GÉNESIS 11
11
Babel torre
1Kay pachapin karqan ch'ulla rimaylla, kikin ch'ulla simikunallataq. 2Inti lloqsimuy kinraymanta runakuna puririspataq, Sinar hallp'api pampata tarirqanku, chaypin tiyarqanku. 3Hinaspan ninakurqanku:
—Haku, ladrillota ruwasunchis, hinaspa ninapi kanasunchis, nispa. Ladrillon ruminku karqan, breataq t'urunku karqan. 4Ninakullarqankutaq:
—Haku, huk llaqtata perqasunchis, hanaq pachakama aypaq torretawan. Mentasqa runataq kasunchis, kay pachantinman ama ch'eqesunchu, nispanku.
5Hinan Señor Diosqa uraykamurqan runakunaq perqasqan llaqtata torretawan rikunanpaq. 6Hinaspanmi Señor Diosqa nirqan:
—Kayqa runakunaqa ch'ullallan, llapankutaq huk rimaynillayoq kanku. Ruwaytan qallarinkuña, kunantaq paykunata mana imapas hark'ayta atinqachu ruway yuyaykunankuta. 7Kunanqa uraykusunchis, hinaspa chaypi rimayninkuta t'ikrarqarisunchis, ama rimasqankuta entiendenakunankupaq, nispa.
8Ahinatan Señor Diosqa chaymantapacha kay pachantinman paykunata ch'eqechirqan, chay hinapitaq llaqta perqayta qollupurqanku. 9Chayraykun chaypa sutinqa Babel #Hebreo simipi Babelqa “rawirqarisqa” nisqa hinan. nisqa, chaypi Señor Diosqa pachantin rimayta t'ikrarqarisqanrayku, chaymantapacha kay pachantinman paykunata ch'eqechisqanrayku ima.
Sempa mirayninkuna
10Kaykunan Sempa mirayninkuna. Millp'uq unu iskay wataña pasaqtinmi, Semqa pachak watayoq kashaspa Arfaxadta churiyarqan. 11Arfaxadta churiyasqan qhepatataq Semqa kawsarqan phisqa pachak watatawanraq, churiyallarqantaq qhari wawakunatapas warmi wawakunatapas.
12Arfaxadmi kinsa chunka phisqayoq watayoq kashaspa churiyarqan Salata. 13Salata churiyasqan qhepatataq Arfaxadqa kawsarqan tawa pachak kinsayoq watatawanraq, churiyallarqantaq qhari wawakunatapas warmi wawakunatapas.
14Salan kinsa chunka watayoq kashaspa churiyarqan Heberta. 15Heberta churiyasqan qhepatataq Salaqa kawsarqan tawa pachak kinsayoq watatawanraq, churiyallarqantaq qhari wawakunatapas warmi wawakunatapas.
16Hebermi kinsa chunka tawayoq watayoq kashaspa churiyarqan Pelegta. 17Pelegta churiyasqan qhepatataq Heberqa kawsarqan tawa pachak kinsa chunkayoq watatawanraq, churiyallarqantaq qhari wawakunatapas warmi wawakunatapas.
18Pelegmi kinsa chunka watayoq kashaspa churiyarqan Reuta. 19Reuta churiyasqan qhepatataq Pelegqa kawsarqan iskay pachak isqonniyoq watatawanraq, churiyallarqantaq qhari wawakunatapas warmi wawakunatapas.
20Reumi kinsa chunka iskayniyoq watayoq kashaspa churiyarqan Serugta. 21Serugta churiyasqan qhepatataq Reuqa kawsarqan iskay pachak qanchisniyoq watatawanraq, churiyallarqantaq qhari wawakunatapas warmi wawakunatapas.
22Serugmi kinsa chunka watayoq kashaspa churiyarqan Nakorta. 23Nakorta churiyasqan qhepatataq Serugqa kawsarqan iskay pachak watatawanraq, churiyallarqantaq qhari wawakunatapas warmi wawakunatapas.
24Nakormi iskay chunka isqonniyoq watayoq kashaspa churiyarqan Tareta. 25Tareta churiyasqan qhepatataq Nakorqa kawsarqan pachak isqonniyoq watatawanraq, churiyallarqantaq qhari wawakunatapas warmi wawakunatapas.
26Taremi qanchis chunka watayoq kashaspa churiyarqan Abramta, Nakorta, Harantawan.
Tarepa mirayninkuna
27Kaymi Tarepa mirayninkuna. Taremi churiyarqan Abramta, Nakorta, Harantawan. Haranqa churiyarqan Lot-ta. 28Harantaq nacesqan Kaldea suyu Ur llaqtapi wañukapurqan taytan Tarepa ñawpaqentaraq.
29Abrammi casarakurqan Saraiwan, Nakortaq casarakurqan Haranpa ususin Iskaq ñañan Milkawan. 30Saraitaq mana wachakuq karqan, manataq wawan karqanchu.
31Taremi Abram churinta pusarikurqan, nieton Lot-tawan, Abrampa warmin Saraitawan, hinaspan paykunawan lloqsipurqan Kaldea suyu Ur llaqtamanta, Canaán suyuman ripunanpaq, ichaqa Harankama hamuspataq chaypi tiyakapurqanku. 32Taremi iskay pachak phisqayoq watayoq kashaspa Haranpi wañukapurqan.
Currently Selected:
GÉNESIS 11: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
