Lʉkas 20

Nkul mojwɨ̀ʼa mo Yesʉs, nye eduho nko?

(Mataos 21.23; Markus 11.27)

1É guu moho, Yesʉs a be ó é jahla bii mo Zyɛm tʉŋlʉ, lé eyeʼle bʉr, ndwe le elɛɛ be Mbɨambɨa Lɔɔ. Ojwɨɨ be opara bé e l'oyeʼle o motie ndwe e l'otamabʉr o lal «mpululu», 2ze dîŋɔ ó: «É wáa nkul mojwɨ̀ʼa go ndɨ esa mbi bɨsyɛɛla go lé esa biʼ ɛ? Go nteme go epa kʉ sa bye é die mo zé?» 3Yesʉs ntɔʼ bɨha e be ó: «Mɛm nteme muno ze dî bɨn tia. Bɨha ga me. 4Zé a pa kʉ dwe Yʉanes nkul ó, nye toʼ le edù bʉr? Zê Zyɛm ɛ? Zê bʉr ɛ?»

5No ó bé a ze timle lɔb waa paʼra wɔɔ. Bé ó: «ǃBɨna si bɨha ga ó: “Zyɛm ó b'a lomo nye” nɛʼɛ, nye óbâʼle dî ó: “Yé be no nɛʼɛ, ebe yé bɨn bé a baabuʼla nye e?” 6ǃBɨna si bɨha ga ó: “Bʉr o b'a lomo nye” nɛʼɛ, bʉr bɨbɛh, bé ólumo bɨna ga mokoʼ, ebe, bɛɛ bɨ kʉ gʉa ó, Yʉanes a be ó ngwiha mɨlɔb.» 7No ó bé a ka bɨha e nye ó: «Bɨh bé agʉa mʉr a dwe nye mojwɨ̀ʼa ó, nye toʼ le edù bʉr ɨ.» 8Yesʉs ntɔʼ lɛɛ e be ó: «Yé be no nɛʼɛ, me nteme, me ákwoʼ lɛɛ bɨn die e mʉr lé edwe me nkul mojwɨ̀ʼa ó, me saʼ bɨsyɛɛla bɨnɨ ɨ.»

Kɨkɛna bɨbɨbla bɨ osyɛl o mosa

(Mataos 21.33; Markus 12.1)

9Yesʉs ze lwib e kul oYʉden é zi kɨkɛna yi. Nye e be ó: «Yé a ze be ó, mʉr ze li peme, ze bè motin mo orezɛŋ tɨ. Pie tɨ, ze liʼe osyɛl o mosa e peme yaa, ó bé nkʉʼ dɨ dwe nye we nkɔb é jɔʼ nkono. Mʉr peme ze tɨ cyen, to di é guu lal fih mɨmbu mɨmbu. 10É jɔʼ nkono, yé a pyal ɨ, nye ze jebe syɛl mosa we, ze lomo nye boo osyɛl o mosa baa, ó bé dweʼ nye we paʼ mpumo a gumo é peme ye e. Osyɛl o mosa baa ze bî mwa mɨlʉmlʉ waa, foŋɔ nye, buulɔ nye mobo mobo. 11No ó nye a bâʼle lomo nuu mwa mɨlʉmlʉ fih. Bé ze bî nteme nye, lwɨɔ nye, foŋɔ nye, buulɔ nye tɨtoʼo. 12Nye ze bâʼle lomo mwa mɨlʉmlʉ lɛl. Nyiha ó byé a bɛble mopɨɨ ɨ, ntɔʼ foŋɔ nye. 13Mʉr peme ze lɛɛ ó: “A me kaʼ sa wâʼ nyá ɛ? Me muno ka ze lomo mwan wam, waa me ndɨ ebul kpɛl ɨ. Diŋa ó, osyɛl o mosa bam, bé ó e nkul edwaabe yɛɛ nye.” 14É jɔʼ osyɛl o mosa be, bé a bee mwan ɨ, byé ze lɛɛla paʼra wɔɔ ó: “Mbe ga: modila mo mʉr peme ó ma ze nɨ! Bɨna jʉʼo ga nye! Bɨliʼ mo sɔŋ we nye a ngbaa bi ɨ, byé nkʉʼ fuʼla mopoʼ ga mɨna!” 15No ó bé a ze pɛʼ nye é peme tʉŋlʉ, to jʉŋɔ nye é mpomo peme. Yé be no nɛʼɛ, bɨn bɛɛ bee ó, mʉr peme ósa nyá ɛ? 16Mɛm, me ebee ó, nye óze jʉ osyɛl o mosa baa bɨbɛh, ze cyel bʉʉ bʉr ofih é peme yaa.» É jɔʼ bʉr, bé a joʼo no e, bé ó: «Tɨtoʼo, yʉʉ sɔʼɔ, yé ákwoʼ syɛɛ ba no!»

17Yesʉs ze dwɛʼ be. Nye ze dî e be ó: «Yé be no nɛʼɛ, wáa lɔb ndɨ tila é Kalara Zyɛm ó:

“Ekoʼ ofim o mbɛr bé a pyeh ɨ,

lé mu ó ekoʼ lé esa ó bɨpab bɨ mbɛr, byé diʼe ocɨcyel ɨ”?

18Mʉr nyiwɛh ótwe é l'ekoʼ laa ɛ, nye óbwiʼ bɨpeh bɨpeh. Waa ekoʼ, lé óbila ɛ, nye ótwiʼlɨ.»

19Oyeʼle o motie ndwe e l'ojwɨɨ be opara, bé a be ó lé ebà bɨjwɨʼ bɨ emɛr Yesʉs é jɔʼ gwar yaa, ebe, bé a be ó si gʉa ó, nye a sa kɨkɛna yaa ó, bé ó ndɨ osyɛl o mosa, ó die le «osyɛl o mosa», lé a dɨ tublo ó be! Sa gwar, bé a be yɛɛ ó, lé ekpɛɛ mɨzɨze mɨ bʉr.

Tœa mo Kɛɛza

(Mataos 22.15; Markus 12.13)

20Bé ze taare lé ebaʼɔ nye, ze lomɔ bʉr o mpyɔm, nwɨɨla e l'ocɨcyel o bʉr, ó bé lam ó nye é mbi lwib nye óbɨha e be e, bé òkɛha nye é mobo mo ngoman. 21No ó bé a ze lɛɛ e nye ó: «Yeʼle, bɨh bé ekʉ gʉa ó, sikʉlʉ go lé edwe bɨh ɨ, yé ó njɨ cɨcyel. Go ádwaabe bʉr é lɔb mompom mɔɔ. Go eyeʼle bɨh ekœʼ ebò e cyen Zyɛm lé ekpɛl ó, bʉr kœʼœ œ. 22Zê motie ga mɨna, mé ekamle mʉr lé ejɛna tœa mo Kɛɛza ɛ? Zê tœa, yé abe kɔmlʉ ɛ?»

23Mpʉ Yesʉs a gʉa mopɨʼ mɔɔ ɛ, no ó nye a lɛɛ e be ó: 24«Paʼ lɛʼle ga me saŋ denie. Dweʼle mpom le die mo zé ndɨ lula é saŋ wiʼ ɨ?» No ó bé a lɛɛ ó: «Byaa mo Kɛɛza ó nɨ!» 25No ó Yesʉs a lɛɛ e be ó: «Dweʼ ga be Kɛɛza bɨsa mo Kɛɛza; bɨn bé à dwe Zyɛm byaa mo Zyɛm.» 26Bé a baabe e nkul eka dwe nye mobe é mokan nye a lwib é mih mɨzɨze mɨ bʉr ɨ. Bé a si jehe mpɨha we. Bɨbɛh twe é leb.

Sikʉlʉ é lɔb pɛ̀ha foo

(Mataos 22.23; Markus 12.18)

27No ó, bʉʉ oSadwisyɛŋ, (bʉr o ndɨ elɛɛ ó, odwè, bé ákwoʼ pàh é mofoo e), bé a ze pyal boo Yesʉs, 28ze dîŋɔ nye motia, é mbi wi: «Yeʼle, Moyiz a be ó si tiile bɨna ga etie ó: “ǃƗ mbɛa mʉr, wé óbe si dwè, liʼe kuho mʉma we, luʼo mwan nɛʼɛ, yé ejala ó, ncyom we, nye baʼ kuho mʉma we waa, bé e nɔɔ nkʉʼ bya bwan é l'efu e tʉl.” 29No ó, yé a ze be ó, obɨɔ tambɛl, nyɔŋ ngwar, sɔŋ ngwar. Waa modweʼe ze ba mʉma. Di é di di di, nye ntɔʼ dwè, aliʼe mwan. 30Waa mba ntɔʼ ba kuho waa, dwè, aliʼe mwan. 31Waa lɛl jwɨʼ gwar. To pyal é bɨbɛh tambɛl, bé a dwè ó, aliʼe bwan. 32Pie tɨ, mʉma waa nteme ka ze dwè. 33No ó, é dobo bɨn lé elɛɛ ó, bʉr, bé ópàh é mofoo e, nye óka fuʼla mʉma mo zé? Ebe, bɨbɛh tambɛl bé a be ó si ba nye!» 34No ó Yesʉs a bɨha e be ó: «Bʉr o mbi jɔʼ yi, bé ebɛa le ecenɔ nteme é moba. 35Sa gwar, odwè Zyɛm lé ebee ó, bé ejala le epàh, to di é lal we pie e l'esie e mbi jɔʼ yiʼ ɨ, bé aŋa ka bɛa, nkʉ cenɔ é moba, 36ebe, bé aŋa ka bâʼle dwè. Bé óbe ó mpʉ beengles. Bé ó bwan mo Zyɛm, ebe, bɨ bɛa pàh. 37Moyiz a si bɛa lɛɛ é kpɛŋlɛm ó, bʉr, bé ópàh é mofoo. Nye a lɛɛ no ó, gumo nye a lwib é lɔb njʉl siʼe wé a duo teme kpaʼ ɛ. Nye a jebe Da ó, Zyɛm mo Abraham, Zyɛm mo Ɨzak ndwe e Zyɛm mo Yakɔb.»

38Yesʉs ze ko tɨʼ ó: «No, yé elɛʼle ó, Zyɛm, nye ó Zyɛm bʉr o ndɨ mɨkubla ɛ. Nye abe waa odwè, ebe, bʉr bɨbɛh, bé ó e tiʼ é nko paʼ we.» 39Bʉʉ oyeʼle o motie, bé a lɛɛ ó: «Yeʼle, gɨ kʉ gʉa lwib!» 40Bé a baaka dihbe ó, bé dîʼe nye mʉʉ motia.

David bé e Lœma mulo mo Zyɛm

(Mataos 22.41; Markus 12.35)

41No ó Yesʉs a lɛɛ e be ó: «Ebe yé bʉr, bé lé elɛɛ ó, Lœma mulo mo Zyɛm, nye ó mwan mo David ɨ? 42Ebe, David nye mʉr tɨʼ a tile é Kalara OSam#20.42 Nye a tile no ó, ɨ Sam 110.1. ó:

“Da a lɛɛ e Tî wam ó:

‘Diʼe si wâ, é mbo ejʉm wam,

43to pyal é jɔʼ me ósa bʉr o dɔm bo ó, bé diʼe cyela mokʉ mo e!’”»

44Yesʉs ntɔʼ ko tɨʼ ó: «David a jebe Lœma mulo mo Zyɛm ó, “Tî wam”. A wáa mbi Lœma mulo mo Zyɛm ndɨ e nkul ebe mwan mo David ɨ?»

Yesʉs lé ebâm e l'oyeʼle o motie bé e l'oFarizyɛŋ

(Mataos 23.1; Markus 12.38; Lʉkas 11.39)

45Mpʉ ntuntuma bʉr, yé a joʼlo-joʼlo nye e, Yesʉs ze lɛɛ e l'ompʉn be ó: 46«Dìʼe ga ncye e l'oyeʼle o motie. Bé ekpɛl to le ejaala, e bɨdur é jaa jaa é guu-gu-guu, ó bʉr taara soho be, le edwiibɨ be é mobɨm bɨnkana. Bé ekpɛl-kpɛl nteme ó, njɨ bɨdia bɨ efoʼ é mompah mɨnjwɨʼla ndwe e mɨmpaŋ bɨdia bɨ dolo, gumo bé lé ede dina ɛ. 47Bé esà-sà mɨkuho, dɛn-dɛn bɨsa bibyɛh myé ndɨ eliʼ e tɨʼ ɨ. Bé ejwɨʼla-jwɨʼla nteme e Zyɛm ó, bul mokan, lé esa lɛʼla. Bé ó ngo bul dweŋɔ mobe le ekabɔ bɨntɨʼa bɨ tɨ.»

Currently Selected:

Lʉkas 20: ozmBad

Highlight

Copy