Yʉanes 13

Yesʉs lé ejwɨ̀ɨ ompʉn mokʉ

1Yé a be ó, yé mu moho ebʉʼ e Paska. Yesʉs a be ó si bɛa gʉa ó, ewala, lɨ pyal, jɔʼ nye duha é si nwa, to boo Sɔŋ ɨ. Nye a be ó si bul kpɛl nkɔb bʉr bé a be baa be, baa bé a liʼ di é si nwaʼ ɛ. Nye a kpɛl be ó, to pyal é l'efehle.

2Yesʉs bé e l'ompʉn be, bé a be ó lé ede é bii kʉʼ. É jɔʼ yaa, Njwɨɨ moleme a be ó si cyɛb Yʉdas Iskariot, mwan mo Simɔn, é leme, dwe nye jwɨʼ ó, nye kɛha Yesʉs. 3Yesʉs nye mʉr tɨʼ a be lé egʉa ó, nye a duho ó, boo Zyɛm, gʉa nteme ó, nye óbula, to boo Zyɛm. Nye a gʉa nteme ó, Sɔŋ we a be si gba sa yiyɛh é jwɨ̀ʼa ye e. 4Ngbaa le eka be, bé dina lé ede nɛʼɛ, nyi ze mʉa si, ze pɛʼ kan kʉ, nʉa sana kan, tiile é kubo, 5ze nʉa modibe, sʉ é fua, ze taare lé ejwɨ̀ɨ ompʉn mokʉ, le epim me e kan wé a be nye é kubo e. 6Nye ze dihle gumo Simɔn Pyɛr a be e. Simɔn Pyɛr, nye ze dî e nye ó: «Da, zê gwɔɔ ó ndɨ mʉr jala le ejwɨ̀ɨ me mokʉ nwa ɛ?» 7Yesʉs, nye e nye ó: «Banana, go dina ó apa gʉa sa me mu lé esa yi. Sa gwar, go ófuʼla ka gʉa ye.» 8Pyɛr ntɔʼ bɛʼ e nye ó: «Hɨʼɨ, Da, go ákwoʼ jwɨ̀ɨ me mokʉ lʉʉ dobo!» Yesʉs ze bɨha e nye ó: «ǃMe baajwɨ̀ɨ go mokʉ nɛʼɛ, go l'abi nkɔb é me.» 9Simɔn Pyɛr, nye e nye ó: «Da, yé be no nɛʼɛ, ajwɨ̀ɨ me njɨ mokʉ e mokʉ. Jwɨ̀ŋɨ me nteme mobo ndwe e lʉ.»

10Yesʉs, nye e nye ó: «Mʉr mu si bɛa jwɨ̀a ɛ, nye aka jala le ebâʼle jwɨ̀ɔ, alaa ó njɨ mokʉ, ebe, nye ó nyʉl nyiwɛh njwɨ̀a. Bɨn bé ó mɨnjwɨ̀a. Sa gwar, abe bɨn bɨbɛh.» 11(Yesʉs a be ó lé ebɛa gʉa mʉr ókɛha nye e. Ebe no ó nye a lɛɛ ó: «Sa gwar, bɨn bé abe mɨnjwɨ̀a bɨbɛh» ɛ.)

12É jɔʼ Yesʉs a sil jwɨ̀ɨ be mokʉ ɨ, nye ntɔʼ bâʼle bwar kan we, bâʼle di si é teble. Nye ó: «Zê bɨn bɨ gʉa sa me sa bɨn nɨ ɛ? 13Bɨn bé ejebe-jebe me ó, “Yeʼle wih”, nkʉ ntɔʼ “Tî wih”. Bɨn bé ekʉ gʉa jebe, ebe, me ó ndɨ kʉ be nye! 14ǃMɛm, Yeʼle win le Tî win, si jwɨ̀ɨ bɨn mokʉ nɛʼɛ, bɨn nteme bé ejala le ejwɨ̀ɨla mokʉ paʼra win. 15Me edwe bɨn ó, dweʼle, ó bɨn nteme nkʉʼ dɨ sa mpʉ me sa bɨn ɨ. 16Me elɛɛ bɨn cyecye ó nɛɛ: syɛl mosa álaa masa we é duu; mwa mɨlʉmlʉ alaa mʉr lomo nye e. 17Banana, bɨn mu ó si gʉa bɨsa byaa. ǃBɨn si ka sa bye nɛʼɛ, gʉŋa ga ó, bɨn bé óbe ó mbɨmbɨa.

18«Me alwib e bɨn bɨbɛh. Me egʉa baa me a pɛh ɛ. Sa gwar, yé ekʉ jala ó, lɔɔ ndɨ tila é Kalara Zyɛm ɨ, wé dira. Yé ó tila ó: “Mʉr lé ede mode mam ɨ, nyi dwibra e me.” 19Me ebal bɨn no ó, syɛɛla yaa l'apa syɛɛlɨ. No, yé ó, é jɔʼ yé óka syɛɛlɨ ɨ, bɨn nkʉʼ buʼla ó, mɛm ó ndɨ#13.19 Tina, yé ó Yesʉs a be ó lé elɛʼle be ó, nye ó we mbi mʉr, anwɨɨla e yʉʉ sɔʼɔ.. 20Me elɛɛ bɨn cyecye ó nɛɛ: mʉr ndɨ enʉa mwa mɨlʉmlʉ wam e duu ɨ, nye edwaabe nteme ó me. No nteme, waa lé enʉa me e duu ɨ, nye edwaabe nteme ó mʉr a ntɨh me e.»

Yesʉs lé elɛɛ ó, nye ókɛhɔ

(Mataos 26.20; Markus 14.17; Lʉkas 22.21)

21É jɔʼ nye a sil lwib no e, mɨlɔb myaa, myé ntɔʼ tɨ nye mokʉ si. Nye ó: «Me elɛɛ bɨn cyecye ó nɛɛ: mʉr ngwar é l'esama lɨn ókɛha me.» 22Ompʉn ze taare lé edwɛʼla paʼra wɔɔ, mɨleme é mo é zaaama, agʉa mʉr tuʼ nye a lwib, tiibe e nye e. 23Mpʉ bé a be ondindil lé ede e, nuu mpʉn mo Yesʉs, waa nye a bul kpɛl ɨ,#13.23 Yʉanes, nye efol die le é Mbɨambɨa Lɔɔ nye a tile e. Nye ó «mpʉn Yesʉs a bul kpɛl ɨ». Dwɛʼa nteme Yʉanes 19.26, 20.2, 21.7, 21.20. a be ó lé ede kunokuno e nye, lʉ we lé ejyɛʼbe é bɨr ye. 24Simɔn Pyɛr ze turo nye dih ó, nye dîʼe Yesʉs die e mʉr nye a lwib, tiibe e nye e. 25Mpʉn waa ze dwibra, jyɛʼ lʉ é bɨr mo Yesʉs, ze dî e nye ó: «Da, yé zé?» 26Yesʉs ze bɨha ó: «Me ótwar epulo e peh bler. Mʉr me ódwe ye e, nye ó ndɨ nye.»

Yesʉs ntɔʼ nʉa peh bler, twar epulo, ntɔʼ dwe Yʉdas, mwan mo Simɔn Iskariot. 27Enʉa Yʉdas a kʉ nʉa peh bler yaa nɛʼɛ, cye e cye yaa Satan ntɔʼ ze ni é nye. Yesʉs, nye e nye ó: «Kpahba sa sa go lé egwɨm sa nɨ.»

28(É bʉr o b'a be ondindil lé ede e, abe e mʉr a gʉa sa yé a pa kʉ sa ó, nye lɛŋɨ nye no e. 29Bé a niŋe ó, yé a be ó é lɔb dia mbɔʼlʉ ekuro Yʉdas a cyelɔ tɨʼ ɨ. Bé a dɨ jwɨʼ ó, Yesʉs a lomo nye ó, nye toʼ, to bwam sa yé óbe be e nyɔm é l'ebʉʼ ɨ, nkʉ ntɔʼ ó, nye toʼ, to gul baanteʼenteʼe.) 30Jɨh tɨʼ Yʉdas a kʉ nʉa peh bler, nye ntɔʼ ze pyal kʉl. Yé a be ó é pum.

Edwan e tiila

31É jɔʼ Yʉdas a pyal kʉl, to sa ye e, Yesʉs, nye e be ó: «Banana, kum Mwan mo Mʉr, nyi nyin. Kum mo Zyɛm Sɔŋ, nyi nyin nteme é nye. 32[ǃƗ kum mo Zyɛm si nyin é Mwan mo Mʉr nɛʼɛ, gʉŋa ga ó,] Zyɛm nteme ódwe Mwan we kum é nye mʉr tɨ. No nteme ó nye muno ze dwe nye kum ɨ. 33Bwan bam aa! Mɨ ka liʼ lé edi e bɨn ó, ma jɔʼ. Bɨn bé ósaa me. No ó, me lé elɛɛ bɨn bananaʼ ó, sa me a taare lé elɛɛ e l'oYʉden ɨ. Yé ó, bɨn bé abe e nkul edu nko me óto e. 34Me mu ó lé etiile bɨn edwan e tiila: kpɛla ga paʼra win, mpʉ me a kpɛl bɨn ɨ. 35ǃBɨn si kpɛla paʼra win nɛʼɛ, bʉr bɨbɛh, bé ógʉa ó, bɨn bé ó ompʉn bam.»

Pyɛr ókɛla ó, nye agʉa Yesʉs

(Mataos 26.31; Markus 14.27; Lʉkas 22.31)

36Simɔn Pyɛr ze dî e nye ó: «Da, go óto nko?» Yesʉs ntɔʼ bɨha e nye ó: «Go abe e nkul edu me é bananaʼ nko me muno ze to e. Go ófuʼla ka du me yɛɛ.» 37Pyɛr, nye e nye ó: «Da, ebe yé me ndɨ abe e nkul edu go é bananaʼ ɛ? Me e nkul ekʉ bir tiʼ yam é l'efu lo!» 38Yesʉs, nye e nye ó: «Gwɔɔ lɛɛ ó, go e nkul ekʉ bir tiʼ yo é l'efu lam ɨ? Me elɛɛ go cyecye ó nɛɛ: gwɔɔ, zʉm kuo l'apa kwaʼle, go ókɛla bɨjɔʼ bɨlɛl ó, go agʉa me!»

Currently Selected:

Yʉanes 13: ozmBad

Highlight

Copy