Yʉanes 11
11
Efie mo Lazar
1Nuu mʉr a be ó, die Lazar. Nye a be ó lé esyɛb. Nye a be ó mʉr Betani, kwar mo Maaria bé e tʉl we Marta. 2(Maaria waa ó ngo lœm mokʉ mo Da Yesʉs labina, pim me e mpuo lʉ we e.#11.2 Syɛɛla ye, yé ónyin dolo: Yʉanes 12.3.) No ó, mpʉ ntʉm we Lazar, a be lé esyɛb ɨ, 3bʉba oba onɨ ze lomɔ mʉr ó, nye toʼ, to lɛɛ Yesʉs ó: «Da, fo go, nye ekʉ syɛb!» 4É jɔʼ Yesʉs a joʼo mpaŋla waa ɛ, nye ó: «Esyɛb mo Lazar, lé ákwoʼ jʉ nye. Lé ókʉ ka sa ó njɨ bʉr dwiiba Zyɛm bé e Mwan we.»
5Yesʉs a be ó lé ekpɛl Marta bé e ncyom we, ndwe e ntʉm wɔɔ Lazar. 6É jɔʼ nye a sil joʼo mpaŋla é lɔb esyɛb laa ɛ, nye ze bâʼle lɛŋ molu moba gumo nye a be e. 7Pie tɨ, nye ze lɛɛ e l'ompʉn be ó: «Bɨna fiʼɨ ga, to Yʉda!» 8Ompʉn be, bé e nye ó: «Yeʼle, yé ó, apa bɛa, oYʉden, bé a be ó lé ejwɨʼla saa elumo go mokoʼ. Zê go lé egwɨm bâʼle to gʉʼ ɛ?» 9Yesʉs, nye e be ó: «Zê moho, wé abe e mowala ewʉm e moba ɛ? ǃƗ mʉr si kœʼ é moho nɛʼɛ, nye abe e nkul ebɨm ebɔʼ, ntɔʼ duma, ebe, nye e myɛn lé epan é si nwaʼ ɛ. Nye nteme, nye egʉa bee. 10Sa gwar, ǃɨ mʉr si ntime é l'edurʉ nɛʼɛ, nye óto le ebɨm mobɔʼ, ebe, nye ankɛɛ sa lé epɛn myɛn ɨ, é nye mʉr tɨ.» 11É jɔʼ nye a sil lɛɛ mokan maa ɛ, nye e be ó: «Fo ga wina Lazar, nye mu ó é dwo. Me to ó, to jɨm nye.» 12Ompʉn, bé e nye ó: «Da! Yé be ó, nye mu ó é dwo nɛʼɛ, gʉŋa ó, nyi tiʼe!» 13(Sa gwar, Yesʉs a be ó lé egwɨm lɛɛ ó, Lazar, nyi dwè. No ó, ompʉn bɛɛ, bé a jwɨʼ ó, yé a be ó mpaŋ dwo ó nye a ja ɛ.) 14Yesʉs ka ze lwib e be, é kpɛŋlɛm. Nye e be ó: «Lazar, nyi dwè. 15Me ekʉ soho e bɨn, ebe, bɨna bé a baabe ga gʉ. Ebe no ó bɨn bé ógʉa jyɛʼ taa buʼo yin boo me e. Ncʉʼ ga, bɨna to ga nko nye ndɨ ɨ.» 16No ó, Tomas bé lé ejebe ó, Egbah ɛ, a ze lɛɛ e bʉʉ ompʉn ó: «Ncʉʼ ga. Bɨna ga e boo nɔɔ to dwè ga gumo gwar!»
Yesʉs ó lé epɛ̀h bʉr é mofoo
17No ó Yesʉs a ze pyal, é jɔʼ yaa, Lazar, nye osi debe e molu monâ. 18Betani, yé ó kunokuno e Yerʉsalɛm, kwoʼ be okilmɨra olɛl. 19Buobuo oYʉden, bé a be ó si ze, lé eze dwaŋle Marta bé e Maaria, mɨleme é l'efie e ntʉm wɔɔ.
20É jɔʼ Marta a joʼo lɔɔ ó, Yesʉs, nye eze ɛ, nye ntɔʼ to bɔma e nye, Maaria nyɛɛ liʼ mbɛr. 21Marta, nye e Yesʉs ó: «Da, nkʉ go a be ó be, be wâʼ nɛʼɛ, mpa ntʉm wam a baadwè. 22Sa gwar, me egʉa ó, dam be é banana, Zyɛm ódwe go sa yiyɛh go ódî nye e.» 23Yesʉs, nye e nye ó: «Ntʉm go ópàh.» 24Marta, nye e nye ó: «Me ekʉ gʉa ó, nye ópàh é foo é jɔʼ odwè, bé ópàh é moho epihe, ntible-bɨkaŋa.» 25Yesʉs, nye e nye ó: «Me ó waa lé epɛ̀h bʉr é mofoo, dwe be tiʼ molu mo mpoʼ mɨmɛh ɛ. Mʉr lé ejyɛʼ taa buʼo ye boo me e, nye dam dwè, nye óbâʼle tiʼe. 26Nteme, waa nyiwɛh lé etiʼe é zi wam le ejyɛʼ taa buʼo ye boo me e, nye ákwoʼ dwè. Zê go lé ebuʼla no ɛ?» 27Nye e nye ó: «Da, me ekʉ gʉa no. Mɨ buʼla ó, go ó ndɨ Lœma mulo mo Zyɛm le Mwan mo Zyɛm, mʉr a be ó, nye óze kaʼ é si nwaʼ ɛ.»
Yesʉs lé ejɨ
28É jɔʼ bé a sil lwib no e, Marta ze to jebe ncyom we Maaria. Nye e nye é l'efo ó: «Yeʼle be ó si pyal! Nye ejebe go!»
29É jɔʼ Maaria a joʼo no e, nye ze mʉa si é bʉ, ze to nko Yesʉs a be e. 30Yesʉs a baapa pyal é l'odumo o kwar. Nye a be ó gumo Marta a to bɔma e nye e. 31Naa yé ó, Yʉden, bé a be ó si pyal boo Maaria, lé eze dwaŋle nye leme é l'efie e ntʉm. É jɔʼ bé a bee Maaria lé emʉa si, pyal kʉl kam e kam ɨ, bé ze du nye. Bé a jwɨʼ ó, nye eto ó nko foo, to jɨ gʉ. 32É jɔʼ Maaria a to pyal nko Yesʉs a be e, nye ze bɨʼ mpom we si é mih mo Yesʉs. Nye e nye ó: «Da, nkʉ go a be ó be, be wâʼ nɛʼɛ, mpa ntʉm wam a baadwè.» 33É jɔʼ Yesʉs a dwɛʼ, bee nye lé ejɨ, bé e l'oYʉden, bé a du nye e, sisim we kʉ ze pɨʼba. 34Yesʉs ze dî ó: «Bɨn bé a dɨl muu we nko?» Bé e nye ó: «Da, ntaʼ, ze bee.» 35Yesʉs ntɔʼ jɨ. 36OYʉden, bé ó: «Mbe ga: nye a si bul kpɛl nye!» 37Bʉʉ bʉr o sama yɔɔ, bé ó: «Heeeʼ! Mʉr a bɛɛ ntim mih nwa, zê nye a baabe e nkul eka sa ó, Lazar beʼ l'adwè ɛ?»
Yesʉs lé epɛ̀h Lazar é foo
38Sisim mo Yesʉs kʉ ze bâʼle pɨʼba é nye mʉr tɨ. Nye ze to nko foo. Foo waa a be ó bah ekoʼ. Bé a dible nʉm foo ó e l'ekoʼ. 39Yesʉs, nye e be ó: «Pɛʼɛ ga ekoʼ.» Marta, kɛl mo ndwè, nye e nye ó: «Da, nye mu ó lé ebul numo! Nye mu ó si debe e molu monâ!» 40Yesʉs, nye e nye ó: «Zê me baalɛɛ e go ó, ǃgo si buʼla nɛʼɛ, go óbee moncɛnba mo Zyɛm ɛ?»
41Bé ntɔʼ pɛʼ ekoʼ. Yesʉs ze bɨn mih kʉ. Nye ó: «Zyoo e go, Da, ebe, gɨ joʼo me. 42Me egʉa ó, go ebɛa joʼo me. No ó, me elɛɛ go no ó, é l'efu e bʉr lé ebʉmra me wâʼ é nka ba, ó bé buʼla ó, go ó b'a lomo me.» 43É jɔʼ nye a sil lwib no e, nye ntɔʼ ze behe. «Lazar ɔɔ! Pyala kʉl ɔɔ!» 44Lazar ntɔʼ pyal kʉl, mobo e mokʉ mɨkɛʼa e mɨmyɔʼ mɨ dɨla. (Mɨmyɔʼ myaa, myé a be ó mɨsɛa e ndomo kan é pumo-pumo. Mpom we a be ó ndîbla e peh kan.) Yesʉs, nye e be ó: «Tiŋɨ ga nye bɨsa bɨnɨ. Birɨ ga nye, nye toʼ.»
Bʉm ejʉŋɔ Yesʉs
(Mataos 26.1; Markus 14.1; Lʉkas 22.1)
45É sama oYʉden bé a ze bee Maaria ɛ, buobuo bʉr, bé a si jyɛʼ taa buʼo yɔɔ boo Yesʉs é jɔʼ bé a bee sa nye a sa ɛ. 46Sa gwar, bʉʉ bʉr é sama oYʉden yaa, bé ze to bee oFarizyɛŋ, ze pʉrɔ be syɛɛla Yesʉs a sa ɛ. 47OFarizyɛŋ bé e l'ojwɨɨ be opara ze gwɨhla é Bʉm Nɨnɨ yɔɔ. Bé ó: «Bɨna bé ósa ga nyá ɛ? Ebe, mʉr nɨ, nyi bul sa bɨdweʼle bɨ nkul we. 48ǃBɨna si bir ga nye nɛʼɛ, bʉr bɨbɛh, bé ójyɛʼ taa buʼo yɔɔ boo nye! É jɔʼ yaa, bʉr o Rom, bé òze, ze bʉ Mpah Tî#11.48 «Mpah Ti» nye lé etwar wâʼ ɛ, nye ó Mpah Zyɛm Yerʉsalɛm. ga wina, le elwimla dɔm e kul ga yina!»
49Nuu mʉr a be ó é sama yaa, die le Kayɨfa. Nye ó b'a be njwɨɨ opara é mbu waa. Nye ó: «Bɨn bé apahle sɔʼɔ! 50Bɨn nteme bé abe e pɨʼ. Bɨn bé abee ó, yé é mbɨa ó, mʉr ngwar dwèʼ, jala e kul ga yina? É mbi waa ó kul ga yina, yé óbe, adim yiyɛh ɛ.»
51(Nye a baalɛɛ ekan laa ebe gwɨma ye. Sa yé a sa ó, nye lɛŋɨ le e, yé a be ó, ebe, nye a be ó njwɨɨ opara é mbu waa. Ebe no ó yé a jala ó, nye gwihɨ ó, yé é mbɨa ó, Yesʉs dwèʼ é l'efu e kul oYʉden ɨ. 52Abe njɨ é l'efu e bʉr o kul gwar yaa bé ome. Nye nteme a dwè ó, é l'efu e bwan mo Zyɛm bɨbɛh! Mpʉ bɨ myɛma é mɨlal myoonkan ɨ, nye ónʉa be, ntɔʼ syɛŋ be, ó bé diʼe njɨ sa gwar.)
53É moho waa ó bé a bòno pɨʼ ó, bé jʉ ó Yesʉs ɨ. 54Ebe no ó Yesʉs a gwaʼ lé eduula é pono é mih mo oYʉden ɨ. Nye ze laa, to é guu lal fih, kunokuno e feha si. Bé e l'ompʉn be, ze to di gʉʼ é nkana bé lé ejebe ó, Efrayɨm ɨ.
55Ebʉʼ e Paska oYʉden, lé a be ó, lé mu kunokuno le epyal. Buobuo bʉr o lal ze taare lé eto Yerʉsalɛm, to puba jyɛm lé a be, lé l'apa taare e. 56Bé a be ó lé esaa Yesʉs é jahla bii mo Zyɛm, lé eto le edîila paʼra wɔɔ ó: «Bɨn bé epahle sa yiʼ nyá ɛ? Zê nye aŋa ka ze é l'ebʉʼ ɛ?» 57Ojwɨɨ be opara bé e l'oFarizyɛŋ, bé a bɛa tiile tiila ó, ǃɨ mʉr si fuuba gʉa gumo Yesʉs ndɨ nɛʼɛ, nye lɛŋɨ bʉr. Bɛɛ bé òka to naʼ nye mobo é nyʉl.
Currently Selected:
Yʉanes 11: ozmBad
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
Yʉanes 11
11
Efie mo Lazar
1Nuu mʉr a be ó, die Lazar. Nye a be ó lé esyɛb. Nye a be ó mʉr Betani, kwar mo Maaria bé e tʉl we Marta. 2(Maaria waa ó ngo lœm mokʉ mo Da Yesʉs labina, pim me e mpuo lʉ we e.#11.2 Syɛɛla ye, yé ónyin dolo: Yʉanes 12.3.) No ó, mpʉ ntʉm we Lazar, a be lé esyɛb ɨ, 3bʉba oba onɨ ze lomɔ mʉr ó, nye toʼ, to lɛɛ Yesʉs ó: «Da, fo go, nye ekʉ syɛb!» 4É jɔʼ Yesʉs a joʼo mpaŋla waa ɛ, nye ó: «Esyɛb mo Lazar, lé ákwoʼ jʉ nye. Lé ókʉ ka sa ó njɨ bʉr dwiiba Zyɛm bé e Mwan we.»
5Yesʉs a be ó lé ekpɛl Marta bé e ncyom we, ndwe e ntʉm wɔɔ Lazar. 6É jɔʼ nye a sil joʼo mpaŋla é lɔb esyɛb laa ɛ, nye ze bâʼle lɛŋ molu moba gumo nye a be e. 7Pie tɨ, nye ze lɛɛ e l'ompʉn be ó: «Bɨna fiʼɨ ga, to Yʉda!» 8Ompʉn be, bé e nye ó: «Yeʼle, yé ó, apa bɛa, oYʉden, bé a be ó lé ejwɨʼla saa elumo go mokoʼ. Zê go lé egwɨm bâʼle to gʉʼ ɛ?» 9Yesʉs, nye e be ó: «Zê moho, wé abe e mowala ewʉm e moba ɛ? ǃƗ mʉr si kœʼ é moho nɛʼɛ, nye abe e nkul ebɨm ebɔʼ, ntɔʼ duma, ebe, nye e myɛn lé epan é si nwaʼ ɛ. Nye nteme, nye egʉa bee. 10Sa gwar, ǃɨ mʉr si ntime é l'edurʉ nɛʼɛ, nye óto le ebɨm mobɔʼ, ebe, nye ankɛɛ sa lé epɛn myɛn ɨ, é nye mʉr tɨ.» 11É jɔʼ nye a sil lɛɛ mokan maa ɛ, nye e be ó: «Fo ga wina Lazar, nye mu ó é dwo. Me to ó, to jɨm nye.» 12Ompʉn, bé e nye ó: «Da! Yé be ó, nye mu ó é dwo nɛʼɛ, gʉŋa ó, nyi tiʼe!» 13(Sa gwar, Yesʉs a be ó lé egwɨm lɛɛ ó, Lazar, nyi dwè. No ó, ompʉn bɛɛ, bé a jwɨʼ ó, yé a be ó mpaŋ dwo ó nye a ja ɛ.) 14Yesʉs ka ze lwib e be, é kpɛŋlɛm. Nye e be ó: «Lazar, nyi dwè. 15Me ekʉ soho e bɨn, ebe, bɨna bé a baabe ga gʉ. Ebe no ó bɨn bé ógʉa jyɛʼ taa buʼo yin boo me e. Ncʉʼ ga, bɨna to ga nko nye ndɨ ɨ.» 16No ó, Tomas bé lé ejebe ó, Egbah ɛ, a ze lɛɛ e bʉʉ ompʉn ó: «Ncʉʼ ga. Bɨna ga e boo nɔɔ to dwè ga gumo gwar!»
Yesʉs ó lé epɛ̀h bʉr é mofoo
17No ó Yesʉs a ze pyal, é jɔʼ yaa, Lazar, nye osi debe e molu monâ. 18Betani, yé ó kunokuno e Yerʉsalɛm, kwoʼ be okilmɨra olɛl. 19Buobuo oYʉden, bé a be ó si ze, lé eze dwaŋle Marta bé e Maaria, mɨleme é l'efie e ntʉm wɔɔ.
20É jɔʼ Marta a joʼo lɔɔ ó, Yesʉs, nye eze ɛ, nye ntɔʼ to bɔma e nye, Maaria nyɛɛ liʼ mbɛr. 21Marta, nye e Yesʉs ó: «Da, nkʉ go a be ó be, be wâʼ nɛʼɛ, mpa ntʉm wam a baadwè. 22Sa gwar, me egʉa ó, dam be é banana, Zyɛm ódwe go sa yiyɛh go ódî nye e.» 23Yesʉs, nye e nye ó: «Ntʉm go ópàh.» 24Marta, nye e nye ó: «Me ekʉ gʉa ó, nye ópàh é foo é jɔʼ odwè, bé ópàh é moho epihe, ntible-bɨkaŋa.» 25Yesʉs, nye e nye ó: «Me ó waa lé epɛ̀h bʉr é mofoo, dwe be tiʼ molu mo mpoʼ mɨmɛh ɛ. Mʉr lé ejyɛʼ taa buʼo ye boo me e, nye dam dwè, nye óbâʼle tiʼe. 26Nteme, waa nyiwɛh lé etiʼe é zi wam le ejyɛʼ taa buʼo ye boo me e, nye ákwoʼ dwè. Zê go lé ebuʼla no ɛ?» 27Nye e nye ó: «Da, me ekʉ gʉa no. Mɨ buʼla ó, go ó ndɨ Lœma mulo mo Zyɛm le Mwan mo Zyɛm, mʉr a be ó, nye óze kaʼ é si nwaʼ ɛ.»
Yesʉs lé ejɨ
28É jɔʼ bé a sil lwib no e, Marta ze to jebe ncyom we Maaria. Nye e nye é l'efo ó: «Yeʼle be ó si pyal! Nye ejebe go!»
29É jɔʼ Maaria a joʼo no e, nye ze mʉa si é bʉ, ze to nko Yesʉs a be e. 30Yesʉs a baapa pyal é l'odumo o kwar. Nye a be ó gumo Marta a to bɔma e nye e. 31Naa yé ó, Yʉden, bé a be ó si pyal boo Maaria, lé eze dwaŋle nye leme é l'efie e ntʉm. É jɔʼ bé a bee Maaria lé emʉa si, pyal kʉl kam e kam ɨ, bé ze du nye. Bé a jwɨʼ ó, nye eto ó nko foo, to jɨ gʉ. 32É jɔʼ Maaria a to pyal nko Yesʉs a be e, nye ze bɨʼ mpom we si é mih mo Yesʉs. Nye e nye ó: «Da, nkʉ go a be ó be, be wâʼ nɛʼɛ, mpa ntʉm wam a baadwè.» 33É jɔʼ Yesʉs a dwɛʼ, bee nye lé ejɨ, bé e l'oYʉden, bé a du nye e, sisim we kʉ ze pɨʼba. 34Yesʉs ze dî ó: «Bɨn bé a dɨl muu we nko?» Bé e nye ó: «Da, ntaʼ, ze bee.» 35Yesʉs ntɔʼ jɨ. 36OYʉden, bé ó: «Mbe ga: nye a si bul kpɛl nye!» 37Bʉʉ bʉr o sama yɔɔ, bé ó: «Heeeʼ! Mʉr a bɛɛ ntim mih nwa, zê nye a baabe e nkul eka sa ó, Lazar beʼ l'adwè ɛ?»
Yesʉs lé epɛ̀h Lazar é foo
38Sisim mo Yesʉs kʉ ze bâʼle pɨʼba é nye mʉr tɨ. Nye ze to nko foo. Foo waa a be ó bah ekoʼ. Bé a dible nʉm foo ó e l'ekoʼ. 39Yesʉs, nye e be ó: «Pɛʼɛ ga ekoʼ.» Marta, kɛl mo ndwè, nye e nye ó: «Da, nye mu ó lé ebul numo! Nye mu ó si debe e molu monâ!» 40Yesʉs, nye e nye ó: «Zê me baalɛɛ e go ó, ǃgo si buʼla nɛʼɛ, go óbee moncɛnba mo Zyɛm ɛ?»
41Bé ntɔʼ pɛʼ ekoʼ. Yesʉs ze bɨn mih kʉ. Nye ó: «Zyoo e go, Da, ebe, gɨ joʼo me. 42Me egʉa ó, go ebɛa joʼo me. No ó, me elɛɛ go no ó, é l'efu e bʉr lé ebʉmra me wâʼ é nka ba, ó bé buʼla ó, go ó b'a lomo me.» 43É jɔʼ nye a sil lwib no e, nye ntɔʼ ze behe. «Lazar ɔɔ! Pyala kʉl ɔɔ!» 44Lazar ntɔʼ pyal kʉl, mobo e mokʉ mɨkɛʼa e mɨmyɔʼ mɨ dɨla. (Mɨmyɔʼ myaa, myé a be ó mɨsɛa e ndomo kan é pumo-pumo. Mpom we a be ó ndîbla e peh kan.) Yesʉs, nye e be ó: «Tiŋɨ ga nye bɨsa bɨnɨ. Birɨ ga nye, nye toʼ.»
Bʉm ejʉŋɔ Yesʉs
(Mataos 26.1; Markus 14.1; Lʉkas 22.1)
45É sama oYʉden bé a ze bee Maaria ɛ, buobuo bʉr, bé a si jyɛʼ taa buʼo yɔɔ boo Yesʉs é jɔʼ bé a bee sa nye a sa ɛ. 46Sa gwar, bʉʉ bʉr é sama oYʉden yaa, bé ze to bee oFarizyɛŋ, ze pʉrɔ be syɛɛla Yesʉs a sa ɛ. 47OFarizyɛŋ bé e l'ojwɨɨ be opara ze gwɨhla é Bʉm Nɨnɨ yɔɔ. Bé ó: «Bɨna bé ósa ga nyá ɛ? Ebe, mʉr nɨ, nyi bul sa bɨdweʼle bɨ nkul we. 48ǃBɨna si bir ga nye nɛʼɛ, bʉr bɨbɛh, bé ójyɛʼ taa buʼo yɔɔ boo nye! É jɔʼ yaa, bʉr o Rom, bé òze, ze bʉ Mpah Tî#11.48 «Mpah Ti» nye lé etwar wâʼ ɛ, nye ó Mpah Zyɛm Yerʉsalɛm. ga wina, le elwimla dɔm e kul ga yina!»
49Nuu mʉr a be ó é sama yaa, die le Kayɨfa. Nye ó b'a be njwɨɨ opara é mbu waa. Nye ó: «Bɨn bé apahle sɔʼɔ! 50Bɨn nteme bé abe e pɨʼ. Bɨn bé abee ó, yé é mbɨa ó, mʉr ngwar dwèʼ, jala e kul ga yina? É mbi waa ó kul ga yina, yé óbe, adim yiyɛh ɛ.»
51(Nye a baalɛɛ ekan laa ebe gwɨma ye. Sa yé a sa ó, nye lɛŋɨ le e, yé a be ó, ebe, nye a be ó njwɨɨ opara é mbu waa. Ebe no ó yé a jala ó, nye gwihɨ ó, yé é mbɨa ó, Yesʉs dwèʼ é l'efu e kul oYʉden ɨ. 52Abe njɨ é l'efu e bʉr o kul gwar yaa bé ome. Nye nteme a dwè ó, é l'efu e bwan mo Zyɛm bɨbɛh! Mpʉ bɨ myɛma é mɨlal myoonkan ɨ, nye ónʉa be, ntɔʼ syɛŋ be, ó bé diʼe njɨ sa gwar.)
53É moho waa ó bé a bòno pɨʼ ó, bé jʉ ó Yesʉs ɨ. 54Ebe no ó Yesʉs a gwaʼ lé eduula é pono é mih mo oYʉden ɨ. Nye ze laa, to é guu lal fih, kunokuno e feha si. Bé e l'ompʉn be, ze to di gʉʼ é nkana bé lé ejebe ó, Efrayɨm ɨ.
55Ebʉʼ e Paska oYʉden, lé a be ó, lé mu kunokuno le epyal. Buobuo bʉr o lal ze taare lé eto Yerʉsalɛm, to puba jyɛm lé a be, lé l'apa taare e. 56Bé a be ó lé esaa Yesʉs é jahla bii mo Zyɛm, lé eto le edîila paʼra wɔɔ ó: «Bɨn bé epahle sa yiʼ nyá ɛ? Zê nye aŋa ka ze é l'ebʉʼ ɛ?» 57Ojwɨɨ be opara bé e l'oFarizyɛŋ, bé a bɛa tiile tiila ó, ǃɨ mʉr si fuuba gʉa gumo Yesʉs ndɨ nɛʼɛ, nye lɛŋɨ bʉr. Bɛɛ bé òka to naʼ nye mobo é nyʉl.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.