Yʉanes 4

Yesʉs bé e sile Samari

1OFarizyɛŋ, bé a be ó si joʼo lɔɔ ó, Yesʉs a be ó lé edulo ompʉn le edù bʉr é buobuo, laa Yʉanes. 2(É l'ocyecye, ntʉʼ Yesʉs nye mʉr tɨʼ a dɨ dù bʉr. Ompʉn be, bé ó b'a dɨ dù bʉr.) 3Ebe no, é jɔʼ Yesʉs a joʼo no e, nye ntɔʼ mʉa é lal Yʉda, lé ebâʼle to lal Galɨle.

4Yé a kʉ be nye é nere-nere ó, nye cwɨŋɨ njɨ ɨ Samari. 5Nye ntɔʼ to pyal kunokuno e yʉʉ nkana Samari bé lé ejebe ó, Sukar ɨ. Nye a be ó, nye mu kunokuno e peme Yakɔb a dwe mwan we Yoseb ɨ. 6Edɛɛ e modibe mo Yakɔb, lé a be ó tɨ. Yesʉs ze di si nkpah edɛɛ, ebe, nye a be ó si cyɛʼ é cyen. Yé a be ó, yé mu lé eto saa teme moho.

7Guu sile Samari, wé ze pyal, lé eze daa modibe. Yesʉs, nye e we ó: «Dweʼ me modibe. Me ónyʉl.» 8Tina, yé ó, ompʉn be, bé a be ó si to nkana, lé eto bwamɔ mode.

9Ebe no ó sile Samari a bula dî e nye ó: «Nyá? Wáa mbi gwɔɔ Yʉden, lé eze jaʼ me modibe, mɛm, sile Samari ɨ?» (Tina, yé ó, oYʉden bé e boo bʉr o Samari, bé abe lé ebɨlan e bɨsɔʼɔ bɨmpwar.)

10Yesʉs ntɔʼ lɛɛ e nye ó: «Nkʉ go be ó be, gʉa etʉm Zyɛm lé entɨh-ntɨh bʉr ɨ, ndwe e mʉr lé ejaʼ go modibe nɛʼɛ, mpa go ô jaʼ nye modibe lé esah ɛ. Nye si ngbaa dwe nteme go ma.»

11Mʉma, nye e nye ó: «Da, go abe e dɛa. Edɛɛ nteme, lé é bul jaa si. Go e nkul esa yé, ó modibe, mé saha, ze kœb bɨna kaʼ kʉ ɨ? 12Mpam ga yina Yakɔb ó b'a liʼe bɨh bɛɛ e l'edɛɛ lɨ. Nye mʉr tɨʼ a be ó si de modibe mo tɨ. Bwan ndwe e l'otir be, si de. No ó, zê go lé ebuʼla ó, go lé elaa Yakɔb ɛ?»

13Yesʉs, nye e nye ó: «Mʉr nyiwɛh lé ede modibe maʼ ɛ, nye óbâʼle joʼo dweh modibe. 14Sa gwar, mʉr nyiwɛh óde modibe me ódwe nye e, nye aŋa ka joʼo dweh modibe, ebe, modibe me ódwe nye e, mé ólihba eno é leme we tʉŋlʉ, gumo tiʼ molu mo mpoʼ mɨmɛh, yé ódɨ sah ɛ.»

15Mʉma, nye e nye ó: «Da, dweʼ me modibe mo maa, me nkʉʼ di, aka bâʼle joʼo dweh modibe, nkʉ bâʼle ze wâʼ lé eze daa modibe.»

16Yesʉs, nye e nye ó: «Toʼ, to jebe njʉm go. Bɨn e nɔɔ bɨbɛh, bé òbula ze wâ.»

17Mʉma, nye e nye ó: «Me abe e njʉm.» Yesʉs, nye e nye ó: «Yé ó no! Gɨ lwib ocyecye é jɔʼ go lɛɛ ó, go abe e njʉm ɨ, 18ebe, go mu ó si bi ojʉm, pyal otɛn! No ó, mʉr bɨn e nɔɔ ndɨ é bananaʼ ɛ, nye ntʉʼ njʉm go. Gɨ kʉ lɛɛ ocyecye naa yɛɛ!»

19Mʉma, nye e nye ó: «Da, go ó kʉ be ngwiha mɨlɔb! Mɨ bee no. 20Bɨmpam bih, byé a ze ó wâʼ é l'ecwɨʼ lɨ, lé eze dwiibɨ Zyɛm. No ó, bɨn oYʉden bɛɛ, bé elɛɛ ó, gumo mʉr lé ejala le edwiibɨ nye e, yé ó njɨ Yerʉsalɛm.»

21Yesʉs, nye e nye ó: «Buʼla me: ewala lé ópyal é jɔʼ bɨn bé óbe, aka to Yerʉsalɛm, nkʉ é l'ecwɨʼ lɨ, ó bɨn dwiibɨ Zyɛm. 22Bɨn bʉr o Samari, bɨn bé apa kʉ gʉa mʉr bɨn ndɨ edwiibɨ ɨ. Bɨh oYʉden ó ndɨ egʉa nye, ebe, tiʼ molu mo mpoʼ mɨmɛh, yé eduho ó, é l'oYʉden. 23Sa gwar, ewala, lé eze—lé mu ó si pyal—jɔʼ mɨmpaŋ mɨ ompʉn, bé ódwiibɨ Zyɛm Sɔŋ é mɨsisim myɔɔ é l'ocyecye e, ebe, nye esaa ó, bʉr o dwiibɨ nye é mbi waa ɛ. 24Zyɛm, nye ó sisim. Ebe no, bʉr o ndɨ edwiibɨ nye e, bé ekʉ jala le esa no é mɨsisim myɔɔ, é l'ocyecye.»

25Mʉma, nye e nye ó: «Me egʉa ó, waa ndɨ Messie ɨ, óze—no, yé ó waa ndɨ ejebɔ ó, Krɨst: Lœma mulo mo Zyɛm ɨ. É jɔʼ nye óze e, nye ógʉa yeʼle bɨna ga bɨsa bɨnɨ bibyɛh.»

26Yesʉs, nye e nye ó: «Me ó ndɨ nye, mɛm, mʉr lé elwib e go nwa!»

27É jɔʼ yaa ó ompʉn mo Yesʉs, bé a ze bula, duho nkana ɛ. Bé ze jehe lé ebee nye lé elwib e mʉma nɨ. Abe e mʉr a dî yɛɛ ó: «Go lé esaa yé e nye?» Nkʉ ó: «Bɨn e nɔɔ bé elab yé?»

28Ebe no ó mʉma nɨ a liʼe dɛa modibe ye, bula to nkana, to jebe bʉr ɨ. Nye ó: 29«Ntaʼ, ze bee ga me wiʼ ɔɔ! Mʉr nwaʼ, nyi lɛɛ me sa yiyɛh me a sa yi ɔɔ! Zê nye óbɛm be Lœma mulo mo Zyɛm ɨ?» 30Bʉr ze tɨbla, lé eduho nkana, toŋɔ nko nye a be e.

31É jɔʼ mʉma a be, nye dina gʉʼ ɨ, ompʉn mo Yesʉs, bé a be ó lé elɛɛ e nye ó: «Yeʼle, paʼ de.» 32Yesʉs, nye e be ó: «Me e sa ede bɨn ndɨ agʉa ɛ.» 33Ebe no ó ompʉn, bé a to le edîila paʼra wɔɔ ó: «Zê nuu mʉr be ó si ze nye e mode ɛ?» 34Yesʉs, nye e be ó: «Mode mam, mé ó, me saʼ gwɨma mo mʉr a ntɨh me e, le efwahle syɛɛ nye a lɛɛ ó, me ntaʼ, ze sea ɛ. 35Bɨn bé elɛɛ ó: “Yi liʼ ongɔn onâ, jɔʼ eto é mɨngol, yé òpyal.” No ó, mɛm, me elɛɛ bɨn ó nɛɛ, paʼ dwɛʼ ga bɨpeme. Yé mu ó si pyal jɔʼ eze é mɨngol! 36Mʉr lé eze é mɨngol ɨ, nye ebi ó myɛna me. Sa nye lé esyɛŋ é mobeʼe e, yé ódi njʉmdia e njʉmdia. No ó, mbèl mompœʼ, bé e mʉr lé eze é mɨngol ɨ, bɨbɛh, bé esoho jwɨʼ gwar, 37ebe, yé cyecye ó: “Nwaʼ, nye eli, bè; nuu, nye eze é mɨngol.” 38Me a lomo bɨn ó, bɨn toʼ é mɨngol é peme bɨn bé a be, ali, abè e. Bʉr ofih ó b'a li le ebè, bɨn bɛɛ ka ze biʼ e be.»

39Buobuo bʉr o Samari bé a be é nkana yaa ɛ, bé a si jyɛʼ taa buʼo yɔɔ boo Yesʉs, ebe, mʉma nɨ a be ó si boʼlo ó: «Nye be ó si lɛɛ me sa yiyɛh me a sa ɛ.» 40É jɔʼ bé a ze nko Yesʉs a be e, bé ze jwɨʼla e nye ó, bé e boo nɔɔ diʼe Sukar. Yesʉs ze ja tɨʼ molu moba. 41Buobuo bʉr ntɔʼ jyɛʼ taa buʼo yɔɔ boo nye ebe lɔɔ Yesʉs a lɛɛ be e.

42Bé e mʉma nɨ ó: «Banana, bɨh bé aka buʼla njɨ ebe lɔɔ go. Bɨh bʉr o tɨʼ, bɨ joʼo lwib ye, le ekʉ gʉa ó, é si nwaʼ nyiwɛh, nye ó ndɨ Tiʼbʉr é l'efu e si nwaʼ nyiwɛh.»

Yesʉs lé etiʼ mwan

43Yesʉs, nye osi ja mʉʉ molu moba nɛʼɛ, nye ze mʉa, lé eto Galɨle, 44ebe, Yesʉs nye mʉr tɨʼ a be ó si boʼlo ó: «Ngwiha mɨlɔb, nye abe lé edweŋɔ kum é lal we.» 45Ebe no, é jɔʼ nye a pyal gʉʼ ɨ, bʉr o Galɨle, bé a be ó si bɨlan e nye, ebe, bé a be ó si bee sa yiyɛh nye a sa ɨ Yerʉsalɛm é jɔʼ bɛɛ, bé a to jeme ebʉʼ ɨ.

46Pie tɨ, Yesʉs ze to Kana, nkana Galɨle, nko nye a liŋ modibe monwoʼ mo rezɛŋ ɨ. Yé a be ɨ Kapernaʉm ó, e nuu sabene. Mwan we ó b'a be lé esyɛb. 47É jɔʼ nye a joʼo ó, Yesʉs, nyi duho Yʉda, nye mu ó Galɨle e, nye ntɔʼ to nko Yesʉs a be e. Nye a to ó, to jwɨʼla e Yesʉs, ó bé e nɔɔ, bé toʼ Kapernaʉm, ó Yesʉs toʼ, to tiʼ nye mwan a be, nye mu tiʼ le efie e.

48Ebe no ó Yesʉs a lɛɛ e nye ó: «Bɨn bé óbe é jɔʼ yiyɛh ó, ajyɛʼ taa buʼo yin boo me cye yiyɛh bɨn l'apa bee bɨdweʼle bɨ nkul wam ndwe e bɨsa bɨ jehe e.»

49Sabene waa, nye e nye ó: «Da, ntaʼ, bɨna toʼ mbɛr wam cye yiyɛh mwan wam l'apa fil mɨswɨh mɨ epihe e.»

50Yesʉs, nye e nye ó: «Toʼ mbɛr go. Mwan go ótiʼe.»

Mʉr nɨ ze buʼla lɔɔ Yesʉs a lɛɛ nye e, ze bula, to kwar we. 51Nye mu temezi nɛʼɛ, ze bɔma e l'osyɛl o mosa be. Bé a be ó lé edu nye. Bé e nye ó: «Mwan go, nyi tiʼe!» 52Ebe no ó nye a dî jɔʼ mwan a tiʼe e. Bé e nye ó: «Nye a tiʼe ó kʉʼ, é l'ewala egwar e bii kʉʼ. Ejyoo, lé a sie nye ó, é jɔʼ yaa.»

53Ebe no ó sɔŋ mwan waa a ka ze gʉa ó, yé a be ó é jɔʼ Yesʉs a lɛɛ e nye ó: «Mwan go ótiʼe» e. Bé e mbɛr bʉr we wiwɛh ze jyɛʼɔ taa buʼo yɔɔ boo Yesʉs.

54Lɨha, lé a be ó dweʼle nkul mba Yesʉs a sa pie jɔʼ nye a duho lal Yʉda, to di Galɨle e.

Currently Selected:

Yʉanes 4: ozmBad

Highlight

Copy