ESOTO 14
14
Ko te Malaga i Loto i te Tai Kula
1Ne fai atu te Aliki ki a Mose penei, 2“Fai ki tino Isalaelu ke foki o fakama'nava i mua o te kogā laukele ko Pe Hailota, i te va o Mikitolo mo te Tai Kula, i tafa o Paala Sefono. 3Ne mafaufau a te tupu o Aikupito me i tino Isalaelu ko takasese i te vao kae saitia i te koga lavaki. 4Ka fakamakeke ne au a te loto o te tupu kae ka afuli ne ia koutou. Ka ko toku manumalo i luga i te tupu o Aikupito mo tena kautau ka fai mo mea e takutakua ei au. Tena, ka iloa ei ne tino Aikupito i a Au ko te Aliki.” Ne fai eiloa ne tino Isalaelu te mea tela ne fakatonu atu ki a latou.
5I te logoga o te tupu o Aikupito i tino Isalaelu ko tele keatea, ne 'fuli tena mafaufauga, pela foki mo ana tino maluga kae fai ake latou penei, “Se a nei te mea ko oti ne fai ne tatou? Ko oti ne tuku ne tatou a tino Isalaelu ke olo, kae nei ko seai ne 'tou pologa!” 6Ne fakatoka a kaliota tau a te tupu, mo tena kautau. 7Ne malaga atu a ia mo ana kaliota katoa, e aofia i ei a te ono selau tafasili kola e takitaki eiloa ne olotou takitaki. 8Ne fakamakeke ne te Aliki a te loto o te tupu tela ne fano ei a ia o afuli a tino Isalaelu kola ko olo mo te manumalo.#14.8: mo te manumalo; io mei lalo o te puipuiga a te Aliki. 9A te kautau a Aikupito mo solofanua katoa, mo kaliota, mo tino fakatele kaliota, ne olo o afuli a tino Isalaelu kae maua atu ne latou i te koga tela ne fakama'nava ei latou i tafa o te Tai Kula tela e pili ki Pe Hailota mo Paala Sefono.
10I te mateaga ne tino Isalaelu te oloatuga a te tupu mo tena kautau ki a latou, ne ma'taku latou kae tagi ki te Aliki mo se fesoasoani. 11Muna a latou ki a Mose, “Ai a ne aumai ei ne koe matou, ke 'mate i konei? E seai ne tanuga i Aikupito? Ko lavea ne koe a te ikuga o te aumaiga ne koe matou mai Aikupito! 12E a, kai fai atu matou ka koi tuai ei tatou o o'mai keatea mai Aikupito me ka tupu se mea penei? Ne fai atu eiloa matou ke tuku malie eiloa matou ke fai mo pologa a tino Aikupito. E sili atu te pologa i Aikupito i lo te 'mate fua i te koga lavaki tenei.”
13Ne tali atu a Mose, “Sa ma'taku! Ke makeke koutou i otou tulaga kae ka lavea ne koutou te mea ka fai ne te Aliki i te aso nei o fakasao koutou. Ka se toe lavea eiloa ne koutou a tino Aikupito konei. 14Ka tau te Aliki mo koutou, kae ke seai eiloa se mea e 'tau o fai ne koutou.”
15Ne fai atu a te Aliki ki a Mose penei, “Ai a e kalaga mai ei koe mo se fesoasoani? Fai ki tino ke olo ki mua. 16Sisi ake tou tokotoko kae fakasaga ki luga i te tai; ka mavaelua te tai, kae ka sa'sale a tino Isalaelu i loto i ei, me ko masapakupaku. 17Ka fai ne au te kau Aikupito ke ma'keke olotou loto, ko te mea ke tau'tali atu eiloa latou i tua o tino Isalaelu ki loto i te tai. Ka fakaaloalogina au i toku manumalo i luga i te tupu mo tena kautau mo ana kaliota pela foki mo ana tino fakatele kaliota. 18Kafai ko fakatakavale latou ne au, ko iloa ei ne tino Aikupito i a au ko te Aliki.”
19A te agelu a te Atua tela e fano faeloa i mua o te kautau a Isalaelu ko masiki o tu i tua, ko te pou kaumana foki ko masiki o nofo 20i te va o tino Isalaelu mo tino Aikupito. E fakapouli ne te kaumana a tino Aikupito, kae fakamaina ne ia a tino Isalaelu, tela la, ko se mafai ei o fakapilipili atu a te sua kautau ki te sua kautau i te po katoa.
21Ne sisi ake te lima o Mose i luga o te tai, kae fakamavae ne te Aliki a te tai ki te matagi malosi eiloa mai te saegala. Ne agi i te po katoa, tela ko fuli ne ia te tai ki te laukele malo. Ko mavaelua te tai, 22#1Koli 10.1,2; Epe 11.29 ko tino Isalaelu eiloa ko olo i loto, i luga i te koga 'masa, mo vai e tu aka pela me ne pui mākeke e lua i olotou feitu. 23Ne tau'tali atu a te kautau a Aikupito i olotou tua ki loto i te tai, mo olotou solofanua, mo kaliota mo tino fakatele kaliota. 24Kae ko pili faeloa ki te tafataeao, ne kilo ifo te Aliki mai te pou afi mo te pou kaumana ki te kautau a Aikupito kae fai ne ia latou ke fakatau fetuli valevale. 25Ne fai ne ia a teka o olotou kaliota ke 'lave, ko te mea ke tuai te lotou gasue'sue. Ne fai ake a tino Aikupito, “A te Aliki e kau ki tino Isalaelu o tau mai ki a tatou. Tatou ka tele keatea mai konei!”
26Muna a te Aliki ki a Mose penei, “Sisi ake tou lima i luga o te tai, ko te vai ka toe foki ifo ki luga i te kau Aikupito, mo olotou solofanua mo kaliota pela foki mo olotou tino faka'tele kaliota.” 27Tela ne sisi ake ei te lima o Mose i luga o te tai kae i te tafataeao ne toe foki eiloa te tai ki te 'sua tela e masani ki ei. Ne taumafai te kau Aikupito o tele keatea mai te tai, kae ne toe 'pei latou ne te Aliki ki loto i te tai. 28Ne toe foki te suatai o te tai, ne lofia ei a kaliota mo olotou tino fakateletele mo te kautau katoa a Aikupito tela ne tautali i tino Isalaelu ki loto i te tai. E seai loa se tino o latou ne sao. 29Ka ko tino Isalaelu ne sasale fakalei eiloa i loto i te tai, i te koga masa, mo 'pui vai i olotou feitu.
30I te aso tena, ne fakasao ei ne te Aliki a tino Isalaelu mai tino Aikupito, kae ne lavea ne tino Isalaelu a tino mate o Aikupito e tafola i te matafaga. 31I te mateaga ne tino Isalaelu a te 'mana malosi tela ne fakaaoga ne te Aliki o fakatakavale tino Aikupito, ne ma'taku ei latou ki te Aliki; kae tali'tonu latou ki te Aliki mo tena tavini ko Mose.
Currently Selected:
ESOTO 14: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
