, ayala ékǎn. Nó njwɨ́ɨ opara á baʼa dî e né ó: «Nzê go ó dí Mʉ̌r Nzyɛ̌m á lœm múló mé jwɨ́ɨ nyá, mʉr dí Mwân mé Nzyɛ̌m mɨ́ná dí egúmlo gá nyá ɛ́?» 62Yésʉs ntɔ̂ʼ yala e né ó: «Me ó nye. Bɨ̌n bé óbee Mwân mé Mʉr, ndîndǐl ɨ́ páʼ mbó éjʉ́m mé Nzyɛ̌m nkul nyɨnyɛ̂h.#14.62: Jwɛ́ʼáá Mk 12.36. Bɨ̌n bé óbee nyé lɨ́ enze, témé dwiné.»

63Nó ó njwɨ́ɨ opara ntɔ̂ʼ nyǎ kán wé. Nye e né ó: «Mɨná bé akǎ báʼǎ sáa gá bʉr o ká boʼlo nyé bá. 64Bɨ̌n bɨ́ jóʼǒ mpʉ nyé dí esâ Nzyɛ̌m nkěh yɨ́. Bɨ̌n bɨɛ̌ bee nyá?» Nó ó bʉ̂r bɨ́bɛ̂h, bé á dwe nye mebě yɨ́. Bé ó: «Bɨ̌h bee ó, nye ɨ́ jala le ejʉ́ŋɔɔ.» 65Nó ó bʉ́ʉ́ bʉ̂r ɨ́ sɔ́má yɔ́ɔ́ bé á nze taare esyɛɛ nye metyéelé ɨ́ mîh, le ebúblo nyé mpǒm, le etû nyé bikúra, le elɛ́ɛ e né ó: «Twóóláá díé é mʉ̂r ŋmɛ́h gó nyá.» Bisója, byé ntɔ̂ʼ nʉa nyê, nze ŋmɛ́hɔɔ nyé mempɛ̂h.

Pétrus lɨ́ ekɛ́lǎ Yésʉs

66Pétrus dína páʼ ébɛhɛɛ nkǒ sí nɛ́ɛ: nyʉ́ʉ́ mʉ́má, syɛ̂l mesâ mé njwɨ́ɨ opara nzě pyâl, 67ntɔ̂ʼ beě Pétrus lɨ́ edwáblě siʼe, nzě dwɛ̂ʼ nyé ɨ́ bʉ́ʉ́ʉ́á. Nye e né ó: «Go ntémé, go á be ó, bɨ̌n e Yésʉs, mʉr Nazarɛ̂t.» 68Pétrus ntɔ̂ʼ kɛ́la. Nye e né ó: «Mé agʉ́a. Mé ajóʼǒ sá gó dí ekpɛl élɛ́ɛ yɨ́.»

Nó nyé á duho lɨ́ ebɛhɛɛ laá, ntɔ̂ʼ tô ɨ́ ntɔ́ɔ á be nko ébê nyɨ́. Njʉ́m kúo nzě kwâʼ. 69Nó mpʉ mʉ́má waá á baʼa bee nye yɨ́, nye ntɔ̂ʼ lɛ́ɛ e bʉr o b'á bě sûm yaá bá ó: «Mʉr nyâ, nye ó mʉr sɔ́má yɔ́ɔ́.» 70Pétrus ntɔ̂ʼ báʼǎ kɛ́la. Abea nɛ́ɛ: bʉr o b'á be tɨ̂ʼ bá, ntɔ̂ʼ báʼǎ lɛ́ɔɔ̌ Pétrus ó: «Yê tyeetye ó, go ó mʉr sɔ́má yɔ́ɔ́, ebě, go ntémé, go ó mʉr Galilê.» 71Nó ó Pétrus á nze baʼa kɛ́la. Nye e né ó: «Nzyɛ̌m ntɨ́ʼɨɨ me, yé bé mě lɛ́ɛ́ ó bibɛr nó! Mé agʉ́a mʉ̂r bɨ́n dí elɛ́ɛ̌ nɨ̌.»

72Tyé e tyé yaá, njʉ́m kúo ntɔ̂ʼ kwâʼ ɨ́ jɔʼ mbá, Pétrus ntɔ̂ʼ símsǎ sá Yésʉs á lɛ́ɛ e né ó: “Njʉ́m kúo dína apǎ kwâʼ nzɔ̂ʼ bá, go ókɛ́la mé nzɔʼ lɛ̂l” yɨ́. Nye ntɔ̂ʼ gɔ́na le ejɨ.

Currently Selected:

Marc 14: ozm

Highlight

Copy