Yʉanes 3

Yesʉs bé e Nikodɛm

1Yé a be ó e nuu Farizyɛŋ, die le Nikodɛm. Nye a be nteme ó tamamʉr é kul oYʉden. 2Nye a si ze pyal boo Yesʉs é pum. Nye e nye ó: «Yeʼle, bɨh bé egʉa ó, go ó yeʼle Zyɛm a ntɨh, lé eze yeʼle bɨh ɨ, ebe, nkʉ Zyɛm, nye abe e mʉr, mʉr waa, nye abe e nkul esa bɨdweʼle bɨ nkul mbi go lé esa ɛ.»

3Yesʉs, nye e nye ó: «Me elɛɛ go cyecye ó nɛɛ: ǃɨ mʉr si be, abâʼle byɛl nɛʼɛ, nye abe e nkul ebee Jwɨ̀ʼa mo Zyɛm.»

4Nikodɛm ze dî e nye ó: «Tamamʉr, nye e nkul ebâʼle byɛl wáa mbi? Zê nye e nkul eni é mo mo nyɔŋ we, ntɔʼ bâʼle byɛl ɛ?»

5Yesʉs, nye e nye ó: «Me elɛɛ go cyecye ó nɛɛ: ǃɨ mʉr si be, apa byɛl mbyɛla modibe e waa Sisim nɛʼɛ, gʉŋa ó, mʉr waa, nye ákwoʼ ni é jwɨ̀ʼa mo Zyɛm. 6Sa mamʉr lé ebya ɛ, yé ó njɨ mamʉr bɨpuno e motié. To kœb ó, Mbɨambɨa Sisim ó ndɨ ebya mʉr ndɨ e sisim ndɨ kublakubla ɛ. 7Atwɨra nkʉ me elɛɛ go ó: “Yé ekʉ jala ó, bɨn bâʼla byɛl.” 8Pubo, wé elaa ó, gumo wé lé ekpɛl ɨ. Gwɔɔ kʉ ka joʼo ó njɨ duu pubo, agʉa yɛɛ nko wé lé eduho, ndwe e nko wé lé eto e. Yé ó jwɨʼ gwar e mʉr nyiwɛh lé ebyɛl é zi mo Mbɨambɨa Sisim ɨ.»

9Nikodɛm, nye e nye ó: «Wáa mbi bɨsa byaa ndɨ e nkul esyɛɛlɨ ɨ?»

10Yesʉs, nye e nye ó: «Gwɔɔ yɛɛ njwɨʼ yeʼle motie é bwa b'Ɨzraɛl, zê yé abana go lé egʉa mɨlɔb mɨnɨ ɛ? 11Me elɛɛ go cyecye ó nɛɛ: bɨh bé elwib é mɨlɔb bɨh lé egʉa ɛ. Bɨh bé eboʼlo nteme ó, é lɔb sa bɨh a bee e. Sa gwar, bɨn bé akpɛl mɛʼle lɔɔ wih. 12Bɨn l'apa buʼla é jɔʼ me lé elɛɛ bɨn bɨsa lé esyɛɛlɨ é si nwaʼ ɛ, zê bɨn bé óbul buʼla ó, é jɔʼ me ólɛɛ bɨn byaa lé esyɛɛlɨ é jobo kʉ ɨ? 13Abe e mʉr ngwar ndɨ si pa bere, to pyal é jobo kʉ, pie Mwan mo Mʉr, mʉr a duho é jobo kʉ, ze kaʼ é si nwaʼ ɛ. 14Jwɨʼ gwar e gwar mpʉ Moyiz a nʉa kpɛʼa nyʉa nkoho, pɛn é lɨ, bɨn ye kʉ é feha si ɨ, jwɨʼ gwar e gwar yaa nteme ó Mwan mo Mʉr lé ejala le ebɨnɔ kʉ ɨ.#3.14 «É jɔʼ yaa ó Yahweh a ze lɛɛ e Moyiz ó: “Kpaʼa nyʉa e bɨgbaa molele, go à pɛn ye é lɨ. Waa nyiwɛh ólwɨɨ nyʉa ɛ, é jɔʼ nye ósiŋle dweʼle nyʉa waa ɛ, nye ótiʼe.” Moyiz ntɔʼ taare lé ekpaʼ nyʉa yaa e nkoho, nye ntɔʼ pɛn ye é lɨ, le ecyel lɨ yaa é pyɛldweh. Mʉr a lwɨɨ nyʉa ɛ, a si toŋɔ e nye é gumo kpɛʼa nyʉa nkoho waa, wé a be e. É jɔʼ nye a siŋle dweʼle nyʉa ɛ, nye a be ó si tiʼe.» Tolɔɔ 21.8-9 15Nye óbɨnɔ kʉ no ó, é l'efu ó, mʉr nyiwɛh ójyɛʼ taa buʼo ye boo nye e, biʼe tiʼ molu mo mpoʼ mɨmɛh.

16«Zyɛm a be ó si bul laŋle kpɛl bʉr o si nwa. Ebe no ó nye a ntɨh Etiʼe e Mwan le ó, waa nyiwɛh ójyɛʼ taa buʼo boo nye e, aka dim. Nye biʼe tiʼ molu mo mpoʼ mɨmɛh. 17Nye a baantɨh Mwan we kaʼ é si nwaʼ ó, nye ntaʼ, ze dwe bʉr o tɨʼ mobe. Nye a ntɨh nye ó, nye dweʼ bʉr bɨbɛh tiʼ molu mo mpoʼ mɨmɛh dumo e nye. 18Mʉr lé ejyɛʼ taa buʼo ye boo Mwan mo Zyɛm ɨ, nye aŋa ka dweŋɔ mobe. To kœb ó, waa ndɨ asa no e, nyiha, nyi bɛa dweŋɔ mobe, ebe, nye apa jyɛʼ taa buʼo ye boo Etiʼe e Mwan mo Zyɛm.

19«Mobe maa, mé ódweŋɔ ó, ebe, myɛn, wi ze pan, ze pyal é si nwa. Bʉr bɛɛ bula kpɛl edurʉ, laa myɛn, ebe, bɨsyɛɛla byɔɔ, byé é bebe. 20Mʉr nyiwɛh lé esa ebebe e, nye enwim myɛn waa. Nye abe lé eze fum myɛn lé epan ɨ, ebe, nye ekpɛɛ ó, ebebe le, lé amu jaa gwiha kʉl, bʉr ntɔʼ dwe nye mobe tɨ. 21Waa nyiwɛh lé ekœʼ ebò e cyen é l'ocyecye e, nye ekpɛl to nko myɛn lé epan ɨ, bʉr nkʉʼ bee ó, bɨsyɛɛla bye, byé eduho ó, é gwɨma mo Zyɛm.»

Yesʉs bé e Yʉanes Ndubʉr

22Jɔʼ ze laa ba, Yesʉs bé e l'ompʉn be, ze to é lal Yʉda. Bé ze ja gʉʼ bwa molu. Nye a be ó lé edù-dù bʉr. 23Yʉanes nteme a be ó, lé edù bʉr é l'ebʉm e Ayɨnɔn, kunokuno e Salim, ebe, modibe, mé a be ó é buo tɨ. Bʉr ze taare lé eto boo Yʉanes lé eto nʉa ndubo. 24(É jɔʼ yaa, yé a be ó, Yʉanes l'apa gbaŋɔ é mbʉʼ.)

25Bé dina tina nɛʼɛ, bʉʉ ompʉn mo Yʉanes ze taare lé edo, bé e nuu Yʉden é mbi bé lé ejala le epuba mobebe e. 26Bé ze to nko Yʉanes a be e, ze dîŋɔ e nye ó: «Yeʼle, zê go lé eka toŋlo mʉr go a seʼle-seʼle é sama bʉr yé a be bɨna ga dibe Yʉrdɛŋ nkɔm-nkɛɛ ɛ? Banana, nyɛɛ nteme mu ó lé edù bʉr! Bʉr nteme mu kʉ ka to ó njɨ boo nye!» 27Yʉanes, nye e be ó: «ǃƗ Zyɛm si bene lé edwe mʉr sɔʼɔ nɛʼɛ, nye abe e nkul ebi ye. 28Bɨn bʉr o tɨ, bé egʉa ó, me a si bɛa boʼlo é mih mɨn ó, ntʉʼ mɛm ndɨ Lœma mulo mo Zyɛm. Me sɔʼɔ ó njɨ mʉr Zyɛm a taare lomo dolo e. 29Mʉr ndɨ e mʉma ɛ, nye ó njɨ mbɛl mʉma. Fo we nyɛɛ, nye ecyɛb-cyɛb ó, é puuu... joʼlo, ó nye nkʉʼ gʉa joʼlo ecel mo mbɛl. Nye ebul soho ecel le! Ebe no ó me lé ebul soho é bananaʼ ɛ. 30Yé ekʉ jala ó, kum we, nye bwaʼ bwaʼa; waa wam twaʼbe twaʼba.

31«Mʉr a duho é jobo kʉ ɨ, nye ó ndɨ elaa bʉr bɨbɛh. Mʉr si nwa, nye ekʉ joʼo ó njɨ mompaŋla mo si nwa. Nye elwib-lwib ó, njɨ mɨlɔb mɨ ka. Mʉr lé eduho é jobo kʉ ɨ, nyiha ó ndɨ elaa bʉr bɨbɛh. 32Nye eboʼlo ó sa nye a bee le ejoʼo e. Sa gwar, bʉr l'amɛʼle joʼo mpaŋla we. 33É jɔʼ mʉr lé emɛʼle joʼo nye e, nye elɛʼle tɨʼ ó, Zyɛm ó ndɨ cyecye. 34Mʉr Zyɛm a lomo e, nye lé entɛŋ ó, mokan mo Zyɛm, ebe, Zyɛm ó lé elomlo nye Mbɨambɨa Sisim, ntinɨ e ntinɨ.

35«Zyɛm Sɔŋ, nye ekpɛl Mwan we. Nyi bɛa gba sa yiyɛh é jwɨ̀ʼa ye. 36Mʉr lé ejyɛʼ taa buʼo ye boo mwan waa ɛ, nye ó ngo bi tiʼ molu mo mpoʼ mɨmɛh. No ó, waa ndɨ esa Mwan mo Zyɛm ebɨh ɨ, nye aŋa bi tiʼ molu mo mpoʼ mɨmɛh yaa, ebe, Zyɛm ókpaa empime e nye.»

Currently Selected:

Yʉanes 3: ozmBad

Highlight

Copy