Mataos 19
19
Ejwɨɨ le eba
(Markus 10.1-12; Lʉkas 16.18)
1É jɔʼ Yesʉs a sil lwib no e, nye ze mʉa ɨ Galɨle, ze to lal Yʉda, ntɔʼ ntaa, to é pɨn Yʉrdɛŋ nkɔm-nkɛɛ. 2Mpampaʼ bʉr, bé ze du nye gʉ. Nye ntɔʼ tiʼ mɨsyoblʉ myé a be é ntuntuma bʉr yaa ɛ.
3No ó bʉʉ oFarizyɛŋ, bé a ze fum nye a be e, lé eze lamɔ nye é mbi lwib nye óbɨha e be e. No ó bé a ze dî e nye ó: «Zê motie ga mɨna, mé akamle mʉr ó, nye buula myɛl ebe mbi ebebe wiwɛh nye sa nye e?» 4Nye ze dî e be ó: «Bɨn bé a baasi láa ó, é l'etɔɔrʉ, Zyɛm Kwihbʉr a cye be ó, nwaʼ, mʉrʉm; nuu, mʉma ɛ?» 5Nye ze bâʼle lɛɛ ó: «Ebe no ó mʉrʉm óliʼe sɔŋ e nyɔŋ, to nara e mʉma we e. Bɨbɛh oba, bé óbe ó nya e puno, sʉn ngwar. 6Bé aka be oba, njɨ ngwar. Ebe no, adɛɛ ga sa Zyɛm, nyi nɛr ɨ.» 7Bé ntɔʼ bâʼle dî e nye ó: «Yé be no nɛʼɛ, ebe yé Moyiz a tiile etie ó, ǃɨ mʉr si kpɛl buulo myɛl nɛʼɛ, nye tila kalara ejwɨɨ le eba, dwe myɛl, nye òbir nye e?» 8Nye ó: «Moyiz a fuo tiile etie laa ó, bɨn nkʉʼ bir-bir bʉba bɨn ó, ebe, bɨn bé é bul lele mɨlʉ. To kœb ó, é l'etɔɔrʉ, etie laa, lé a baabe tɨ. 9Me elɛɛ bɨn ó nɛɛ: ǃɨ mʉr si buulo myɛl—nyɛɛ yɛɛ l'asa mɨfyɛba—ntɔʼ ba mʉma fih nɛʼɛ, nyi sa mɨfyɛba ó tɨʼ ɨ.»
10No ó ompʉn be, bé a ze lɛɛ e nye ó: «Yé be ó, tiʼ mʉma e mʉrʉm, yé óbe no nɛʼɛ, lɛɛ ó, yé agum ka jala ó, mʉr baʼ.» 11Yesʉs ze lɛɛ e be ó: «Ntʉʼ bʉr bɨbɛh ndɨ e nkul enʉa lɔɔ wi. Bʉr o b'a taare dweŋɔ nkul waa ɛ, bé ome ó ndɨ e nkul enʉa we. 12Ebe, é bʉr o ndɨ aba ɛ, yé e bʉr o ndɨ bɨmpwaʼre duho é mɨmo mɨ onyɔŋ bɔɔ ɛ. No nteme, yé e baa lé ecwɨhɔ cwɨhɨ ebe bʉr ofih lé ecwɨh be e. Yé nteme, yé e baa lé etil bé bʉr o tɨʼ bʉba, ó bé nkʉʼ ni é jwɨ̀ʼa mo Da ɛ. Waa ndɨ e nkul enʉa lɔɔ wiʼ ɨ, nye nʉŋa we.»
Yesʉs lé esʉ bwɔɔncyom mocyɛʼ mo mpom
(Markus 10.13-16; Lʉkas 18.15-17)
13Bʉr ntɔʼ ze nye e bwan bɔɔ, ó nye kɛlɨ be mobo le ejwɨʼla é l'efu lɔɔ. Ompʉn be ze bâm e l'obyɛl o bwan, ó bé l'ayi bâʼle sa no. 14Yesʉs nyɛɛ ze lɛɛ e be ó: «Birɨ ga bwɔɔncyom, bé ntaʼ boo me. Afu fo ga be, ebe, jwɨ̀ʼa mo Da, yé cyela ó, é l'efu e bʉr o ndɨ mpʉ be e.» 15Nye ntɔʼ kɛl bwan baa mobo, ze laa gumo yaa.
Mbil bɨsa
(Markus 10.17-31; Lʉkas 18.18-30; 13.30)
16Nuu mʉr ze dihle nko Yesʉs a be e, ze dî e nye ó: «Yeʼle, me saʼ yáa mpaŋ syɛɛla é l'efu ó, me biʼe tiʼ molu mo mpoʼ mɨmɛh?» 17Yesʉs ze bɨha e nye ó: «Paʼ taare bɨha me tia nwa. Ebe yé go lé edî me tia é lɔb sa ndɨ é mbɨa ɛ? Njɨ mʉr ngwar ó di é mbɨa ɛ. Yé be ó, go egwɨm bi tiʼ molu mo mpoʼ mɨmɛh nɛʼɛ, duʼo motie.» 18Soho waa ze dî e nye ó: «Maa máa?» Yesʉs ze bɨha e nye ó: «Yé ó tila ó: “Ajʉ mʉr. Asa mɨfyɛba. Adíbe. Abuʼo mɨɔ go mʉr lɔb. 19Dwaaba sɔŋ e nyɔŋ go#19.19 Dwɛʼa Mɨtoʼ 20.12-16, ndwe e Motie 5.16-20.,” ndwe nteme, “Go kpɛlɨ mɨɔ go mʉr mpʉ go lé ekpɛl go mʉr tɨʼ ɨ#19.19 Dwɛʼa Mɨtiila 19.18..”»
20No ó ma soho waa a ze bɨha e nye ó: «Mɨ du motie monɨ mɨmɛh. Yé ndɨ eka sa me sɔɔlʉ ɛ?» 21Yesʉs ze lɛɛ e nye ó: «Yé be ó, go egwɨm kumo é l'ombɨmbɨa é mɨpaʼ mimyɛh nɛʼɛ, toʼ, to bɛma bim bɨsa go ndɨ e bye e. Go à dwe baanteʼenteʼe o bʉr mɔn tɨ. É jɔʼ yaa ó go óbi okum e l'ogbaa twiha é lal mo Zyɛm ɨ. Pie tɨ, go òze du me.» 22É jɔʼ ma soho waa a joʼo mpɨha waa ɛ, nye ntɔʼ bula é gœʼra-gœʼra e mocyɛʼ mo nyʉl, ebe, nye a be ó é twiha bɨsa.
23Yesʉs ze lɛɛ e l'ompʉn be ó: «Me elɛɛ bɨn cyecye ó nɛɛ: yé é bul kɔbla lé eni é jwɨ̀ʼa mo Da é jɔʼ mʉr ndɨ e l'okum e l'ogbaa twiha ɛ! 24Me ebâʼle lɛɛ e bɨn ó nɛɛ: é mpʉ yé ndɨ é kɔbla ó, kamtʉl laŋa é l'egʉa e ndondo e, jwɨʼ gwar e gwar yaa nteme ó ndɨ é bul kɔbla ó, mbil bɨsa niʼe é jwɨ̀ʼa mo Zyɛm ɨ.» 25É lwib nɨ, ompʉn be ntɔʼ laŋle jehe nye, ze dîila ó: «Yé be no nɛʼɛ, zé nyɛɛ ókoʼo lé ebi tiʼ molu mo mpoʼ mɨmɛh ɛ?» 26Yesʉs ze dwɛʼ be é tʉʉʉŋ, ntɔʼ lɛɛ e be ó: «Bʉr, bé ákwoʼ bi tiʼ molu mo mpoʼ mɨmɛh ebe syɛɛla yɔɔ bé bʉr o tɨ. Sa gwar, Zyɛm ó ndɨ e nkul ekoʼo bɨsa bibyɛh.»
27Pyɛr ntɔʼ nʉa lwib. Nye e nye ó: «Paʼ bee! Bɨh bɨ liʼe bɨsa bih bibyɛh, njɨ lé edu go. A bɨh bɛɛ, bé óbi yé?» 28Yesʉs ze bɨha e be ó: «Me elɛɛ bɨn cyecye ó nɛɛ: bɨn bʉr o b'a du me é koo pihe e, é jɔʼ Mwan mo Mʉr ódi é dia taʼa ye é jɔʼ dɔnwa bɨsa bibyɛh ɛ, bɨn bé ódi é bɨdia bɨ taʼa bin ewʉm e bɨba. Bɨn bé ótiʼe moveh mo bwa b'Ɨzraɛl ewʉm e moba mɨlɔb. 29Mʉr nyiwɛh ndɨ si liʼe mɨmbɛr mye, obɨɔ be, okɛl be, sɔŋ we, nyɔŋ we, bwan be, nkʉ bɨpeme bye é lɔb wam ɨ, nye óbula bi bye zɔʼ nter, bi nteme tiʼ molu mo mpoʼ mɨmɛh. 30Sa gwar, buobuo bʉr o ndɨ “mofoʼ” e, bé óliʼ é pihe. Baa ndɨ “mopihe” e, bé ócyɛb é mofoʼ.»
Currently Selected:
Mataos 19: ozmBad
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
