JUAN 9

Ñawsa naceq runata qhawarichisqan

1Purishaspanmi Jesusqa rikurqan ñawsapuni naceq runata. 2Yachachisqankunataq payta tapurqanku: —Yachachikuq, ¿imanaqtintaq kay runaqa ñawsa nacerqan? ¿Tayta-mamanpa huchanmantachu? Icha, ¿kikinpa huchanmantachu? nispa.

3Jesustaq nirqan: —Manan kikinpa huchanmantachu, manataqmi tayta-mamanpa huchanmantapaschu ñawsaqa nacerqan, aswanpas Diospa ruwayninkuna paypi rikuchisqa kananpaqmi. 4P'unchayraq kashaqtinqa kachamuwaqniy Diospa ruwanankunata llank'anaykupunin, tutayaqtinmi ichaqa mana pipas llank'ayta atinqañachu. 5Kay pachapi kashanaykamaqa runakunatan k'anchasaq, nispa.

6Chayta nispataq pampaman thoqarqan, thoqayninwan t'uruchaspataq ñawsaq ñawinta t'uruwan llusiykurqan. 7Hinaspan nirqan: —Phaway, Siloé estanquepi mayllikamuy (Siloé sutiqa Kachasqa ninantan nin), nispa.

Chaymi ñawsaqa rispa mayllikamurqan, hinaspan qhawashaq kutimpurqan. 8Hinaqtinmi wasi-masinkunaqa ñawpaq mañapakusqanta rikuqkunapiwan nirqanku: —¿Manachu kayqa tiyaykuspa limosna mañapakuq? nispa.

9Wakinmi nirqanku: —Arí, paypunin, nispa.

Wakintaq nirqanku: —Manan paychu, paymanqa rikch'akullanmi, nispa.

Chay runataq willakurqan: —Ñoqan chay ñawsaqa kani, nispa.

10Hinan payta nirqanku: —¿Imaynatan ñawiykiqa kicharirqokurqan? nispa.

11Chaymi payqa nirqan: —Jesús sutiyoq runan t'uruchaspa ñawiyta llusiykuwarqan, hinaspan niwarqan: Siloeta rispa mayllikamuy, nispa. Rispaytaqmi mayllikamurqani, hinaspan qhawarirqani, nispa.

12Chaymi payta nirqanku: —¿Maypin chay runa kashan? nispa.

Paytaq nirqan: —Manan yachanichu, nispa.

Fariseokunaq ñawsata tapupayasqanku

13-14Jesuspa t'uruchaspan ñawsaq ñawinta qhawarichisqanqa samana p'unchaymi karqan. Chaymi ñawsa karqan chay runata fariseokunaman*f** pusarqanku. 15Hinan fariseokunaqa*f** payta tapurqanku imaynatachus qhawarisqanta. Paytaq fariseokunata*f** nirqan: —T'uruwanmi ñawiyta llusiykuwarqan, hinan mayllikamuspay qhawapushani, nispa.

16Chaymi wakin fariseokunaqa*f** nirqanku: —Chay runaqa manan Diosmantachu, samana p'unchayta mana waqaychasqanrayku, nispa.

Wakintaq nirqanku: —Huchasapa runaqa manan kay milagrokunata ruwayta atinmanchu, nispa. Paykuna purataq yuyayninkuta mana tupachiyta atirqankuchu.

17Chaymi ñawsa karqan chay runata wakmanta tapurqanku: —Qanri, ¿ima ninkitaq ñawiykita qhawarichiq runamanta? nispa.

Hinan payqa nirqan: —Profetan*f**, nispa.

18Judío umallikunataq ichaqa mana payta creerqankuchu ñawsa kasqanta, manallataq qhawarisqantapas, chaymi tayta-mamanta waqyachimurqanku. 19Hinaspan paykunata tapurqanku: —¿Kaypunichu ñawsa naceq wawaykichis? ¿Imaynataq kunanri qhawapushan? nispa.

20Chaymi tayta-mamanqa nirqan: —Arí, yachaykun wawaykupuni kasqantaqa ñawsapuni nacesqantapas. 21Imaynachus kunan qhawashasqantan ichaqa mana yachaykuchu, pichus ñawinta kicharisqantapas manan yachaykuchu. Payqa machu runañan, payta tapuychis, kikinmi willasunkichis, nispa.

22Tayta-mamanqa chayta nirqan Judío umallikunata manchakuspanmi. Paykunaqa rimanakurqankuñan pillapas “Jesusqa Mesiasmi” niqtaqa Diosmanta yachachina wasimanta qarqonankupaq. 23Chaymi tayta-mamanqa nirqan: —Machu runañan, payta tapuychis, nispa.

24Hinan ñawsa karqan chay runata waqyallarqankutaq, hinaspan payta nirqanku: —Sut'inta Diospa qayllanpi niwayku. Ñoqaykuqa yachaykun chay runaqa huchasapa kasqanta, nispa.

25Paytaq nirqan: —Huchasapachus kasqantaqa manan yachanichu, huktan ichaqa yachani, ñoqa ñawsa kashaspay kunan qhawashasqayta, nispa.

26Chaymi payta nillarqankutaq: —¿Imanarqasunkitaq? ¿Imaynatan ñawiykita kicharirqan? nispa.

27Hinan nirqan: —Willaykichisñan, manataqmi uyariwankichischu. ¿Imaraykun wakmanta chayta tapuwankichis? ¿Paywanchu qankunapas ripuyta munankichis? nispa.

28Hinan k'arakta phiñakuspa nirqanku: —Qanmi payta qatikuqqa kanki, ñoqaykuqa Moisesta qatikuqmi kayku. 29Ñoqaykuqa yachaykun Moisesman Diospa rimaykusqanta, maymantachus chay runaq kasqantan ichaqa mana yachaykuchu, nispa.

30Chaymi chay runaqa paykunata nirqan: —Musphanamá kayqa, maymantachus kasqanta qankunaq mana yachasqaykichisqa, ñoqatan ichaqa ñawiyta qhawarichiwarqan. 31Yachanchismi Diosqa huchasapakunata mana uyarisqanta, aswanpas pipas Diosta manchakuspa munayninta ruwaqtan ichaqa uyarin. 32Manan hayk'aqpas uyarikurqanchu ñawsapuni naceqpa ñawin kicharisqamantaqa. 33Manachus Diosmanta pay kanman chayqa, manan imatapas ruwayta atinmanchu, nispa.

34Chaymi Judío umallikunaqa payta nirqanchu: —Qanqa huchapipunin nacerqanki, chaychu, ¿qanqa yachachiwankikuman? nispa.

Hinaspan hawaman qarqomurqanku.

Ñawsa-kaymanta

35Jesusmi chay runa qarqomusqankuta yacharqan, hinaspan paywan tupaspa nirqan: —¿Diospa Kachamusqan Runapi iñinkichu? nispa.

36Paytaq nirqan: —Wiraqocháy, willaykuway paypi iñinaypaq, nispa.

37Jesustaq payta nirqan: —Rikushawankiñan, ñoqan kani, qanwan rimaq, nispa.

38Chay runataq: —Señorníy, iñinin, nispa qonqoriykukuspa Jesusta yupaycharqan.

39Jesustaq nirqan: —Ñoqaqa juzgaqmi kay pachaman hamurqani, mana rikuqkuna rikunankupaq, rikuqkunataq ñawsayanankupaq, nispa.

40Wakin fariseokunataq*f** chayta uyarispa Jesusta nirqanku: —¿Ñoqaykupas ñawsallataqchu kayku? nispa.

41Jesustaq paykunata nirqan: —Ñawsa kaspaykichisqa mana huchayoqchá kawaqchis. Qankunan ninkichis: Qhawashaykun, nispa, chayraykun huchallayoqpuni kashankichis, nispa.

Currently Selected:

JUAN 9: QC88

Highlight

Copy