San Juan 12
12
To̱ꞌon yóꞌo káꞌa̱n ña xa̱ꞌa̱ ñáMaría chi̱kaa̱ ñá nduta̱ xáꞌan támi xa̱ꞌa̱ ta̱Jesús
(Mt. 26:6-13; Mr. 14:3-9)
1Ta i̱ño̱ ki̱vi̱ ya̱chi̱ ka̱ o̱n ta̱ꞌán kixáꞌá viko̱ Pascua, ta ndi̱kó tuku ta̱Jesús ki̱xaa̱ ra ñoo Betania no̱o̱ yóo ta̱Lázaro. Ta ta̱Lázaro yóꞌo kúu ta̱a ta̱ xa ni̱xiꞌi̱, ta ta̱Jesús sa̱nataku̱ ñaꞌá ra. 2Ta ni̱xaa̱ ta̱Jesús ñii veꞌe no̱o̱ xa̱ki̱n na ñii viko̱ loꞌo ña kísa to̱ꞌó na ta̱Jesús. Ta ñáMarta xíka ñá táxi ña xíxi ni̱vi na ndóo viko̱ yóꞌo, ta ta̱Lázaro kándúꞌu̱ ra no̱o̱ yóo tón mesa, xíxi ra xíꞌin ta̱Jesús. 3Ta saá inka̱ ñáki̱ꞌva̱ ta̱Lázaro ñáMaría, ki̱xaa̱ ñá no̱o̱ yóo xa̱ꞌa̱ ta̱Jesús. Níꞌi ñá ñii yu̱yu̱ ña sava litro#12:3 Sava litro nduta̱ kúu ñii libra. chútú ña xíꞌin nduta̱ va̱ꞌa tá xáꞌan támi, na̱ní rá nardo, tá yáꞌví ní kúu rá. Ta ñáMaría chi̱kaa̱ ñá rá xa̱ꞌa̱ ta̱Jesús, ta yákón ñá xa̱ꞌa̱ ra xíꞌin yisi̱ si̱ni̱ ñá. Ta siko̱ ña xáꞌan támi nduta̱ yóꞌo, ni̱xi̱ta̱ níꞌnó ndiꞌi ña ini veꞌe yóꞌo. 4Ta ñii ta̱xíka xíꞌin ta̱Jesús, na̱ní ra Judas Iscariote, sa̱ꞌya ta̱Simón kúu ra, ta o̱n váꞌa kóni ta̱yóꞌo xa̱ꞌa̱ ña ke̱ꞌé ñáñaꞌa̱ yóꞌo saá. Ta̱Judas yóꞌo kúu ta̱a ta̱ si̱kó kuíꞌná ta̱Jesús ndaꞌa̱ ni̱vi na sáa̱ ini xíni ñaꞌá. 5Ta ni̱ka̱ꞌa̱n ta̱Judas, káchí ra saá:
―¿Nda̱chun o̱n vása ní‑sikó ñá nduta̱ yóꞌo xíꞌin yaꞌvi rá ña kúu u̱ni̱ ciento si̱ꞌún denario,#12:5 Ñii denario kúu si̱ꞌún ña kúu yaꞌvi ñii ta̱a ta̱ ki̱sa chiño ñii ki̱vi̱. ta saníꞌi ñá si̱ꞌún yóꞌo ndaꞌa̱ ni̱vi nandáꞌví, níkúu? ―káchí ta̱Judas xíꞌin na.
6Ta o̱n si̱ví xa̱ꞌa̱ ña ndixa kíꞌvi ini ra xíni ra ni̱vi nandáꞌví kúu ña ni̱ka̱ꞌa̱n ta̱Judas saá, chi ta̱Judas kúu ta̱a ta̱ ndíso chiño xíꞌin si̱ꞌún ña xíni̱ ñóꞌó ta̱Jesús xíꞌin naxíka xíꞌin ra. Ta yóo sava ki̱vi̱ ta̱Judas kísa kuíꞌná ra loꞌo si̱ꞌún yóꞌo. 7Ta ta̱Jesús nda̱kuii̱n ra, ni̱ka̱ꞌa̱n ra xíꞌin ta̱Judas, káchí ra saá:
―O̱n sandiꞌi ún ñáñaꞌa̱ yóꞌo chi ñava̱ꞌa ke̱ꞌé ñá xíꞌin i̱. Saá chi chi̱kaa̱ va̱ꞌa ñá nduta̱ yóꞌo ña koni̱ ñóꞌó ñá rá ki̱vi̱ vitin xa̱ꞌa̱ ña kasa tiꞌva ñá yi̱kí ko̱ñu i̱, chi xa yatin kíxaa̱ ña kivi̱ i̱ ta ndu̱xu̱n i̱. 8Ta ndóꞌó, ndiꞌi saá ki̱vi̱ yóo nandáꞌví xíꞌin ndó, ta yi̱ꞌi̱, saloꞌo ní ka̱ ki̱vi̱ yóo i̱ xíꞌin ndó ―káchí ta̱Jesús xíꞌin ni̱vi na ndóo viko̱ loꞌo yóꞌo.
To̱ꞌon yóꞌo káꞌa̱n ña ndí kóni na kaꞌni na ta̱Lázaro
9Kua̱ꞌa̱ ní najudío xi̱ni̱ so̱ꞌo na ña ki̱xaa̱ ta̱Jesús ñoo Betania, ta kua̱ꞌa̱n na koto na ra, ta ñii saá kóni na koto na ta̱Lázaro ta̱a ta̱ xi̱kuu ta̱ ni̱xiꞌi̱, ta ta̱Jesús sa̱nataku̱ ñaꞌá ra. 10Ta saá nanáꞌno no̱o̱ nasu̱tu̱ na kúu na xa yóo yuꞌú ña kaꞌni na ta̱Jesús, ta vitin na̱koo yuꞌú nayóꞌo ña kaꞌni na ta̱Lázaro. 11Kóni na kaꞌni na ta̱Lázaro chi kua̱ꞌa̱ ní najudío xa sa̱ndakoo na yichi̱ nasu̱tu̱ yóꞌo, ta ki̱xáꞌá na ndíko̱n na sa̱ta̱ ta̱Jesús, chi sa̱nataku̱ ra ta̱Lázaro.
To̱ꞌon yóꞌo káꞌa̱n ña xa̱ꞌa̱ ki̱vi̱ ni̱ki̱ꞌvi ta̱Jesús ñoo Jerusalén
(Mt. 21:1-11; Mr. 11:1-11; Lc. 19:28-40)
12Ta ni̱ti̱vi inka̱ ki̱vi̱, ta chútú ní ni̱vi ñoo Jerusalén chi xa kóni kixáꞌá viko̱ Pascua, ta ni̱vi na nákutáꞌan yóꞌo xi̱ni̱ so̱ꞌo na vitin kixaa̱ ta̱Jesús ñoo Jerusalén yóꞌo. 13Ta saá ke̱e na kua̱ꞌa̱n na, ta xa̱ꞌnda na no̱o̱ ndaꞌa̱ tón yito̱n ño̱o̱, ta níꞌi na kua̱ꞌa̱ ní ño̱o̱ yóꞌo, ta kua̱ꞌa̱n na nakutáꞌan na xíꞌin ta̱Jesús yichi̱ no̱o̱ va̱xi ra. Ta xíꞌin ndiꞌi ndee̱ na, ni̱ka̱ꞌa̱n na, káchí na saá:
―¡Ná kasa káꞌno yó Ndios! ¡Ná keꞌé Ndios ñava̱ꞌa xíꞌin ta̱yóꞌo, ta̱a ta̱ ki̱xaa̱ xíꞌin nda̱yí Ndios! ¡Ná keꞌé Ndios ñava̱ꞌa xíꞌin ta̱yóꞌo ta̱a ta̱ kúu Rey, ta̱káꞌno no̱o̱ naIsrael! ―káchí na, káꞌa̱n na.
14Ta ta̱Jesús xa na̱níꞌi ra ñii burro loꞌo ta yóso ra va̱xi ra. Saá ki̱sa ndivi ra ña káchí to̱ꞌon Ndios ña ni̱taa na xi̱na̱ꞌá, ña káchí saá:
15O̱n kuyi̱ꞌví ndó, nañoo Jerusalén.
Koto ndó, yóꞌo va̱xi ta̱a ta̱ kúu Rey no̱o̱ ndó,
va̱xi ra yóso ra ñii burro loꞌo,
saá káchí to̱ꞌon Ndios ña ni̱taa na xi̱na̱ꞌá.
16Ta naxíka xíꞌin ta̱Jesús o̱n vása ní‑kunda̱a̱ ini na yukía̱ kóni kachí ndiꞌi ña xíto na yóꞌo. Ta saá ni, ki̱vi̱ ndi̱ꞌi ku̱ndivi ña ni̱xiꞌi̱ ta̱Jesús ta na̱taku̱ ra ta ndi̱kó ra nda̱a ra ñoyívi ni̱no, ta̱nda̱ saá na̱káꞌán na to̱ꞌon Ndios ña ni̱taa na xi̱na̱ꞌá xa̱ꞌa̱ ta̱Jesús. Ta saá ku̱nda̱a̱ ini na ndí ndiꞌi ña ke̱ꞌé ni̱vi xíꞌin ta̱Jesús kúu ña ki̱sa ndivi na to̱ꞌon Ndios yóꞌo.
17Ni̱xi̱yo kua̱ꞌa̱ ní ni̱vi na xi̱ni ta̱Jesús ki̱vi̱ sa̱nataku̱ ra ta̱Lázaro. Chi ta̱ xa ni̱xiꞌi̱ xi̱kuu ra, ta ni̱ndu̱xu̱n ra ti̱xin kavua̱, ta saá ki̱xaa̱ ta̱Jesús, ta ka̱na ra ta̱Lázaro xíꞌin ki̱vi̱ ra, ta sa̱nataku̱ ñaꞌá ra. Ta ni̱vi na xi̱ni ñayóꞌo xa̱ta níꞌnó na to̱ꞌon xa̱ꞌa̱ ñava̱ꞌa yóꞌo ke̱ꞌé ta̱Jesús. 18Ña̱kán kía̱ ndiꞌi ni̱vi na xi̱ni̱ so̱ꞌo to̱ꞌon yóꞌo, ke̱e na kua̱ꞌa̱n na ña nakutáꞌan na xíꞌin ta̱Jesús yichi̱ no̱o̱ va̱xi ra ña kixaa̱ ra ñoo Jerusalén. 19Ta xa̱ꞌa̱ ñayóꞌo nafariseo ni̱ka̱ꞌa̱n na xíꞌin táꞌan na, káchí na saá:
―¡Nda̱ ma̱ni̱ kúu ña ndukú yó kundeé yó no̱o̱ ta̱yóꞌo! ¡Koto ndó! Ndiꞌi saá ni̱vi ñoyívi yóꞌo ndíko̱n na sa̱ta̱ ta̱Jesús vitin ―káchí na, káꞌa̱n na xíꞌin táꞌan na.
To̱ꞌon yóꞌo káꞌa̱n ña ni̱vi na inka̱ ñoo na̱ndukú na ta̱Jesús
20Ta sava ni̱vi na ki̱xaa̱ ñoo Jerusalén ña kasa to̱ꞌó na Ndios viko̱ Pascua kúu na inka̱ ñoo, ta káꞌa̱n na to̱ꞌon griego. 21Ta sava nagriego yóꞌo ki̱xaa̱ na no̱o̱ ñii ta̱xíka xíꞌin ta̱Jesús ta̱ na̱ní Felipe, ta̱a ta̱ ke̱e ñoo Betsaida estado Galilea kúu ra. Ki̱xaa̱ nagriego no̱o̱ ta̱Felipe yóꞌo, ta ni̱ka̱ꞌa̱n na xíꞌin ra, káchí na saá:
―Tata, kóni ndi̱ koto ndi̱ ta̱Jesús ―káchí na xíꞌin ra.
22Ta ta̱Felipe ni̱xa̱ꞌa̱n ra nda̱to̱ꞌon ra xíꞌin inka̱ ta̱xíka xíꞌin ta̱Jesús, ta̱ na̱ní Andrés, ta ndio̱vi̱ na saá ke̱e na kua̱ꞌa̱n na, ta ni̱xaa̱ na no̱o̱ ta̱Jesús ña ndato̱ꞌon na xíꞌin ra xa̱ꞌa̱ ña kóni nagriego yóꞌo. 23Ta nda̱kuii̱n ta̱Jesús, ni̱ka̱ꞌa̱n ra saá:
―Xa kíxaa̱ yatin ní ki̱vi̱ ña yi̱ꞌi̱, ta̱a ta̱ ki̱xi no̱o̱ Ndios, kasa ndivi i̱ chiño káꞌno, ta xa̱ꞌa̱ ñayóꞌo Ndios kasa káꞌno ra yi̱ꞌi̱, ta kanóo síkón ñato̱ꞌó i̱. 24Ta ña ndixa nda̱a̱ káꞌa̱n i̱ xíꞌin ndó tá yóo ñii ndiki̱n trigo, ta tá o̱n chiꞌi ni̱vi ndiki̱n yóꞌo, ta kindo̱o matóꞌón ña. Ta saá ni, tá chiꞌi ni̱vi ndiki̱n trigo yóꞌo ti̱xin ñoꞌo̱, ta saá ndixa ta̱ꞌvi̱ so̱o̱ ña, ta ndu̱ta̱ ña ta kuaꞌno ña, ta nduu ña kua̱ꞌa̱ ní ndiki̱n trigo. Ta nda̱tán yóo ndiki̱n trigo ña chiꞌi ni̱vi ti̱xin ñoꞌo̱ saá yóo i̱ chi xíni̱ ñóꞌó kivi̱ i̱, ta ndu̱xu̱n i̱, ta nataku̱ i̱. Ta xa̱ꞌa̱ ña kundoꞌo i̱ saá, kua̱ꞌa̱ ní ni̱vi kutaku̱ na xíꞌin Ndios. 25Ta nda̱tán yi̱ꞌi̱ táxi xíꞌin mi̱i i̱ ña kasa ndivi i̱ ña kóni Ndios, ñii ki̱ꞌva saá ni̱vi na ndíko̱n yichi̱ i̱, xíni̱ ñóꞌó na taxi xíꞌin mi̱i na ña keꞌé na ña kóni Ndios. Chi ndiꞌi ni̱vi na ndasaá kuiti kúsii̱ ini kutaku̱ va̱ꞌa ñoyívi yóꞌo, nayóꞌo ndañóꞌó na no̱o̱ Ndios. Ta ndiꞌi ni̱vi na o̱n vása ndíꞌi ní ini xa̱ꞌa̱ ña kutaku̱ va̱ꞌa na ñoyívi yóꞌo, nayóꞌo kúu na naníꞌi yichi̱ nda̱a̱ ña va̱ꞌa kutaku̱ na xíꞌin Ndios. 26Ndiꞌi ni̱vi na kóni kasa chiño no̱o̱ i̱, xíni̱ ñóꞌó kundiko̱n na yichi̱ i̱, ta saá nda̱tán yóo ña kéꞌé i̱, saá keꞌé na. Ta Yivá i̱ Ndios kasa to̱ꞌó ra ndiꞌi ni̱vi na kúu na kísa chiño no̱o̱ i̱.
To̱ꞌon yóꞌo káꞌa̱n ña ta̱Jesús nda̱to̱ꞌon ra xíꞌin ni̱vi ndasaá koo ña kivi̱ ra
27’Ta vitin ndíꞌi ní ini i̱, ta xáni ní ini i̱ yukía̱ ka̱ꞌa̱n i̱ xíꞌin Ndios. ¿Án ndukú i̱ no̱o̱ Yivá i̱ Ndios ña saka̱ku ra yi̱ꞌi̱ no̱o̱ ña xo̱ꞌvi̱ ní i̱? Óꞌon, o̱n ka̱ꞌa̱n i̱ saá, chi xa̱ꞌa̱ ña kasa ndivi i̱ chiño yo̱ꞌvi̱ ní, nda̱ kivi̱ i̱ kúu ña ki̱xaa̱ i̱ ñoyívi yóꞌo ―káchí ta̱Jesús.
28Ta saá ni̱ka̱ꞌa̱n ta̱Jesús xíꞌin Ndios, káchí ra saá:
―Tata Yivá i̱, vitin kasa ndivi ún chiño xa̱ꞌa̱ ña kasa káꞌno ni̱vi yóꞌó ta chinóo síkón na ñato̱ꞌó ún ―káchí ta̱Jesús xíꞌin Ndios.
Ta saá xi̱ni̱ so̱ꞌo ra ta̱chi̱ to̱ꞌon Ndios ña ki̱xi ñoyívi ni̱no ña ni̱ka̱ꞌa̱n ña, káchí ña saá:
―Xa ki̱sa ndivi i̱ chiño káꞌno ña ki̱sa káꞌno ni̱vi yi̱ꞌi̱, ta chi̱nóo síkón na ñato̱ꞌó i̱, ta tuku inka̱ yichi̱ keꞌé i̱ saá ―káchí to̱ꞌon ni̱ka̱ꞌa̱n ña xíꞌin ra.
29Ta ni̱vi na ndóo xíꞌin ta̱Jesús xi̱ni̱ so̱ꞌo na ta̱chi̱ yóꞌo, ta sava ni̱vi xa̱ni si̱ni̱ na án ndáꞌyi sa̱vi̱. Ta inka̱ na ni̱ka̱ꞌa̱n, káchí na:
―Ñii ángel ña ki̱xi no̱o̱ Ndios ni̱ka̱ꞌa̱n ña xíꞌin ra ―káchí na, káꞌa̱n na.
30Ta ta̱Jesús ni̱ka̱ꞌa̱n ra xíꞌin na:
―O̱n si̱ví xa̱ꞌa̱ yi̱ꞌi̱ kúu ña ni̱ka̱ꞌa̱n ta̱chi̱ yóꞌo, ta ni̱ka̱ꞌa̱n ta̱chi̱ yóꞌo xa̱ꞌa̱ ña chindeé ña ndóꞌó ña ndixa kandixa ndó yi̱ꞌi̱. 31Vitin xa yatin kíxaa̱ ki̱vi̱ ña kasa nani Ndios xa̱ꞌa̱ kua̱chi ni̱vi ñoyívi yóꞌo. Ta saá ñaníma̱ ndiva̱ꞌa káꞌno, ña kúu ña xáꞌnda chiño no̱o̱ ni̱vi ñoyívi yóꞌo vitin, Ndios sakana ra níma̱ yóꞌo ko̱ꞌo̱n ña ke̱ꞌe no̱o̱ naa ní. 32Ta yi̱ꞌi̱, ki̱vi̱ ndaníꞌi ni̱vi yi̱ꞌi̱ no̱o̱ síkón, ta xíꞌin ñayóꞌo keꞌé i̱ ña ndiꞌi ni̱vi kixaa̱ na no̱o̱ i̱ ―káchí ta̱Jesús xíꞌin na.
33Ni̱ka̱ꞌa̱n ra to̱ꞌon yóꞌo ña ndato̱ꞌon ra xíꞌin ni̱vi ña kunda̱a̱ ini na ndí kivi̱ ra ndaꞌa̱ tón cruz. 34Ta nda̱kuii̱n ni̱vi, ni̱ka̱ꞌa̱n na, káchí na saá:
―Xa ka̱ꞌvi ndi̱ to̱ꞌon Ndios ña ni̱taa na kui̱ya̱ xi̱na̱ꞌá ña káchí xa̱ꞌa̱ Cristo, ta̱a ta̱ tiꞌví Ndios. Ta to̱ꞌon yóꞌo káchí ña ndí Cristo kutaku̱ ra ndiꞌi saá ki̱vi̱ ña va̱xi. Ta yóꞌó káchí ún ndí ndaníꞌi na ta̱a ta̱ ki̱xi no̱o̱ Ndios, ta sandaa na ra ndaꞌa̱ tón cruz. Ta, ¿yu kúu ta̱a ta̱ káꞌa̱n ún xa̱ꞌa̱, ta̱ káchí ún kúu ta̱a ta̱ ki̱xi no̱o̱ Ndios? ―káchí na xíꞌin ra.
35Ta nda̱kuii̱n ta̱Jesús, ni̱ka̱ꞌa̱n ra xíꞌin na:
―Nda̱tán yóo ñoꞌo̱ ndinoꞌo yéꞌe, saá yóo i̱, ta saloꞌo kuiti ka̱ ki̱vi̱ yóo i̱ xíꞌin ndó. Xíni̱ ñóꞌó kundiko̱n ndó yichi̱ i̱ ña yéꞌe ndinoꞌo, ko̱to̱ ñii kama nakiꞌin yichi̱ ña naa ndóꞌó. Chi ni̱vi na xíka yichi̱ naa o̱n vása xíni̱ nayóꞌo míchí kua̱ꞌa̱n na. 36Yi̱ꞌi̱ kúu Ñoꞌo̱ ndinoꞌo yéꞌe, ta vitin ki̱vi̱ ña yóo ka̱ i̱ xíꞌin ndó, xíni̱ ñóꞌó kandixa ndó yi̱ꞌi̱. Ta saá nduu ndó ni̱vi na kua̱ꞌa̱n yichi̱ no̱o̱ yéꞌe Ñoꞌo̱ ndinoꞌo ―káchí ta̱Jesús xíꞌin na.
Ta ndi̱ꞌi ni̱ka̱ꞌa̱n ra saá, ta ke̱e ra kua̱ꞌa̱n ra, ta ni̱xaa̱ ra ñii xiiña no̱o̱ chi̱seꞌé xíꞌin mi̱i ra ko̱to̱ naníꞌi nani̱vi ra.
To̱ꞌon yóꞌo káꞌa̱n ña kua̱ꞌa̱ ní najudío ni̱‑xiin na kandixa na ta̱Jesús
37Vará ta̱Jesús xa ke̱ꞌé ra kua̱ꞌa̱ ní milagro xi̱ni ni̱vi, ta saá ni, ni̱‑xiin na kandixa na ra. 38Ta xíꞌin ña o̱n kandixa na ra, ki̱sa ndivi na ña ni̱ka̱ꞌa̱n to̱ꞌon Ndios ña ni̱taa ta̱profeta Isaías kui̱ya̱ xi̱na̱ꞌá, ña káchí saá:
Yivá yó Ndios, loꞌo ní ni̱vi ka̱ndixa na to̱ꞌon ún ña nda̱to̱ꞌon i̱ xíꞌin na.
Ni o̱n vása ní‑kunda̱a̱ ini na ndí xíꞌin ndee̱ mi̱i ún kúu ña ki̱sa ndivi i̱ ndiꞌi chiño náꞌno ña xi̱ni na,
káchí to̱ꞌon ña ni̱taa ta̱Isaías xi̱na̱ꞌá. 39Vitin kísa ndivi najudío yóꞌo nda̱tán yóo ña ni̱taa ta̱Isaías kui̱ya̱ xi̱na̱ꞌá, chi ni̱‑kuchiño na kandixa na ta̱Jesús. Ta inka̱ xiiña no̱o̱ to̱ꞌon Ndios ña ni̱taa ta̱Isaías xi̱na̱ꞌá, káchí ña saá xa̱ꞌa̱ ni̱vi yóꞌo:
40O̱n vása ní‑xiin na nakoni na ta ko̱ꞌo̱n na yichi̱ ña kúu ñanda̱a̱,
ña̱kán kía̱ Ndios ta̱xi ra ña nduu nayóꞌo nda̱tán yóo ni̱vi nakuáá,
chi o̱n vása kúchiño na koni na ñanda̱a̱.
Ta xa̱ꞌa̱ ña ni̱‑xiin na kandixa na ñanda̱a̱, Ndios ta̱xi ra ña nduu toon ní ka̱ ini na,
nduu na ni̱vi na o̱n vása kúchiño kandixa ñanda̱a̱.
Ta xa̱ꞌa̱ ni̱vi yóꞌo, Ndios ni̱ka̱ꞌa̱n ra, ka̱chí ra saá:
“Nda̱ loꞌo ni̱‑xiin na nandikó ini na,
ta ni̱‑xiin na kixi na no̱o̱ i̱ xa̱ꞌa̱ ña sandaꞌa i̱ na ña va̱ꞌa kutaku̱ na yichi̱ nda̱a̱”,
ka̱chí Ndios no̱o̱ to̱ꞌon ra ña ni̱taa ta̱Isaías kui̱ya̱ xi̱na̱ꞌá. 41Ta̱Isaías yóꞌo xi̱kuu ñii ta̱profeta ta̱ ni̱ka̱ꞌa̱n ndoso to̱ꞌon Ndios kui̱ya̱ xi̱na̱ꞌá, ta xi̱ni ra ndiꞌi ndee̱ ña livi káꞌno ña kómí ta̱Jesús ñoyívi ni̱no. Ta saá ta̱Isaías ni̱taa ra to̱ꞌon yóꞌo, ña ndáto̱ꞌon xa̱ꞌa̱ ña ndóꞌo ta̱Jesús ki̱vi̱ táku̱ ra ñoyívi yóꞌo.
42Vará sava nachiño náꞌno no̱o̱ najudío kándixa na ta̱Jesús ndí ndixa kúu ra ta̱a ta̱ ti̱ꞌví Ndios, ta o̱n vása ní‑xiin na ka̱ꞌa̱n na saá xíꞌin inka̱ ni̱vi chi yíꞌví na no̱o̱ nafariseo. Saá chi nafariseo xa xa̱ꞌnda chiño na ndí ndiꞌi ni̱vi na kándixa ndí ta̱Jesús kúu Cristo, ta̱a ta̱ ti̱ꞌví Ndios va̱xi, nayóꞌo o̱n kuchiño ka̱ na ki̱ꞌvi na ini veꞌe ño̱ꞌo sinagoga, káchí nafariseo. 43Ndiꞌi ni̱vi na kúu na yíꞌví ka̱ꞌa̱n ña kándixa na ta̱Jesús, nayóꞌo xáni si̱ni̱ na ndí ña ndáya̱ꞌví ní ka̱ kúu ña kanóo va̱ꞌa ñato̱ꞌó na no̱o̱ ni̱vi ñoyívi yóꞌo, ta xáni si̱ni̱ na loꞌo ní ndáya̱ꞌví ña kúu ña kanóo va̱ꞌa ñato̱ꞌó na no̱o̱ Ndios.
To̱ꞌon yóꞌo káꞌa̱n ña ndí to̱ꞌon ta̱Jesús kúu ña kasa nani xa̱ꞌa̱ kua̱chi ni̱vi
44Ta saá xíꞌin ndiꞌi ndee̱ ra, ta̱Jesús ni̱ka̱ꞌa̱n ra xíꞌin ni̱vi, káchí ra saá:
―Ta ni̱vi na kándixa yi̱ꞌi̱, nayóꞌo o̱n si̱ví ñii la̱á mi̱i i̱ kándixa na, ta kándixa na Ndios, ta̱a ta̱ ti̱ꞌví yi̱ꞌi̱ ki̱xaa̱ i̱. 45Ta ni̱vi na xíni yi̱ꞌi̱, nayóꞌo xíni na Yivá i̱ Ndios, ta̱a ta̱ ti̱ꞌví yi̱ꞌi̱ ki̱xaa̱ i̱. 46Yi̱ꞌi̱ kúu Ñoꞌo̱ ndinoꞌo yéꞌe ñoyívi yóꞌo. Ta ndiꞌi ni̱vi na ndixa kándixa yi̱ꞌi̱, nayóꞌo o̱n ko̱ꞌo̱n ka̱ na yichi̱ no̱o̱ naa. 47Ta ndiꞌi ni̱vi na kuiti xíni̱ so̱ꞌo to̱ꞌon ña káꞌa̱n i̱, ta o̱n xi̱in na kasa ndivi na ña, ta o̱n si̱ví yi̱ꞌi̱ kúu ta̱a ta̱ kasa nani xa̱ꞌa̱ ña o̱n váꞌa kéꞌé nayóꞌo. Saá chi o̱n si̱ví xa̱ꞌa̱ ña kasa nani i̱ xa̱ꞌa̱ kua̱chi ni̱vi kúu ña ki̱xaa̱ i̱ ñoyívi yóꞌo, ta xa̱ꞌa̱ ña saka̱ku i̱ ni̱vi ñoyívi yóꞌo kúu ña ki̱xaa̱ i̱. 48Ta ni̱vi na o̱n xi̱in koni yi̱ꞌi̱, ta ni o̱n xi̱in na kandixa na to̱ꞌon i̱, ta ndixa xa yóo ña kasa nani xa̱ꞌa̱ kua̱chi nayóꞌo. Chi tá ki̱xaa̱ ki̱vi̱ sondíꞌí ñoyívi yóꞌo, ta mi̱i to̱ꞌon ña ni̱ka̱ꞌa̱n i̱ xíꞌin nayóꞌo kasa nani xa̱ꞌa̱ kua̱chi na ña kúu ña o̱n vása ní‑xiin na chikaa̱ so̱ꞌo na to̱ꞌon yóꞌo. 49Chi xíꞌin nda̱yí Yivá i̱ Ndios káꞌa̱n i̱ to̱ꞌon ña ndáto̱ꞌon i̱ xíꞌin ndó. Ta o̱n si̱ví ndasaá kuiti to̱ꞌon mi̱i i̱ kúu ña káꞌa̱n i̱. Saá chi Yivá i̱ Ndios kúu ta̱a ta̱ ti̱ꞌví yi̱ꞌi̱ ki̱xaa̱ i̱, ta xa̱ꞌnda chiño ra ndá to̱ꞌon kúu ña ka̱ꞌa̱n i̱ xíꞌin ndó, ta xa̱ꞌnda chiño ra yu kúu ña sanáꞌa i̱ ndóꞌó. 50Ta yi̱ꞌi̱, xíni̱ va̱ꞌa i̱ ndí ña xáꞌnda chiño Yivá i̱ Ndios kúu ña táxi kutaku̱ ndinoꞌo ni̱vi ndiꞌi saá ki̱vi̱. Ta ñii ki̱ꞌva nda̱tán yóo to̱ꞌon ña xa̱ꞌnda chiño ra ka̱ꞌa̱n i̱, saá káꞌa̱n i̱ xíꞌin ni̱vi ―káchí ta̱Jesús xíꞌin na.
Currently Selected:
San Juan 12: mim
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
San Juan 12
12
To̱ꞌon yóꞌo káꞌa̱n ña xa̱ꞌa̱ ñáMaría chi̱kaa̱ ñá nduta̱ xáꞌan támi xa̱ꞌa̱ ta̱Jesús
(Mt. 26:6-13; Mr. 14:3-9)
1Ta i̱ño̱ ki̱vi̱ ya̱chi̱ ka̱ o̱n ta̱ꞌán kixáꞌá viko̱ Pascua, ta ndi̱kó tuku ta̱Jesús ki̱xaa̱ ra ñoo Betania no̱o̱ yóo ta̱Lázaro. Ta ta̱Lázaro yóꞌo kúu ta̱a ta̱ xa ni̱xiꞌi̱, ta ta̱Jesús sa̱nataku̱ ñaꞌá ra. 2Ta ni̱xaa̱ ta̱Jesús ñii veꞌe no̱o̱ xa̱ki̱n na ñii viko̱ loꞌo ña kísa to̱ꞌó na ta̱Jesús. Ta ñáMarta xíka ñá táxi ña xíxi ni̱vi na ndóo viko̱ yóꞌo, ta ta̱Lázaro kándúꞌu̱ ra no̱o̱ yóo tón mesa, xíxi ra xíꞌin ta̱Jesús. 3Ta saá inka̱ ñáki̱ꞌva̱ ta̱Lázaro ñáMaría, ki̱xaa̱ ñá no̱o̱ yóo xa̱ꞌa̱ ta̱Jesús. Níꞌi ñá ñii yu̱yu̱ ña sava litro#12:3 Sava litro nduta̱ kúu ñii libra. chútú ña xíꞌin nduta̱ va̱ꞌa tá xáꞌan támi, na̱ní rá nardo, tá yáꞌví ní kúu rá. Ta ñáMaría chi̱kaa̱ ñá rá xa̱ꞌa̱ ta̱Jesús, ta yákón ñá xa̱ꞌa̱ ra xíꞌin yisi̱ si̱ni̱ ñá. Ta siko̱ ña xáꞌan támi nduta̱ yóꞌo, ni̱xi̱ta̱ níꞌnó ndiꞌi ña ini veꞌe yóꞌo. 4Ta ñii ta̱xíka xíꞌin ta̱Jesús, na̱ní ra Judas Iscariote, sa̱ꞌya ta̱Simón kúu ra, ta o̱n váꞌa kóni ta̱yóꞌo xa̱ꞌa̱ ña ke̱ꞌé ñáñaꞌa̱ yóꞌo saá. Ta̱Judas yóꞌo kúu ta̱a ta̱ si̱kó kuíꞌná ta̱Jesús ndaꞌa̱ ni̱vi na sáa̱ ini xíni ñaꞌá. 5Ta ni̱ka̱ꞌa̱n ta̱Judas, káchí ra saá:
―¿Nda̱chun o̱n vása ní‑sikó ñá nduta̱ yóꞌo xíꞌin yaꞌvi rá ña kúu u̱ni̱ ciento si̱ꞌún denario,#12:5 Ñii denario kúu si̱ꞌún ña kúu yaꞌvi ñii ta̱a ta̱ ki̱sa chiño ñii ki̱vi̱. ta saníꞌi ñá si̱ꞌún yóꞌo ndaꞌa̱ ni̱vi nandáꞌví, níkúu? ―káchí ta̱Judas xíꞌin na.
6Ta o̱n si̱ví xa̱ꞌa̱ ña ndixa kíꞌvi ini ra xíni ra ni̱vi nandáꞌví kúu ña ni̱ka̱ꞌa̱n ta̱Judas saá, chi ta̱Judas kúu ta̱a ta̱ ndíso chiño xíꞌin si̱ꞌún ña xíni̱ ñóꞌó ta̱Jesús xíꞌin naxíka xíꞌin ra. Ta yóo sava ki̱vi̱ ta̱Judas kísa kuíꞌná ra loꞌo si̱ꞌún yóꞌo. 7Ta ta̱Jesús nda̱kuii̱n ra, ni̱ka̱ꞌa̱n ra xíꞌin ta̱Judas, káchí ra saá:
―O̱n sandiꞌi ún ñáñaꞌa̱ yóꞌo chi ñava̱ꞌa ke̱ꞌé ñá xíꞌin i̱. Saá chi chi̱kaa̱ va̱ꞌa ñá nduta̱ yóꞌo ña koni̱ ñóꞌó ñá rá ki̱vi̱ vitin xa̱ꞌa̱ ña kasa tiꞌva ñá yi̱kí ko̱ñu i̱, chi xa yatin kíxaa̱ ña kivi̱ i̱ ta ndu̱xu̱n i̱. 8Ta ndóꞌó, ndiꞌi saá ki̱vi̱ yóo nandáꞌví xíꞌin ndó, ta yi̱ꞌi̱, saloꞌo ní ka̱ ki̱vi̱ yóo i̱ xíꞌin ndó ―káchí ta̱Jesús xíꞌin ni̱vi na ndóo viko̱ loꞌo yóꞌo.
To̱ꞌon yóꞌo káꞌa̱n ña ndí kóni na kaꞌni na ta̱Lázaro
9Kua̱ꞌa̱ ní najudío xi̱ni̱ so̱ꞌo na ña ki̱xaa̱ ta̱Jesús ñoo Betania, ta kua̱ꞌa̱n na koto na ra, ta ñii saá kóni na koto na ta̱Lázaro ta̱a ta̱ xi̱kuu ta̱ ni̱xiꞌi̱, ta ta̱Jesús sa̱nataku̱ ñaꞌá ra. 10Ta saá nanáꞌno no̱o̱ nasu̱tu̱ na kúu na xa yóo yuꞌú ña kaꞌni na ta̱Jesús, ta vitin na̱koo yuꞌú nayóꞌo ña kaꞌni na ta̱Lázaro. 11Kóni na kaꞌni na ta̱Lázaro chi kua̱ꞌa̱ ní najudío xa sa̱ndakoo na yichi̱ nasu̱tu̱ yóꞌo, ta ki̱xáꞌá na ndíko̱n na sa̱ta̱ ta̱Jesús, chi sa̱nataku̱ ra ta̱Lázaro.
To̱ꞌon yóꞌo káꞌa̱n ña xa̱ꞌa̱ ki̱vi̱ ni̱ki̱ꞌvi ta̱Jesús ñoo Jerusalén
(Mt. 21:1-11; Mr. 11:1-11; Lc. 19:28-40)
12Ta ni̱ti̱vi inka̱ ki̱vi̱, ta chútú ní ni̱vi ñoo Jerusalén chi xa kóni kixáꞌá viko̱ Pascua, ta ni̱vi na nákutáꞌan yóꞌo xi̱ni̱ so̱ꞌo na vitin kixaa̱ ta̱Jesús ñoo Jerusalén yóꞌo. 13Ta saá ke̱e na kua̱ꞌa̱n na, ta xa̱ꞌnda na no̱o̱ ndaꞌa̱ tón yito̱n ño̱o̱, ta níꞌi na kua̱ꞌa̱ ní ño̱o̱ yóꞌo, ta kua̱ꞌa̱n na nakutáꞌan na xíꞌin ta̱Jesús yichi̱ no̱o̱ va̱xi ra. Ta xíꞌin ndiꞌi ndee̱ na, ni̱ka̱ꞌa̱n na, káchí na saá:
―¡Ná kasa káꞌno yó Ndios! ¡Ná keꞌé Ndios ñava̱ꞌa xíꞌin ta̱yóꞌo, ta̱a ta̱ ki̱xaa̱ xíꞌin nda̱yí Ndios! ¡Ná keꞌé Ndios ñava̱ꞌa xíꞌin ta̱yóꞌo ta̱a ta̱ kúu Rey, ta̱káꞌno no̱o̱ naIsrael! ―káchí na, káꞌa̱n na.
14Ta ta̱Jesús xa na̱níꞌi ra ñii burro loꞌo ta yóso ra va̱xi ra. Saá ki̱sa ndivi ra ña káchí to̱ꞌon Ndios ña ni̱taa na xi̱na̱ꞌá, ña káchí saá:
15O̱n kuyi̱ꞌví ndó, nañoo Jerusalén.
Koto ndó, yóꞌo va̱xi ta̱a ta̱ kúu Rey no̱o̱ ndó,
va̱xi ra yóso ra ñii burro loꞌo,
saá káchí to̱ꞌon Ndios ña ni̱taa na xi̱na̱ꞌá.
16Ta naxíka xíꞌin ta̱Jesús o̱n vása ní‑kunda̱a̱ ini na yukía̱ kóni kachí ndiꞌi ña xíto na yóꞌo. Ta saá ni, ki̱vi̱ ndi̱ꞌi ku̱ndivi ña ni̱xiꞌi̱ ta̱Jesús ta na̱taku̱ ra ta ndi̱kó ra nda̱a ra ñoyívi ni̱no, ta̱nda̱ saá na̱káꞌán na to̱ꞌon Ndios ña ni̱taa na xi̱na̱ꞌá xa̱ꞌa̱ ta̱Jesús. Ta saá ku̱nda̱a̱ ini na ndí ndiꞌi ña ke̱ꞌé ni̱vi xíꞌin ta̱Jesús kúu ña ki̱sa ndivi na to̱ꞌon Ndios yóꞌo.
17Ni̱xi̱yo kua̱ꞌa̱ ní ni̱vi na xi̱ni ta̱Jesús ki̱vi̱ sa̱nataku̱ ra ta̱Lázaro. Chi ta̱ xa ni̱xiꞌi̱ xi̱kuu ra, ta ni̱ndu̱xu̱n ra ti̱xin kavua̱, ta saá ki̱xaa̱ ta̱Jesús, ta ka̱na ra ta̱Lázaro xíꞌin ki̱vi̱ ra, ta sa̱nataku̱ ñaꞌá ra. Ta ni̱vi na xi̱ni ñayóꞌo xa̱ta níꞌnó na to̱ꞌon xa̱ꞌa̱ ñava̱ꞌa yóꞌo ke̱ꞌé ta̱Jesús. 18Ña̱kán kía̱ ndiꞌi ni̱vi na xi̱ni̱ so̱ꞌo to̱ꞌon yóꞌo, ke̱e na kua̱ꞌa̱n na ña nakutáꞌan na xíꞌin ta̱Jesús yichi̱ no̱o̱ va̱xi ra ña kixaa̱ ra ñoo Jerusalén. 19Ta xa̱ꞌa̱ ñayóꞌo nafariseo ni̱ka̱ꞌa̱n na xíꞌin táꞌan na, káchí na saá:
―¡Nda̱ ma̱ni̱ kúu ña ndukú yó kundeé yó no̱o̱ ta̱yóꞌo! ¡Koto ndó! Ndiꞌi saá ni̱vi ñoyívi yóꞌo ndíko̱n na sa̱ta̱ ta̱Jesús vitin ―káchí na, káꞌa̱n na xíꞌin táꞌan na.
To̱ꞌon yóꞌo káꞌa̱n ña ni̱vi na inka̱ ñoo na̱ndukú na ta̱Jesús
20Ta sava ni̱vi na ki̱xaa̱ ñoo Jerusalén ña kasa to̱ꞌó na Ndios viko̱ Pascua kúu na inka̱ ñoo, ta káꞌa̱n na to̱ꞌon griego. 21Ta sava nagriego yóꞌo ki̱xaa̱ na no̱o̱ ñii ta̱xíka xíꞌin ta̱Jesús ta̱ na̱ní Felipe, ta̱a ta̱ ke̱e ñoo Betsaida estado Galilea kúu ra. Ki̱xaa̱ nagriego no̱o̱ ta̱Felipe yóꞌo, ta ni̱ka̱ꞌa̱n na xíꞌin ra, káchí na saá:
―Tata, kóni ndi̱ koto ndi̱ ta̱Jesús ―káchí na xíꞌin ra.
22Ta ta̱Felipe ni̱xa̱ꞌa̱n ra nda̱to̱ꞌon ra xíꞌin inka̱ ta̱xíka xíꞌin ta̱Jesús, ta̱ na̱ní Andrés, ta ndio̱vi̱ na saá ke̱e na kua̱ꞌa̱n na, ta ni̱xaa̱ na no̱o̱ ta̱Jesús ña ndato̱ꞌon na xíꞌin ra xa̱ꞌa̱ ña kóni nagriego yóꞌo. 23Ta nda̱kuii̱n ta̱Jesús, ni̱ka̱ꞌa̱n ra saá:
―Xa kíxaa̱ yatin ní ki̱vi̱ ña yi̱ꞌi̱, ta̱a ta̱ ki̱xi no̱o̱ Ndios, kasa ndivi i̱ chiño káꞌno, ta xa̱ꞌa̱ ñayóꞌo Ndios kasa káꞌno ra yi̱ꞌi̱, ta kanóo síkón ñato̱ꞌó i̱. 24Ta ña ndixa nda̱a̱ káꞌa̱n i̱ xíꞌin ndó tá yóo ñii ndiki̱n trigo, ta tá o̱n chiꞌi ni̱vi ndiki̱n yóꞌo, ta kindo̱o matóꞌón ña. Ta saá ni, tá chiꞌi ni̱vi ndiki̱n trigo yóꞌo ti̱xin ñoꞌo̱, ta saá ndixa ta̱ꞌvi̱ so̱o̱ ña, ta ndu̱ta̱ ña ta kuaꞌno ña, ta nduu ña kua̱ꞌa̱ ní ndiki̱n trigo. Ta nda̱tán yóo ndiki̱n trigo ña chiꞌi ni̱vi ti̱xin ñoꞌo̱ saá yóo i̱ chi xíni̱ ñóꞌó kivi̱ i̱, ta ndu̱xu̱n i̱, ta nataku̱ i̱. Ta xa̱ꞌa̱ ña kundoꞌo i̱ saá, kua̱ꞌa̱ ní ni̱vi kutaku̱ na xíꞌin Ndios. 25Ta nda̱tán yi̱ꞌi̱ táxi xíꞌin mi̱i i̱ ña kasa ndivi i̱ ña kóni Ndios, ñii ki̱ꞌva saá ni̱vi na ndíko̱n yichi̱ i̱, xíni̱ ñóꞌó na taxi xíꞌin mi̱i na ña keꞌé na ña kóni Ndios. Chi ndiꞌi ni̱vi na ndasaá kuiti kúsii̱ ini kutaku̱ va̱ꞌa ñoyívi yóꞌo, nayóꞌo ndañóꞌó na no̱o̱ Ndios. Ta ndiꞌi ni̱vi na o̱n vása ndíꞌi ní ini xa̱ꞌa̱ ña kutaku̱ va̱ꞌa na ñoyívi yóꞌo, nayóꞌo kúu na naníꞌi yichi̱ nda̱a̱ ña va̱ꞌa kutaku̱ na xíꞌin Ndios. 26Ndiꞌi ni̱vi na kóni kasa chiño no̱o̱ i̱, xíni̱ ñóꞌó kundiko̱n na yichi̱ i̱, ta saá nda̱tán yóo ña kéꞌé i̱, saá keꞌé na. Ta Yivá i̱ Ndios kasa to̱ꞌó ra ndiꞌi ni̱vi na kúu na kísa chiño no̱o̱ i̱.
To̱ꞌon yóꞌo káꞌa̱n ña ta̱Jesús nda̱to̱ꞌon ra xíꞌin ni̱vi ndasaá koo ña kivi̱ ra
27’Ta vitin ndíꞌi ní ini i̱, ta xáni ní ini i̱ yukía̱ ka̱ꞌa̱n i̱ xíꞌin Ndios. ¿Án ndukú i̱ no̱o̱ Yivá i̱ Ndios ña saka̱ku ra yi̱ꞌi̱ no̱o̱ ña xo̱ꞌvi̱ ní i̱? Óꞌon, o̱n ka̱ꞌa̱n i̱ saá, chi xa̱ꞌa̱ ña kasa ndivi i̱ chiño yo̱ꞌvi̱ ní, nda̱ kivi̱ i̱ kúu ña ki̱xaa̱ i̱ ñoyívi yóꞌo ―káchí ta̱Jesús.
28Ta saá ni̱ka̱ꞌa̱n ta̱Jesús xíꞌin Ndios, káchí ra saá:
―Tata Yivá i̱, vitin kasa ndivi ún chiño xa̱ꞌa̱ ña kasa káꞌno ni̱vi yóꞌó ta chinóo síkón na ñato̱ꞌó ún ―káchí ta̱Jesús xíꞌin Ndios.
Ta saá xi̱ni̱ so̱ꞌo ra ta̱chi̱ to̱ꞌon Ndios ña ki̱xi ñoyívi ni̱no ña ni̱ka̱ꞌa̱n ña, káchí ña saá:
―Xa ki̱sa ndivi i̱ chiño káꞌno ña ki̱sa káꞌno ni̱vi yi̱ꞌi̱, ta chi̱nóo síkón na ñato̱ꞌó i̱, ta tuku inka̱ yichi̱ keꞌé i̱ saá ―káchí to̱ꞌon ni̱ka̱ꞌa̱n ña xíꞌin ra.
29Ta ni̱vi na ndóo xíꞌin ta̱Jesús xi̱ni̱ so̱ꞌo na ta̱chi̱ yóꞌo, ta sava ni̱vi xa̱ni si̱ni̱ na án ndáꞌyi sa̱vi̱. Ta inka̱ na ni̱ka̱ꞌa̱n, káchí na:
―Ñii ángel ña ki̱xi no̱o̱ Ndios ni̱ka̱ꞌa̱n ña xíꞌin ra ―káchí na, káꞌa̱n na.
30Ta ta̱Jesús ni̱ka̱ꞌa̱n ra xíꞌin na:
―O̱n si̱ví xa̱ꞌa̱ yi̱ꞌi̱ kúu ña ni̱ka̱ꞌa̱n ta̱chi̱ yóꞌo, ta ni̱ka̱ꞌa̱n ta̱chi̱ yóꞌo xa̱ꞌa̱ ña chindeé ña ndóꞌó ña ndixa kandixa ndó yi̱ꞌi̱. 31Vitin xa yatin kíxaa̱ ki̱vi̱ ña kasa nani Ndios xa̱ꞌa̱ kua̱chi ni̱vi ñoyívi yóꞌo. Ta saá ñaníma̱ ndiva̱ꞌa káꞌno, ña kúu ña xáꞌnda chiño no̱o̱ ni̱vi ñoyívi yóꞌo vitin, Ndios sakana ra níma̱ yóꞌo ko̱ꞌo̱n ña ke̱ꞌe no̱o̱ naa ní. 32Ta yi̱ꞌi̱, ki̱vi̱ ndaníꞌi ni̱vi yi̱ꞌi̱ no̱o̱ síkón, ta xíꞌin ñayóꞌo keꞌé i̱ ña ndiꞌi ni̱vi kixaa̱ na no̱o̱ i̱ ―káchí ta̱Jesús xíꞌin na.
33Ni̱ka̱ꞌa̱n ra to̱ꞌon yóꞌo ña ndato̱ꞌon ra xíꞌin ni̱vi ña kunda̱a̱ ini na ndí kivi̱ ra ndaꞌa̱ tón cruz. 34Ta nda̱kuii̱n ni̱vi, ni̱ka̱ꞌa̱n na, káchí na saá:
―Xa ka̱ꞌvi ndi̱ to̱ꞌon Ndios ña ni̱taa na kui̱ya̱ xi̱na̱ꞌá ña káchí xa̱ꞌa̱ Cristo, ta̱a ta̱ tiꞌví Ndios. Ta to̱ꞌon yóꞌo káchí ña ndí Cristo kutaku̱ ra ndiꞌi saá ki̱vi̱ ña va̱xi. Ta yóꞌó káchí ún ndí ndaníꞌi na ta̱a ta̱ ki̱xi no̱o̱ Ndios, ta sandaa na ra ndaꞌa̱ tón cruz. Ta, ¿yu kúu ta̱a ta̱ káꞌa̱n ún xa̱ꞌa̱, ta̱ káchí ún kúu ta̱a ta̱ ki̱xi no̱o̱ Ndios? ―káchí na xíꞌin ra.
35Ta nda̱kuii̱n ta̱Jesús, ni̱ka̱ꞌa̱n ra xíꞌin na:
―Nda̱tán yóo ñoꞌo̱ ndinoꞌo yéꞌe, saá yóo i̱, ta saloꞌo kuiti ka̱ ki̱vi̱ yóo i̱ xíꞌin ndó. Xíni̱ ñóꞌó kundiko̱n ndó yichi̱ i̱ ña yéꞌe ndinoꞌo, ko̱to̱ ñii kama nakiꞌin yichi̱ ña naa ndóꞌó. Chi ni̱vi na xíka yichi̱ naa o̱n vása xíni̱ nayóꞌo míchí kua̱ꞌa̱n na. 36Yi̱ꞌi̱ kúu Ñoꞌo̱ ndinoꞌo yéꞌe, ta vitin ki̱vi̱ ña yóo ka̱ i̱ xíꞌin ndó, xíni̱ ñóꞌó kandixa ndó yi̱ꞌi̱. Ta saá nduu ndó ni̱vi na kua̱ꞌa̱n yichi̱ no̱o̱ yéꞌe Ñoꞌo̱ ndinoꞌo ―káchí ta̱Jesús xíꞌin na.
Ta ndi̱ꞌi ni̱ka̱ꞌa̱n ra saá, ta ke̱e ra kua̱ꞌa̱n ra, ta ni̱xaa̱ ra ñii xiiña no̱o̱ chi̱seꞌé xíꞌin mi̱i ra ko̱to̱ naníꞌi nani̱vi ra.
To̱ꞌon yóꞌo káꞌa̱n ña kua̱ꞌa̱ ní najudío ni̱‑xiin na kandixa na ta̱Jesús
37Vará ta̱Jesús xa ke̱ꞌé ra kua̱ꞌa̱ ní milagro xi̱ni ni̱vi, ta saá ni, ni̱‑xiin na kandixa na ra. 38Ta xíꞌin ña o̱n kandixa na ra, ki̱sa ndivi na ña ni̱ka̱ꞌa̱n to̱ꞌon Ndios ña ni̱taa ta̱profeta Isaías kui̱ya̱ xi̱na̱ꞌá, ña káchí saá:
Yivá yó Ndios, loꞌo ní ni̱vi ka̱ndixa na to̱ꞌon ún ña nda̱to̱ꞌon i̱ xíꞌin na.
Ni o̱n vása ní‑kunda̱a̱ ini na ndí xíꞌin ndee̱ mi̱i ún kúu ña ki̱sa ndivi i̱ ndiꞌi chiño náꞌno ña xi̱ni na,
káchí to̱ꞌon ña ni̱taa ta̱Isaías xi̱na̱ꞌá. 39Vitin kísa ndivi najudío yóꞌo nda̱tán yóo ña ni̱taa ta̱Isaías kui̱ya̱ xi̱na̱ꞌá, chi ni̱‑kuchiño na kandixa na ta̱Jesús. Ta inka̱ xiiña no̱o̱ to̱ꞌon Ndios ña ni̱taa ta̱Isaías xi̱na̱ꞌá, káchí ña saá xa̱ꞌa̱ ni̱vi yóꞌo:
40O̱n vása ní‑xiin na nakoni na ta ko̱ꞌo̱n na yichi̱ ña kúu ñanda̱a̱,
ña̱kán kía̱ Ndios ta̱xi ra ña nduu nayóꞌo nda̱tán yóo ni̱vi nakuáá,
chi o̱n vása kúchiño na koni na ñanda̱a̱.
Ta xa̱ꞌa̱ ña ni̱‑xiin na kandixa na ñanda̱a̱, Ndios ta̱xi ra ña nduu toon ní ka̱ ini na,
nduu na ni̱vi na o̱n vása kúchiño kandixa ñanda̱a̱.
Ta xa̱ꞌa̱ ni̱vi yóꞌo, Ndios ni̱ka̱ꞌa̱n ra, ka̱chí ra saá:
“Nda̱ loꞌo ni̱‑xiin na nandikó ini na,
ta ni̱‑xiin na kixi na no̱o̱ i̱ xa̱ꞌa̱ ña sandaꞌa i̱ na ña va̱ꞌa kutaku̱ na yichi̱ nda̱a̱”,
ka̱chí Ndios no̱o̱ to̱ꞌon ra ña ni̱taa ta̱Isaías kui̱ya̱ xi̱na̱ꞌá. 41Ta̱Isaías yóꞌo xi̱kuu ñii ta̱profeta ta̱ ni̱ka̱ꞌa̱n ndoso to̱ꞌon Ndios kui̱ya̱ xi̱na̱ꞌá, ta xi̱ni ra ndiꞌi ndee̱ ña livi káꞌno ña kómí ta̱Jesús ñoyívi ni̱no. Ta saá ta̱Isaías ni̱taa ra to̱ꞌon yóꞌo, ña ndáto̱ꞌon xa̱ꞌa̱ ña ndóꞌo ta̱Jesús ki̱vi̱ táku̱ ra ñoyívi yóꞌo.
42Vará sava nachiño náꞌno no̱o̱ najudío kándixa na ta̱Jesús ndí ndixa kúu ra ta̱a ta̱ ti̱ꞌví Ndios, ta o̱n vása ní‑xiin na ka̱ꞌa̱n na saá xíꞌin inka̱ ni̱vi chi yíꞌví na no̱o̱ nafariseo. Saá chi nafariseo xa xa̱ꞌnda chiño na ndí ndiꞌi ni̱vi na kándixa ndí ta̱Jesús kúu Cristo, ta̱a ta̱ ti̱ꞌví Ndios va̱xi, nayóꞌo o̱n kuchiño ka̱ na ki̱ꞌvi na ini veꞌe ño̱ꞌo sinagoga, káchí nafariseo. 43Ndiꞌi ni̱vi na kúu na yíꞌví ka̱ꞌa̱n ña kándixa na ta̱Jesús, nayóꞌo xáni si̱ni̱ na ndí ña ndáya̱ꞌví ní ka̱ kúu ña kanóo va̱ꞌa ñato̱ꞌó na no̱o̱ ni̱vi ñoyívi yóꞌo, ta xáni si̱ni̱ na loꞌo ní ndáya̱ꞌví ña kúu ña kanóo va̱ꞌa ñato̱ꞌó na no̱o̱ Ndios.
To̱ꞌon yóꞌo káꞌa̱n ña ndí to̱ꞌon ta̱Jesús kúu ña kasa nani xa̱ꞌa̱ kua̱chi ni̱vi
44Ta saá xíꞌin ndiꞌi ndee̱ ra, ta̱Jesús ni̱ka̱ꞌa̱n ra xíꞌin ni̱vi, káchí ra saá:
―Ta ni̱vi na kándixa yi̱ꞌi̱, nayóꞌo o̱n si̱ví ñii la̱á mi̱i i̱ kándixa na, ta kándixa na Ndios, ta̱a ta̱ ti̱ꞌví yi̱ꞌi̱ ki̱xaa̱ i̱. 45Ta ni̱vi na xíni yi̱ꞌi̱, nayóꞌo xíni na Yivá i̱ Ndios, ta̱a ta̱ ti̱ꞌví yi̱ꞌi̱ ki̱xaa̱ i̱. 46Yi̱ꞌi̱ kúu Ñoꞌo̱ ndinoꞌo yéꞌe ñoyívi yóꞌo. Ta ndiꞌi ni̱vi na ndixa kándixa yi̱ꞌi̱, nayóꞌo o̱n ko̱ꞌo̱n ka̱ na yichi̱ no̱o̱ naa. 47Ta ndiꞌi ni̱vi na kuiti xíni̱ so̱ꞌo to̱ꞌon ña káꞌa̱n i̱, ta o̱n xi̱in na kasa ndivi na ña, ta o̱n si̱ví yi̱ꞌi̱ kúu ta̱a ta̱ kasa nani xa̱ꞌa̱ ña o̱n váꞌa kéꞌé nayóꞌo. Saá chi o̱n si̱ví xa̱ꞌa̱ ña kasa nani i̱ xa̱ꞌa̱ kua̱chi ni̱vi kúu ña ki̱xaa̱ i̱ ñoyívi yóꞌo, ta xa̱ꞌa̱ ña saka̱ku i̱ ni̱vi ñoyívi yóꞌo kúu ña ki̱xaa̱ i̱. 48Ta ni̱vi na o̱n xi̱in koni yi̱ꞌi̱, ta ni o̱n xi̱in na kandixa na to̱ꞌon i̱, ta ndixa xa yóo ña kasa nani xa̱ꞌa̱ kua̱chi nayóꞌo. Chi tá ki̱xaa̱ ki̱vi̱ sondíꞌí ñoyívi yóꞌo, ta mi̱i to̱ꞌon ña ni̱ka̱ꞌa̱n i̱ xíꞌin nayóꞌo kasa nani xa̱ꞌa̱ kua̱chi na ña kúu ña o̱n vása ní‑xiin na chikaa̱ so̱ꞌo na to̱ꞌon yóꞌo. 49Chi xíꞌin nda̱yí Yivá i̱ Ndios káꞌa̱n i̱ to̱ꞌon ña ndáto̱ꞌon i̱ xíꞌin ndó. Ta o̱n si̱ví ndasaá kuiti to̱ꞌon mi̱i i̱ kúu ña káꞌa̱n i̱. Saá chi Yivá i̱ Ndios kúu ta̱a ta̱ ti̱ꞌví yi̱ꞌi̱ ki̱xaa̱ i̱, ta xa̱ꞌnda chiño ra ndá to̱ꞌon kúu ña ka̱ꞌa̱n i̱ xíꞌin ndó, ta xa̱ꞌnda chiño ra yu kúu ña sanáꞌa i̱ ndóꞌó. 50Ta yi̱ꞌi̱, xíni̱ va̱ꞌa i̱ ndí ña xáꞌnda chiño Yivá i̱ Ndios kúu ña táxi kutaku̱ ndinoꞌo ni̱vi ndiꞌi saá ki̱vi̱. Ta ñii ki̱ꞌva nda̱tán yóo to̱ꞌon ña xa̱ꞌnda chiño ra ka̱ꞌa̱n i̱, saá káꞌa̱n i̱ xíꞌin ni̱vi ―káchí ta̱Jesús xíꞌin na.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.