KENESE 16
16
Ko Hakala mo Isamaeli
1E seki ai eiloa se tamaliki a Apelamo mo Salai; kae e isi la se tavini fafine a Salai, se fafine Aikupito, e igoa ki a Hakala. 2Ne faipati atu a Salai ki a Apelamo penei, “E seki ai eiloa se tamaliki a taua kai aumai ne te Aliki. Fano ke 'moe koulua mo taku tavini fafine, e se taumate ka fanau ne ia se tamaliki ma taua.” Ne talia eiloa ne Apelamo te mea tela ne fai atu ne Salai. 3Tela, tuku atu eiloa ne Salai a Hakala ke fai mo avaga fakasalasala a Apelamo. Te mea nei ne tupu ka ko tusa mo te sefulu tausaga o Apelamo i Kanana. 4Ne 'moe Apelamo mo Hakala, tela ne faitama ei a Hakala. I te iloaga ne Hakala i a ia ko faitama, tupu ei te loto fakamatamata i a ia, kae fai fili ki a Salai.
5Tela, fai atu ei a Salai ki a Apelamo penei, “E pogai mai i a koe te se fiafia o Hakala ki a au.#16.5: te se e o koe; io me Ko koe loa e logomae i tau mea sē ne fai mai ki a au. Ko au ne tuku atu ne au a Hakala ki a koe, kae i te iloaga ne ia i a ia ko faitama, ko te mea eiloa ko fai fili mai ki a au. A te Aliki ke fakamasino ne ia taua, me ko oi te tino e sao i a taua!”
6Ne tali atu a Apelamo penei, “Ko lei, a ia ko tau tavini kae e pule ne koe; fai so se mea e loto koe o fai ki a ia.” Tena ne se fai fakalei ei ne Salai a Hakala, iku eiloa ki te sola o Hakala.
7Ne fakafetaui atu te agelu a te Aliki ki a Hakala i te vaitafe foniki i te koga lavaki, i te auala ki Sula 8kae fai atu ki a ia penei, “Hakala, te tavini a Salai, a koe ne vau mai fea, kae fano foki koe ki fea?”
Ne tali atu a Hakala penei, “Au ne tele keatea mai i a Salai, toku pule.”
9Ne fai atu a te agelu ki a ia penei, “Toe foki ki a Salai o tavini ki a ia. 10Ka fakatokouke ne au tou gafa ke se maua o lau. 11Ka fanau mai tau tamaliki, se tamaliki tagata, kae ka fakaigoa ne koe ko Isamaeli,#16.11: Isamaeli: A te uiga o te igoa tenei i te gana Epelu, “E lagona ne te Atua.” me ko oti ne lagona ne te Aliki tau tagi fanoanoa. 12A tau tamaliki ka ola e pela mo se asini vao. Ka fai fili a ia ki tino katoa; a tino katoa foki ka fai fili ki a ia. Ka se nofo fakatasi a ia mo ona kaiga.”
13Ne fai ifo a Hakala ki a ia eiloa penei, “E tonu eiloa me ne lavea ne au a te Atua kae ola eiloa au o folafola atu ki tino?” Tela, fakaigoa ei ne ia a te Aliki tela ne faipati atu ki a ia, “Te Atua e Lavea ne ia.” 14Tena te mea e fakaigoa ei ne tino a te vaikeli tela e tu i te va o Katesa mo Peleti ko “Te Vaikeli o te Atua Ola tela e Matea ne la a Au.”
15 #
Kala 4.22
Ne fanau mai te tamaliki a Apelamo ne fai i a Hakala, fakaigoa ei ne Apelamo ko Isamaeli. 16I te taimi tena, a Apelamo ko tusa mo te valu sefulu ono ona tausaga.
Currently Selected:
KENESE 16: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
