Эхин 48
48
1Нэгэ хэды саг болоод, эсэгэмни ехээр үбшэлбэ гэжэ Иосиф дуулаба. Тиигээд тэрэ Мэнашшээ болон Эпрааим гэдэг хүбүүдээ дахуулаад, эсэгэдээ ерэбэ. 2«Иосиф хүбүүнтнай танда зорин ерээ» гэһэн үгэ дуулаад, Израиль хамаг хүсэеэ суглуулан, орон дээрээ үндыжэ һууба. 3Тиигээд Яков Иосиф хүбүүндээ иигэжэ хандаба:
— Ханаһаан ороной Лүүз гэдэг газарта байхадамни, Түгэс Хүсэтэ Бурхан намда үзэгдэжэ, үреэгээ бэлэй. 4Үреэхэдээ, Тэрэ «Би шинии уг удамые үрэжэлтэй олон болгохоб, олон арадуудые шамһаа бии болгохоб, энэ газар нютагые хэтэ мүнхэдөө эзэмшэхээр үри һадаһадташ үгэхэб» гэһэн юм. 5Минии Египет ерээдүй байхада түрэһэн хоёр хүбүүдшни минии хүбүүд болохо. Эпрааим Мэнашшээ хоёр ууган хүбүүн Рэүбээн Симеон хоёртой адли минии түрэһэн хүбүүд болобо гээшэ. 6Харин тэдэнэй удаа түрэһэн хүбүүд шинии болохо. Тэдээндэ өөрын гэхэ үмсэ газар намһаа үгтэхэгүй. Харин намһаа үмсын газарта хүртэһэн аханарайнгаа газар дайдада тэдэ ажаһууха эрхэтэй. 7Месопотамиһаа Ханаһаан руу нүүхэ замдам Эпраата, ондоогоор Бэтлэһээм, хотодо дүтэ Рахээл минии гар дээрэ наһа баража, би тэрэниие харгын хажууда хүдөөлүүлээ бэлэйб.
8Иигэжэ хөөрэжэ байтараа Израиль гэнтэ Иосифой хоёр хүбүүдые хараад, асууба:
— Эдэ хэд бэлэй?
9— Бурханай үршөөһэн хоёр хүбүүдни, — гэжэ Иосиф харюусаба.
— Тэдэнээ намда дүтэлүүлэ, — гэбэ Израиль. — Би тэдэнииеш Эзэн Бурханай нэрээр үреэхэм.
10Үбгэ наһан боложо, Израилиин хараа муудаад, мүртэй һайнаар харадаггүй һэн. Иосиф хүбүүдээ дүтэлүүлбэ, Израиль ашанараа тэбэреэд үнсэбэ. 11Тиигээд тэрэ Иосифто хэлэбэ:
— Би шамайе харахаб гэжэ найдаагүй һэм, харин Бурхан шамайешье, шинии хүбүүдыешье хараха аза талаан үршөөбэл.
12Иосиф хоёр хүбүүдээ эсэгынгээ үбэр дээрэһээ абаад, урдань һүгэдэн, доро дохибо. 13Удаань тэрэ хоёр хүбүүдээ хүтэлөөд, бага хүбүүн Эпрааимые Израилиин зүүн гарта, ууган хүбүүн Мэнашшээ гэгшые баруун гартань абаашан, урдань зогсообо. 14Зүгөөр Израиль баруун гараа бага хүбүүн Эпрааимай толгой дээрэ, зүүн гараа ууган хүбүүн Мэнашшээ гэгшын толгой дээрэ табиба. 15Тиигээд Иосифые үреэхэдээ, хоёр хүбүүдыень үреэн, иигэжэ тэрэ хэлэбэ:
— Минии үбгэ эсэгэ Абраһаам, эсэгэмни Исаак Бурханай зааһан замаар ябадаг байһан юм. Наһанаймни туршада намайе Бурхан дахуулжа, энэ үдэр хүрэтэр хаража хамгаалан байна. 16Намайе ёро муухай хүсэнһөө хамгаалжа байһан Бурханай элшэн эдэ хоёр хүбүүдые үреэхэнь болтогой! Минии нэрые эдэ хоёр хүбүүд залгамжалан абажа, үбгэ эсэгэнэр болохо Абраһаамай, Исаагай нэрэнүүдые уламжалан абажа ябахань болтогой! Эдэ хүбүүдэй үри һадаһадынь үй түмэн болохонь болтогой!
17Эсэгынгээ баруун гараа Эпрааимай толгой дээрэ табиһые Иосиф хараад, дурагүйдэжэ, гарыень абажа, ууган хүбүүн Мэнашшээ гэгшын толгой дээрэ табяад, 18иигэжэ хэлэбэ:
— Тиимэ бэшэ, аба! Та эндүүржэ байнат. Ууган хүбүүмни энэ байна. Баруун гараа энэ хүбүүнэйм толгой дээрэ табиит.
19— Би мэдэнэб, — гэбэ Израиль. — Мэдэнэб, хүбүүмни. Энээнһээш мүн лэ агууехэ арад гараха. Тиигэбэшье, дүү хүбүүниинь тэрээнһээ үлүү байха, олон арадай эхи табиха.
20Тиигээд тэрэ хоёр ашанараа саашань үреэжэ, иигэжэ хэлэбэ:
— Израилиин үри һадаһад бэе бэеэ үреэхэдээ, та хоёрой нэрэ хэлэжэ байхань болтогой! «Эпрааим Мэнашшээ хоёрой абаһан һайн һайханиие Эзэн Бурхан танда баһа үгэхэнь болтогой!» гэжэ үреэжэ байг лэ.
Эпрааимай нэрэһээ эхилжэ Яковой хэлэһэниинь ахаһаа үлүү хүндэтэй хүн тэрэ болохо гэһыень элирхэйлнэ.
21Һүүлээрнь Израиль Иосифто хэлэбэ:
— Абашни удахагүй хада гэртээ харихань. Харин Бурхан таанадтай хамта байжа, үбгэ эсэгэнэрэйтнай нютаглан байһан Ханаһаан орон таанадые бусаан абаашаха. 22Урдань би эмоор гэдэг обог аймагай урдаһаа тулалдахадаа, һэлмэ, һурша номой хүсөөр шэмэтэй һайхан нэгэ хадалиг газар дайда оложо абаһан хүм. Хүбүүдэйнгээ дундаһаа гансал шамдаа би тэрэ газарые үмсын болгон үгэнэб. Иигэжэ, хүбүүмни, ши аханарайнгаа дундаһаа абаһаа эгээл ехэ эд зөөри уг залгамжалан абаа болонош.
Currently Selected:
Эхин 48: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
