GALUEGA 3
3
Ko Sasale te Tagata 'Pili
1I te aso e tasi, ne olo atu a Petelu mo Ioane ki te Fale Tapu i te itula o talosaga, tela ko te tolu i te afiafi. 2E isi se tino ne 'pili mai tena fanaumaiga, ko sausau mai. E masani eiloa i aso takitasi o aumai te tagata tena o tuku sāle i te mataloa o te Fale Tapu e igoa ki te Mataloa Gali, ko te mea ke akai ne ia a tupe a tino kola e olo ki loto i te Fale Tapu. 3I te laveaga ne ia a Petelu mo Ioane ka ulu atu ki loto i te Fale Tapu, akai atu eiloa a ia ki a laua. 4Ne faka'toka katoa o la mata ki a ia, tela fai atu ei Petelu ki a ia, “Kilo mai ki a maua!” 5Kilo atu ei a ia ki a laua, mo te fakamoemoe ka maua mai se mea mai i a laua. 6Muna a Petelu ki a ia, “E seai ne aku tupe, kae ka tuku atu fua ne au a te mea tenei e nofo mo au: i te igoa o Iesu Keliso te Nasaleta, ko fakatonu atu au ki a koe, sasale!” 7Puke atu ei a Petelu ki tona lima fakaatamai o fakatu ake ki luga. I kona foki eiloa, 'lei ei mo ona vae pela foki mo ona sokogavae. 8Ne tafuke ake a ia o tu ki luga o sasale. Ulu tasi ei latou mo Petelu mo Ioane ki loto i te Fale Tapu, e sasale kae tafukefuke kae 'viki ki te Atua. 9Ne matea ne tino katoa ne i kona, me ko sasale a ia kae 'viki ki te Atua. 10Ka ko te mateaga ne latou me ko te tino akai mea tela e nofo sāle i te mataloa o te Fale Tapu e igoa ki te Mataloa Gali, ne 'poi kae ofo latou me ne mafai pefea o sasale a ia.
Ko te Lauga a Petelu i Loto i te Fale Tapu
11Ka koi 'piki eiloa a ia ki a Petelu mo Ioane, i loto i te Fale Fakaoso o Solomona, kae 'tele a tino ki a latou mo te ofo. 12I te laveaga ne Petelu a tino kona, fai atu ei ki a latou: “Tagata Isalaelu, ai a e ofo ei koutou ki te mea nei, kae ai a foki e faka'toka mai ei otou mata ki a maua? I te otou taofi ne mafai ne ia nei o sasale i te mana o maua io me ko te ma amio Atua? 13#Eso 3.15Ko oti ne tuku atu ne te Atua o Apelaamo, Isaako, mo Iakopo, ko te Atua foki o o'tou tupuga, tela ne tuku atu ne ia a te 'malu ki tena Tavini ko Iesu, tela ne tuku atu ne koutou ki pule, kae toe 'teke foki ne koutou a ia i mua o Pilato, i te otiga ne fai atu a Pilato ke fakasaoloto a ia. 14#Mata 27.15-23; Male 15.6-14; Luka 23.13-23; Ioa 19.12-15E se gata foki i kona, ne 'teke foki ne koutou te Tama Tapu kae Amiotonu, kae ne fakatagi atu koutou ki a Pilato ke fai te otou loto, ke fakasaoloto mai a te tino tatino. 15Ne tamate ne koutou a te Aliki o te ola, kae ne toe fakatu ake ne te Atua mai tino 'mate, ka ko matou ne tino molimau foki ki te mea nei. 16Ko malosi a te tino 'pili tenei e alatu i te fakatuanaki ki tona igoa, e pela eiloa mo te mea ko matea kae iloa foki ne koutou. Ko te fakatuanaki eiloa ki a Iesu ne ala ei o malosi a ia, e pela eiloa mo te mea ne tupu i mua o koutou katoa.
17“Oku taina, e iloa ne au a te mea ne fai ne koutou mo otou takitaki ki a Iesu, me ne fai ne koutou ona ko te otou va'lea. 18Ko leva ne 'valo ne te Atua i gutu o pelofeta, me e 'tau o puapuagatia tena Keliso; kae ne fakataunu ne ia tena valoaga i te ala tenei. 19Tela la, ke na salamo koutou ki otou agasala, kae 'fuli atu ki te Atua, ko te mea ke fakamagalo otou agasala. 20E se gata fua i kona, ka ke maua foki a taimi o te malosi faka te Agaga mai te Aliki, ka ke tuku mai foki ne ia tena Keliso ko Iesu, tela ko leva ne filifili ne ia mo koutou. 21E 'tau o nofo eiloa i te lagi ke oko ki te taimi e fakafou ei a mea katoa, tela ne faipati ki ei a te Atua i taimi ko 'teka i gutu o ana pelofeta 'malu. 22#Teu 18.15,18Ne fai mai Mose: ‘Ka uga mai ne te Aliki te otou Atua se pelofeta ki a koutou, e pela eiloa mo te ugamaiga o au,#3.22: e pela mo ia ne uga mai ne ia a au; io me e tusa mo au. e penei foki eiloa mo au ne uga mai ne ia ki a koutou. E 'tau mo koutou o faka'logo ki mea katoa e fai mai ne ia ki a koutou. 23#Teu 18.19So se tino e se fakalogo ki muna a te pelofeta tena, ka 'vae keatea mai tino o te Atua kae fakamaseigina.’ 24A pelofeta katoa e kamata mai i a Samuelu mo latou katoa mai ona tua, ne fai'pati katoa kae ne folafola foki ne latou aso konei. 25#Kene 22.18A koutou ko fanau a pelofeta, kae ka maua foki ne koutou te feagaiga tela ne fai ne te Atua mo otou tupuga. Ne fai atu a te Atua ki a Apelaamo, ‘Ka fakamanuia ne au a tino katoa o te lalolagi, e alatu i au fanau.’ 26Tela la, filifili ei ne te Atua tena Tavini, kae uga mai o fakamanuia mai ki a koutou, i te fai ne ia koutou ke sala'mo mai i otou ala masei.”
Currently Selected:
GALUEGA 3: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
