ESOTO 4
4
Ko Tuku ne te Atua ki a Mose a te 'Mana o fai Vavega
1Ne tali atu a Mose ki te Aliki, “Kae kafai la e se talitonu a tino Isalaelu ki a au, kae se faka'logo mai ki pati e fai atu ne au. Se a te mea ka fai ne au mafai se talitonu latou i a koe ne fakaasi mai ki a au?”
2Ne fesili mai te Aliki ki a ia penei, “Se a te mea tena i tou lima?”
Kae tali atu a Mose, “Se tokotoko.”
3Muna te Aliki, “Pei aka ki lalo.” I te peiga ne Mose a te tokotoko ki lalo, te mea eiloa ko liu gata. Tele ei Mose o faka'mao keatea mai i ei. 4Ne toe fai mai te Aliki ki a Mose, “Punou ki lalo o puke i tena velo.” Ne punou ifo Mose ki lalo, puke aka ne ia, ko te mea eiloa ko toe liu tokotoko. 5Ne fai atu te Aliki, “Fai ne koe te mea tena ke fakatalitonu ki ei tino Isalaelu, i te Aliki, te Atua o olotou tupuga, te Atua o Apelaamo, Isaako mo Iakopo, ne fakaasi atu ki a koe.”
6Ne toe faipati mai te Aliki ki a Mose penei, “Faulu tou lima ki loto i tou gatu.” Ne faulu te lima o Mose ki loto i tena gatu, kae i te taimi ne tata ake ei ne ia ko lepela, ko 'kena eiloa pela me se kiona. 7Ne fai atu te Aliki, “Toe faulu tou lima ki loto i tou gatu.” Ne toe faulu tena lima ki tena gatu, kae i te tataga ki tua, ko 'lei, ko 'pau eiloa mo tena foitino katoa. 8Ne muna mai te Aliki ki a Mose, “Kafai se talitonu latou i te vavega tela muamua, ka talia eiloa ne latou te vavega tena. 9Kae kafai la e tumau eiloa te lotou se talitonu ki a koe, mo te se fia faka'logo atu ki au pati; asu mai la ne vai mai i te vaitafe o te Naila kae ligi ki luga i te laukele; ko te vai tena ka liu toto.”
10Ne fai atu a Mose ki te Aliki, “Te Aliki, sa ugagina au. Au se se tagata e poto i te faipati. I te taimi ne kamata ei koe o faipati mai ki a au ke oko ki taimi nei, e seki lagona eiloa ne au se mafuliga ki taku faipati. Taku faipati e se 'lei kae tuai.”
11Ne tali mai te Aliki ki a ia, “Ko oi ne fai ne ia te gutu o te tagata? Ko oi e fai ne ia a tagata ke 'tuli kae gugu? Ko oi e fai ne ia a mata o te tino ke pula kae ke 'kivi foki? Ko au eiloa ko te Aliki. 12Nei la, vau o fano, ka fesoasoani atu au ki tau faipati, ka tukutuku atu foki ne au ki a koe a pati e 'tau o fai.”
13Ne tali atu a Mose, “Te Aliki, fakamolemole uga aka se tino fakaatea.”
14Ona ko te mea tenei, ne ita ei te Aliki ki a Mose kae fai atu penei, “E iloa ne koe tou taina tela ko Alona mai te matakaiga o Levi? E iloa ne au me poto a ia i te faipati, kae tenei ko vau o fakafetaui ki a koe, kae ka fiafia a ia o kilo ki a koe. 15Faipati ki ei, fai atu foki a pati e 'tau ke fai ne ia. Ka fesoasoani atu au ki a koulua o akoako atu a pati ke fai ne koulua. 16Ka fai a ia mo tino failauga ia koulua o faipati atu ki tino; ka ko koe ka pela mo te Atua, o fakasinosino ki a ia a pati e 'tau o fai ne ia. 17Puke te tokotoko tenei ke olo mo koulua, me ka fakaaoga ne koulua mo fai a vavega e uke.”
Ko toe foki a Mose ki Aikupito
18Ne foki atu a Mose ki a Ietelo, te tamana o tena avaga, kae fai atu ki a ia penei, “Fakamolemole tuku mai au ke foki ki Aikupito o asi atu ki oku kaiga me koi ola me ikai.” Ne tuku atu ne Ietelo a ia ke fano, fakatofa atu ei ki a ia.
19Ka koi nofo eiloa Mose i Mitiana, ne fai mai te Aliki ki a ia penei, “Foki ki Aikupito, i tino kola ne taumafai o tamate koe ko oti katoa ne 'mate.” 20Ne puke aka ei Mose ki tena avaga, mo ana tamaliki tagata, faka'sopo ki luga i te asini, ma'laga atu eiloa latou ki Aikupito. Kae ave foki ne ia te tokotoko tela ne fai atu te Atua ke fano mo ia.
21Ne toe fai mai te Aliki ki a Mose, “Nei ka foki koe ki Aikupito, sa puli la o fai vavega kola ne tuku atu ne au ke fai ne koe i mua o te tupu. Ka fakamakeke ne au a te loto o te tupu, ke se talia ne ia tino Isalaelu ke olo. 22Kae ka fai atu koe ki te tupu i a Au, te Aliki, ne fai atu penei, ‘A Isalaelu ko taku toekimua tagata. 23#Eso 12.29Au e fai atu ki a koe ke tuku mai taku tama ke fano, ko te mea ke tapuaki mai ki a au, kae ita koe. Nei, ka tamate ne au tau toekimua tagata.’ ”
24I te lotou auala ki Aikupito, ne ma'nava a Mose mo tena kaiga, kae ne fanatu te Aliki o taumafai o tamate a ia. 25-26Ne puke aka ne Sepola, te avaga a Mose, te fatu mata'kai o pilitome a tena tama tagata, kae fakapatele ki vae o Mose.#4.25-26: Vae: Te fakamatalaga fakapitoa ki “vae,” i konei e fakauiga ki masaki o te tagata. Pela mo te faifaiga o te pilitome, ne fai atu ei Sepola ki a Mose, “Koe nei ko taku avaga i te toto.” Tena ne fakasao ei te ola o Mose ne te Aliki.
27I vaitaimi kona, ko oti te Aliki ne faipati ki a Alona penei, “Fano ki te koga lavaki o fakafetaui ki a Mose.” Ne fano loa ei a Alona o fakafetaui ki a Mose i te Mauga Tapu; ka ko te la fetauiga ne sogi atu ei a ia ki a Mose. 28I kona foki eiloa ne fakamatala katoa atu ne Mose a pati a te Aliki ne fai ki a ia, i te faiatuga ke foki a ia ki Aikupito; ne tala atu foki ne ia a vavega kola ne fakatonu atu ne te Aliki ke fai. 29Ne olo ei Alona mo Mose ki Aikupito, fakamaopoopo eiloa ne laua a takitaki katoa o tino Isalaelu. 30Ne folafola atu ne Alona a pati katoa a te Aliki kola ne fai ki a Mose, oti aka, fai ei ne Mose a vavega katoa i mua o latou. 31Ne talitonu latou; ka ko te 'logoga i te Aliki ne fanatu ki a latou, kae ne lavea ne ia te lotou nofo pologa, ne ifo latou kae tapuaki.
Currently Selected:
ESOTO 4: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
