KENESE 32
32
Iakopo ko Fakatoka o Fakafetaui ki a Esau
1Ne fano te malaga a Iakopo, kae i te ala, ne fakafetaui atu a agelu ki a ia. 2I te laveaga ne ia a latou, ana muna, “Tenei te koga e nofo ei te Atua”; tela ne fakaigoa ei ne ia te koga tena ko Manaima.#32.2: Mahanaima: A te uiga o te igoa tenei faka Epelu “koga 'nofo e lua se tumau.”
3Ne uga ne Iakopo ana ave fekau ke mua ki tena taina ko Esau, i te fenua ko Etoma. 4Ne fakatonu ne ia latou ke olo ki a Esau mo te fekau penei: “Ko au, ko Iakopo, tau tavini fakalogo, ko vau ki toku pule ko Esau. Au ne tuai mai i a au ne nofo i a Lapana kae tenei ko fatoa oko mai. 5E isi ne aku pulumakau, mo asini, mo mamoe mo kouti mo tavini. Ko uga atu ne au aku ave fekau kona, mo te fakamoemoe ko koe ke fiafia ki a au.”
6I te 'fokimaiga o avefekau a Iakopo, ne fai mai ki a ia penei, “Matou ne oko ki tou taina ko Esau, kae tenei ko vau i tena auala o fakafetaui ki a koe. E fa selau tagata konei e 'mai mo ia.” 7Ne tai poi te loto o Iakopo, tela ne vae ei ne ia a tino ne mai mo ia ki potukau e lua, e pena foki ana mamoe mo kouti mo pulumakau mo kamela. 8Ne mafaufau Iakopo me kafai e vau Esau o faitaua ki te sua potukau, kae ka sao te sua potukau.
9Tena ne fai te talo a Iakopo, “Te Atua o toku tupuna ko Apelaamo, mo toku tamana ko Isaako, fakalogo mai. Te Aliki, koe ne fai mai ke foki au ki toku fenua, ki oku kaiga kae ka fai ne koe ke solosolo lei mea katoa. 10E se taitai o fetaui te lasi o tou alofa mo tou fakamaoni ki a au tau tavini, ka ko au se tagata fua seai se aoga. Ne sopo atu au ki te sua feitu o te Iolitana mo te tokotoko fua tenei, kae nei ko foki mai au mo potukau konei e lua. 11Fakamolemole fakasao mai au, mai toku taina ko Esau. Au e mataku i te mea ma vau o faitaua mai kae ta ne ia matou, fakatasi mo fafine mo tamaliki. 12#Kene 22.17Masaua i a koe ne tauto ke fakasolosolo lei ne koe a mea katoa mo au, kae fakatokouke foki ne koe toku gafa ke se maua o lau, e pela mo one i te matafaga.”
13-15Ne nofo a Iakopo i kona i te po tena, kae i te taeao ne filifili ne ia mai ana lafu a manu konei mo fai tena meaalofa ki tena taina ko Esau: e lua selau kouti fafine kae luasefulu kouti tagata, e lua selau mamoe fafine kae luasefulu mamoe tagata. E tolusefulu kamela fai sau mo olotou tama, e fa sefulu pulumakau fafine kae sefulu pulumakau tagata, e luasefulu asini fafine kae sefulu asini tagata. 16Ne vaevae ne ia ki potoga, kae fakasoa ne ia ana tavini, e tokotasi ki te potoga e tasi, ke tausi ne latou. Muna a ia ki a latou, “Mua koutou, kae fai se va i va o potoga takitasi.” 17Ne fakatonu atu a Iakopo ki te tavini muamua penei, “Kafai e fakafetaui atu toku taina ko Esau kae fesili atu penei, ‘Ko oi tou pule? Koe e fano ki fea? E ai a manu kona i ou mua?’ 18e tau mo koe o tali atu penei, ‘E a Iakopo, tau tavini. Ne aumai ne ia mo fai tena meaalofa ki tena pule ko Esau. A Iakopo tena fua ko pili o sae mai.’ ” 19E pena foki tena fakatonuga ki tavini katoa kola e olo mo te meaalofa ki a Esau: “Konei pati e tau o fai ne koutou ki a Esau mafai e fetaui koutou. 20E tau koutou o fai penei, ‘E tonu, a tau tavini ko Iakopo tena fua ko pili o sae mai.’ Ne mafaufau Iakopo me kaati ka fiafia Esau i meaalofa, kae kafai ko fetaui laua kaati ka fakamagalo ne Esau a ia.” 21Ne uga atu ne ia a tavini mo te meaalofa i mua, kae nofo aka a ia mo nisi o tena kau o manava i kona i te po tena.
Ko Tafiti a Iakopo i Penieli
22I te po eiloa tena, ne tu ake Iakopo, puke ana avaga kola e tokolua, mo ana avaga faka'salasala foki kola e tokolua, mo ana tamaliki e tinogafulu ma tokotasi, olo atu ei ki te sua feitu o te Vaitafe ko lapoka. 23I te otiga ne ave ne ia tena kaiga ki te sua feitu o te vaitafe, ne foki ifo foki a ia o avatu ana mea totino katoa, 24#Hose 12.3,4ka ko ia ne nofo tokotasi i te koga tena.
Tena, kae vau te tagata e tokotasi o tafiti mo ia i te po katoa ke oko eiloa ki te vaveao. 25I te iloaga ne te tagata tena i a ia ka se manumalo, ne kini ne ia te sokoga i te kauaga o Iakopo, tela ne seke ei te kauaga o Iakopo. 26Ne fai mai te tagata tela ki a Iakopo penei, “Tuku mai au ke fano me ko pili o ao.”
Muna a Iakopo, “E se mafai o tiakina ne au a koe vagana ke fakamanuia mai ne koe a au.”
27Muna a te tagata tela, “Ko oi tou igoa?”
Ne tali atu Iakopo, “Ko Iakopo.”
28 #
Kene 35.10
Muna a te tagata tela, “A tou igoa ka se toe 'taku ki a Iakopo. A koe ko oti ne fepaki mo te Atua e pena foki mo tagata, kae ne manumalo koe; tela la, a tou igoa se ko Iakopo kae ko Isalaelu,#32.28: Isalaelu: A te uiga o te igoa tenei faka Epelu “ne fetolo mo te Atua ” io me “Te Atua ne fetolo.” ko tena uiga ne fetolo mo te Atua.”
29 #
Fama 13.17,18 Muna a Iakopo, “Taku mai nei me ko oi tou igoa,” kae tali mai te tagata tela penei, “Ai a e fia iloa ei ne koe toku igoa?” Tena fakamanuia atu eiloa ne ia a Iakopo.
30Muna a Iakopo, “Ko oti ne matea ne au te Atua ki oku mata, kae tenei eiloa au koi ola mai”; tela ne fakaigoa ei ne ia te koga tena ko Penieli,#32.30: Penieli: A te uiga o te igoa tenei faka Epelu “ko mata o te Atua.” ko tena uiga ko mata o te Atua. 31I te tiakinaga ne Iakopo Penieli, ka ko te la ko fanake, kae ne ketuketu atu eiloa a ia i tena kauaga ko seke. 32Ke oko mai ki aso nei, a tino Isalaelu e se kai ki te uga kano tela i te sokoga o te kauaga, me ko te uga kano tena tela ne kini ei a Iakopo.
Currently Selected:
KENESE 32: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
