Эхин 21
21
Абраһаам ба хүбүүдынь Исаак, Ишмаэль
1Эзэн хэлэһэн үгэдөө хүрэжэ, Саррые һанаандаа оруулаад, үрэ үршөөн заяаба. 2Сарра хээлитэй болоод, Бурханай хэлэһэн болзорто, үтэлһэн Абраһаамда хүбүү түрэбэ. 3Абраһаам хүбүүндээ Исаак гэжэ нэрэ үгэбэ.
4Хүбүүнэйнгээ түрэһөөр долоон хоногой үнгэрһэнэй удаа Абраһаам Бурханай захиралтын ёһоор бэлгыень отолбо.
5Исаагай түрэхэдэ Абраһаам зуун наһатай байгаа. 6Тиимэһээ Сарра иигэжэ хэлэбэ:
— Бурхан бидэндэ ёһотойл хошон баяр үршөөгөө. Дуулаһан хүн бүхэн эгшэтэрээ энеэхэл даа.
7Саашань тэрэ иигэжэ нэмэбэ:
— Сарра хүүгэдые хүхүүлхэ, Абраһаам хүбүүтэй болохо гэжэ хэн бодохо байгааб?
8Хүбүүн томохон болобо. Хүхэнһөөн гараһан үдэр Абраһаам ехэ найр хэбэ.
9Нэгэтэ Сарра Египет ороной Һагаар эхэнэрһээ гараһан Авраһаамай хүбүүнэй өөрынь хүбүүн Исаагые наадалжа байхые хараад, 10Абраһаамда:
— Энэ шэбэгшэ эхэнэрые хүбүүнтэйнь хамта эндэһээ үлдэ! Угай зөөри хубаарилхада зарасын үри минии хүбүүн Исаагтай хамта угай эд зөөридэ хүртэхэ ёһогүй! — гэжэ хэлэбэ.
11Абраһаам Ишмаэль хүбүүнтэеэ хахасаха дурагүй байһан тула иимэ үгэнүүдые шагнахадань, сэдьхэлынь үбдэжэ байба. 12Зүгөөр Бурхан тэрээндэ:
— Хүбүүн, зараса эхэнэр тухайгаа һанаагаа бү зобо. Саррын хэлэһэн үгэ дуула! Юундэб гэхэдэ, Исаагаар дамжан, ши минии үгэхэб гэһэн үри хүүгэдтэй болохош. 13Харин зараса эхэнэрэйшни үри Ишмаэль гэдэг шинии хүбүүн мүн лэ байһан ушарһаа Би тэрэнэй үри һадаһадһаа бэеэ дааһан арад бии болгохоб, — гэжэ айладхаба.
14Үглөө үглөөгүүр Абраһаам эртэ бодожо, Һагаарта хилээмэ үгөөд, годон арһаар оёһон амһарта соо уһа үргэлүүлээд, хүбүүтэйнь хамта ябуулба. Һагаар хүбүүгээ хүтэлэн, Бэһээр-Шээбэ гэдэг хээрэ тала руу шэглэн ошобо.
15Тэрэ газараар удаан сагта түгэншэлэн ябахадань, туламтай уһаниинь дууһаба. Һагаар хүбүүгээ нэгэ һөөгэй һүүдэртэ һуулгаад, 16харбаһан годлиин хүрэхэ зайда өөрөө ошожо һуугаад, «хүбүүнэйнгээ үхэхые хараха аргамгүй» гээд сурхирса уйлаба.
17Ишмаэлиин бархиржа эхилхэдэ, Бурхан дуулаба, тиигээд Бурханай элшэн огторгойһоо Һагаарые ооголбо:
— Юун болооб, Һагаар? Бурхан хүбүүнэйшни бархирхые соносоо, зоболонгыень хараа, тиимэһээ бү ай! 18Бодо һууриһаа, хүбүүндээ ошо, гартаа аба! Би тэрээнһээшни агууехэ арад бии болгохоб.
19Бурхан нюдыень нээжэ, Һагаар худаг обёорбо. Тэндэ ошожо, амһартаяа уһаар дүүргээд, хүбүүндээ асаржа ундалуулба.
20Тэрэ сагһаа хойшо Бурхан энэ хүбүүе анхарба, хүбүүн хээрэ талада амидарһаар томо боложо, хожомынь һурша номоор мэргэн харбадаг хүн болоо һэн. 21Тэрэ Параан гэдэг хээрэ талада нүүжэ һуурижаба. Эхэнь тэрээндэ Египедһээ һамга асаржа үгөө һэн.
Абраһаам Абимээлэх хоёрой хэлсээн
22Тэрэ үедэ Гэраар хотын хаан Абимээлэх сэрэгэйнгээ дарга Пихол гэгшэтэй суг Абраһаамтай уулзажа, иигэжэ хэлэбэ:
— Юушье хээ һаатнай, танда Бурхан туһална. 23Намайе, минии үхибүүдые, ашанарыемни мэхэлхэгүйб гэжэ Бурханай нэрээр тангариглагты! Би танда хэды һайн байгаабииб, эгээл тиимээр намдашье, танда нютаг болоһон орон дайдадашье һайнаар хандахаб гэжэ тангариглагты!
24Абраһаам тангариглаба. 25Зүгөөр Абимээлэхтэ зарасанарайнь худагыень буляаһан тухай тэрэ гомдол бариба.
26— Би энээн тухай юушье мэдэхэгүй байнаб. Та энээн тушаа намда үнинэй хэлэхэеэ яагаабта? Би мүнөөл энээн тушаа танһаа дуулажа байһан ушарһаа тэрэ худагые хэн абааб гэжэ мэдэнэгүйб.
27Абраһаам Абимээлэхтэй хэлсээ баталан, хэдэн хони, үхэр үгэжэ, хэлсээгээ баталба. 28Абраһаам хонин һүрэгһөөн долоон эмэ хурьга шэлэжэ абаба. 29Тиихэдэнь Абимээлэх асууба:
— Энэ долоон хони юундэ амяарнь илгабат?
30— Эдээниие абагты, — гэжэ Абраһаам харюусаба. — Эдэ энэ худаг минии байһанай гэршэ: би өөрөө малтаа һэм.
31-32Абимээлэх сэрэгэйнгээ дарга Пихолтой хамта тэрэ долоон эмэ хонидые абажа, хэлсээ баталаад, нютагаа бусаба. Тэдэнэй Гэраар хото пилишт обог зоной нютагта оршодог бэлэй.
Абраһаам Абимээлэх хоёрой тэрэ худагай хажууда тангариг үргэжэ хэлсээ баталһан ушарһаа тэрэ газарта Бэһээр-Шээбэ#21.31-32 Газарай энэ нэрэ гурбан удхатай: нэгэдэхеэр, энэ Тангаригай Худаг, хоёрдохеор, Долооной Худаг, гурбадахяар, Бүтээһэнэй Худаг. гэжэ нэрэ олгогдобо.
33Абраһаам Бэһээр-Шээбэ нютагта томо мододые таряад, эгүүридэ мүнхэ Эзэн Бурханиие хүндэлжэ, тэндэ мүргэдэг, үргэл хэдэг болоо бэлэй.
34Иигэжэ Абраһаам пилишт обог зоной орон нютагта удаан сагта ажаһуугаа һэн.
Currently Selected:
Эхин 21: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
