ESOTO 26
26
Ko te Faleie o te Aliki
(Eso 36.8-38)
1“Faite te koga i loto o te Faleie Tapu, te Faleie tela e nofo ei au, ki laugatu lino e sefulu kola e laga ki vulu lanu usi, lanu kulakula mo te lanu kula. Ka oti ko 'sui ki ei ne ata o kelupi. 2Ke faite a laugatu takitasi konei ki te fua e tasi: e sefululua mita te loa kae lua mita te lauefa. 3Ke 'sui fakatasi a laugatu e lima, ko te seti tena e tasi. Sui foki pena te sua lima. 4Fai ne pu fakalave ki laugatu lanu usi, i kapakapa ki tua o seti takitasi. 5Fai ne pu fakalave e limasefulu i kapakapa o te laugatu o te seti muamua, e pena foki te lua o seti, ko te mea ke fakafesagai tonu a la pu fakalave. 6Faite ake foki se limasefulu pine faka'lave ki aulo mo soko a seti kona e lua, mo mea e tasi.
7“Faite se ufi mo te Faleie ki potu laugatu e sefulutasi kola e fai ki fulu o kouti. 8Faite ke 'pau te fua o mea katoa kona, e sefulutolu mita te loa kae lua mita te lauefa. 9'Sui fakatasi a laugatu e lima i te seti e tasi, kae ono i te sua seti, ko fetu lua ei te toe laugatu i te seti tela e ono laugatu i ei, i mua o te Faleie. 10'Sui ne pu fakalave e limasefulu i kapakapa o te toe laugatu i te sua seti, e limasefulu foki i kapakapa o te sua seti. 11Faite ake foki se limasefulu pine palasi ko fakalave ei ke soko tasi a seti konei e lua ko te mea ke tasi. 12Ka oti, ko fakatautau ifo ei te toega o te laugatu i feitu ki tua o te Faleie. 13A te limasefulu senitimita tela e silia i feitu takitasi o te loaga o te Faleie, ke fakatautau ifo i feitu o te Faleie mo pui.
14“Faite ne ufiufi e toe lua, e tasi e faite ki te pakili o te mamoe ne vali ki te lanu kula, ka ko te sua ufi e faite ki pakili manu; mea konei mo ufi te feitu ki tua.
15“Faite te foitino fale ki lakau o te akasia kae ke tonu lei katoa. 16A foitino fale takitasi ke taki fa mita te loa kae taki 66 senitimita te lauefa, 17faite foki ne fakanifonifoga e lua mo fakasoko a foitino fale konei e lua. A foitino fale katoa ke fai katoa ne fakanifoga penei. 18Faite e luasefulu laupapa mo te feitu ki saute, 19mo ne lagolago siliva e fasefulu e lago ei. E taki lua lago i lalo o te laupapa mo taofi ona fakanifonifoga e lua. 20Faite se luasefulu laupapa mo te feitu ki matu o te Faleie, 21kae e fasefulu lagolago siliva; e taki lua i lalo o te laupapa e tasi. 22Faite e ono laupapa mo te feitu ki tua o te Faleie i te feitu ki te togala, 23kae lua laupapa i te matulimanu. 24A laupapa i matulimanu konei ke fakasoko ake eiloa mai lalo ke oko eiloa ki luga. A laupapa konei e lua, kola e faite ki ei matulimanu e lua ke faite foki penei. 25Tena la, e tusa mo te valu laupapa mo olotou lagolago siliva e sefuluono; e takilua lagolago siliva mai lalo o laupapa takitasi.
26“Faite e sefululima lakau fakalava ki te lakau ko te akasia; e lima i te feitu e tasi o te Faleie, 27e lima i te sua feitu, kae lima i te feitu ki tua, tela ko te feitu ki te togala. 28A te lakau fakalava i te kogaloto o te foitino‐fale, ke faka'lava mai eiloa i te sua mata o te Faleie ki te sua mata. 29Ufi a laupapa katoa ki aulo, ko fakamau ki ei a ligi aulo mo taofi a lakau faka'lava kona, kola e ufi foki ki te aulo. 30A te fakatuga o te Faleie ke fai eiloa pela mo te fuafuaga ne fakaasi atu ne au i luga i te mauga.
31“Faite ake foki se laugatu pui ki se laugatu lino kae lei, tela e laga ki te vulu lanu usi, lanu kulakula mo te kula. Ka oti ko sui ki ei ne ata o kelupi, 32ko tautau ei ki luga i pou e fa kola e faite ki te akasia kae ufi ki te aulo, a pou kona e mau i ei pine fakalave, kae tu i luga o lagolago siliva e fa. 33#Epe 6.19; 9.3-5Faka'mau atu a laugatu pui mai lalo ifo o te unu pine fakalave i tuafale o te Faleie, ko tuku ei ki ei a te Pusa o te Feagaiga tela e tuku i ei a papa fatu e lua, kae tuku mai tua o te laugatu pui. A te laugatu pui e vae i ei a te Potu Tapu mo te Potu Tafasili i te Tapu. 34Ka oti, ko pono ei te Pusa o te Feagaiga. 35Kae mai tua o te Potu Tafasili i te Tapu ke tuku ki ei te taipola i te feitu ki matu o te Faleie, kae tuku te tulaga‐moli ki te feitu ki saute.
36“Faite se laugatu pui ki te laugatu lei tela e laga ki te vulu kula mo te lanu usi mo te lanu kulakula, ko suisui fakagaligali ei mo te mataloa o te Faleie. 37Faite ne pou e lima ki lakau o te akasia kae ufi ki te aulo kae fakamau ki ei ne pine aulo, mo tautau te laugatu pui tenei, kae faite ake ei foki ne lago palasi e lima mo pou konei.
Currently Selected:
ESOTO 26: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
