Zaŋ 8

1Wo Isa yʼa iŋgile kʼekki mokkolo kʼInda kʼOlibiye. 2Soggo ti soohe walak maŋ, Isa yʼa-gimo ki booro Ɓoy Raa, wo ɗoŋ ɓaadaŋ an dʼiido tuddí. Iŋkino maŋ yʼa-guune, yʼan diʼn iise dooyiso. 3Aame geŋ ɗoŋ suuniyo kʼoogoro ti Pariziyeŋ, an ziiɗo erewo an aa ti ziiɗo ti moone ti kule bakatú, an di-tʼiido kʼume kʼIsa, an ti-tʼîhira a ɗaana ɗuwo pay 4wo an i di ruute a Isa, anʼde: «Galmeegey, erewo ette ay aa ti ziiɗo ti moone ti kule bakatú. 5Adda mattup kʼoogoro, Muusa yʼin riiŋe ti kaaga yʼede, erayi ɗoŋ isiyo kino eŋ, ki tôwwo ki kakkisa ti moŋgali#8.5 Kun wollo adda mattup ki Lebitik 20.10, wo Deeterenom 22.22.. Wo ki kee maŋ, kʼede moo me?»

6An rootiyo iŋkino an i ekkiyo ikka, kono an di yʼ seeɗa tʼono. Maŋ Isa yʼa tʼuttile, yi-reekiso ƴelagí a siiɗo. 7Kane an koɗɗime tondisadí, iŋkino Isa yʼa tʼumɓe eedí, wo yʼan di ruute, yʼede: «Ti diinaguŋ eŋ wede yi kʼisiyo olɗiko ye maŋ, yi amɓo mokkolo, yʼa ti seɗɗo ki poone.» 8Maŋ yʼa tʼuttile sey, yi-reekiso ƴelagí a siiɗo. 9Aame an illiga Isa yi ruute iŋkino maŋ, kane ɗoŋ duuru an dʼiise eŋgilsito soo me kʼita bakadí bakadí, iise ti gôlɗali bini a-tʼîide. I dʼuupe Isa kane ti erewo gettiyo ti dʼôhire a ɗaanadí. 10Iŋkino maŋ Isa yʼa tʼumɓe eedí, wo yʼa tunde erewo, yʼede: «Erewo no, ɗoŋ i kiʼn ziiɗoʼŋ kane too me? Wenɗa soo toŋ a roote koŋ booro ti kiʼn ziiɗa umbo ko?» 11Maŋ ti diʼn gime onamí, tʼede: «Wenɗa soo toŋ umbo, Galmeeʼki nuŋ.» Iŋkino maŋ Isa yʼa ruute, yʼede: «Nuŋ toŋ maŋ ni ki ɗekke booro eedí ye. Mi tʼoozo, mʼeŋgilo wo mʼisa olɗiko ye baa.»]

Isa yoŋ toore a duniya

12Isa yʼan di ruute sey, yʼede: «Nuŋ miŋ wede i dʼeliyo toore a ɗoŋ duniya pay. Wede yi ni diina maŋ, yʼa tʼoona toore wede i di tʼela lekkiyo, yi kʼozira zimolo ye.» 13Maŋ kane Pariziyeŋ an i di ruute, anʼde: «Kee ki kazita ono a tukki kee batum geŋ, onamá ay kʼamɓe ye.» 14Isa yʼan di ruute, yʼede: «Aame nuŋ ni kazita ono a tukki nuuno batum toŋ maŋ, onamó ɗerec kono ni suune ti too me nʼiido me, wo ume nʼamɓe me. Wo ɗe kune, kun ki suune ye ume wede nʼiido, wo nʼamɓe ki tunɗa me. 15Kune kun ɗekkiyo booro a suuniyo ere ki kune ɗoŋ tudde. Nuŋ a tukki wenɗa soo toŋ ni ki ɗekkiyo booro ye. 16Wo aame ni ɗekkiyo booro maŋ, ni ɗekkiyo ɗerec kono nuŋ siidó ye. Ay ɗekkiyo booro soo ti Meega wede i nʼigibo me. 17Ono eŋ an riiŋe ti kaaga adda mattup kʼoogiraguŋ, anʼde: “Ɗoŋ sire an rootiyo onamaŋ i tʼiide kaŋ soo maŋ, geŋ onamaŋ ɗerec#8.17 Kun wollo adda mattup ki Deeterenom 17.6; 19.15..” 18Nuŋ ni kazita ono a tukki nuŋ batum, wo Meega wede i nʼigibo toŋ, yi kazita ono a tukki nuŋ kay.» 19Iŋkino maŋ kane an i di ruute, anʼde: «Ɗe Meegá too me?» Maŋ Isa yʼan diʼn gime onamaŋ, yʼede: «Nuŋ kun ki nʼ suune ye, wo Meegó toŋ kun ki yʼ suune ye. Aame nuŋ kun ni zuune maŋ, Meegó toŋ kun di yʼ suune.»

20Isa yi ruutite ono geŋ aame yo a booro Ɓoy Raa, yi dooyiso goppoŋ ti ume wede ɗuwo an di boohiyo korɓite Ɓoy Raa. Wo wenɗa soo toŋ a yi seeɗa umbo kono yoŋ onniyadí ti kʼîide ye ɓotto.

Ono kʼIsa a eŋgilsadí

21Isa yʼan di ruute sey, yʼede: «Nuŋ nʼeŋgila, wo kune kun di nʼ deha, wo ɗe kun aa di tʼinda ti olɗikaguŋ a egguŋ. Ume wede nʼette eŋ, kun kʼaane ettiyo ye.» 22Iŋkino maŋ kane Yawudiyagi an di ruute tuddaŋ, anʼde: «Kunuŋ yi rootiyo iŋkino yʼa tʼîda tuddí ko, yi rootiyo: “Ume wede nʼetta eŋ, kun kʼaane ettiyo ye” me?» 23Maŋ Isa yʼan di ruute, yʼede: «Kuneʼŋ ti ɗanɗi a duniya, wo nuŋ ti kandaane tʼawwa. Kune ki duniya ettiyo, wo nuŋ ki duniya ettiyo ye. 24Kono kʼiŋkino nʼun di ruute kun di tʼinda tʼolɗikaguŋ a egguŋ me. Aame kun kʼamɓu “nuŋ miŋ nuŋ” ye maŋ, kune kun di-tʼinda ti olɗikaguŋ a egguŋ.» 25Maŋ kane Yawudiyagi an di yʼ tunde, anʼde: «Ɗe kee miŋ wee wee?» Isa yʼan di ruute, yʼede: «Nuŋ nʼun ti gize tuddó tʼume kʼeesiyo to. 26Nuŋ oo dʼede ono ki rootiyo a ekki kune, ti sulɗi ɗoŋ nʼa ɗekke booro egguŋ toŋ ɓaadaŋ, wo wede i nʼigiboʼŋ yoŋ yi rootiyo ono ɗoŋ ɗerec, wo ni kazita a ɗuwo pay munɗa wede nʼollige ti bize yode Raa.»

27Wo kane Yawudiyagi an ki zuune ye yʼan rootiyo ti Meega me. 28Iŋkino maŋ Isa yʼan di ruute, yʼede: «Aame nuŋ wede an nʼehe aa ulo wede eŋ, kun ti nʼ ziipa tʼawwa#8.28 Kun ti nʼ ziipa tʼawwa: I-kaza aame Isa Almasi an ti yʼ tiika ekkʼundumu wede zaapu tʼekki bakadí kaŋ tontilko, wo Meegí yi yʼumɓa kʼawwa ki kandaane maŋ. maŋ, kun diʼn suuna eŋ “nuŋ miŋ nuŋ”. Wo kun di suuna munɗa wede ti suma nuuno kʼeedó ni kʼisiyo ye, ni rootiyo munɗa wede Meega yi ni duuye. 29Wo yo wede i nʼigibo geŋ, yoŋ ti nuuno. Yi ki nʼooliyo siidó ye, kono nuŋ nʼisiyo daayum munɗa wede ulbí i-dʼise uŋse.» 30A ono ɗoŋ Isa yi ruute geŋ, ɗoŋ ɓaadaŋ an di ziipe addaŋ a yode.

Ɗoŋ eedaŋ toore ti ɗoŋ adda ɓuliko

31Maŋ Isa yʼan di ruute a Yawudiyagi ɗoŋ i ziipe addaŋ a yode, yʼede: «Aame kun lekkiyo kettiyo a onamó maŋ, kune sanalliyagó ki kotto. 32Aame geŋ ɗerec kun di suuna, wo ɗerec gette tʼun diʼn isa ɗoŋ eedaŋ toore.» 33Maŋ kane an i di ruute, anʼde: «Kaye ita kʼin̰n̰i kʼIbirayim, ɓuliko a wenɗa kaŋ soo toŋ ay kʼize ye. Ɗe kʼay di rootiyo kun tʼisa ɗoŋ eedaŋ toore mummino?» 34Isa yʼan di ruute, yʼede: «Ɗerec iŋkino wo nʼun di rooto: Wede isiyo olɗiko geŋ yoŋ ɓule kʼolɗiko. 35Wede ɓule geŋ yi ki lekka daayum adda ɓoy ye, wo ulo ɓoy geŋ yoŋ miŋ daayum yʼa lekka adda ɓoy. 36Aame Ulo Raa yʼun tiʼn iza egguŋ toore maŋ, kune kun tʼisa ki kotto ɗoŋ eedaŋ toore. 37Nuŋ ni suune kune ita kʼin̰n̰i kʼIbirayim me. Wo kun di dehu urzi tôwwadó kono onamó geŋ kun kʼamɓu ye. 38Munɗa wede nuŋ ni rootiyo, ni wullo ki Meegó. Wo kune kun isiyo munɗa wede meeguguŋ yʼun ruute.» 39Maŋ kane an di ruute, anʼde: «Kaye meegey Ibirayim.» Isa yʼan di ruute, yʼede: «Ki kotto aame kune in̰n̰i kʼIbirayim maŋ, kun dʼise naabo ere aa yoŋ yʼaaze. 40Nuŋ nʼun ruute ono ɗoŋ ɗerec nʼilligo ti Raa toŋ, aŋkeŋ kun di dehu urzi tôwwadó. Wo iŋkino me Ibirayim yi kʼize ye. 41Kune kun isiyo naabo ere ki meeguguŋ.» Maŋ kane an i di ruute, anʼde: «Kaye in̰n̰i ɗoŋ ki bande ye, Meegey soo, yode Raa.»

42Isa yʼan di ruute, yʼede: «Aame Meeguguŋ Raa ki kotto maŋ, nuŋ kun di nʼ geyye kono nuŋ nʼuɗɗo miŋ ti Raa, wo nʼiido ken̰n̰o tʼurzi yode. Ni kʼiidoʼŋ ti toogo kʼeedó ye, yode i nʼigibo me. 43Moo me ono ni rootiyo itadaŋ kun kiʼn suuniyo ye me? Kono kun ki dehu kun kʼolliga ye onamó me. 44Kune meeguguŋ Meeda siitanɗani, wo kun dehu kun dʼise naabo ere meeguguŋ yi dehu. Yoŋ tʼume kʼeesiyo to, naabadí tôwwo ɗuwo. Munɗa wede ɗerec yi kʼisiyo ye, kono ɗerec di yode umbo. Aame yi lohito ono maŋ, yi rootiyo tʼaddí pay, kono yoŋ wede lohito, wo yoŋ meeki lohito kʼono. 45Wo kono nuŋ ni rootiyo ono ɗoŋ ɗerec geŋ, onamó kun ki dʼamɓu ye. 46Wee wee tʼadda diinaguŋ eŋ aane i roote nuŋ ni ize olɗiko me? Wo ɗe aame ni rootiyo ono ɗoŋ ɗerec maŋ, ki moo me onamó kun ki dʼamɓu ye me? 47Iŋkino maŋ wede yoŋ ki Raa geŋ yʼa olliga ono ki Raa. Wo kun kʼollige ye kono kune ki yode Raa ye.»

Isa ti Ibirayim

48Maŋ kane deero Yawudiyagi an i di ruute a Isa, anʼde: «Kaye ay ruute ayʼde kee Samariten, wo a-dʼede siitan a eedá geŋ, ɗerec ye ko?» 49Isa yʼan di-gime onamaŋ, yʼede: «Nuŋ oo kʼede siitan a eedó ye. Ni tamma Meegó, wo kune kun di-toogiyo ki tammadó me. 50Nuŋ ni ki dehu tamma tuddó ye, wo wede ede i dehu tammadó me, yoŋ geŋ wede ɗekkiyo booro. 51Ɗerec iŋkino wo nʼun di rooto: Wede yʼollige onamó wo yʼa ti sooru eego maŋ, kuɗic unto yi ki ti wolla ye.»

52Maŋ kane deero Yawudiyagi an i di ruute, anʼde: «Aŋkeŋ kaye ay zuune baa, kee a-dʼede siitan a eedá. Ibirayim yʼinda ti kaaga wo nebiyagi toŋ an tʼinda, miŋ kee kʼede: “Wede yʼollige onamó wo yʼa ti sooru eego maŋ, kuɗic unto yi ki ti wolla ye.” 53Keeʼŋ goole ki ceere meegey Ibirayim wede inda, ti nebiyagi ɗoŋ i tʼinda ko? Kunuŋ kʼelkiyo kee wee wee?» 54Maŋ Isa yʼan di ruute, yʼede: «Aame nuŋ nʼa tʼimme tuddó maŋ, tammadó gette ki bita. Nuŋ i ni tamma Meegó, wede kunʼde yoŋ Raaguŋ gen̰n̰o, 55wo kun gi di yʼ suuniyo ye. Nuŋ ni yʼ suune, wo aame nʼa roote ni ki yʼ suune ye maŋ, geŋ nuŋ ni tʼize wede lohito kʼono aa kune. Wo ɗe nuŋ ni yʼ suune, wo ni dʼollige onamí nʼa-ti sooru eego. 56Aame meeguguŋ Ibirayim yʼilliga onniyadó yi ti wolla maŋ, addí a ûune tʼuŋsuwo, wo yi ti wulle maŋ, ulbí uŋse.» 57Maŋ kane deero Yawudiyagi an i di ruute, anʼde: «Kee ozzinagá ada paat toŋ i kʼîide ye, ɗe Ibirayim kʼa yi wulle mummino?» 58Isa yʼan di ruute, yʼede: «Ɗerec iŋkino wo nʼun di rooto: Ki poone Ibirayim an di yi tʼeha geŋ, “nuŋ miŋ nuŋ”.» 59Iŋkino maŋ an ziki moŋgali ki kakkisadí, wo Isa yi-ti digge diine ɗoŋ duuru, tʼadda booro Ɓoy Raa yʼa tʼuɗɗe.

Currently Selected:

Zaŋ 8: moz

Highlight

Copy