KENESE 11
11
Ko te Taoa o Papelu
1Muamua eiloa, a tino katoa i te lalolagi e fai'pati katoa ki te 'gana e tasi. 2I olotou oloolo salega i te saegala, ne oko atu latou ki se kogā laukele laugatasi i Papelonia, nofo tumau ei latou i kona. 3Ne faipati ake latou penei, “O'mai i tatou ka faite a puliki kae tao ke ma'keke.” Tela ne maua ei olotou puliki, e pela foki mo kolota e fakapiki tasi ei a puliki. 4Ne fai ake latou penei, “O'mai i tatou ka faite se fa'kai mo tena taoa ke oko ki te lagi, ko te mea ke takutakua tatou, kae ke se salalau valevale tatou i te lalolagi.”
5Tena ne fanaifo ei te Aliki o onoono ki te fa'kai mo te taoa tela ne faite ne tagata kona, 6kae fai aka mo ana muna penei, “Kiloke, a latou se fenua e tasi kae fai'pati ki te gana e tasi; mea nei ko te kamataga fua o te mea ka fai ne latou. Ko pili nei kae ka mafai o fai ne latou so se mea e ma'nako latou o fai! 7Tatou ka olo ifo o faka'numi aka te lotou gana ko te mea ke se malamalama sua tino i pati a sua tino.” 8Tela ne fakasalalau atu ei latou ne te Aliki i te lalolagi, ko te mea eiloa ko gata te faitega o te fa'kai. 9Ne fakaigoa te fa'kai tena ko Papelonia,#11.9: Papelonia: A te uiga o te igoa tenei faka Epelu “numi taki.” me ne faka'numi ne te Aliki i kona te gana a tino katoa, kae fakasalalau atu latou ki koga kesekese o te lalolagi.
Ko te Gafa o Semu
(1NTupu 1.24-27)
10Tenei te fakasologa o te gafa o Semu. E tusa mo te 100 tausaga o Semu kae fai tena tama tagata tela ko Apasata; ka ko tusa mo te lua tausaga mai tua ifo o te lofiaga. 11Mai te taimi tena, ne ola atu eiloa Semu i nisi tausaga e 500, kae isi foki ne ana nisi tamaliki fakamuli ifo.
12E tusa mo te 35 tausaga o Apasata, kae fai tena tama tagata, ko Seela. 13Mai tua ifo, ne ola atu eiloa a ia i nisi tausaga e 500. Kae isi foki ne ana nisi tamaliki fakamuli ifo.
14E tusa mo te 30 tausaga o Seela kae fai tena tamaliki tagata, ko Epela; 15kae mai tua ifo ne ola atu eiloa a ia i nisi tausaga e 403, kae isi foki ne ana nisi tamaliki fakamuli ifo.
16E tusa mo te 34 tausaga o Epela, kae fai tena tamaliki tagata, ko Peleka; 17kae mai tua ifo ne ola atu eiloa a ia i nisi tausaga e 430, kae isi foki ne ana nisi tamaliki fakamuli ifo.
18E tusa mo te 30 tausaga o Peleka kae fai tena tamaliki tagata ko Leu; 19kae mai tua ifo, ne ola atu eiloa a ia i nisi tausaga e 209, kae isi aka foki ne ana nisi tamaliki fakamuli ifo.
20E tusa mo te 32 tausaga o Leu kae fai tena tamaliki tagata, ko Seluka; 21kae mai tua ifo, ne ola atu eiloa a ia i nisi tausaga e 207, kae isi aka foki ne ana nisi tamaliki fakamuli ifo.
22E tusa mo 30 tausaga o Seluka kae fai tena tamaliki tagata ko Nakoli; 23kae mai tua ifo, ne ola atu eiloa a ia i nisi tausaga e 200, kae isi aka foki ne ana nisi tamaliki fakamuli ifo.
24E tusa mo te 29 tausaga o Nakoli kae fai tena tamaliki tagata ko Tala; 25kae mai tua ifo ne ola atu eiloa a ia i nisi tausaga e 119, kae isi foki ne ana nisi tamaliki fakamuli ifo.
26E tusa mo te 70 tausaga o Tala kae fai ana tamaliki tagata ko Apelamo, ko Nakoli mo Halana.
Ko te Gafa o Tala
27Tenei te fakasologa o te gafa o Tala, te tamana o Apelamo, Nakoli mo Halana. Halana ko te tamana o Lota. 28A Halana ne mate i tena fa'kai tonu eiloa tela ko Ulo i Papelonia, ka ko tena tamana i ei koi ola eiloa. 29A Apelamo ne avaga ki a Salai, ka ko Nakoli ne avaga ki a Milika, te tama fafine a Halana. A Halana ko te tamana foki o Isika, 30ka ko Salai e se fanau.
31A Tala ne malaga atu mai Ulo i Papelonia o fano ki te fenua o Kanana fakatasi mo Apelamo mo tena mokopuna ko Lota, te tama tagata a Halana, mo Salai, te avaga a Apelamo. Ne oko atu latou ki Halana, nofo eiloa i kona. 32I kona eiloa ne mate ei a Tala, ka ko tusa mo te 205 tausaga o tena olaga.
Currently Selected:
KENESE 11: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
