ESOTO 16
16
Ko Manai, mo Manu ko Salu
1Ne tiakina ne te kau Isalaelu te koga ko Elima, kae i te po sefulu lima o te lua o masina i te otiga ne tiakina ne latou a Aikupito, ne oko atu ei latou ki te koga lavaki ko Sina, tela e tu i te va o Elima mo Sinai. 2I te koga lavaki tena ne fakatagi atu ei tino Isalaelu ki a Mose mo Alona kae fai atu ki a laua penei, 3“E sili atu te 'lei moi ne tamate matou ne te Aliki i Aikupito. I te motou 'nofoga i Aikupito, e mafai faeloa ne matou o sagasaga ki lalo o 'kai fakalei omotou kano manu. E uke foki meakai valevale e kai ne matou, kae e mafai foki ne te tino o kai ki te mea e mafai ne ia o kai. Kae nei, ne aumai fua ne koulua a matou ke mate fiakai i te koga lavaki tenei.”
4 #
Ioa 6.31
Ne fai mai te Aliki ki a Mose penei, “Ka faka'to ifo ne au a meakai mai te lagi mo koutou katoa. I aso takitasi, a tino ka olo o tae a meakai e lava ei latou i te aso tena. I te feitu tena, ka tofotofo ne au a latou me e tautali i aku fakatonuga me ikai. 5I te ono o aso, e tau o puke mai ne latou a meakai mo aso e lua, ko fakatoka ei.”
6Tena ne fai ei Mose mo Alona ki tino Isalaelu katoa penei, “I te afiafi nei ka iloa ei ne koutou me ko te Aliki ne aumai ne ia koutou keatea mai Aikupito. 7I te tafataeao, ka matea ei ne koutou a te mainaga o te fakatasi mai o te Aliki. Ko oti ne lagona ne ia te otou mui'mui. Maua nei e fai fua te fakatonuga tela e fai mai ne te Aliki.” 8Tela, fai atu ei a Mose penei, “Ko te Aliki ka tuku atu ne ia a kano manu mo otou kai i te afiafi, kae i te taeao ka tuku atu ne ia a falaoa ki te mea e ma'nako koutou ki ei, me ko oti ne lagona ne ia te otou tagi mo te se ma'lie ki a ia. Kafai e mui'mui koutou ki a maua, a te tonuga a koutou e muimui ki te Aliki, me i maua e tau'tali fua i fakatonuga e fai mai ne te Aliki.”
9Muna Mose ki a Alona, “Fai atu ki tino Isalaelu katoa ke o'mai o tu i mua o te Aliki, me ko oti ne lagona ne ia te lotou tagi.” 10I te faipatiatuga a Alona ki te kau Isalaelu, ne saga olotou mata ki te koga lavaki, te mea loa ko matea ne latou te mainaga o te Aliki mai te kaumana. 11Muna te Aliki ki a Mose, 12“Ko oti ne lagona ne au a te mui'mui o tino Isalaelu. Fai atu ki a latou me i te taimi eiloa e to ei te la, ka maua ei ne latou ne kano manu mo olotou 'kai; kae i te tafataeao ka maua ne latou a falaoa, e tusa mo te uke e ma'nako latou ki ei. Ka iloa ei ne latou i a au, te Aliki, ko te lotou Atua.”
13I te afiafi, ne eva mai a fuifuiga salu uke eiloa tela ko tafola valevale i matafale o olotou fale moe; kae i te tafataeao ko lavea atu te sau i tafafale o latou. 14I te maloga o te sau ko lavea atu se mea manifinifi pela me se matutuga kiona i luga i te laukele. E malulu kae kena pela me se kiona. 15#1Koli 10.3I te mateaga ne tino Isalaelu, ne seki iloa ne latou me se a, tela ne fai ake ei latou penei, “Se a te mea tenei?”
Ne fai atu a Mose ki a latou penei, “Tenei te meakai tela ko tuku atu ne te Aliki ke kai koutou ki ei. 16Ko oti ne fai te fakatonuga a te Aliki ke olo koutou takitokotasi o fakaputu meakai kona ne tuku mai ne ia ki te mea e lava koutou i ei. E taki lua lita i te tino tokotasi i te kaiga.”
17Ne fai ne tino Isalaelu a te fakatonuga tena, a nisi tino e uke olotou mea ne puke, ka ko nisi e mutana. 18#2Koli 8.15A latou kola e uke olotou mea ne tae e se tō uke, pela foki eiloa mo latou kola ne tae e mutana, e se to mu'tana foki. Tela la, ne tae eiloa ne te tino a te mea e lava lei ei a ia. 19Ne fai mai a Mose ki a latou penei, “E seai ne mea e faka'toe ki te taeao.” 20E isi ne tino ne seki faka'logo ki a Mose, kae faka'toe eiloa ne latou ne mu mea. I te taeaoakega ko fonu i ilo kae ko manogi masei foki. Tela, ne ita ei a Mose ki a latou. 21I tafataeao katoa ne olo a tino o tae te aofaki e ma'nako latou ki ei; kae i taimi ko vela mai ei a te la, a mea kola e toe i te laukele ko liu vai.
22I te ono o aso, ne tae ne latou fakatau mo aso e lua, e taki fa lita i te tino tokotasi. Ne o'mai katoa a takitaki o Isalaelu o fakamatala ki a Mose te mea tena, 23#Eso 20.8-11kae fai atu a Mose ki a latou penei, “Ko oti ne fai te fakatonuga a te Aliki, i te aso taeao se aso tapu, kae se aso malolo foki, tela e tau o fakatapu atu ki a ia. I te aso nei, tao a mea kola e manako koutou o tao kae saka a mea kola e manako koutou o saka. A mea kola e toe e tau o tuku mo te aso taeao.” 24E pela eiloa mo te fakatonuga a Mose, ne tausi ne latou a mea kola e toe mo te sua aso; seki masei, seki tolo foki ne ilo. 25Muna Mose, “Kai a mea konei i te aso nei, me i te aso nei ko te Sapati, te aso malolo tela ko oti ne fakatapu mo te Aliki. Ka seai ne meakai e lavea ne koutou i otou tafafale. 26E 'tau mo koutou o tae meakai i aso e ono, kae i te fitu o aso, te aso malolo, ka seai ne meakai e maua ne koutou.”
27I te fitu o aso, e isi ne tino ne olo o tae meakai, kae seai ne olotou mea ne maua. 28Tela ne fai mai ei te Aliki ki a Mose penei, “Ka gata afea te se fia faka'logo o koutou ki aku fakatonuga? 29Masaua me ko oti ne tuku atu ne au, ko te Aliki, se aso malolo mo koutou. Tena te mea e tuku faeloa atu ne au ki a koutou a meakai i te ono o aso e fakatau mo aso e lua. E tau mo koutou o nofo malie i otou fale i te fitu o aso.” 30Tena, seki ga'lue ei a tino Isalaelu i te fitu o aso.
31 #
Nume 11.7,8 Ne fakaigoa ne tino Isalaelu a te meakai tela ne tuku mai ne te Aliki ko te manai,#16.31: manai A te uiga o te pati tenei faka Epelu “Se a te mea na?” (onoono ki te foaitau 15). e foliga pela me se tamā fuaga kena, kae ka kai koe ki ei, e pela me se masi ne palu mo te hani. 32Muna Mose, “Ko oti ne fakatonu mai te Aliki ki a tatou, ke tausi ne manai ma o'tou mokopuna, ko te mea ke lavea ne latou te meakai tela ne tuku mai ne te Aliki ke kai tatou i ei i te koga lavaki, i te aumaiga ne ia tatou mai Aikupito.” 33#Epe 9.4Muna Mose ki a Alona, “Puke mai se tia, kae fao ki loto ne manai e tusa mo te lua lita te 'mafa, kae tuku ki loto i se koga tapu ke tausi ma o'tou mokopuna.” 34E pela mo te fakatonuga a te Aliki ki a Mose, ne tuku ei ne Alona i mua o te Pusa o te Feagaiga, ke mafai o tausi faka'lei. 35Ne kai eiloa tino Isalaelu i te manai i te fa sefulu tausaga ke oko eiloa ki taimi ne oko atu latou ki te fenua o Kanana, tela ne nofo tumau ei latou. 36A te mea e fua ki ei manai i aso kona e tusa mo te luasefulu lita.
Currently Selected:
ESOTO 16: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
