Mataayi 16
16
AVafalisayi vilonda ʉYesu ahʉfie ɨkɨvalɨlo
(Malɨka 8:11-13; Lʉʉka 12:54-56)
1AVafalisayi na Vasadukayi vamonga vakalʉta kʉkʉmʉghela ʉYesu, vakasʉʉma kuuti ahʉfie ɨkɨvalɨlo kɨno kivonia kuuti asungʼhilue nʉ Ngʉlʉve. 2ɄYesu akavamʉla akati, “Pano jɨfikile ɨvwilile mwiti, ‘Pakɨlaavo kukia vʉnofu, ʉlwakʉva kʉkyanya kʉvalafu.’ 3Palwakɨlo mwiti, ‘Ʉmʉsyʉghʉ ɨfula ɨmbaha jitoonya, ʉlwakʉva kʉlɨ mafunde kange kʉghuvile.’ Mwe vakedʉsi ʉmue, mʉkagwile kulʉvʉlania ifivalɨlo ifya kʉkyanya kʉ mpalanga, lwandaani mukunua kʉkʉfitangʼhania ifivalɨlo fino fivombeka lɨno kuuti fili nʉ mʉlʉvo mʉki!#16:2-3 Ifidebe ifi namwefili mʉ fitabu fimonga ifikʉʉlʉ. 4Avaanhu va kɨsina ɨkɨ ɨkɨhosi, vano navikʉmʼbɨkɨla mwojo ʉNgʉlʉve,#16:4 Navikʉmʼbɨkɨla mwojo ʉNgʉlʉve: Mʉ Kɨyunaani lɨlembilue, ɨkɨsina ɨkɨvwafu, kwekʉti vamʉlekile ʉNgʉlʉve ghwave. vilonda ɨkɨvalɨlo. Looli navalapelua ɨkɨvalɨlo, ʉlwene ɨkɨvalɨlo kɨno ʉNgʉlʉve alyahʉfisie vwɨmɨla ʉYoona.” Pepano ʉYesu akavaleka, akavʉʉka ilʉta.
Imbʉlanɨsio imbiivi isa Vafalisayi na Vasadukayi
(Malɨka 8:14-21)
5Avavʉlanɨsɨvua va Yesu ye vilovoka ɨnyanja, vakasyemua kutoola amakate. 6ɄYesu akavavʉʉla akati, “Mʉvisaghe maaso nɨ kɨlʉle ɨkya Vafalisayi na Vasadukayi.” 7Avavʉlanɨsɨvua vala vakatengʉla piposania veene viiti, “Ijova enendɨɨkɨ ʉlwakʉva natʉgadile amakate!”
8ɄYesu akasikagʉla sino vakava vijova, akavavʉʉla akati, “Mwe vanya lwɨtɨko lʉdebe ʉmue! Kɨki mukanɨngʼhana jʉmue mwiti mʉlɨ vasila makate? 9Mʉjiighe namʉkʉlʉtangʼhania, nambe kukʉmbʉka amakate ghala ghahaano ghano vakaliile avaanhu vala imbilima ihaano. Asi, ifisighasi mʉkamemisie indɨɨlo ilɨngi? 10Nambe amakate ghala lekelalʉbale kʉ vaanhu vala imbilima ine, asi, mʉkakongʼhanisie ifisighasi indɨɨlo ilɨngi? 11Lwandaani namʉkʉlʉtangʼhania kuuti imhola sino nijova numue nasa makate? Ʉne nijova kuuti, mʉvisaghe maaso nɨ kɨlʉle ɨkya Vafalisayi na Vasadukayi.” 12Apuo avavʉlanɨsɨvua vaake vakalʉtangʼhania kuuti naaveele ijova ɨkɨlʉle, looli aveele ijova imbʉlanɨsio imbiivi isa Vafalisayi na Vasadukayi.
ɄPeteli ijova kuuti ʉYesu ghwe Kɨlɨsite
(Malɨka 8:27-30; Lʉʉka 9:18-21)
13Pepano ʉYesu akalʉta imbale isa kʉ Kaisalia-Filipi. Ye afikile, akavaposia avavʉlanɨsɨvua vaake akati, “Avaanhu viiti ʉne ne Mwana ghwa Muunhu, neene veeni?” 14Vakamwamʉla vakati, “Vamo viiti veeve Yohani Mwofughi, vamonga viiti veeve Eliya, avange viiti veeve Yelemia, nambe kuuti ʉve ʉlɨ ʉmo mʉ vavɨli.” 15ɄYesu akavaposia kange akati, “Neke ʉmue mwiti neene veeni?” 16ɄSimoni ʉPeteli akamwamʉla akati, “Ʉve veeve Kɨlɨsite, Mwana ghwa Ngʉlʉve jʉno mwʉmi.”
17ɄYesu akamʼbʉʉla akati, “Simoni mwana ghwa Yoona ʉfunyilue, ʉlwakʉva nakwale ʉmuunhu jʉno akʉhʉfisie isio, looli ʉNhaata ghwango jʉno alɨ kʉkyanya. 18Lɨno nɨkʉkʉvʉʉla kuuti, veeve Peteli, kwekʉti lɨnhalavue. Pakyanya pa lɨnhalavue ɨlɨ nijenga ɨnyumba jango jɨno kye kɨpʉgha kya vɨtɨki, ingʉfu isa kʉvʉfue nasingajɨleme lʉsiku. 19Nɨkʉkʉpeela ifungulilo isa Vʉtwa vwa kʉkyanya, sooni sino ʉkanile mʉ ɨɨsi ɨjɨ, ghwope ʉNgʉlʉve iiva akanile kʉkyanya. Kange, sooni sino ghwɨtɨkisie mʉ ɨɨsi ɨjɨ, najʉ Ngʉlʉve iiva ɨtɨkisie kʉkyanya.” 20Pe ʉYesu akavakaana avavʉlanɨsɨvua vaake vala kuuti, navangamʼbʉlaghe muunhu kuuti ʉmwene ghwe Kɨlɨsite.
ɄYesu ijova ɨmhola ɨja kʉfua na kusyʉka kwa mwene
(Malɨka 8:31–9:1; Lʉʉka 9:22-27)
21Kutengʉla ʉnsiki ʉghuo, ʉYesu akava ɨkʉvavʉʉla pa vʉvalafu avavʉlanɨsɨvua vaake kuuti, lʉnoghiile ʉmwene kulʉta kʉ Yelusalemu na kuuva ni mhumuko nyinga kuhʉma kʉ vagojo, kʉ vavaha va vatekesi na kʉ vavʉlanɨsi va ndaghɨlo isa Moose,#16:21 Vagojo, kʉ vavaha va vatekesi na kʉ vavʉlanɨsi va ndaghɨlo isa Moose: Ava ve valongosi va Vayahudi mʉ mbombo sooni. Ɨmba ɨlɨsio Kɨpʉgha kya valongosi kʉ Vʉghanʉle vwa Masio aMahesia. na kubudua. Neke ɨkɨghono ɨkya vʉtatu isyʉka. 22Pe ʉPeteli akalʉta naghwope palʉbale, akatengʉla kʉkʉnʼdalɨkɨla akati, “Lʉleke pivombeka ʉluo Mʉtwa! Isio nasingakwaghe!” 23Neke ʉYesu akansyetʉkɨla ʉPeteli, akamʼbʉʉla akati, “Vʉʉka apa ghwe Setano ʉve! Ghulonda kʉkʉsigha ʉne kuvomba ʉvughane vwa Ngʉlʉve! Amasaaghe ghaako nagha Ngʉlʉve, ʉlwene masaaghe gha vaanhu.”
24Pe akavavʉʉla avavʉlanɨsɨvua vaake akati, “Ʉmuunhu jʉno ilonda kʉkʉmbɨngɨlɨla ʉne, avʉleke ʉvughane vwake, itavʉle ambɨngɨlɨlaghe nambe kʉʉve kwe kʉfua.#16:24 Itavʉle ambɨngɨlɨlaghe nambe kʉʉve kwe kʉfua: Mʉ Kɨyunaani lɨlembilue, ikaane jʉjuo apɨnde ɨkɨkovekano kyake ambɨngɨlɨlaghe. 25Ʉlwakʉva ʉmuunhu jʉno ilonda kupoka ʉvwʉmi vwake, ʉjuo alambʉsia, looli ʉmuunhu jʉno ikwambʉsia ʉvwʉmi vwake vwɨmɨla ʉne, ʉjuo iliiva nʉ vwʉmi ʉvwa kʉvʉsila kʉsila. 26Lɨno, ʉmuunhu ndepoonu ivʉmbʉlɨla kɨki kuuva nʉ vʉmofu vwoni ʉvwa ɨɨsi, neke ambʉsie ʉvwʉmi vwake? Nambe ʉmuunhu ahʉmie kɨki apyanɨsie pa vwʉmi vwake? 27Ʉlwakʉva ʉne ne Mwana ghwa Muunhu nilikwisa na vanyamhola vango mʉ vʉvaha vwa Nhaata ghwango. Pe nilikʉmhomba nʉjʉnge kulɨngʼhana ni mbombo saake. 28Kyangʼhaani nɨkʉvavʉʉla, vamonga nkate mʉlyʉmue mwe vano mʉlɨ apa, navalafua kuhanga pano vikʉnyaagha ne Mwana ghwa Muunhu nɨlaava nikwisa mʉ Vʉtwa vwango.”
Currently Selected:
Mataayi 16: wbi
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
