Lʉʉka 18

Kʉkʉnsʉʉma ʉNgʉlʉve kɨsila kʉkatala

1ɄYesu akavavʉʉla avavʉlanɨsɨvua vaake ɨkɨhwanɨkɨsio ɨkya kuuti, vanoghiile kʉkʉnsʉʉma ʉNgʉlʉve jaatu, valekaghe kukatala. 2Akavavʉʉla akati, “Kwealyale ʉmhɨghi mʉ lɨkaaja lɨmonga. Ʉmhɨghi ʉjuo, naalyale ɨkʉmwoghopa ʉNgʉlʉve, kange naakavɨkɨlagha mwojo kʉkʉvatanga avange. 3Lɨno, mʉ lɨkaaja ɨlio, mwealyale ʉmfwɨle jʉmonga, jʉno akalʉtagha jaatu kwa mwene kusʉʉma ʉlʉtango, akatisagha, ‘Nisʉʉma ʉhɨghɨle ʉnkole ghʉno nɨkʉnsighila ʉmʉlʉgʉ ghwango vwɨmɨla ifiinu fyango.’

4“Ifighono finga filyakilile, ʉmhɨghi jʉla alyale ifikaana kʉkʉntanga ʉmfwɨle jʉla. Neke kʉvʉsililo, akijovasia mʉ mwojo ghwake akati, ‘Poope nambe nanɨkʉmwoghopa ʉNgʉlʉve, nambe kuvɨkɨla mwojo kʉkʉvatanga avaanhu, 5neke ʉlwakʉva ʉmfwɨle ʉjʉ ɨkʉngasia kyongo, lɨno nɨntange nɨhɨghe ʉnkole vwɨmɨla ifiinu fyake, neke aleke kʉkʉngʼhatasia kange!’ ”

6Pe ʉMʉtwa akati, “Mʉmanyɨlaghe kwa mhɨghi jʉla ʉmhosi, ndavʉle alyalamwile kuvomba! 7Lɨno, ʉNgʉlʉve, naale ɨkʉvavombela vʉnofu avasalʉlua vaake vano vikʉmpelepesia pamwisi na pakɨlo? Ndepoonu idɨɨla kʉkʉvatanga? 8Nɨkʉvavʉʉla kuuti, ʉNgʉlʉve kyaɨkʉvavombela ngʼhaningʼhaani sino vanoghiile. Asi, ʉne ne Mwana ghwa Muunhu niliiva nigomoka mʉ ɨɨsi, nilikʉvaagha avaanhu vano vikʉnyɨtɨka?”

Ɨkɨhwanɨkɨsio ɨkya Mfalisayi nʉ nsongesia songo

9Pe ʉYesu akavavʉʉla mʉ kɨhwanɨkɨsio, avaanhu vano vakivonagha kuuti vagholofu na kubenapʉla avange vooni, akati, 10“Avaanhu vavɨlɨ valyalʉtile kukufuunya kʉ nyumba ɨnyɨmɨke ɨja kufunyila, jʉmonga alyale Mfalisayi, ʉjʉnge alyale nsongesia songo. 11ɄMfalisayi jʉla akɨɨma pikufuunya, neke mʉ mwojo ghwake akatisagha, ‘Ghwe Ngʉlʉve, nɨkʉkʉhongesia, ʉlwakʉva ʉne nanɨlɨ ndavʉle avaanhu avange, avakuunyi, avahoka makole, avavwafu, nambe ndavʉle ʉnsongesia songo ʉjʉ! 12Ʉne nivʉhɨɨla kulia mʉlwa kufuunya ifighono fivɨlɨ mʉ mʉlʉngʉ. Kange, nɨkʉkʉtavʉlɨla ɨlɨtekelo ɨkɨghavo kɨmo mʉ fighavo kɨjigho mʉ fiinu fyango fyoni.’

13“Neke ʉnsongesia songo jʉla, alyɨmile patali iniime nʉ lʉsukunalo, kʉmo ikutovatova pa kɨfuva kyake, iiti, ‘Ghwe Ngʉlʉve, ʉmhyanɨle, ʉne nɨlɨ mhosi!’ ” 14Pe ʉYesu akati, “Nɨkʉvavʉʉla kuuti, ʉnsongesia songo alyagomwike kʉ kaaja, apyanilue inyɨvi saake. Looli ʉjʉnge jʉla naalyapyanilue! Ʉlwakʉva, ʉmuunhu ghweni jʉno ikughinia, ʉNgʉlʉve alamwisia; neke ʉmuunhu jʉno ikujisia, ʉNgʉlʉve alamʉghinia.”

ɄYesu ɨkʉvafuunya avaana avafyele

(Mataayi 19:13-15; Malɨka 10:13-16)

15Ɨkɨghono kɨmonga, avaanhu vakamʉletela ʉYesu avaana avafyele, kuuti avɨɨke amavoko ghaake pa veene avafuunye. Avavʉlanɨsɨvua vaake ye valʉvwene ʉluo, vakavadalɨkɨla avaanhu vala. 16Neke ʉYesu akavakemeela avaana valʉte kwa mwene, akati, “Mʉvaleke avaana avadebe visaghe kʉlyʉne, namʉngavasighaghe, ʉlwakʉva ʉVʉtwa vwa Ngʉlʉve vwa vaanhu vano valɨ ndavʉle avaana ava. 17Kyangʼhaani nɨkʉvavʉʉla, ʉmuunhu ghweni jʉno naɨkʉmwɨtɨka ʉNgʉlʉve ndavʉle ʉmwana ʉnʼdebe,#18:17 Ʉmuunhu ghweni jʉno naɨkʉmwɨtɨka ʉNgʉlʉve ndavʉle ʉmwana ʉnʼdebe: Ʉmʉlʉvo ʉghʉnge kwekʉti Ʉmuunhu ghweni jʉno naikwɨtɨka kulongosivua nʉ Ngʉlʉve ndavʉle ʉmwana vʉle ikwɨtɨka kulongosivua na vapaafi vaake, naangingile nambe lʉsiku mʉ Vʉtwa vwa Ngʉlʉve. naangingile nambe lʉsiku mʉ Vʉtwa vwa Ngʉlʉve.”

Ʉlʉtalamu ʉlwa mmofu kukwingila mʉ Vʉtwa vwa Ngʉlʉve

(Mataayi 19:16-30; Malɨka 10:17-31)

18Ʉmʼbaha jʉmonga, akamposia ʉYesu akati, “Ghwe Mʼbʉlanɨsi ghwe nnofu, nɨvombe kɨki neke nɨɨve nʉ vwʉmi ʉvwa kʉvʉsila kʉsila?” 19ɄYesu akamwamʉla akati, “Kɨki kʉkʉnhambʉla kuuti nɨlɨ nnofu? Nakwale ʉnnofu, looli jʉ Ngʉlʉve mwene! 20Ʉsimanyile indaghɨlo isa Ngʉlʉve: ‘Nʉngavwafukaghe, nʉngabudaghe, nʉngahɨjaghe, nʉngolekaghe isa vʉdesi, ʉmwoghopaghe ʉvaaso nʉ mamaajo.’#Kuhʉma 20:12-16; Similisio sa Ndaghɨlo 5:16-20 ” 21Ʉmwene akati, “Isio sooni, nɨsigadɨliile kuhʉma ʉvwana vwango.”

22ɄYesu ye apʉliike isio, akamʼbʉʉla akati, “Ghwaghilue ɨkɨɨnu kɨmo. Ʉlʉte ʉghʉsie fyoni fino ʉlɨ nafyo, neke indalama sino ʉkavile ʉvapeele avakotofu. Apuo pe ghuuva nɨ kyʉma kʉkyanya. Pepano ghwisaghe ʉmbɨngɨlɨlaghe.” 23Ʉmʼbaha jʉla, ye apʉliike isio, akasukunala kyongo, ʉlwakʉva alyale nɨ kyʉma kinga. 24ɄYesu ye amwaghile kuuti asukuniile, akati, “Lʉtalamu kyongo avamofu kukwingila mʉ Vʉtwa vwa Ngʉlʉve! 25Kɨhʉʉgʉ ɨngamɨla pikila pa kalyoli ka honelo, kukila ʉmmofu kukwingila mʉ Vʉtwa vwa Ngʉlʉve!”

26Avaanhu vano valyapʉliike isio, vakati, “Pe veeni lɨno, jʉno anoghiile kupokua?” 27ɄYesu akati, “Kʉ vaanhu, lʉtalamu kuvomba, neke kwa Ngʉlʉve sooni sivombeka.” 28Apuo, ʉPeteli akamʼbʉʉla ʉYesu akati, “Lolagha, ʉsue tʉfilekile ifiinu fiitu fyoni, tʉkʉkʉvɨngɨlɨla ʉve!” 29ɄYesu akavavʉʉla akati, “Kyangʼhaani nɨkʉvavʉʉla kuuti, ʉmuunhu ghweni jʉno ajɨlekile ɨnyumba jaake, nambe ʉnʼdala ghwake, nambe avanyalʉkolo vaake, nambe avapaafi vaake, nambe avaana vaake, vwɨmɨla ʉVʉtwa vwa Ngʉlʉve, 30ʉjuo pano ajiighe pa ɨɨsi apa ikwʉpɨla finga kukila fino akafilekile. Kange, ʉnsiki ghʉno ghukwisa, alapelua ʉvwʉmi ʉvwa kʉvʉsila kʉsila.”

ɄYesu ijova ʉlwa vʉtatu ɨmhola ɨja kʉfua na kusyʉka kwa mwene

(Mataayi 20:17-19; Malɨka 10:32-34)

31ɄYesu akavatoola avavʉlanɨsɨvua vaake kɨjigho na vavɨlɨ, akava navoope palʉbale, pe akavavʉʉla akati, “Lolagha, tulʉta kʉ Yelusalemu. Neke ʉkuo, sooni sino avavɨli valyalembile vwɨmɨla ʉne ne Mwana ghwa Muunhu, silʉta kuvombeka. 32Ʉlwakʉva nitapivɨkua mʉ mavoko gha vaanhu vano naVayahudi. Pe kyavikʉnyovelela na kʉkʉndigha, na kʉkʉfunyila amati. 33Kange, vikʉngʼhopa ni mijeledi na kʉkʉmbuda. Neke ɨkɨghono ɨkya vʉtatu, nisyʉka.”

34Neke avavʉlanɨsɨvua vaake navalyasitangʼhinie sino alyale ɨkʉvavʉʉla, ʉlwakʉva valyafisilue ʉmʉlʉvo ghwa masio agha. Navalyakagwile kuuti ijova kɨɨnu kɨki.

ɄYesu ɨkʉnsosia ʉmʼbofu

(Mataayi 20:29-34; Malɨka 10:46-52)

35ɄYesu na vavʉlanɨsɨvua vaake ye valɨ piipi nɨ lɨkaaja ɨlya Yeliko, ʉmuunhu jʉmonga jʉno alyale mʼbofu alikalile palʉbale pa sɨla, isʉʉma ifiinu. 36Ye apʉliike avaanhu vinga vikila, akaposia akati, “Kʉlɨ kɨki?” 37Vakamʼbʉʉla vakati, “ɄYesu ʉghwa kʉ Nasaleti ikila.” 38Pepano akakemeela fiijo akati, “Ghwe Yesu, Mwana ghwa Davɨdi,#18:38 Mwana ghwa Davɨdi: AVayahudi vakahʉvɨlagha kuuti, ʉNgʉlʉve ilikʉnsuungʼha ʉmuunhu kuhʉma mʉ kɨkolo ɨkya Davɨdi kʉkʉvapoka kʉ valʉgʉ. Ɨmba kʉ Vʉghanʉle vwa Masio aMahesia. ʉsʉngʉkɨle!” 39Avaanhu vano valyale kʉvʉlongolo kwa Yesu, vakava vikʉnʼdalɨkɨla kuuti ajike. Neke ʉmwene akaghina kukemeela fiijo iiti, “Ghwe Mwana ghwa Davɨdi, ʉsʉngʉkɨle!”

40ɄYesu akɨɨma, akalaghɨla kuuti vamʉleete kwa mwene. Ʉmʼbofu jʉla ye aveleliile, ʉYesu akamposia akati, 41“Ghulonda nɨkʉvombele kɨki?” Akati, “Ghwe Mʉtwa, nilonda nɨlolaghe.” 42ɄYesu akamʼbʉʉla akati, “Lɨno ʉlolaghe! Ʉsokile vwɨmɨla ʉlwɨtɨko lwako.” 43Ʉnsiki ghʉghuo ʉmʼbofu jʉla ye akalolagha, pe akava ɨkʉmʼbɨngɨlɨla ʉYesu kʉmo ɨkʉmʉghinia ʉNgʉlʉve. Avaanhu vooni ye vasivwene isio, voope vakamʉghinia ʉNgʉlʉve.

Currently Selected:

Lʉʉka 18: wbi

Highlight

Copy