Matio 28
28
Jusu-ae wlǔh-ɛ
(Maɛ 16.1-10; Luu 24.1-12; Chɔɔn 20.1-10)
1Juu-a wlè-weɛ̍ sì-aɛ, ɛ̍ nu̍ Sɔnde̍-a klàɛ̍we̍ gbàìn, wɛ̀ Mɛle Makalin ke Mɛle dɔɔ mu̍ dě Jusu-a gbàlɔ̍ we̍ gbɛ̀n la̍. 2U̍h iě-a kli dǎ-a nɛ̀ wlù poɔ-a chììn tba̍ blǔh wɛ̀, sɔ ɛ̍ ku̍ wɔ̍n kaa̍. Dɛ̍nu̍ɛ, nɛ̀ Joi-a ǐnchɔ̀-a sɔ dě ja̍i̍wlɔ̀ ɛ̍ ji̍ nɔ̌ bloɔ̍. Iě ɛ̍ mu̍ dě Jusu-a gbàlɔ̍ we̍, wɛ̀ ɛ̍ kli̍bo sɔɔ̌ nɛ-a dǒ ɛ̍ wɔ̍i̍n-ɛ, iě ɛ̍ tè ɛ̍ kɛ̍n. 3Ìn ja ɛ̍ ja̍ gbɛ̀n-ɛ, nɛ̀ ɛ̍ po̍ slaɛn ka nǐ-a chlɛ jlǐh-ɛ. Ɛ̍ pa̍-jlii̍ nɛ pɔ̀ɔ̀ ka kǒ gbo̍-ɛ. 4Fledlǔ ùh-a tù-a gbàlɔ̍-a chɛ̀ jlǐhɛ̍ we̍-ɛ, sɔ ɛ̍ po̍ u̍h faɔn kaa̍ iě u̍h-a ku̍-a tlɛ̍. Iě u̍h gbǎ wlùh ka nyɔ̍ mɛ̌-ɛ.
5Wɛ̀ Nyɔsoa-a ǐnchɔ̀ la̍a̍ dě nynɔ̌gbaɔᵻ laa̍ we̍, “Mɔ̀ bɔ̌ faɔn ple̍-ɛ, ǐn juo ɛ̍ Jusu ɔ̀ u̍h kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍-ɔ bo mɔ̀-a pɔ̀n i̍. 6Jɛ ɔ̍ se̍ da̍a nɛ dɛ. Ɔ̍ wlǔh-e wɛ̀, ɛ̀ ɔ̍ sà-aɛ bo ɔ̍ nu̍-a. Mɔ̀ ji̍ tà ɔ̍ pɛ̌n-a i̍ de-ɛ jě. 7Ɛ̍ tìh-ɛ, mɔ̀ mu̍ suei̍ mɔ̀ iě ɔ̍ kòà wlùh sèàɛ̍. Mɔ̀ la̍a̍, ‘Ɔ̍ wlǔh-e wɛ̀, iě ɔ̍ mu̍ la̍ mɔ̀ jǔ dě Kaladii fɔɔ, dě mɔ̀-a mu̍ ɔ̍ jě-e.’ Tu̍owli ǐn blě-a dǒ mɔ̀ we̍-ɛ bo.”
8Iě nynɔ̌gbaɔᵻ laa̍ u̍h tèwe u̍h sɔ dǒ gbàlɔ̍ wɔ̍i̍n, nɛ̀ u̍h-a ple̍ faɔn, jɛ nɛ̀ kǎ mɔna̍-a nu̍ u̍h ke. Wɛ̀ u̍h gba̍ ple̍-ɛ u̍h iě ɔ̍ kòà wlùh sèàɛ̍.
9U̍h iě-a kèle-ɛ, nɛ̀ Jusu-a chɛ̀ jɛɛ u̍h wɛ̀. Ɔ̍ la̍a̍, “Mɔ̀ nàà wlǔh.” Wɛ̀ u̍h mu̍ ɔ̍ wlì, iě u̍h gbɛ̍n ɔ̍ bu̍hᵻ i̍, wɛ̀ u̍h sà ɔ̍ wɛɛ. 10Wɛ̀ Jusu la̍a̍ dě u̍h we̍, “Mɔ̀ bɔ̌ faɔn ple̍-ɛ. Jɛ mɔ̀ mu̍ mɔ̀ iě ǎn kòà wlùh sèàɛ̍ ùh nu̍-a ǐn de̍di̍i̍ᵻɛ́, u̍h iě Kaladii mu̍ dě u̍h-a mu̍ ǐn jě-e.”
Fledlǔ gba̍ kunǎ
11Nynɔ̌gbaɔᵻ laa̍ u̍h nɛ dǒ mu̍ la̍ sǔh wɛ̀ fledlǔ ùh-a tù-a gbàlɔ̍ jlǐhɛ̍ we̍-ɛ, iě u̍h-a duuh mu̍ dě de̍ tùgbàwlɔ̀ di̍i̍. Wɛ̀ dɛ̍ᵻ kli̍hgbɛ̍ ìh nɛ-aɛ, iě u̍h po̍ i̍h-a kunǎ dě Nyɔsoa-a slaǎ sà nyɔ̍ klaaᵻ we̍. 12Wɛ̀ Nyɔsoa-a slaǎ sà nyɔ̍ klaaᵻ ke nyɔ̍ klaaᵻ jiěe dlǔ-i. Wɛ̀ u̍h nyǐ fledlǔ laa̍ wlǐ dɔu. 13U̍h la̍a̍, “Ka mɔ̀ iě-a dǎ-ɛ, mɔ̀ la̍a̍, ‘À nɛ dǒ mɔ̌ la̍ wɛ̀ ɔ̍ kòà ji̍ maɔ̍, iě u̍h jlǐ ɔ̍ kǔ.’ 14Pò Pale wɔ̌n i̍h-ɛ, nɛ̀ à mu̍ ɔ̍ pɔluh i̍ pɛ̌n-ɛ ɔ̍-ɔ je̍e mɔ̀ dɛ̍ nui.”
15Wɛ̀ fledlǔ dǔ wlǐ laa̍ iě u̍h nu̍ dɛ̍ u̍h dǎ-aɛ. Pɔ̀n laa̍ bo ɛ̀ dlɛɛ-a ka i̍ sèàn dě Juu nyɔ̍ nynɛ̌ we̍.
Jusu wlǔh-i ɔ̍ kòà kɛ̍n
(Maɛ 16.14-18; Luu 24.36-49; Chɔɔn 20.19-23; Nu̍-dɛ̍ᵻ 1.6-8)
16Wɛ̀ kòà-a pùè jɔɛ̍ due laa̍ u̍h mu̍ dě Kaladii fɔɔ dě tlu̍h kɛ̍n, tà Jusu la̍ u̍h iě-a mu̍-ɛ. 17Ti̍ u̍h jě-a ɔ̍-ɛ, iě u̍h sà ɔ̍ wɛɛ, jɛ nɛ̀ duuh-a wlùh nɛ kɛ̍-ɛ. 18Wɛ̀ Jusu klɛɛn dǒ u̍h we̍ iě ɔ̍ la̍a̍, “Gbǐh kli̍hgbɛ̍ nɛ-a dě ja̍i̍wlɔ̀-ɛ ke jih nɛ-a nɔ̌ bloɔ̍-ɛ, i̍h nyǐ-ɛ m wɛ̀. 19Ɛ̍ tìh-ɛ, mɔ̀ mu̍, mɔ̀ ple̍ blǔh kli̍hgbɛ̍ la we̍ mɔ̀ iě nyɔ̍ kli̍hgbɛ̍ ǎn kòà we̍i̍ nu̍. Nɛ̀ mɔ̀ po̍ u̍h nǐ dlǔ dǒ Baa ke Jǔ ke Nyɔsoa-a Sùù-a nynɛ̌ kɛ̍n. 20Nɛ̀ mɔ̀ po̍ u̍h nǎ wɛ̀ u̍h iě dɛ̍ᵻ kli̍hgbɛ̍ ǐn sèàɛ̍-a mɔ̀ wlùh-ɛ nu̍. Nɛ̀ ǎn mu̍ mɔ̀ sɔ̍nᵻ we̍ i̍ naɛ ti̍ kli̍hgbɛ̍ we̍, sɔ da̍a ìè dě ti̍-a dlǔ i̍ chlà la̍ mu̍.”
Currently Selected:
Matio 28: KDNT
Highlight
Share
Copy
Want to have your highlights saved across all your devices? Sign up or sign in
The New Testament in Western Krahn published as KU̍O̍ DELEE © The Bible Society in Liberia, 1999.
Matio 28
28
Jusu-ae wlǔh-ɛ
(Maɛ 16.1-10; Luu 24.1-12; Chɔɔn 20.1-10)
1Juu-a wlè-weɛ̍ sì-aɛ, ɛ̍ nu̍ Sɔnde̍-a klàɛ̍we̍ gbàìn, wɛ̀ Mɛle Makalin ke Mɛle dɔɔ mu̍ dě Jusu-a gbàlɔ̍ we̍ gbɛ̀n la̍. 2U̍h iě-a kli dǎ-a nɛ̀ wlù poɔ-a chììn tba̍ blǔh wɛ̀, sɔ ɛ̍ ku̍ wɔ̍n kaa̍. Dɛ̍nu̍ɛ, nɛ̀ Joi-a ǐnchɔ̀-a sɔ dě ja̍i̍wlɔ̀ ɛ̍ ji̍ nɔ̌ bloɔ̍. Iě ɛ̍ mu̍ dě Jusu-a gbàlɔ̍ we̍, wɛ̀ ɛ̍ kli̍bo sɔɔ̌ nɛ-a dǒ ɛ̍ wɔ̍i̍n-ɛ, iě ɛ̍ tè ɛ̍ kɛ̍n. 3Ìn ja ɛ̍ ja̍ gbɛ̀n-ɛ, nɛ̀ ɛ̍ po̍ slaɛn ka nǐ-a chlɛ jlǐh-ɛ. Ɛ̍ pa̍-jlii̍ nɛ pɔ̀ɔ̀ ka kǒ gbo̍-ɛ. 4Fledlǔ ùh-a tù-a gbàlɔ̍-a chɛ̀ jlǐhɛ̍ we̍-ɛ, sɔ ɛ̍ po̍ u̍h faɔn kaa̍ iě u̍h-a ku̍-a tlɛ̍. Iě u̍h gbǎ wlùh ka nyɔ̍ mɛ̌-ɛ.
5Wɛ̀ Nyɔsoa-a ǐnchɔ̀ la̍a̍ dě nynɔ̌gbaɔᵻ laa̍ we̍, “Mɔ̀ bɔ̌ faɔn ple̍-ɛ, ǐn juo ɛ̍ Jusu ɔ̀ u̍h kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍-ɔ bo mɔ̀-a pɔ̀n i̍. 6Jɛ ɔ̍ se̍ da̍a nɛ dɛ. Ɔ̍ wlǔh-e wɛ̀, ɛ̀ ɔ̍ sà-aɛ bo ɔ̍ nu̍-a. Mɔ̀ ji̍ tà ɔ̍ pɛ̌n-a i̍ de-ɛ jě. 7Ɛ̍ tìh-ɛ, mɔ̀ mu̍ suei̍ mɔ̀ iě ɔ̍ kòà wlùh sèàɛ̍. Mɔ̀ la̍a̍, ‘Ɔ̍ wlǔh-e wɛ̀, iě ɔ̍ mu̍ la̍ mɔ̀ jǔ dě Kaladii fɔɔ, dě mɔ̀-a mu̍ ɔ̍ jě-e.’ Tu̍owli ǐn blě-a dǒ mɔ̀ we̍-ɛ bo.”
8Iě nynɔ̌gbaɔᵻ laa̍ u̍h tèwe u̍h sɔ dǒ gbàlɔ̍ wɔ̍i̍n, nɛ̀ u̍h-a ple̍ faɔn, jɛ nɛ̀ kǎ mɔna̍-a nu̍ u̍h ke. Wɛ̀ u̍h gba̍ ple̍-ɛ u̍h iě ɔ̍ kòà wlùh sèàɛ̍.
9U̍h iě-a kèle-ɛ, nɛ̀ Jusu-a chɛ̀ jɛɛ u̍h wɛ̀. Ɔ̍ la̍a̍, “Mɔ̀ nàà wlǔh.” Wɛ̀ u̍h mu̍ ɔ̍ wlì, iě u̍h gbɛ̍n ɔ̍ bu̍hᵻ i̍, wɛ̀ u̍h sà ɔ̍ wɛɛ. 10Wɛ̀ Jusu la̍a̍ dě u̍h we̍, “Mɔ̀ bɔ̌ faɔn ple̍-ɛ. Jɛ mɔ̀ mu̍ mɔ̀ iě ǎn kòà wlùh sèàɛ̍ ùh nu̍-a ǐn de̍di̍i̍ᵻɛ́, u̍h iě Kaladii mu̍ dě u̍h-a mu̍ ǐn jě-e.”
Fledlǔ gba̍ kunǎ
11Nynɔ̌gbaɔᵻ laa̍ u̍h nɛ dǒ mu̍ la̍ sǔh wɛ̀ fledlǔ ùh-a tù-a gbàlɔ̍ jlǐhɛ̍ we̍-ɛ, iě u̍h-a duuh mu̍ dě de̍ tùgbàwlɔ̀ di̍i̍. Wɛ̀ dɛ̍ᵻ kli̍hgbɛ̍ ìh nɛ-aɛ, iě u̍h po̍ i̍h-a kunǎ dě Nyɔsoa-a slaǎ sà nyɔ̍ klaaᵻ we̍. 12Wɛ̀ Nyɔsoa-a slaǎ sà nyɔ̍ klaaᵻ ke nyɔ̍ klaaᵻ jiěe dlǔ-i. Wɛ̀ u̍h nyǐ fledlǔ laa̍ wlǐ dɔu. 13U̍h la̍a̍, “Ka mɔ̀ iě-a dǎ-ɛ, mɔ̀ la̍a̍, ‘À nɛ dǒ mɔ̌ la̍ wɛ̀ ɔ̍ kòà ji̍ maɔ̍, iě u̍h jlǐ ɔ̍ kǔ.’ 14Pò Pale wɔ̌n i̍h-ɛ, nɛ̀ à mu̍ ɔ̍ pɔluh i̍ pɛ̌n-ɛ ɔ̍-ɔ je̍e mɔ̀ dɛ̍ nui.”
15Wɛ̀ fledlǔ dǔ wlǐ laa̍ iě u̍h nu̍ dɛ̍ u̍h dǎ-aɛ. Pɔ̀n laa̍ bo ɛ̀ dlɛɛ-a ka i̍ sèàn dě Juu nyɔ̍ nynɛ̌ we̍.
Jusu wlǔh-i ɔ̍ kòà kɛ̍n
(Maɛ 16.14-18; Luu 24.36-49; Chɔɔn 20.19-23; Nu̍-dɛ̍ᵻ 1.6-8)
16Wɛ̀ kòà-a pùè jɔɛ̍ due laa̍ u̍h mu̍ dě Kaladii fɔɔ dě tlu̍h kɛ̍n, tà Jusu la̍ u̍h iě-a mu̍-ɛ. 17Ti̍ u̍h jě-a ɔ̍-ɛ, iě u̍h sà ɔ̍ wɛɛ, jɛ nɛ̀ duuh-a wlùh nɛ kɛ̍-ɛ. 18Wɛ̀ Jusu klɛɛn dǒ u̍h we̍ iě ɔ̍ la̍a̍, “Gbǐh kli̍hgbɛ̍ nɛ-a dě ja̍i̍wlɔ̀-ɛ ke jih nɛ-a nɔ̌ bloɔ̍-ɛ, i̍h nyǐ-ɛ m wɛ̀. 19Ɛ̍ tìh-ɛ, mɔ̀ mu̍, mɔ̀ ple̍ blǔh kli̍hgbɛ̍ la we̍ mɔ̀ iě nyɔ̍ kli̍hgbɛ̍ ǎn kòà we̍i̍ nu̍. Nɛ̀ mɔ̀ po̍ u̍h nǐ dlǔ dǒ Baa ke Jǔ ke Nyɔsoa-a Sùù-a nynɛ̌ kɛ̍n. 20Nɛ̀ mɔ̀ po̍ u̍h nǎ wɛ̀ u̍h iě dɛ̍ᵻ kli̍hgbɛ̍ ǐn sèàɛ̍-a mɔ̀ wlùh-ɛ nu̍. Nɛ̀ ǎn mu̍ mɔ̀ sɔ̍nᵻ we̍ i̍ naɛ ti̍ kli̍hgbɛ̍ we̍, sɔ da̍a ìè dě ti̍-a dlǔ i̍ chlà la̍ mu̍.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
The New Testament in Western Krahn published as KU̍O̍ DELEE © The Bible Society in Liberia, 1999.