Mataos 22
22
Kɨkɛna ebʉʼ le eba
(Lʉkas 14.15-24)
1Yesʉs a be ó lé ebâʼle sa be bɨkɨkɛna. Nye ó: 2«Jwɨ̀ʼa mo Da, yé enwɨɨla ó e guu njwɨɨbʉr wé a cyel zɔɔ eba é l'efu e mwan we e. 3Nye ze lomo osyɛl o mosa be ó, bé toʼ, to jebe bʉr o nye a baŋle é zɔɔ waa ɛ. Bé ntɔʼ bene lé eze. 4Nye ze bâʼle lomo bʉʉ osyɛl o mosa be. Nye ó: “Lɛŋɨ ga e bʉr me a baŋle ó nɛɛ: Mɨ sil kaʼ dina ebe bɨn. Mɨ tiʼe mɨnjʉm bɨntɛɛ e bwa bɨntɛɛ ndɨ é nwaʼbe e. Sa yiyɛh mu ó kwɨmla. Ntaʼ ga é zɔɔ eba.” 5Bʉr o nye a baŋle e, bɛɛ ze pyeh lɔɔ we waa, atoŋɔ. Bé a sa-sa ó: nwaʼ, to é ye peme; nuu, to é we mbɛr mompɛma. 6Baa bʉʉ, mɛrɔ osyɛl o mosa onɨ, saŋɔ be cere, jʉŋɔ be. 7Njwɨɨbʉr waa, wé ze kpaa empime, ze lomo bɨzima bye, le eto jʉ ojʉl o bʉr baa, le ediʼ nkana yɔɔ mɨfu. 8Pie tɨ, nye ze lɛɛ e l'osyɛl o mosa be ó: “Zɔɔ eba nyɛɛ, dina ó kwɨmla. No ó, bʉr me a taare baŋle e, bé ajala le edi tɨ. 9Ebe no, cyɛba ga é moman mɨmpaʼa. Bɨn bé à baŋle mʉr nyiwɛh bɨn bé ófuuba e nye e. Nye ntaʼ é zɔɔ eba!” 10Osyɛl o mosa be ntɔʼ to é mozi mɨmɛh, to le egohlo bʉr o b'a bɔma-bɔma e be e, le bɨbɨbla bɨ bʉr ndwe e baa be embɨa. Mbɛr zɔɔ eba ze loŋlo e bʉr, bɨbɛh ondindil lé ede.
11«É jɔʼ njwɨɨbʉr, wé a ni mbɛr ɨ, wé ze dwɛʼ bʉr o b'a be ondindil lé ede e. Nye ka bee nɛʼɛ, nuu mʉr, abe e mɨkan mɨ zɔɔ eba é nyʉl! 12Nye ze dî e nye ó: “Fo wam! Ebe yé go ze wâ, abwar kan zɔɔ eba ɛ?” Mʉr waa kar ebɨha sɔʼɔ. Nye a kʉ di ó diʼe, njɨ é jwɨm. 13Njwɨɨbʉr, wé ze lɛɛ e l'osyɛl o mosa be ó: “Kaʼa ga nye mobo e mokʉ. Bɨn guha nye kʉl é l'edurʉ le ankom-nkom, nko nye óto dɨ time le elwaare moje e.”»
14Yesʉs ze ko tɨʼ ó: «Ebe, baa lé ebaŋlɔ ɛ, bé é buo. Sa gwar, baa ndɨ mɨpɛha ɛ, bé ó titia.»
Ejɛna tœa mo Kɛɛza
(Markus 12.13-17; Lʉkas 20.20-26)
15OFarizyɛŋ ze to bòno pɨʼ ó, bé lam ó Yesʉs é mbi lwib nye óbɨha e be e. 16No ó bé a ze lomo bʉʉ ompʉn bɔɔ nko nye a be e, bé e bʉr o mpoʼo Erod. Bé e nye ó: «Yeʼle, bɨh bɨ gʉa ó, go elɛɛ ó ocyecye. Go nteme, go edwe bɨh sikʉlʉ tiibe e Zyɛm é l'ocyecye. Sa mʉr fih lé ebee é we paʼ ɛ, yé alɛɛ go sɔʼɔ. Go ádwaabe bʉr é lɔb mompom mɔɔ. 17Ebe no, lɛŋɨ bɨh é go paʼ, nkʉ motie ga mɨna, mé akamle mʉr ó, nye jɛna ga Kɛɛza tœa ɛ? Zê yé ó kɔmlʉ ó, mʉr jɛna nye nya ɛ?»
18Tina, yé ó, Yesʉs nyɛɛ lé ekʉ gʉa bɨbebebebe bɨjwɨʼ byɔɔ. Nye ze dî be ó: «Bɨn baanya-bɨkʉʉŋʉ ba! Ebe yé bɨn lé ejwɨʼla saa elam me é mbi lwib me óbɨha e bɨn ɨ? 19Lɛʼla ga me mɔn bɨn lé ejɛna-jɛna tœa e tɨʼ ɨ.» Bé ntɔʼ lɛʼle nye saŋ denie. 20Yesʉs ntɔʼ dî e be ó: «Dweʼle mpom le die mo zé ndɨ lula é saŋ wiʼ ɨ?» 21Bé e nye ó: «Yé ó byaa mo Kɛɛza!» Nye e be ó: «Ebe no, dweʼ ga Kɛɛza bɨsa mo Kɛɛza; bɨn bé à dwe Zyɛm byaa mo Zyɛm.» 22Njoʼa bé a joʼo nye lé elɛɛ no e, bé ntɔʼ jehe nye mɨnʉm mɨmbeʼ, liʼɔ nye, toŋɔ.
Sikʉlʉ é lɔb pɛ̀ha foo
(Markus 12.18-27; Lʉkas 20.27-38)
23É dobo egwar laa nteme ó, oSadwisyɛŋ, bé a ze pyalɔ boo Yesʉs ɨ. (OSadwisyɛŋ bɛɛ, bé ó baa lé elɛɛ-lɛɛ ó, odwè, bé ákwoʼ pàh é mofoo e.) Bé ze dî e nye tia ó, é mbi wi: 24«Yeʼle, Moyiz a be ó si tiile bɨna ga etie lɨ. Lé ó tila ó: “ǃƗ mbɛa mʉr, wé si dwè, aliʼe mwan nɛʼɛ, yé ejala ó, ncyom we, nye baʼ kuho mʉma we. Bé e mʉma waa nkʉʼ bya bwan é l'efu e tʉl.” 25To kœb ó, yé a be bɨh wâʼ ó e bʉʉ bɨɔ tambɛl. Waa modweʼe ze ba mʉma. Di é di di di, nye ntɔʼ dwè, aliʼe mwan. Mpʉ nye a baabya ɛ, nye ntɔʼ liʼ é mobo mo ncyom we, waa a bɔma nye e. 26Syɛɛla yaa pyal é waa mba, le waa lɛl, to-to ó toʼ, to pyal é waa tambɛl. 27É jɔʼ bé a be si sil dwè e, mʉma waa ka ze dwè. 28Ebe no, é dobo bɨn lé elɛɛ ó, bʉr bé ópàh é mofoo e, mʉma waa ógumo e zé é l'obɨɔ tambɛl ba? Ebe, bɨbɛh, bé a be ó si ba nye!»
29Yesʉs ze bɨha e be ó: «Bɨn bé esa bɨgwìh, ebe, bɨn bé agʉa Kalara Zyɛm, nkʉ nkul we. 30Sa bɨn ndɨ agʉa ɛ, yé ó, é jɔʼ bʉr, bé óbe si pàh é mofoo e, bé aŋa ka bɛa, nkʉ cenɔ é moba. Bé ódi-di ó, mpʉ beengles lé ebɛa di é jobo kʉ ɨ. 31ǃBɨn si dî me tia é nko paʼ odwè, le mpʉ bé ópàh nɛʼɛ, zê bɨn bé a baasi láa sa Zyɛm Sɔŋ a tile bɨn tɨʼ ɨ? 32“Me ó Zyɛm mo Abraham, Zyɛm mo Ɨzak, le Zyɛm mo Yakɔb.”»
Yesʉs ze ko mokan maʼ ó: «No, yé elɛʼle ó, Zyɛm, nye ó Zyɛm bʉr o ndɨ mɨkubla ɛ. Nye abe waa odwè.»
33Ntuntuma bʉr yé a be tɨʼ ɨ, yé ze jehe sikʉlʉ Yesʉs a dɨ dwe be e.
Etie lé elaa motie mɨmɛh ɛ
(Markus 12.28-34; Lʉkas 10.25-37)
34É jɔʼ oFarizyɛŋ, bé a joʼo ó, Yesʉs a be ó si pɨr oSadwisyɛŋ mɨnʉm ɨ, bé ntɔʼ syɛŋa gumo yaa é lɔb we. 35Nuu mʉr é sama yɔɔ a be yeʼle motie e, ze lam Yesʉs é mbi lwib nye óbɨha e nye e. No ó nye a ze dî e nye ó: 36«Yeʼle, é motie ga mɨna, láa etie ndɨ é bul bwaʼ ɛ?» 37Yesʉs ze bɨha e nye ó: «Etie ndɨ é bul bwaʼ ɛ, lé ó: “Kpɛlɨ Sɔŋ go Da Zyɛm e leme go wiwɛh, e sisim go wiwɛh ndwe e pɨʼ go nyiwɛh.” 38Lɨha, lé ó ndɨ é l'efoʼ. Lé nteme, lé ó etie ndɨ é bul bwaʼ ɛ. 39No ó laa emba, bé e laa le efoʼ, mé edile ó, jwɨʼ gwar. Lɨha, lé ó: “Kpɛlɨ mɨɔ go mʉr mpʉ go lé ekpɛl go mʉr tɨʼ ɨ.” 40Motie moba monɨ, mé ó etin e motie mo Moyiz mɨmɛh, ndwe e sikʉlʉ yiyɛh ogwiha o mɨlɔb, bé a dwe e.»
David bé e Lœma mulo mo Zyɛm
(Markus 12.35-37; Lʉkas 20.41-44)
41Mpʉ oFarizyɛŋ, bé a be, bé mu si syɛŋa gumo yaa ɛ, Yesʉs ntɔʼ dî be tia nwaʼ ó: 42«Bɨn bé epa kʉ jwɨʼ é yé, tiibe e Lœma mulo mo Zyɛm ɨ? Nye mwan mo zé?» Bé ntɔʼ bɨha e nye ó: «Nye ó mwan mo David.» 43Yesʉs ze dî e be ó: «A, ebe yé David nye mʉr tɨ, é zi mo Mbɨambɨa Sisim, a jebe Lœma mulo mo Zyɛm ó, “Tî wam” ɨ? Nye a lɛɛ ó#22.43 Dwɛʼa Sam 110.1.:
44Da a lɛɛ e Tî wam ó:
“Diʼe si é nko paʼ mbo ejʉm wam,
to pyal é jɔʼ me ósa bʉr o dɔm bo ó, bé diʼe cyela mokʉ yo e!”
45David a jebe Lœma mulo mo Zyɛm ó, “Tî wam”. É mpʉ yé ndɨ no e, wáa mbi Lœma mulo mo Zyɛm ndɨ e nkul ebe mwan mo David ɨ?»
46Mʉr a baabe e nkul ebɨha tia we. Pie jɔʼ yaa, mʉr a baaka dihbe lé entɛŋ nye tia.
Currently Selected:
Mataos 22: ozmBad
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
