Mataayi 14
14
Ɨmhola ɨja kʉbudua kwa Yohani ʉMwofughi
(Malɨka 6:14-29; Lʉʉka 9:7-9)
1Ʉnsiki ghʉla ʉntwa ʉHelode#14:1 ɄHelode: Ɨmba ɨlɨsio Helode kʉ Vʉghanʉle vwa Masio aMahesia. alyapʉliike imhola sa Yesu. 2Pe akavavʉʉla avavombi vaake akati, “Ʉjuo ghwe Yohani ʉMwofughi, asyʉkile kuhʉma kʉ vafue, fye nambe alɨ ni ngʉfu isa kʉvomba ifidegho.”
3ɄHelode alyajovile enendɨɨkɨ, ʉlwakʉva alyankolile ʉYohani, akankʉnga na kʉkʉnʼdindila mʉ ndinde. ɄYohani alyadindilue vwɨmɨla ʉHelodia, ʉnʼdala ghwa Filipo, ʉnnuuna ghwa Helode. 4Alyadindilue mʉ ndinde, ʉlwakʉva alyamʼbʉlile ʉHelode kuuti, “Ʉve, pano ʉpokile ʉnʼdala ghwa nnunaavo, ʉvombile lʉno nalʉnoghiile mʉ ndaghɨlo sa Ngʉlʉve.”#Valeevi 18:16; 20:21 5ɄHelode ʉjuo akalondagha kʉkʉmʼbuda ʉYohani, neke akoghopagha avaanhu, ʉlwakʉva valyankagwile ʉYohani kuuti mʼbɨli.
6Lɨno, pa kɨkulukulu ɨkya kʉkʉmbʉka kuholua ʉntwa ʉHelode, ʉmwalɨve ghwa Helodia akaseeja pamaaso gha vahesia. Ʉmhɨnja ʉjuo akamhovosia fiijo ʉHelode, 7kuhanga akajɨɨgha kʉkʉmpeela kɨno ilonda kusʉʉma. 8Neke ʉmhɨnja jʉla akahongua nʉ ngʼina ɨkya kʉsʉʉma, akamʼbʉʉla ʉHelode akati, “Nilonda ʉmheele lɨno lɨno ʉmutu ghwa Yohani ʉMwofughi mʉ lɨsinia.” 9Ʉntwa ʉHelode akasukunala kyongo. Neke, ʉlwakʉva akajɨghile pamaaso gha vahesia vala, akalaghɨla kuuti ʉmhɨnja ʉjuo apelue. 10Pe akasuungʼha ʉmuunhu alʉte mʉ ndinde adumule ʉmutu ghwa Yohani. 11Ʉmutu ghwa Yohani ghʉkaletua mʉ lɨsinia, akapelua ʉmhɨnja jʉla, ghwope akampeela ʉngʼina. 12Pepano avavʉlanɨsɨvua va Yohani vakalʉta, vakatoola ʉmʼbɨlɨ ghwa Yohani, vakaghʉvɨɨka mʉ mbiipa. Pe vakalʉta kʉkʉmʼbʉʉla ʉYesu ɨmhola jɨla.
ɄYesu ilɨsia avaanhu imbilima ihaano
(Malɨka 6:30-44; Lʉʉka 9:10-17; Yohani 6:1-14)
13ɄYesu ye apʉliike ɨmhola ɨjio, akavʉʉka pala nɨ ngalava na kulʉta pamonga pa vʉsyefu. Neke avaanhu ye vapʉliike kuuti ʉYesu avʉkile pala, vakahʉma mʉ makaaja ghaave, vakaghenda lʉghʉlʉ, vikʉmʼbɨngɨlɨla ʉYesu kʉno alʉtile. 14ɄYesu ye ikwika mʉ ngalava, akalɨvona ɨlɨpʉgha ɨlɨvaha ɨlya vaanhu, akavavonela ɨkɨsa, akavasosia avatamu vaave.
15Ye vwilile, avavʉlanɨsɨvua vaake vakalʉta pa mwene vakamʼbʉʉla vakati, “Apa tukalile pe lʉnyika pasila kɨmonga, kange vwilile, ʉvatavʉle avaanhu ava valʉtaghe mʉ fikaaja kuuti vakaghʉle ifyakʉlia.” 16ɄYesu akavamʉla akati, “Nakwekʉti ʉmpaka aveene vavʉʉke, mʉvapeele ʉmue ɨkyakʉlia.” 17Aveene vakamʉla vakati, “Natʉlɨ na kɨmonga apa, looli ghalɨ gha makate ghahaano ni samaki ivɨlɨ.” 18ɄYesu akavavʉʉla akati, “Mʉleete apa.”
19Pepano akavavʉʉla avaanhu kuuti vikale pa lɨsoli. Pe akatoola amakate ghala ghahaano ni samaki sila ivɨlɨ, akalola kʉkyanya, akamhongesia ʉNgʉlʉve. Pe akamenyʉlania amakate ghala, akavapeela avavʉlanɨsɨvua vaake, voope vakavaghavɨla avaanhu. 20Avaanhu vooni vakalia, vakikuta. Avavʉlanɨsɨvua vaake vakakongʼhania ifisighasi, sikamema indɨɨlo kɨjigho ni vɨlɨ. 21Avaanhu vano valyaliile, avakɨnhaata veene valyale imbilima ihaano, kɨsila kʉvala avakɨjʉʉva na vaana.
ɄYesu ighenda pakyanya pa malenga
(Malɨka 6:45-52; Yohani 6:16-21)
22Ʉnsiki ghʉghuo, ʉYesu akavavʉʉla avavʉlanɨsɨvua vaake kuuti vingile mʉ ngalava, valongole kulʉta ɨmwambo ɨjɨngɨ, pano ʉmwene itavʉla ɨlɨpʉgha lya vaanhu kuuti valʉtaghe. 23Ye avatavwile, akalʉta mwene kʉ kɨdunda kukufuunya. Ɨngʼhiisi jɨkatengʉla, ajiighe mwene kʉ kɨdunda. 24Ʉnsiki ʉghuo ɨngalava#14:24 Ɨngalava: Ɨmba ɨlɨsio Ngalavakʉ Vʉghanʉle vwa Masio aMahesia. jɨla jɨkava jɨfikile pakate pa lɨsʉmbe, jitovua na mavɨngo, ʉlwakʉva ɨmhepo ɨmbaha jɨkasighagha kʉno vilʉta.
25Ye kutapihenga, ʉYesu akalʉta kʉ vavʉlanɨsɨvua vaake, ighenda pakyanya pa malenga. 26Neke avavʉlanɨsɨvua vaake ye vikʉmwagha ighenda pakyanya pa malenga, vakoghopa kyongo, vakakoola vakati, “Ɨlɨsyʉka!” 27Ʉnsiki ghʉghuo ʉYesu akavavʉʉla akati, “Kangala, neene, namʉngoghopaghe.” 28Pe ʉPeteli akamʼbʉʉla akati, “Ghwe Mʉtwa, nave lweli veeve, ʉmbʉʉle niise palyʉve nɨghende pakyanya pa malenga.” 29ɄYesu akamwamʉla akati, “Isa.” Pe ʉPeteli akiika mʉ ngalava jɨla, akatengʉla pighenda pakyanya pa malenga, ilʉta kwa Yesu. 30Neke ye ivona ɨmhepo ɨmbaha jigugula, akoghopa kyongo, akatengʉla kudwiviila. Pe akakoola akati, “Ghwe Mʉtwa, ʉmhoke!”
31Ʉnsiki ghʉla ghʉla, ʉYesu akagholosia ʉlʉvoko lwake, akankola, akamʼbʉʉla akati, “Ghwe nya lwɨtɨko lʉdebe ʉve, kɨki ʉlɨ ni nganighani?” 32Pepano ʉYesu nʉ Peteli vakingila mʉ ngalava, ɨmhepo jɨla jɨkalitama. 33Avavʉlanɨsɨvua vano valyale mʉ ngalava, vakamwɨmɨka ʉYesu vakati, “Kyangʼhaani, ʉve ʉlɨ Mwana ghwa Ngʉlʉve!”#14:33 Mwana ghwa Ngʉlʉve: Ɨmba kʉ Vʉghanʉle vwa Masio aMahesia.
ɄYesu isosia avatamu kʉ ɨɨsi ɨja Genesaleti
(Malɨka 6:53-56)
34ɄYesu na vavʉlanɨsɨvua vaake vakalovoka ɨlɨsʉmbe ɨlya Galilaya, vakafika mʉ ɨɨsi ɨja Genesaleti. 35Avaanhu ava pala ye vakagwile kuuti ghwe Yesu, vakatwala imhola imbale sooni. Pepano avaanhu vakavatwala avatamu vooni kwa Yesu, 36vakansʉʉma avɨtɨkɨsie avatamu vabasie lʉ lʉvilo lwa mwenda ghwake. Avatamu vooni vano vakabasyagha, vakasokagha.
Currently Selected:
Mataayi 14: wbi
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
Mataayi 14
14
Ɨmhola ɨja kʉbudua kwa Yohani ʉMwofughi
(Malɨka 6:14-29; Lʉʉka 9:7-9)
1Ʉnsiki ghʉla ʉntwa ʉHelode#14:1 ɄHelode: Ɨmba ɨlɨsio Helode kʉ Vʉghanʉle vwa Masio aMahesia. alyapʉliike imhola sa Yesu. 2Pe akavavʉʉla avavombi vaake akati, “Ʉjuo ghwe Yohani ʉMwofughi, asyʉkile kuhʉma kʉ vafue, fye nambe alɨ ni ngʉfu isa kʉvomba ifidegho.”
3ɄHelode alyajovile enendɨɨkɨ, ʉlwakʉva alyankolile ʉYohani, akankʉnga na kʉkʉnʼdindila mʉ ndinde. ɄYohani alyadindilue vwɨmɨla ʉHelodia, ʉnʼdala ghwa Filipo, ʉnnuuna ghwa Helode. 4Alyadindilue mʉ ndinde, ʉlwakʉva alyamʼbʉlile ʉHelode kuuti, “Ʉve, pano ʉpokile ʉnʼdala ghwa nnunaavo, ʉvombile lʉno nalʉnoghiile mʉ ndaghɨlo sa Ngʉlʉve.”#Valeevi 18:16; 20:21 5ɄHelode ʉjuo akalondagha kʉkʉmʼbuda ʉYohani, neke akoghopagha avaanhu, ʉlwakʉva valyankagwile ʉYohani kuuti mʼbɨli.
6Lɨno, pa kɨkulukulu ɨkya kʉkʉmbʉka kuholua ʉntwa ʉHelode, ʉmwalɨve ghwa Helodia akaseeja pamaaso gha vahesia. Ʉmhɨnja ʉjuo akamhovosia fiijo ʉHelode, 7kuhanga akajɨɨgha kʉkʉmpeela kɨno ilonda kusʉʉma. 8Neke ʉmhɨnja jʉla akahongua nʉ ngʼina ɨkya kʉsʉʉma, akamʼbʉʉla ʉHelode akati, “Nilonda ʉmheele lɨno lɨno ʉmutu ghwa Yohani ʉMwofughi mʉ lɨsinia.” 9Ʉntwa ʉHelode akasukunala kyongo. Neke, ʉlwakʉva akajɨghile pamaaso gha vahesia vala, akalaghɨla kuuti ʉmhɨnja ʉjuo apelue. 10Pe akasuungʼha ʉmuunhu alʉte mʉ ndinde adumule ʉmutu ghwa Yohani. 11Ʉmutu ghwa Yohani ghʉkaletua mʉ lɨsinia, akapelua ʉmhɨnja jʉla, ghwope akampeela ʉngʼina. 12Pepano avavʉlanɨsɨvua va Yohani vakalʉta, vakatoola ʉmʼbɨlɨ ghwa Yohani, vakaghʉvɨɨka mʉ mbiipa. Pe vakalʉta kʉkʉmʼbʉʉla ʉYesu ɨmhola jɨla.
ɄYesu ilɨsia avaanhu imbilima ihaano
(Malɨka 6:30-44; Lʉʉka 9:10-17; Yohani 6:1-14)
13ɄYesu ye apʉliike ɨmhola ɨjio, akavʉʉka pala nɨ ngalava na kulʉta pamonga pa vʉsyefu. Neke avaanhu ye vapʉliike kuuti ʉYesu avʉkile pala, vakahʉma mʉ makaaja ghaave, vakaghenda lʉghʉlʉ, vikʉmʼbɨngɨlɨla ʉYesu kʉno alʉtile. 14ɄYesu ye ikwika mʉ ngalava, akalɨvona ɨlɨpʉgha ɨlɨvaha ɨlya vaanhu, akavavonela ɨkɨsa, akavasosia avatamu vaave.
15Ye vwilile, avavʉlanɨsɨvua vaake vakalʉta pa mwene vakamʼbʉʉla vakati, “Apa tukalile pe lʉnyika pasila kɨmonga, kange vwilile, ʉvatavʉle avaanhu ava valʉtaghe mʉ fikaaja kuuti vakaghʉle ifyakʉlia.” 16ɄYesu akavamʉla akati, “Nakwekʉti ʉmpaka aveene vavʉʉke, mʉvapeele ʉmue ɨkyakʉlia.” 17Aveene vakamʉla vakati, “Natʉlɨ na kɨmonga apa, looli ghalɨ gha makate ghahaano ni samaki ivɨlɨ.” 18ɄYesu akavavʉʉla akati, “Mʉleete apa.”
19Pepano akavavʉʉla avaanhu kuuti vikale pa lɨsoli. Pe akatoola amakate ghala ghahaano ni samaki sila ivɨlɨ, akalola kʉkyanya, akamhongesia ʉNgʉlʉve. Pe akamenyʉlania amakate ghala, akavapeela avavʉlanɨsɨvua vaake, voope vakavaghavɨla avaanhu. 20Avaanhu vooni vakalia, vakikuta. Avavʉlanɨsɨvua vaake vakakongʼhania ifisighasi, sikamema indɨɨlo kɨjigho ni vɨlɨ. 21Avaanhu vano valyaliile, avakɨnhaata veene valyale imbilima ihaano, kɨsila kʉvala avakɨjʉʉva na vaana.
ɄYesu ighenda pakyanya pa malenga
(Malɨka 6:45-52; Yohani 6:16-21)
22Ʉnsiki ghʉghuo, ʉYesu akavavʉʉla avavʉlanɨsɨvua vaake kuuti vingile mʉ ngalava, valongole kulʉta ɨmwambo ɨjɨngɨ, pano ʉmwene itavʉla ɨlɨpʉgha lya vaanhu kuuti valʉtaghe. 23Ye avatavwile, akalʉta mwene kʉ kɨdunda kukufuunya. Ɨngʼhiisi jɨkatengʉla, ajiighe mwene kʉ kɨdunda. 24Ʉnsiki ʉghuo ɨngalava#14:24 Ɨngalava: Ɨmba ɨlɨsio Ngalavakʉ Vʉghanʉle vwa Masio aMahesia. jɨla jɨkava jɨfikile pakate pa lɨsʉmbe, jitovua na mavɨngo, ʉlwakʉva ɨmhepo ɨmbaha jɨkasighagha kʉno vilʉta.
25Ye kutapihenga, ʉYesu akalʉta kʉ vavʉlanɨsɨvua vaake, ighenda pakyanya pa malenga. 26Neke avavʉlanɨsɨvua vaake ye vikʉmwagha ighenda pakyanya pa malenga, vakoghopa kyongo, vakakoola vakati, “Ɨlɨsyʉka!” 27Ʉnsiki ghʉghuo ʉYesu akavavʉʉla akati, “Kangala, neene, namʉngoghopaghe.” 28Pe ʉPeteli akamʼbʉʉla akati, “Ghwe Mʉtwa, nave lweli veeve, ʉmbʉʉle niise palyʉve nɨghende pakyanya pa malenga.” 29ɄYesu akamwamʉla akati, “Isa.” Pe ʉPeteli akiika mʉ ngalava jɨla, akatengʉla pighenda pakyanya pa malenga, ilʉta kwa Yesu. 30Neke ye ivona ɨmhepo ɨmbaha jigugula, akoghopa kyongo, akatengʉla kudwiviila. Pe akakoola akati, “Ghwe Mʉtwa, ʉmhoke!”
31Ʉnsiki ghʉla ghʉla, ʉYesu akagholosia ʉlʉvoko lwake, akankola, akamʼbʉʉla akati, “Ghwe nya lwɨtɨko lʉdebe ʉve, kɨki ʉlɨ ni nganighani?” 32Pepano ʉYesu nʉ Peteli vakingila mʉ ngalava, ɨmhepo jɨla jɨkalitama. 33Avavʉlanɨsɨvua vano valyale mʉ ngalava, vakamwɨmɨka ʉYesu vakati, “Kyangʼhaani, ʉve ʉlɨ Mwana ghwa Ngʉlʉve!”#14:33 Mwana ghwa Ngʉlʉve: Ɨmba kʉ Vʉghanʉle vwa Masio aMahesia.
ɄYesu isosia avatamu kʉ ɨɨsi ɨja Genesaleti
(Malɨka 6:53-56)
34ɄYesu na vavʉlanɨsɨvua vaake vakalovoka ɨlɨsʉmbe ɨlya Galilaya, vakafika mʉ ɨɨsi ɨja Genesaleti. 35Avaanhu ava pala ye vakagwile kuuti ghwe Yesu, vakatwala imhola imbale sooni. Pepano avaanhu vakavatwala avatamu vooni kwa Yesu, 36vakansʉʉma avɨtɨkɨsie avatamu vabasie lʉ lʉvilo lwa mwenda ghwake. Avatamu vooni vano vakabasyagha, vakasokagha.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.