Yohani 5

ɄYesu ɨkʉnsosia ʉmʉlema amaghʉlʉ mʉ kɨghono ɨkya Sabati

1Pambele ʉYesu akalʉta kʉ lɨkaaja ɨlya Yelusalemu kʉ kɨkulukulu ɨkya Vayahudi. 2Mʉ lɨkaaja ɨlio pweghʉlyale ʉmʉlyango ʉmʼbaha ghʉno ghʉkatambʉlwagha Mʉlyango ghwa Ngʼholo.#5:2 Mʉlyango ghwa Ngʼholo: Kusyʉta ɨlɨkaaja ɨlya Yelusalemu lʉlyajengilue ʉlʉvɨɨka ʉlwa mavue. Ʉlʉvɨɨka ʉluo lʉlyale na malyango minga. Amalyango aghuo ghalyale na matavua, ghʉmonga ghʉkatambʉlwagha Mʉlyango ghwa Ngʼholo, ʉlwakʉva ghʉlyale piipi na pano vakaghʉsɨkɨsyagha ingʼholo ni fidɨmua ifingi (Nehemia 3:1; 12:39). Piipi nʉ mʉlyango ʉghuo, pwelɨlyale ɨlɨlamba lɨno mʉ njovele ɨja Kɨebulania lɨkatambʉlwagha Betisata. Mʉlʉbale mʉ lɨlamba ɨlio, pwefilyale ifibalaasa fihaano ifyeleefu. 3Mʉ fibalaasa ifio valyaghonile avatamu vinga: avabofu amaaso, avalema amaghʉlʉ na vanya lɨteela. Avatamu avuo vakaghulagha amalenga ghatimbusivue, 4ʉlwakʉva kweghʉkavisagha ʉnsiki pano ʉnyamhola ghwa Ngʉlʉve akikagha kutimbusia amalenga mʉ lɨlamba ɨlio. Ʉntamu ʉghwa kwasia kukwingila pano amalenga ghatimbwike, alyale isooka ɨnhamu jaake.#5:3-4 Avatamu avuo vakaghulagha ... isooka ɨnhamu jaake: Amasio agha namweghale mʉ fitabu fimonga ifikʉʉlʉ.

5Lɨno pa lɨlamba pala, pwealyale ʉmʉkɨnhaata jʉmonga jʉno alyale ntamu amaaka fijigho fitatu na lekelakwoni. 6ɄYesu akamwagha ʉmuunhu ʉjuo aghonile pala. Alyakagwile kuuti ʉmuunhu ʉjuo ɨnhamu jaake ja maaka minga, akamposia akati, “Asi, ghulonda kusooka?” 7Ʉntamu jʉla akamwamʉla akati, “Ghwe ntwa, amalenga ghangatimbusivue, nakwale ʉmuunhu ʉghwa kʉmbɨɨka mʉ lɨlamba. Pano nilonda kukwingila mʉ lɨlamba, ye nivonagha ʉmuunhu ʉjʉnge anhaliile pikwingila.” 8Pepano ʉYesu akamʼbʉʉla akati, “Ɨma, veghala ɨkɨteefu kyako, vujagha.” 9Ʉnsiki ghʉghuo ʉmuunhu jʉla akasooka, akaveghala ɨkɨteefu kyake, akatengʉla pighenda. Ɨkɨghono ɨkio jaale Sabati.#5:9 Sabati: Ɨmba kʉ Vʉghanʉle vwa Masio aMahesia.

10Pe avalongosi va Vayahudi vakamʼbʉʉla ʉmuunhu jʉla jʉno asokile vakati, “Ʉmʉsyʉghʉ kɨghono kya Sabati, indaghɨlo nasikʉkwɨtɨkɨsia kupɨnda ɨkɨteefu.” 11Neke ʉmuunhu jʉla akavamʉla akati, “Ʉmuunhu jʉno asosisie ghwe mwene ambʉlile kuuti, ‘Veghala ɨkɨteefu kyako, vujagha.’ ” 12Pe avalongosi vala vakamposia vakati, “Jʉno akʉvʉlile kuvomba ʉluo ghwe veeni?” 13Neke ʉmuunhu jʉla naalyammanyile jʉno ansosisie, ʉlwakʉva ʉYesu alyavʉkile pa lɨpʉgha lɨla.

14Pambele ʉYesu akamwagha ʉmuunhu jʉla mʉ nyumba ɨnyɨmɨke ɨja kufunyila, akamʼbʉʉla akati, “Lolagha, lɨno ʉsokile. Nʉngavombaghe inyɨvi kange, nave ghuvomba lʉkʉkwagha ʉlʉtalamu ʉlʉkome kukila ʉlwa kwanda.” 15Ʉmuunhu jʉla akavʉʉka pala, akalʉta kʉkʉvavʉʉla avalongosi va Vayahudi kuuti, jʉno ansosisie ghwe Yesu. 16Pepano avalongosi va Vayahudi vakatengʉla kʉkʉnʼgasia ʉYesu, ʉlwakʉva avasosyagha avaanhu mʉ kɨghono ɨkya Sabati.

ɄMwana ghwa Ngʉlʉve mpela vwʉmi

17Neke ʉYesu akavavʉʉla akati, “ɄNhaata ghwango ivomba ɨmbombo ifighono fyoni, na jʉʉne nivomba ɨmbombo ifighono fyoni.” 18Vwɨmɨla ʉluo, avalongosi va Vayahudi vakava vighina kulonda ɨsɨla ɨja kʉmʼbuda ʉYesu. Vakalondagha kʉkʉmʼbuda, ʉlwakʉva vakatisagha adenyile ʉlʉlaghɨlo lwa kɨghono ɨkya Sabati, kange ijova kuuti, ʉNgʉlʉve ghwe Viise. Mʉ ʉluo ikuvɨɨka kuuti alɨngʼhiine nʉ Ngʉlʉve.

19ɄYesu akavavʉʉla akati, “Kyangʼhaani nɨkʉvavʉʉla, ʉne ne Mwanaake nanivomba lʉmonga vwɨmɨla amasaaghe ghango, looli nivomba si sino nɨkʉmwagha ʉNhaata ivomba. Nijova ʉluo, ʉlwakʉva sino ivomba ʉNhaata, se sino na jʉʉne ne Mwanaake nivomba. 20ɄNhaata anganile ʉne ne Mwanaake, ɨkʉhʉfia sooni sino ivomba ʉmwene. Kange, ilikʉhʉfia ʉne imbombo sino ilonda nɨvombe, imbombo imbaha kukila isio, kuuti pe mʉdeghe fiijo. 21Ndavʉle ʉNhaata vʉle ɨkʉvasyʉsia avafue na kʉkʉvapeela ʉvwʉmi, fye enendɨɨkɨ na jʉʉne nɨkʉvapeela ʉvwʉmi, vano nilonda kʉkʉvapeela. 22Kange, ʉNhaata naihɨgha muunhu, looli amheliile ʉne ʉvʉtavʉlɨlua vwoni ʉvwa kʉhɨgha, 23neke avaanhu vooni vanyoghopaghe ndavʉle vikʉmwoghopa ʉmwene. Ʉmuunhu jʉno naɨkʉnyoghopa ʉne ne Mwanaake, naɨkʉmwoghopa ʉNhaata jʉno asungʼhile.

24“Kyangʼhaani nɨkʉvavʉʉla, ʉmuunhu jʉno ipʉlɨka amasio ghango, na kʉkʉmwɨtɨka ʉNgʉlʉve jʉno asungʼhile, alɨ nʉ vwʉmi ʉvwa fighono fyoni. Ʉne nanilikʉmhɨgha kuuti mhosi, ʉjuo akilile ʉvʉfue na kukwingila mʉ vwʉmi ʉvwa kʉvʉsila kʉsila. 25Kyangʼhaani nɨkʉvavʉʉla, ʉnsiki ghukwisa, kange ghʉfikile, avafue vilipʉlɨka ɨlɨsio lyango ne Mwana ghwa Ngʉlʉve. Avaanhu vano vilipʉlɨka, viliiva nʉ vwʉmi ʉvwa kʉvʉsila kʉsila. 26Nijova ʉluo, ʉlwakʉva ndavʉle ʉNhaata vʉle alɨ ni ngʉfu isa kʉmpeela ʉmuunhu ʉvwʉmi ʉvwa kʉvʉsila kʉsila, na jʉʉne amheliile ingʉfu isa kʉvapeela avaanhu ʉvwʉmi ʉvuo. 27Kange, amheliile ʉvʉtavʉlɨlua ʉvwa kʉhɨgha avaanhu, ʉlwakʉva ʉne nɨlɨ Mwana ghwa Muunhu. 28Namʉngadeghaghe amasio aghuo, ʉlwakʉva ghukwisa ʉnsiki ghʉno avafue vooni vilipʉlɨka ɨngʼhemeelo jango. 29Avafue vilisyʉka, vano vavombagha inofu viliiva nʉ vwʉmi ʉvwa fighono fyoni, vano vavombagha ʉvʉhosi vilihɨghua.”

Ʉvwolesi vwɨmɨla ʉYesu

30ɄYesu akafijovagha akatisagha, “Ʉne nanivomba kɨmonga vwɨmɨla amasaaghe ghango, ʉne nihɨgha avaanhu ndavʉle ɨkʉmbʉʉla ʉNhaata. Nihɨgha mʉ vwakyangʼhaani, ʉlwakʉva nanivomba mʉ vughane vwango, looli mʉ vughane vwa Ngʉlʉve jʉno asungʼhile. 31Nave ʉne nikujoleka jʉʉne, ʉvwolesi vwango navwa kyangʼhaani. 32Looli kwale ʉjʉnge jʉno ikwoleka imhola sango, ʉjuo ghwe Nhaata, na jʉʉne nɨkagwile kuuti, sooni sino ikwoleka vwɨmɨla ʉne, sa kyangʼhaani. 33Ʉmue mʉlyasungʼhile avaanhu kwa Yohani ʉMwofughi, ghwope alyavoliike isa kyangʼhaani vwɨmɨla ʉne.#Yohani 1:19-27 34Neke ʉne nanihʉvɨɨla sino vikwoleka avaanhu, ʉlwene nijova isi kuuti mʉkave ʉvʉpoki. 35ɄYohani ʉMwofughi alyahʉfisie ʉvwakyangʼhaani kʉlyʉmue, ndavʉle ɨtaala vʉle jiviika na kumulika mʉ ngʼhiisi. Ʉmue mʉlyahovwike vwɨmɨla ʉluo kʉ nsiki nʼdebe.

36“Neke ʉne nɨlɨ ni mhola sino sikʉnyoleka fiijo kukila sino alyoliike ʉYohani. Nijova ʉluo, ʉlwakʉva imbombo sino nivomba, sino ʉNhaata alyamheliile kuuti nɨvombe, se sino sikʉnyoleka kuuti, ʉNhaata ghwe jʉno asungʼhile. 37Ghwope ʉNhaata jʉno asungʼhile ʉne, ikwoleka imhola sango. Ʉmue namʉghelile nambe lʉsiku kupʉlɨka ɨlɨsio lyake, nambe kʉkʉmwagha vʉle alɨvuo. 38Kange, imbʉlanɨsio saake nasili nkate mʉlyʉmue, ʉlwakʉva namʉkʉnyɨtɨka ʉne ne jʉno asungʼhile kʉlyʉmue. 39Mughimba kulolesia mʉ Malembe aMɨmɨke, ʉlwakʉva musaagha kuuti mʉ Malembe ʉmuo ndepoonu mukava ʉvwʉmi ʉvwa kʉvʉsila kʉsila. AMalembe aMɨmɨke aghuo ghikʉnyoleka ʉne. 40Neke ʉmue namulonda kukwisa kʉlyʉne, kuuti mʉpelue ʉvwʉmi ʉvwa kʉvʉsila kʉsila.

41“Ʉne nanihʉvɨɨla avaanhu vanginie. 42Ʉlwene nɨkagwile kuuti ʉmue namʉmʉghanile ʉNgʉlʉve. 43Ʉne nisile mʉ vʉtavʉlɨlua vwa Nhaata ghwango, ʉmue musiita kʉkʉnyʉpɨla. Neke ʉjʉnge angiise mʉ vʉtavʉlɨlua vwake jʉjuo, mʉkʉmwʉpɨla. 44Lɨno, ndepoonu mʉkʉnyɨtɨka ndaani ʉmue mwe vano mulonda kughinisivua na vaanhu, namulonda kughinisivua nʉ Ngʉlʉve jʉno alɨ jʉmo mwene?

45“Mʉlekaghe piiti ʉne nilikʉvatwala kwa Nhaata avahɨghe. ɄMoose ghwe jʉno ilikʉvatwala mʉhɨghue, ʉlwakʉva ghwe jʉno mʉkʉmhʉvɨɨla. 46Nave lweli mʉkʉmwɨtɨka ʉMoose, ngale mʉkʉnyɨtɨka na jʉʉne, ʉlwakʉva ʉMoose alyalembile imhola sango. 47Neke nave namukwɨtɨka amasio ghano alyalembile ʉMoose, ndepoonu mukwɨtɨka ndaani amasio ghango?”

Currently Selected:

Yohani 5: wbi

Highlight

Copy