GALUEGA Fakatomuaga
Fakatomuaga
Te Galuega a te Kau Apositolo se fakasokoga o Te Evagelia a Luka. A tena fakamoemoega maluga ko te mea ke fakailoa me ne pefea a soko muamua o Iesu, kola ne takitaki ne te Agaga Tapu, o fakasalalau a te Tala Lei e uiga ki a ia “i Ielusalema, ki kogā koga katoa o Iutaia mo Samalia, ke oko ki kapakapalagi o te lalolagi” (1.8). Te mea nei ko te tala mo te gasuesuega o Kelisiano, tela ne kamata mai i loto i tino Iutaia, kae ne salalau ke fai mo talitonuga o te lalolagi katoa. Te Tusitala e fakataua ne ia o fakapatonu ki ana tino faitau, me i tino Kelisiano e se ne tino e fakamakosu ki te malo Loma, kae ko te talitonuga Kelisiano ko te fakataunuga o te lotu Iutaia.
A Galuega e mafai o vaevae ki vaega taua e tolu, e fakaata i ei te lasi o kogā koga kola, ko oti ne oko ki ei te folafolaga o te Tala Lei e uiga ki a Iesu, mo te fakatuga o Ekalesia: (1) te kamataga o gasuesuega o te talitonuga Kelisiano i Ielusalema mai i tua o te fanoga o Iesu ki te lagi; (2) ne fakasalalau atu ki nisi feitu o Palesitina; mo (3) te toe fakasalalauga, ki te lalolagi i te Metitilani ke oko ki Loma.
Tasi o vaega taua o Te Tusi o Galuega ko te galuega a te Agaga Tapu, tela ne vau mo te 'mana ki luga o tino talitonu i Ielusalema i te aso o te Penitekoso kae ne fakatumau o takitaki kae fakamalosi te Ekalesia mo ana takitaki i loto o mea katoa ne 'tupu kola e fakamatala i loto o te tusi tenei. A fekau a Kelisiano taumua e fakamatala fakatoetoe ki loto o lauga, mo nisi mea kola ne tupu kae ne fakamau i Te Tusi o Galuega e fakaasi te malosi o te fekau tenei i olaga o tino talitonu mo te mafutaga fakakautaina i loto o te Ekalesia.
Ko Fakasologa o Mataupu
Fakatokatokaga o fai mo molimau (1.1-26)
a. Toe poloakiga a Iesu mo tena feagaiga (1.1-14)
b. Sui o Iuta (1.15-26)
Molimau i Ielusalema (2.1—8.3)
Molimau i Iutaia mo Samalia (8.4—12.25)
Galuega a Paulo (13.1—28.31)
a. Malaga fakamisionale muamua (13.1—14.28)
e. Fonotaga i Ielusalema (15.1-35)
i. Lua o malaga fakamisionale (15.36—18.22)
o. Malaga fakamisionale i te tolu (18.23—21.16)
u. Paulo te pagota i Ielusalema, Kaisaleia, mo Loma (21.17—28.31)
Currently Selected:
GALUEGA Fakatomuaga: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific