KENESE 25
25
Ko Nisi Gafa o Apelaamo
(1NTupu 1.32-33)
1A Apelaamo ne toe avaga ki te fafine e igoa ki a Kitula, 2konei a tamaliki a ia i te fafine tena: ko Semelana, ko lokasana, ko Metana, ko Mitiana, ko Isepaka, mo Suaa. 3A lokasana ko te tamana o Seepa mo Titana, ka ko tino ne tupu mai i a Titana ko tino Asulimo, tino Letusimo mo tino Leumemo. 4A tamaliki a Mitiana ko Efa, ko Efala, ko Hanoka, ko Apitu mo Eleta. A latou katoa konei ko te gafa o Kitula.
5Ne tuku ne Apelaamo ana mea totino katoa ki a Isaako; 6kae i te taimi tenei koi ola ei a ia, e isi ne meaalofa ne tuku ne ia ki nisi tamaliki a ia ne fai i nisi avaga a ia. Tena ne uga ei ne ia ana tamaliki tagata konei ki te fenua i tena tama tagata ko Isaako.
Ko te Mate mo te Tanuga o Apelaamo
7-8A Apelaamo ne mate ka ko tusa mo 175 tausaga o tena olaga. 9Ne tanu a ia ne ana tama tagata ko Isaako mo Isamaeli i te ana o Makapelu i te laumanafa i te feitu ki te saegala o Mamele tela ko te laumanafa mua o Efelona, te tama tagata a Soala te tagata Heti. 10#Kene 23.3-16Te laumanafa tena ko te laumanafa ne togi ne Apelaamo mai tino Heti; a Apelaamo mo tena avaga ko Sala ne tanu fakatasi i te koga tena. 11I te matega o Apelaamo, ne fakamanuia atu ne te Atua tena tama ko Isaako, tela e nofo pili ki “Te vaikeli o te Atua Ola tela e Matea ne la a Au.”
Ko te Gafa o Isamaeli
(1NTupu 1.28-31)
12Konei a igoa o tamaliki tagata a Isamaeli, te tama tagata a Apelaamo ne fai i te tavini fafine a Sala e igoa ki a Hakala. E fakasolo eiloa mai te ulumatua o fano ki lalo: 13Ko Nepaiota, ko Ketala, ko Atapeelu, ko Mepesama, 14ko Mesema, ko Tuma, ko Mase 15ko Hatata, ko Tema, ko letula, ko Nafiso, mo Katema. 16A latou ko tupuga o te sefulu lua matakaiga, ka ko olotou igoa e fakaigoa ki ei olotou fa'kai mo olotou koga e fakamanava saale ei latou. 17Ne mate Isamaeli ka ko tusa mo te 137 tausaga o tena olaga. 18A te gafa o Isamaeli ne nofo i te fa'kai i te va o Havila mo Sula, i te feitu ki te saegala o Aikupito, i te auala ki Asulia. Ne nofo mao eiloa latou mai nisi o te fanauga a Apelaamo.
Ko te Fanaumaiga o Esau mo Iakopo
19Tenei te tala o Isaako, te tamaliki tagata a Apelaamo. 20A Isaako ne avaga ki a Lepeka, te tama fafine a Petueli tela se tino Alamea mai Mesopotamia, ka ko tusa mo te fa sefulu ona tausaga. A Lepeka ko te tuagaene foki o Lapana. 21A Lepeka e seki faitama eiloa, tela ne talo ei a Isaako ki te Aliki mo Lepeka. Ne talia ne te Aliki tena talo, tela ne faitama ei a Lepeka. 22I te tinae o Lepeka se masaga, kae koi tuai o fanau a ia ne taua te ava tamaliki kona i loto i tena tinae. Muna a Lepeka penei, “Ai a e tupu ei te mea tenei ki a au?” Tela ne fesili atu ei a ia ki te Aliki ki se tali.
23 #
Loma 9.12
Muna a te Aliki ki a ia,
“E lua malo kona i loto i tou tinae;
Ka fanau mai ne koe ne tamaliki e tokolua kola ka fai fili.
A tino e tupu mai i a laua ka fai fili foki!
Ka malosi atu a te sua tamaliki i te sua tamaliki.
Te tama matua ka tavini atu ki te tamaliki foliki.”
24Tela, i te fanau maiga o Lepeka, se masaga. 25Te tamaliki muamua e kulakula kae fulufulua, tela ne fakaigoa ei ko Esau.#25.25: Esau: A te igoa tenei e fakauiga ki a Seila, te kogā fenua tela fakamuli ifo ne nofoakigina ne te gafa o Esau; Seila tena uiga faka Epelu “fulufuluā.” 26Te sua tamaliki ne fanau mai kae piki mau eiloa ki te mulivae o Esau, tela ne fakaigoa ei a ia ko Iakopo.#25.26: Iakopo: A te uiga o te igoa tenei faka Epelu “mulivae.” I taimi tena ne fanau ei tokolua kona, ka ko Isaako ei ko ono sefulu ona tausaga.
Ko Fakatau atu ne Esau tena Tofi Toekimua ki a Iakopo
27Ne 'tupu ake tamaliki tagata kona, a Esau se tagata poto i te atuli manu, kae fiafia foki ki te olaga i fafo, ka ko Iakopo se tino filemu kae e nofo sale eiloa i te fale. 28A Isaako e fiafia ki a Esau me e fia kai saale ki manu vae fa kola e ta saale ne Esau, ka ko Lepeka e fiafia ki a Iakopo.
29I te aso e tasi, a Iakopo e tunu te supu pini, kae ulu mai a Esau, fatoa foki mai eiloa i te afuliga o manu. A Esau ko likiliki faka eiloa, 30tela ne fai atu ei ki a Iakopo penei, “Au ko likiliki faka eiloa; asu mai aka ne aku mea mai tau supu kula tena.” Tena te mea e fakaigoa ei a ia ko Etoma.#25.30: Etoma: A te uiga o te igoa tenei faka Epelu “kula.”
31Ne tali atu a Iakopo penei, “Ke tuku mai muamua ne koe tou tofi toekimua ki a au ko fatoa avatu ei ne au ne mu mea ma koe.”
32Muna a Esau, “Ko 'lei! Au ka mate i te fiakai, au se ola i toku tulaga ko te toekimua.”
33 #
Epe 12.16
Ne tali atu a Iakopo, “Tauto muamua me ka tuku mai tou tofi toekimua ki a au.”
Tela ne tauto ei Esau kae tuku atu tena tofi toekimua ki a Iakopo. 34Tuku atu ei ne Iakopo ki a ia ne falaoa mo ne supu mo ona kai. I tena otiga ne kai kae inu, te mea eiloa ko fano. E pena eiloa te manatu mama o Esau ki tena tofi toekimua.
Currently Selected:
KENESE 25: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
