Эхин 50
50
1Иосиф эсэгынгээ толгой тэбэреэд, уйлан хайлан, таалан байба.
2Эмшэ домшонороо дуудан, Израиль эсэгынгээ шарилые занданшуулха захиралта тэрэ үгэбэ. 3Дүшэн хоногой туршада занданшуулха ажал ябуулагдаба, удаань далан хоногой туршада Египедэй улад зон Израилиин хойноһоо гашуудаа һэн.
4Уй гашуудалай үдэрнүүдэй дүүрэхэдэ, хаанай түшэмэлнүүдтэ Иосиф хандаба:
— Та бүхэнэй һанаанда таарамжатай байгаа һаам, эзэн хаанда иигэжэ хэлыт. 5Минии эсэгэ наһа барахынгаа урда тээ намһаа тангариг абаһан юм. Тэрэнэй ёһоор, би эсэгынгээ шарилые Ханаһаан ороной нэгэ хадын булаша бунханда абаашажа хүдөөлүүлхэ ёһотойб. Тэрэ булаша бунханиие эсэгэмни өөрөө бэлдэһэн юм. Эсэгэеэ хүдөөлүүлээд, бусажа ерэхэб. Минии ябахые зүбшөөгыт.
6Тиихэдэнь эзэн хаан иигэжэ харюу дамжуулба:
— Яба, эсэгэеэ хүдөөлүүлэ. Үгэһэн тангаригаа бэелүүлэ.
7Тиигэжэ Иосиф эсэгынгээ шарил абаад, Ханаһаан орон зорибо. Египедэй хаанай бүхы түшэмэлнүүд, зүблэгшэд болон Египедэй бүхы дээдэ зиндаата зон тэрээнтэй хамта ябаба. 8Тэдээнһээ гадна Иосифой бүхы гэр бүлэ, аха дүүнэр, эсэгэдэнь хамаатай бүхы түрэл гаралнууд ябалсаба. Гансал бага балшар үхибүүд, мал һүрэгынь лэ Египедэй Гоошэн нютагта үлэбэ. 9Хүнгэн тэргэтэй зоной, морин сэрэгэй мүн лэ ябалсаһан ушарһаа эдэ бүгэдэ нилээд ехэ субаан болоо бэлэй.
10Тэдэ Ханаһаан орон руу ороод, Иордан голой зүүн талада оршодог Атаад гэдэг хүнэй таряанай тээрмэ дээрэ ерээд, дахин уйлалдаба. Иигэжэ Иосиф тэндэ долоон хоногой туршада тогтожо, эсэгынгээ хойноһоо угаа ехээр шаналан-гашуудан ёһолоо бэлэй. 11Энэ нютагта ажаһуудаг ханаһаанайхид энээниие хараад, гайхан хэлсэбэ:
— Египедэй зон ямар ехээр бархиралдажа, гашуудажа байна гээшэб!
Тиимэһээ энэ газарые «Египедэй зоной бархираан», үгышье һаа, «Абэл-Мицрааим» гэжэ нэрлэһэн юм.
12Хүбүүдынь эсэгынгээ һүүлшын захяа дүүргээ: 13шарилыень Ханаһаан орондо асаржа, Мамре хотын зүүн талада оршодог Махпелаа гэдэг газарай хадын булашада абаашажа хүдөөлүүлбэ. Анхан сагта тэдэнэй үбгэ эсэгэ Абраһаам энэ газарые хээт обогой Эфрон гэдэг хүнһөө худалдан абаа бэлэй.
14Хүдөөлүүлһэнэй һүүлээр Иосиф суг ябаһан хүн зонтоёо хамта Египет руу бусаа бэлэй.
Аха дүүнэртэеэ Иосифой эблэрэлгэ
15Эсэгынгээ наһа бараһанай һүүлээр Иосифой аха дүүнэр хоорондоо хөөрэлдэбэ:
— Олон жэлэй урда тээ бидэ Иосифто муу юумэ хэһэн гээшэбди. Тиимэһээ тэрэ мүнөө маанадта муу һанажа, үһөөгөө абахаяа һанаа һаань, яахабибди?
16Тиигэжэ тэдэ Иосифто иимэ үгэнүүдые дамжуулхыень хүниие эльгээбэ:
— Наһа барахынгаа урда тээ эсэгэмнай иигэжэ захяа һэн: 17«Урдань шамда муу юумэ хэһэн аханараа хүлисыш даа гэжэ Иосиф хүбүүндэмни дамжуулаарайгты». Тиимэһээ эсэгымнай шүтэн зальбардаг Бурханай богоолнууд болохо маанадые хүлисыш даа гэжэ бидэ мүнөө шамайе гуйнабди.
Эдэ үгэнүүдые шагнахадаа, Иосиф уйлаа һэн.
18Аха дүүнэрынь тэрээндэ ерэжэ, урдань һүгэдэжэ мүргөөд, хэлэбэ:
— Бидэ мүнөө танай богоолшье болохоор бэлэн байнабди!
19— Бү айгты намһаа, — гэбэ Иосиф. — Би зарга шиидхэдэг Бурхан бэшэб. 20Таанад намда мууе хэхые оролдоот, зүгөөр Бурханай үршөөлөөр энэтнай дэмбэрэлтэ хэрэгээр дүүрээ: хэды олон зоной ами наһан тэрэнэй ашаар абарагдаа гээшэб! 21Тиимэһээ бү айгты! Би таанадые, танай үхи хүүгэдыешье эдихэ хоолоор хангахаб.
Энэ мэтэ һайн һайхан үгэнүүдые тэрэ хэлэжэ, аханарайнгаа һанаа сэдьхэл тэгшэрүүлээ бэлэй.
22Иосиф аха дүүнэртэеэ болон бүхы түрэл гаралаараа хамта иигэжэ Египедтэ амидаржа, зуун арбан наһаяа угтаба. 23Тэрэ түрэһэн хүбүүн Эпрааимайнгаа хүүгэдые, аша болон гушанараа, түрэһэн хүбүүн Мэнашшээ гэгшынгээ хүбүүн Махиирэй хүүгэдые үзөө бэлэй.
24Наһа барахынгаа урда тээ Иосиф аха дүүнэрээ дуудаад, иигэжэ хэлэбэ:
— Минии мордохо саг дүтэлжэ байна. Гэбэшье Бурхан таанадта туһалха, энэ орон нютагһаа гаргажа, үбгэ эсэгэнэрнай болохо Абраһаамда, Исаагта, Яковто үгэхөөр тангариглаһан тэрэ орон нютаг руу абаашаха.
25Тиигээд Иосиф аха дүүнэрһээ тангариг абаба:
— Бурханай таанадта туһалан эндэһээ гаргажа, тэрэ орон нютаг руу зөөлгэхэдэнь, минии яһые эндэһээ тиишэнь абаашаад хүдөөлүүлхэт.
26Иигэжэ Иосиф зуун арбан наһандаа нүгшэбэ. Шарилайнь занданшуулагдаад, хайрсаг соо анжаруулһан орон — Египет.
Currently Selected:
Эхин 50: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
