Mataayi 23

ɄYesu ɨkʉvapavɨla avaanhu vwɨmɨla avalongosi va Vayahudi

(Malɨka 12:38-40; Lʉʉka 11:37-52; 20:45-47)

1Pe ʉYesu akalɨvʉʉla ɨlɨpʉgha lɨla palɨkɨmo na vavʉlanɨsɨvua vaake akati, 2“AVavʉlanɨsi va ndaghɨlo sa Moose na Vafalisayi valɨ nʉ vʉtavʉlɨlua ʉvwa kʉvavʉlanɨsia avaanhu indaghɨlo sa Moose. 3Lɨno, mʉgadɨlɨlaghe na kuvomba sino vikʉvavʉʉla. Neke namʉngavɨngɨlɨlaghe amaghendele ghaave, ʉlwakʉva sino vivʉlanɨsia nase sino vivomba. 4Aveene vipinya amasigho amasito#23:4 Amasigho amasito: Apa ʉYesu ihwananɨsia amasigho ni ndaghɨlo sooni sino avavʉlanɨsi va ndaghɨlo sa Moose na Vafalisayi vakongelisie. Indaghɨlo isio silyale nhalamu kʉ vaanhu kʉkʉsikola na kʉkʉsivɨngɨlɨla. na kʉkʉvatwɨka avange, neke aveene navighela nambe padebe kutanga kupɨnda.#23:4 Aveene navighela nambe padebe kutanga kupɨnda: Mʉ Kɨyunaani lɨlembilue, Neke aveene navikwabasia nambe nɨ kyove.

5“Imbombo sooni sino vivomba, vivomba mʉlwa kuhʉfia pamaaso gha vaanhu. Vipinya pa vweni na mʉ mavoko ififuko ifya ngʼhwembe#23:5 Ififuko ifya ngʼhwembe: AVayahudi vakipinyagha pa vweni na mʉ mavoko ififuko ifya ngʼhwembe fino mʉnkate vakavɨkagha aMalembe aMɨmɨke. Vakavombagha ʉluo kuuti vakʉmbʉkaghe kʉkʉmwɨmɨka ʉNgʉlʉve ifighono fyoni. ifikome kukila ifya vange. Kange, vikwongelesia ʉvʉtali ʉvwa filʉndo ifya salavua#23:5 Filʉndo ifya salavua: ɄNgʉlʉve alyalaghiile avakɨnhaata vooni kuuva ni filʉndo ifya salavua mʉ menda ghaave fino fiswembeela imbale ine. Vakavombagha ʉluo kuuti vakʉmbʉkaghe kʉkʉmwɨmɨka ʉNgʉlʉve na kuvɨngɨlɨla indaghɨlo saake (Mbalɨlo 15:37-41; Similisio sa Ndaghɨlo 22:12). Neke avavʉlanɨsi va ndaghɨlo sa Moose na Vafalisayi vakavɨkagha kuuva fitali fiijo kukila avange kuhʉfia ʉvwoghopua vwave. mʉ menda ghaave. 6Mʉ fikulukulu vilonda kukukala kʉ fitengo ifya voghopua, na mʉ masinagogi vilonda kukukala kʉvʉlongolo. 7Kange, vilonda avaanhu vavahʉngɨlaghe nʉ vwoghofi mʉ mapuulo. Vihovoka fiijo pano avaanhu vikʉvatambʉla viiti, ‘Mʼbʉlanɨsi.’

8“Neke ʉmue namʉngatambʉlwaghe, ‘Mʼbʉlanɨsi,’ ʉlwakʉva ʉMʼbʉlanɨsi ghwinu alɨ jʉmo mwene, ʉmue mweni mʉlɨ vavɨngɨlɨli. 9Kange, namʉngantambʉlaghe ʉmuunhu mʉ ɨɨsi, ‘Nhaata,’ ʉlwakʉva ʉNhaata ghwinu alɨ jʉmo mwene, alɨ kʉkyanya. 10Kange, namʉngatambʉlwaghe, ‘Valongosi,’ ʉlwakʉva ʉMʉlongosi ghwinu alɨ jʉmo mwene, ghwe Kɨlɨsite. 11Ʉmuunhu ghweni jʉno ilonda kuuva mʼbaha ghwinu, avisaghe mʼbombi ghwinu. 12Ʉlwakʉva ʉmuunhu ghweni jʉno ikughinia, ʉNgʉlʉve alamwisia. Neke ʉmuunhu jʉno ikujisia, ʉNgʉlʉve alamʉghinia.

13“Ɨga ʉmue mwe vavʉlanɨsi va ndaghɨlo sa Moose, na jʉmue mwe Vafalisayi, mʉlɨ vakedʉsi! Mʉkʉvasigha avaanhu kukagʉla ɨsɨla ɨja kwingila mʉ Vʉtwa vwa kʉkyanya. Jʉmue mwe veene namukwingila, kange vano vilonda kukwingila, namʉkʉvɨtɨkɨsia.

14“Ɨga ʉmue mwe vavʉlanɨsi va ndaghɨlo sa Moose na jʉmue mwe Vafalisayi, mʉlɨ vakedʉsi! Mʉkʉvafumba avafwɨle ifiinu fyave, neke mukufuunya inyifuunyo inhali pamaaso gha vaanhu kuuti mʉvoneke mʉlɨ vagholofu! Ɨkɨghono ɨkya vʉhɨghi mʉlʉpɨla ʉlʉkwegho lwa Ngʉlʉve.#23:14 Akadebe aka namwekale mʉ fitabu fimonga ifikʉʉlʉ.

15“Ɨga ʉmue mwe vavʉlanɨsi va ndaghɨlo isa Moose na jʉmue mwe Vafalisayi, mʉlɨ vakedʉsi! Musyʉtasyʉta mʉ ɨɨsi na kulovoka inyanja neke mʉmʼbangʉle nambe ʉmuunhu jʉmo jʉno naMʉyahudi, kuuti aave Mʉyahudi. Neke kyande avangwike kuuva ghwinu, mʉkʉmʼbɨɨka ʉpɨle kavɨlɨ kukila ʉmue ʉlʉpumuko ʉlwa mwoto ghʉno naghusima lʉsiku.

16“Ɨga ʉmue mwe valongosi mwe vabofu amaaso! Mʉkʉvavʉlanɨsia avaanhu mwiti, ‘Ʉmuunhu angajɨɨghe vwɨmɨla ɨnyumba ɨnyɨmɨke ɨja Ngʉlʉve, nalʉtalamu. Looli ʉmuunhu angajɨɨghe vwɨmɨla ɨsahabu jɨno jɨlɨ mʉ nyumba ɨnyɨmɨke ɨja Ngʉlʉve, ʉjuo ilondua kuvomba ndavʉle ajɨghile.’ 17Ʉmue mʉlɨ vajasu, kange mʉlɨ vabofu amaaso! Kɨlɨku ɨkɨvaha kukila? Asi, isahabu au ɨnyumba ɨnyɨmɨke ɨja Ngʉlʉve jɨno jipelela isahabu kuuva nyɨmɨke? 18Kange muvʉlanɨsia avaanhu mwiti, ‘Ʉmuunhu angajɨɨghe vwɨmɨla ɨkɨtekelelo, nalʉtalamu. Looli angajɨɨghe vwɨmɨla ɨlɨtekelo lɨno vavɨkile pa kɨtekelelo, ʉjuo ilondua kuvomba ndavʉle ajɨghile.’ 19Ʉmue mʉlɨ vabofu amaaso! Kɨlɨku ɨkɨvaha kukila? Asi, lɨvaha ɨlɨtekelo au ɨkɨtekelelo kɨno kipelela ɨlɨtekelo lɨɨve lyɨmɨke? 20Ʉmuunhu jʉno ijɨɨgha vwɨmɨla ɨkɨtekelelo, iiva ijɨɨgha vwɨmɨla ɨkɨtekelelo ni fiinu fyoni fino fivɨkua pa kyene. 21Kange, ʉmuunhu ghweni jʉno ijɨɨgha vwɨmɨla ɨnyumba ɨnyɨmɨke ɨja Ngʉlʉve, iiva ijɨɨgha vwɨmɨla ɨnyumba ɨjio na kwa Ngʉlʉve jʉno ikukala mʉ nyumba ɨjio. 22Ghwope jʉno ijɨɨgha vwɨmɨla kʉkyanya, ijɨɨgha vwɨmɨla ɨkɨtengo kya Ngʉlʉve na kwa Ngʉlʉve jʉno ikukala pa kɨtengo ɨkio.

23“Ɨga ʉmue mwe vavʉlanɨsi va ndaghɨlo sa Moose, na jʉmue mwe Vafalisayi, mʉlɨ vakedʉsi! Mughina kʉkʉntavʉlɨla ʉNgʉlʉve ɨlɨtekelo ɨlya saka#23:23 Saka, lyale lɨtekelo lɨno vakatavʉlagha ɨkɨghavo kɨmo mʉ fighavo kɨjigho mʉ fino ʉmuunhu akavile (Similisio sa Ndaghɨlo 14:22). AVafalisayi vakavɨngɨlɨlagha fiijo ʉlʉlaghɨlo ʉlʉ (Lʉʉka 18:12). mʉ fiinu ifya ndalama indebe, ndavʉle inyʉngʉ ni filʉngo ifingi ifya kyakʉlia. Neke namuvɨkɨla mwojo kuvomba imbaha sino silʉngɨkua mʉ ndaghɨlo, ndavʉle kuuva mʉ vwakyangʼhaani, kuuva vanya lʉsʉngʉ na kuuva nʉ lwɨtɨko. Isi se sino mʉnoghiile kuvomba, palɨkɨmo na madebe aghuo ghano muvomba. 24Ʉmue mwe valongosi vabofu amaaso! Muhʉʉja ifiinu ifidebe mʉ fino munyua, neke mugulubika ingamɨla!

25“Ɨga ʉmue mwe vavʉlanɨsi va ndaghɨlo sa Moose, na jʉmue mwe Vafalisayi, mʉlɨ vakedʉsi! Mukuvɨɨka vagholofu pamaaso gha vaanhu, neke ifiinu fino mʉlɨ nafyo fya vʉlyasi nʉ vʉhojofu. Mʉlɨ ndavʉle ʉmuunhu jʉno isuka ɨkɨkombe nɨ sahani kʉnji kwene, neke ileka mʉnkate muno mʉnyalile, ʉvʉnyali vʉno vʉlɨ papinga. 26Ʉve ghwe Mfalisayi, ghwe mʼbofu amaaso! Valasia taasi ʉvʉhosi vʉno mwevʉle nkate mʉlyʉve, neke ɨmbombo jaako jiiva nofu.

27“Ɨga ʉmue mwe vavʉlanɨsi va ndaghɨlo sa Moose, na jʉmue mwe Vafalisayi, mʉlɨ vakedʉsi! Mʉlɨ ndavʉle imbiipa sino vimata ɨlɨkeeji, sivoneka nofu kʉnji, neke mʉnkate simemile amafupa gha vafue nʉ vʉnyali ʉvʉnge. 28Fye lʉlɨvuo na jʉmue, kʉnji muvoneka mʉlɨ vagholofu, neke nkate mʉ moojo ghiinu mʉmemile ʉvʉkedʉsi nʉ vʉhosi.

29“Ɨga ʉmue mwe vavʉlanɨsi va ndaghɨlo sa Moose, na jʉmue mwe Vafalisayi, mʉlɨ vakedʉsi! Ʉlwakʉva mujenga imbiipa isa vavɨli va Ngʉlʉve na kulava imbiipa isa vagholofu. 30Pe mujova mwiti, ‘Pwetʉsavisagha amasiki gha vakʉʉlʉ viitu, natwale tʉkʉvatanga kʉkʉvabuda avavɨli va Ngʉlʉve.’ 31Mʉ njovele ɨjio muvonia kuuti, ʉmue mʉlɨ vahosi ndavʉle avakʉʉlʉ viinu vano valyavabudile avavɨli va Ngʉlʉve! 32Lɨno, mʉkwɨlanɨsie ʉvʉhosi vʉno avakʉʉlʉ viinu valyatengwile!

33“Ʉmue mwe kɨsina ɨkɨhosi! Mʉlɨ ndavʉle injoka inya sumu ɨngʼhali! Ndepoonu mupʉnga ndaani ʉvʉhɨghi vwa Ngʉlʉve ʉvwa kʉvataagha kʉ lʉpumuko lwa mwoto ghʉno naghusima lʉsiku? 34Pʉlɨkɨsia! Lɨno, nɨkʉvasuungʼha kʉlyʉmue avavɨli, na vaanhu avanya lʉhala na vavʉlanɨsi va ndaghɨlo sa Moose, neke ʉmue mulikʉvabuda, vamonga mulikʉvakomelela pa fikovekano, avange mulikʉvatova ni mijeledi mʉ masinagogi ghiinu na kʉkʉvadaga kuhʉma ɨlɨkaaja nɨ lɨkaaja. 35Mʉ ʉluo ʉNgʉlʉve ilikʉvahɨgha ʉmue vwɨmɨla kʉkʉvabuda avaanhu vooni avagholofu, kuhʉma ibudua ʉAbeli jʉno naalyahokile kɨɨnu, kuhanga ibudua ʉSakalia ʉnkina Belekia, jʉno alyabudilue pakate pa nyumba ɨnyɨmɨke ɨja Ngʉlʉve na pa kɨtekelelo.#Vʉtengʉlɨlo 4:8; 2 Mhola sa Masiki 24:20-22 36Kyangʼhaani nɨkʉvavʉʉla, avaanhu ava kɨsina ɨkɨ valʉpɨla ʉlʉkwegho lwa Ngʉlʉve vwɨmɨla ʉvʉhosi ʉvuo vwoni.”

ɄYesu isukunala vwɨmɨla avaanhu ava mʉ Yelusalemu

(Lʉʉka 13:34-35)

37Pepano ʉYesu akati, “Yelusalemu, Yelusalemu! Ghubuda avavɨli na vaanhu vano visungʼhua kʉlyʉve, ʉkʉvatova na mavue. Kekinga nɨlondile kʉkʉvakongʼhania avaanhu vaako, ndavʉle ɨngʼhʉkʉ vʉle jikongʼhania na kughumbatɨla ifyanaake, neke namukʉnda! 38Lolagha, ʉNgʉlʉve ɨkʉjɨleka ɨnyumba jiinu kuuva mahaame! 39Kyangʼhaani nɨkʉvavʉʉla kuuti, kutengʉlɨla lɨno namʉnganyaaghe kange, kuhanga ʉnsiki pano muliiti, ‘Afunyilue jʉno ikwisa mʉ lɨtavua lya Mʉtwa ʉNgʉlʉve!’#Sabuli 118:26 ”

Currently Selected:

Mataayi 23: wbi

Highlight

Copy