ESOTO 39
39
Ko te Suiga o Gatu mo Faitaulaga
(Eso 28.1-14)
1Ne faite ne latou a gatu gali mo faitaulaga ki te vulu lanu usi, kulakula, mo te lanu kula, ke 'pei ki ei i te taimi e galue ei a latou i loto i te Potu Tapu. Ne fai ne latou a gatu fakafaitaulaga mo Alona, e pela eiloa mo te fakatonuga a te Aliki ki a Mose.
2Ne sui ne latou a te efota ki laugatu lino gali fakatasi mo te vulu lanu usi, lanu kulakula, mo te kula, mo te filo aulo. 3Ne tuki foki ne latou te aulo ke manifinifi kae isiisi ne latou fakalauliki, laga ei ne latou ki loto i te laugatu lino gali mo vulu lanu usi, kulakula, mo te lanu kula. 4Ne faite foki ne latou a pakave e lua kae sui atu ki feitu takitasi o te efota, ko te mea ke mafai o fakamau a te efota ki ei. 5A te fusi, tela ne laga foki ki mea ne laga ki ei a te efota, ne soko atu ki te efota ko te mea ke pela me se mea e tasi, e pela mo te fakatonuga a te Aliki ki a Mose. 6Ne fakatoka ne latou a fatu kaneli kae fakamau ki tulaga aulo o latou. I luga o fatu kaneli konei ne ta ei ne latou a igoa o tama a Iakopo e tinoagafulu mo te tokolua. 7Ne fakamau ne latou a fatu kaneli ki pakave o te efota e fakaasi ei matakaiga o Isalaelu e sefulu lua, e pela eiloa mo te fakatonuga a te Aliki ki a Mose.
Ko te Lagaga o te Ufi Fatafata
(Eso 28.15-30)
8Ne fai foki ne latou a te ufi fatafata ki mea foki kola ne fai ki ei a te efota fakatasi mo suiga fakagaligali kola e tai pau eiloa mo suiga fakagaligali o te efota. 9A te ufi fatafata e pau lei ana feitu e fa kae e fetulua, e luasefulu lua senitimita te loa kae luasefulu lua foki senitimita te lauefa. 10I luga o te ufi fatafata ne fakamau ne latou ki ei e fa laina o fatu taua, i te laina muamua ko te lupi, te topasi, mo te kaneti; 11i te lua o laina, ko te emela, te safaila, mo te taemani, 12i te tolu o laina, ko te takosi, te akate, mo te emesita, 13kae i te fa o laina, ko te pelila, te kaneli, mo te iasepi. A fatu taua konei ne fakamau ki tulaga aulo o latou. 14I fatu taua konei takitasi, ko oti ne ta ki ei igoa o tamaliki a Iakopo, e fakaasi ei a matakaiga o Isalaelu e sefulu lua. 15Kae ne faite ne latou ne filifili mai te tina aulo mo te ufi fatafata, kae ne fili eiloa ne latou ke pela me ne kafa. 16Ne faite foki ne latou e lua tulaga aulo mo mama aulo e lua kae fakamau ne latou a mama e lua ki mata tulimanu tafa ki luga o te ufi fatafata. 17Sai ei ne latou a mata e lua o filifili aulo e lua ki mama aulo e lua, 18kae sai foki a nisi mata e lua o filifili aulo ki tulaga aulo e lua, kae i te faiga tenei ko fakamau ne latou mai mua o pakave o te efota. 19Ne faite foki ne latou ne mama aulo e lua kae fakamau atu ki mata tulimanu tafa ki lalo o te ufi tafatafa, i te feitu ki loto tela e tafa ki te efota. 20Ne toe faite ne latou ne mama aulo e lua kae fakamau mai lalo, i mua o pakave e lua o te efota, e pili ki te matatuiga kae mai luga faeloa o te fusi. 21E pela mo te fakatonuga a te Aliki ki a Mose, ne sai ei ne latou a mama o te ufi fatafata ki mama o te efota ki te filo lanu usi, ko te mea ko te ufi fatafata ke moe tonu mai luga o te fusi kae ke se matagataga.
Ko te Lagaga o Nisi Gatu Fakafaitaulaga
(Eso 28.31-43)
22A te gatu loa tela e loa atu i te efota ne faite katoa ki te vulu lanu usi. 23Ko te ua o te gatu ne fakamalosigina ki se lagaga fakatamilo ko te mea ke se masae gofie. 24-26A kapakapa ki lalo o te gatu loa ne sui fakatamilo ne latou ki ei a ata o fuagalakau o te pomekalanite ki te laugatu lino gali mo te vulu lanu usi, lanu kulakula mo te kula, kae fakavasavasa ki 'pele aulo, e pela eiloa mo te fakatonuga a te Aliki ki a Mose.
27Ne sui ne latou a tilima mo Alona mo ana tamaliki tagata, 28mo te laugatu sai o te ulu, mo pulou mo tivae lino, 29mo te fusi laugatu e laga ki lino gali mo vulu lanu usi, kulakula mo te lanu kula kae fakagaligali ki suisuiga fakagaligali, e pela eiloa mo te fakatonuga a te Aliki ki a Mose. 30Ne faite ne latou se mea ki te tina aulo, kae tusi i ei a pati konei, “Ko fakatapu mo te Aliki.” 31Fakamau ei ne latou ki te koga i mua o te pulou ki te uka lanu usi e pela eiloa mo te fakatonuga a te Aliki ki a Mose.
Ko te Fakaotiga o te Galuega
(Eso 35.10-19)
32A galuega katoa i te faitega o te Faleie o te Aliki ne fakapalele lei eiloa. A tino Isalaelu ne faite ne latou a mea katoa o te Faleie, e pela eiloa mo te fakatonuga a te Aliki ki a Mose. 33Ne avatu ne latou ki a Mose a te Faleie mo ana mea katoa, ko ana pine fakalave, ko te foitino fale, ko talava fiti, ko ana pou mo ona tulaga; 34ko te ufi pakili mamoe lanu kula, mo te ufi pakili manu malosi, mo te laugatu pui, 35mo te Pusa o te Feagaiga tela e fao i ei a papa fatu, mo ana amo, mo tena pono; 36mo te taipola mo ana mea katoa, mo te falaoa e ofo atu ki te Atua; 37mo te tulaga moli aulo fakatasi mo ana moli mo ana mea katoa, mo te sinu e utu ei a moli; 38mo te fata-fai-taulaga aulo, mo te sinu tapu, mo taulaga manogi, mo te pui laugatu o te mataloa o te Faleie; 39mo te fata-fai-taulaga palasi mo tena mea valavala palasi, mo ana amo, mo ana mea katoa; mo te pesini fano mo tena tulaga; 40mo te pui laugatu o te pui loto fakatasi mo ana pou mo olotou tulaga, mo te pui laugatu o te mataloa o te pui fakatamilo mo ona lopu; mo pine fakamau o te Faleie; mo mea katoa kola ka fakaaoga i te Faleie; 41mo gatu gali ke fakaaoga ne faitaulaga i te Potu Tapu — gatu tapu e o Alona te faitaulaga mo ana tamaliki tagata. 42Ne fai eiloa ke oti a te galuega ne tino Isalaelu ke pela eiloa mo te mea ne fakatonu mai ne te Aliki ki a Mose. 43Ne asi ne Mose a mea katoa takitasi kae ne lavea ne ia me ko maea a mea katoa ne fai ne latou ke pela eiloa mo te fakatonuga a te Aliki, tena, fakamanuia atu ei ne Mose a latou.
Currently Selected:
ESOTO 39: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
