Nya-mangaji Mirningiya Jujiba 40
40
Jujiba kilu-yunduyunduma awara wumba kawula-mawuranga
1Kulu baku ngulakari arndaarnda kawula-arri rri-mbangu, kawulalu-walima mirningiyawujara rri-jawina rri-wirdi nyiku ki-wirdiwalangu ki-king, nya-mangaji king alunga liyi-jibiya Yijiba. Kulu jina nyarrku wirdi kulkurdanthawu wabuda yiku ki-king ngala jina nyarrku wirdi mu-ngarranku yiku ki-king. Kawula-wardima awara yiku ki-king, 2kulu rriyiku ka-yinjathirri wulanga rriyi-ja rriyi-wirdiyu.
3Kawulili-ja bajinju nmanthawu rdirrirrantha barra, kawulili-ja yilalu ki-wirdiyu ki-burijin, nya-mangaji burijin wumba Jujiba ka-arri baji.
4Kulu nyungku-ja ki-wirdinju, kawulila-ka yilalu ki-Jujiba kulu yiwa barra yukulyukumanthawu awara wulanga marda. Kila-ka ma-ngarra wulanga, kila-ka wabuda wulanga, kawulilu-kunkunma baji...i yurrngumantha ngalawula kawula-arri baji.
5Kulu baji barra, wundururra barra, kawula-mawuranga awara, rri-ja jawinawujara yiku ki-king. Kawula-mawuranga awara ruthuruthu yiku nyuwarrkulu baki yiku nyuwarrkulu.
6Kulu yalibala kawula-lhuwarri wardirrinjarra nawula-wurdu, nyamba-rarrinjarra nawula-wurdu kangka kurdardi kawula-nykarrinma nya-mangaji wumba kawula-mawuranga. Kulu ka-wingka Jujiba yalibala barra wulalu, kulu rri-ja barra kanymardawujara rri-jawina wardirrinjarra nawula-ngurru.
7Kulu kawulilu-yalbanga ki-Jujiba, “Marrimbala! Ngandarra jimbala-wardirrinji nimbala-wurdu? Ruthu nimbala-ngurru jimbalirna-nganji.”
8Ngalawula kawula-arri yiku, “Katharramba-mawuranga wundururra narnu-ngabiya, kulu marningatharra rri-manji nuwu-mangaji. Kulu kurdardi nganinju katharrilu-yunduyundumarru jina wuka, kurdardi yiku marnaji.” Kulu ka-arri wulanga Jujiba, “Nganhimbali-naya kimbala-mawuranga kangka mamiwa Kud jiwini ngathangka kalngi yijan, yiwa mirdan jinawuthu mawuranganthawu, kulu yiwa ki-Kud kilu-yunduyundumala ngatha jinangu awara barra wumba kimbala-mawuranga.”
9Kulu yiwa barra ambuliyalu nyungku-ja, wirdi kulkurdanthawu wabuda yiku ki-king. Kulu kili-nu barra narniku wumba kilu-mawuranga. “Ngarna, karna-mawuranga na-mbangu narnu-walawala karnu-arri, 10narnu-yala ankangu karanka na-kanymarda arrkula. Kulu ka-wurlma wanjirr, ka-wurlma wulanthantha karna-kala. Bajingu kurna-kala nu-wulaya ma-mangaji ma-kuriba, ku-wunhunhurri. 11Kulu ka-arri banikin marlijinda ngathangka, nya-mangaji baji yabi barra nyiku ki-king. Bajingu kurna-jabuma karanka ma-kuriba kulu kurna-burrujulma nu-ngiliny wajkaliya banikindu, kulu karna-ngunda king, karna-yibarra banikin marlijinda yilaa. Nganinya barra karna-mawuranga.”
12Kulu Jujiba barra ka-wukanyi yiku, “Jinangu wumba kinyu-mawuranganhu, jinangu yunduyundumanthawu awara yinku nganinya. Na-mangaji na-kanymarda arrkula karanka, jinangu barra Yijan Kud ja-wukanyinji na-kanyraarda arrkula na-wunbarr. 13Kumba-yangamala na-wurdu king, ka-yabirrila yinku barra na-wurdu, kulu baku, na-kanymarda arrkula na-wunbarr kirnili-nmala kulu ka-wingkala winkandu. Ka-wanila barra bajinju yilalu, kinya-kalakanthanama wabuda barra nguthalimanthawu yiku ki-king. Jinangu barra yinku kinyu-mawuranganhu.”
14Kulu mili ka-wukanyi yiku Jujiba, “Ngala minja kanha-linginmala namba yinda ka-wanila ki-king yilalu, kirna-barlirra, kulu kanhi-nala yiku ngarna wingkayawu winkandu, 15kangka winarrku karakarra kamalu-rduma nakaringu nyungku-nganunga ki-awarala, nganunga liyi-wuluwu liyi-Yiburu, kulu karnala-ka marnajinju. Kulu mili winarrku barra karnilu-yibarra rdirrirrantha arndaarnda winarrku, kurdardi karna-wardimanma awara. Nganinya kanhi-nala yiku ki-king, kirna-barlirra.”
16Kulu bajingu barra, yiwa nyarrku barra, jina wirdi mu-ngarranku yiku ki-king, kila-nykarri wukanyinjarra yiku nyuwarrkulu, yunduyundumantharra yiku narnu-yabi. Ka-arri yiku ki-Jujiba, “Kulu marningarna, ngarna barra karna-mawuranga awara. Kurna-kanthaninya wulala ngathangka ma-mbangu, ma-minini ma-kanymarda arrkula ma-mangaji, nu-lhangka ma-ngarra arndaarnda, yumbulyumbumantha ma-ngarra wumba kalu-wuba. 17Kulu julaki barra, ka-wabama bajinju ngathangkalu wulalu kulu ankaya. Kumba-wudurrumanthaninya ma-mangaji ma-wunhunhu ngathangka wulala, kumba-wudurrumanthaninya ma-mangaji mungka-mininila wumba kurna-rduma yiku ki-king.”
18Kulu Jujiba yiku ka-wukanyi, kili-nu barra, “Jinangu wumba kinyu-mawuranganhu, jinangu yunduyundumanthawu awara yinku nganinya. Ja-wukanyinji jinangu wuka yinku Yijan Kud. Ma-kanymarda arrkula ma-minini, na-kanymarda arrkula na-wunbarr. 19Nya-mangaji king, kalili-nala yinku, ka-wingkala winkandu-ngala kirnalu-marra nda-ngunduwa, ka-nbala na-wulaya, kalali-nala nganinya. Kirnalu-yibarrala na-manka arrijila ki-wurndaa, baku na-kanymarda arrkula na-wunbarr. Kulu nya-mangaji julaki kumba-wudurruma ma-mangaji ma-ngarra, marda yinda barra kumba-wudurrumala yinku, nyungku-mangaji ki-julakinda.” Nganinya barra ka-arri yiku Jujiba.
20Kulu baku barra, na-kanymarda arrkula na-wunbarr ngalarnu na-mangaji wumba ka-yanjarri wabarrangu king barra bajingulaji, winarrku ka-arri mingkiya bumantharra wirdiwalangu king, alu rarrmanthawu ma-ngarra, nyamba-lhawarrmanthawu yiku. Kulu kalili-ja barra likungu li-jawina ki-king, rdumanthawu barra rri-ja kanymarda mirningiyawujara.
21Kulu jinangu barra, wirdi kulkurdanthawu wabuda yiku ki-kinga, kilu-waninjanguma ki-king barra bajinju yilalu. Kili-yibarra mili banikin marlijinda yilaa ki-king, yiwa wunjayawu.
22Ngala jinangu nyarrku barra, wirdi mu-ngarranku yiku ki-king, kila-kanthaninya, kalu-yibarra arrijila ki-wurndaa, kulu kalu-rama barra, kalu-ma na-ngunduwa, bawuji.
Nya-mangaji wuka wumba ka-wukanyi yiwa Jujiba kilu-yunduyunduma awara, nganambajilulu barra ka-ngabiya awara wulanga.
23Ngala nya-mangaji nyarrku, ngaliwa ka-arri yilaa ki-king mili yurrulu, ngala minja kilu-murdirri kurdandu jinangu Jujiba, kurdardi mili kilu-linginmanma. Bawuji.
Currently Selected:
Nya-mangaji Mirningiya Jujiba 40: jao
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
