Lʉʉka 19

ɄYesu itangʼhana nʉ Sakaayi

1ɄYesu akingila mʉ lɨkaaja ɨlya Yeliko, pe akava ikila mʉ lɨkaaja lɨla. 2Neke mʉ lɨkaaja lɨla, kwealyale ʉmuunhu jʉmonga, jʉno akatambʉlwagha Sakaayi. ɄSakaayi alyale mʼbaha ghwa vasongesia songo, kange alyale mmofu. 3Ʉmuunhu ʉjʉ akava ilonda kʉkʉmʼbona ʉYesu kuuti alɨ ndaani, neke akakunua kʉkʉmwagha, ʉlwakʉva alyale mfupi kange avaanhu valyale vinga kyongo. 4Pepano akalʉta lʉvɨlo, kʉvʉlongolo kʉ lɨpʉgha, akatogha mʉ mpiki ʉnkʉjʉ, kuuti amwaghe ʉYesu kyaikila pala. 5ɄYesu ye afikile pala, akalola kʉkyanya kʉ mpiki, akamwagha ʉSakaayi akati, “Sakaayi, ika ngʼhaningʼhaani! Ʉlwakʉva ʉmʉsyʉghʉ nilɨnda kʉ kaaja jaako.” 6ɄSakaayi akiika ngʼhaningʼhaani, akamwambɨlɨla ʉYesu nʉ lʉkeelo kʉ kaaja ja mwene.

7Avaanhu vooni vano vakamwagha ʉYesu ye ikwingila mula, vakatengʉla kukungʼulasia viiti, “Kɨki alʉtile kukukala kwa muunhu ʉmhosi ndavʉle ʉjʉ!” 8Neke ʉSakaayi akɨɨma, akamʼbʉʉla ʉMʉtwa akati, “Ghwe Mʉtwa! Lɨno, ifiinu fyango nighava pakate, lʉbale nɨkʉvapeela avakotofu. Neke ʉmuunhu jʉno nɨmpokile kɨmonga, nɨkʉnʼgomokesia kane kʉ fino nɨpokile.”#Valeevi 6:1-5 9ɄYesu akamʼbʉʉla akati, “Ʉmʉsyʉghʉ, ʉvʉpoki vwisile kʉ vaanhu va mʉ nyumba ɨjɨ, ʉlwakʉva ghwope ʉjʉ mwana ghwa kyangʼhaani ghwa kɨkolo kya Abulahamu. 10Ʉlwakʉva ʉne ne Mwana ghwa Muunhu nisile kulonda na kupoka avaanhu vano vasovile.”

Ɨkɨhwanɨkɨsio ɨkya vavombi vano valyapelilue indalama

(Mataayi 25:14-30)

11Avaanhu vano valyale vikʉmpʉlɨkɨsia ʉYesu, vakasaghagha kuuti ʉVʉtwa vwa Ngʉlʉve vʉlɨ piipi,#19:11 ɄVʉtwa vwa Ngʉlʉve vʉlɨ piipi, kwekʉti ʉYesu ilʉta kʉ Yelusalemu kutema ʉVʉtwa. ʉlwakʉva valyale piipi kufika kʉ Yelusalemu. Pe ʉYesu akavavʉʉla ɨkɨhwanɨkɨsio akati, 12“Kwealyale ʉmuunhu jʉmonga ʉghwa kɨkolo ɨkya kɨtwa, jʉno alyakyʉlile kulʉta ɨɨsi ɨja kʉ vʉtali. Alyalʉtile ʉkuo kuuti apelue ʉvʉtavʉlɨlua ʉvwa kuuva ntwa, pe agomoke kutema ɨɨsi jaake.

13“Ye akyale pivʉʉka, akavakemeela avavombi vaake kɨjigho, nʉjʉnge akampeela indalama nyinga,#19:13 Indalama nyinga: Mʉ Kɨyunaani lɨlembilue, mina, indalama isio lwale lʉhombo lwa mʼbombi ʉlwa meesi ghatatu. akavavʉʉla akati, ‘Mʉvombelaghe indalama isi mʉlwa kufulusia kuhanga nigomoka.’ 14Neke avaanhu ava ɨɨsi jaake navalyamʉghanile, pe vakasuungʼha vamonga kʉ ɨɨsi jɨla ɨja kʉ vʉtali kuuti ndɨɨkɨ, ‘Ʉmuunhu ʉjʉ, natulonda aave ntwa ghwitu!’ 15Poope nambe valyajovile ʉluo, alyapelilue ʉvʉtavʉlɨlua ʉvwa kuuva ntwa.

“Neke ye agomwike, akavakemeela avavombi vala vano alyavapeliile indalama, kuuti akagʉle nʉjʉnge afulwisie ndaani. 16Ʉmʼbombi ʉghwa kwanda akafika, akamʼbʉʉla akati, ‘Ghwe ntwa, indalama sino ghwamheela nɨfulwisie isingi ifighavo kɨjigho.’ 17Ʉntwa jʉla akamʼbʉʉla akati, ‘Ʉvombile vʉnofu, ʉve ʉlɨ mʼbombi nnofu. Ʉlwakʉva ghwakolopalɨla pa fiinu ifidebe, nɨkʉkʉpeela kutema amakaaja kɨjigho.’ 18Ʉmʼbombi ʉghwa vʉvɨlɨ ghwope akafika, akamʼbʉʉla akati, ‘Ghwe ntwa, indalama sino ghwamheela, nɨfulwisie isingi ifighavo fihaano.’ 19Ʉntwa akamʼbʉʉla ghwope akati, ‘Na jʉʉve, nɨkʉkʉpeela kutema amakaaja ghahaano.’

20“Ʉmʼbombi ʉjʉnge akafika akati, ‘Ghwe ntwa, indalama saako isi apa. Nɨkapinyile mʉ kyenda, kuuti sileke pisova. 21Nɨkavombile ʉluo ʉlwakʉva nɨkʉkwoghopa, ʉve ʉlɨ mwʉmu. Ghutoola fino nʉvɨkile, kange ghupeta fino nʉvyalile.’ 22Ʉntwa akamʼbʉʉla akati, ‘Ghwe mʼbombi ghwe mhosi ʉve! Lɨno, nɨkʉkʉhɨgha vwɨmɨla amasio ghaako ghano ʉjovile. Ghwakagʉla kuuti ʉne nɨlɨ muunhu mwʉmu, nitoola fino nanɨvɨkile, kange nipeta fino nanɨvyalile, 23lɨno kɨki naghwavɨɨka indalama sango kʉ vano vifulusia,#19:23 Kʉ vano vifulusia, kwe kʉno avaanhu vinga vivɨɨka indalama saave, kuuti pambele vatoole na sino sifulwike. neke nɨtoole palɨkɨmo na sino sifulwike?’

24“Pepano ʉntwa jʉla akavavʉʉla avaanhu vano valyɨmile pala akati, ‘Mʉpoke indalama isio, mʉmpeele jʉno afulwisie kɨjigho.’ 25Vakamʼbʉʉla vakati, ‘Ghwe ntwa, ongo jʉla alɨ naso kɨjigho!’ 26Akati, ‘Nɨkʉvavʉʉla kuuti, ʉmuunhu ghweni jʉno alɨ nafyo ipelua ifingi, neke iiva nafyo finga. Looli jʉno nsila kɨmonga, nambe ɨkɨdebe kɨno alɨ nakyo, ikunyua. 27Palɨkɨmo nisio, mʉvaleete avalʉgʉ vango vala, vano navaava vilonda ʉne nɨɨve ntwa ghwave, mʉvabude pamaaso ghango!’ ”

ɄYesu ikwingila mʉ Yelusalemu na kaluulu

(Mataayi 21:1-11; Malɨka 11:1-11; Yohani 12:12-19)

28ɄYesu ye ajovile isio, akava ifilʉta kʉ Yelusalemu kʉmo alongwile kʉ lɨpʉgha lɨla ɨlya vaanhu. 29Ye alɨ piipi nɨ kɨkaaja ɨkya Betifage nɨ kya Betania, pa kɨdunda kɨno kɨkatambʉlwagha Miseituni, akavasuungʼha avavʉlanɨsɨvua vaake vavɨlɨ, 30akavavʉʉla akati, “Mʉlʉte mʉ kɨkaaja kɨno kɨlɨ kʉvʉlongolo kʉlyʉmue. Neke pano mukwingila mʉ kɨkaaja ɨkio, mʉkʉjaagha ɨnyaana ja dogovi jɨkʉngilue. Ɨdogovi ɨjio nambe muunhu naaghelile kʉkʉjangalɨla. Mʉjavʉle, mʉjɨleete apa. 31Nave ʉmuunhu ɨkʉvaposia iiti, ‘Kɨki mʉkʉjavʉla?’ Mʉmʼbʉlaghe mʉtisaghe, ‘ɄMʉtwa alɨ nʉ vʉfumbue najo.’ ”

32Pe avavʉlanɨsɨvua vala vakalʉta, vakasaagha sooni ndavʉle ʉYesu aveele avavʉlile. 33Ye vikʉjavʉla ɨnyaana jɨla ɨja dogovi, avanya joope vakavaposia vakati, “Kɨki mʉkʉjavʉla ɨnyaana ja dogovi?” 34Vakavavʉʉla vakati, “ɄMʉtwa alɨ nʉ vʉfumbue najo.” 35Vakatwala kwa Yesu, vakatandɨka amenda ghaave pakyanya pa dogovi,#19:35 Dogovi: Kʉ Vayahudi idogovi filyale fikanu fya kʉpɨnda avaanhu nambe amasigho. Avatwa valyale vipɨndua ni falaasi. Ifalaasi pamonga sikapindagha avaanhu kulʉta kulua ɨlɨlʉgʉ. ɄYesu pano ikwingila mʉ Yelusalemu angaliile ɨdogovi, alyale ivonia kuuti ʉmwene ntwa ghwa lʉtengaano, ʉntwa ʉmhʉʉgʉ. neke vakantosia ʉYesu.

36ɄYesu ye ilʉta, avaanhu valyale vitandɨka amenda ghaave mʉ nsevo. 37Ye alɨ piipi kukwika mʉ kɨdunda ɨkya Miseituni, ɨkɨpʉgha kyoni ɨkya vavʉlanɨsɨvua vaake#19:37 Vavʉlanɨsɨvua vaake: Ava ve vano vakamʼbɨngɨlɨlagha ʉYesu na kuvʉlanɨsɨvua nʉ mwene. Ɨmba ɨlɨsio Vavʉlanɨsɨvua kʉ Vʉghanʉle vwa Masio aMahesia. vakahovoka, vakatengʉla kʉkʉmpaala ʉNgʉlʉve vwɨmɨla ifidegho fyoni fino valyalolile ʉYesu ye ivomba. Pe vakampalagha fiijo, 38vakatisagha,

“Afunyilue ʉNtwa jʉno ikwisa mʉ lɨtavua lya Mʉtwa ʉNgʉlʉve.#Sabuli 118:26

Ʉlʉtengaano kʉkyanya

nʉ vʉvaha kwa Ngʉlʉve jʉno alɨ kʉkyanya.”

39Mʉ lɨpʉgha lɨla mwevalyale aVafalisayi vamonga. AVafalisayi avuo vakamʼbʉʉla ʉYesu vakati, “Mʼbʉlanɨsi, vadalɨkɨle avavʉlanɨsɨvua vaako, valeke kujova isio!” 40ɄYesu akati, “Nɨkʉvavʉʉla, nave ava vajike, amavue kyaghijegheela fiijo kʉkʉnginia!”

ɄYesu ivɨla kuuti ɨYelusalemu jilihemulua

41ɄYesu ye alɨ piipi, ɨkʉlyagha ɨlɨkaaja ɨlya Yelusalemu, akatengʉla kulɨla vwɨmɨla ʉlʉpumuko lʉno lukwisa kʉ lɨkaaja ɨlio 42akati, “Lwale luuva kʉba ʉkagʉle ʉmʉsyʉghʉ sino ʉnoghiile kuvomba, neke ʉʉve nʉ lʉtengaano! Lɨno, sifisilue pamaaso ghaako. 43Mʉ fighono fino fikwisa, avalʉgʉ vaako vilijenga ɨlɨlinga, kusyʉngʉtɨla ɨlɨkaaja lyako lyoni, apuo pe vitengʉla pikʉkwalʉkɨla kuhʉma imbale sooni. 44Vilikʉkʉghwɨsia paasi, ʉve na vaanhu vaako vooni. Navilikʉkʉlekela nambe lɨvue lɨno lilisighala pakyanya pa lɨngɨ, ʉlwakʉva naghwalondagha kukagʉla, ʉnsiki ghʉno ʉNgʉlʉve ɨkʉkʉletela ʉvʉpoki!”

ɄYesu ivalasia ɨnyumba ɨnyɨmɨke ɨja kufunyila

(Mataayi 21:12-17; Malɨka 11:15-19; Yohani 2:13-22)

45ɄYesu akingila mʉ lʉvɨɨka ʉlwa nyumba ɨnyɨmɨke ɨja kufunyila, akatengʉla kudaga avaanhu vano valyale mula vighʉsia ifiinu. 46Akavavʉʉla akati, “Lɨlembilue mʉ Malembe aMɨmɨke, ‘Ɨnyumba jango, jiiva nyumba ja kufunyila.’#Yesaya 56:7 Neke ʉmue, mʉhambwile kuuva ‘mhanga ja valyasi’!”#Yelemia 7:11

47Pepano ʉYesu jaatu akava ivʉlanɨsia avaanhu mʉ nyumba ɨnyɨmɨke ɨja kufunyila. Pe avavaha va vatekesi na vavʉlanɨsi va ndaghɨlo na vagojo va Vayahudi, vakava vilonda ɨsɨla ɨja kʉmʼbuda, 48neke vakakunua, ʉlwakʉva avaanhu vooni vano vakamʼbɨngɨlɨlagha, vakagadɨlɨlagha vʉnono amasio ghaake.

Currently Selected:

Lʉʉka 19: wbi

Highlight

Copy