KENESE 49
49
Ko Toe Pati eiloa a Iakopo
1Ne kalaga atu a Iakopo ki ana tama tagata kae fai atu penei, “O'mai ki oku mua, ke fakamatala atu ne au a mea ka tupu ki a koutou i aso fakamuli:
2“Tama a Iakopo, maopoopo mai o fakalogo ki aku muna.
Fakalogo mai ki te otou tamana ko Isalaelu.
3Taku toekimua ko Leupena, a koe ko toku malosi
Ka ko taku tamaliki muamua foki eiloa ne fai.
A koe ko toe tamaliki fakamatamata eiloa ka ko toe tamaliki malosi foki eiloa i taku fanau.
4A koe e pela me se lofiaga fakamataku, ka ko koe e se ko te tino tafasili i te tāua,
Me i a koe ne fano ki taku avaga fakasalasala kae fakamatagā
Ne koe te moega o tou tamana.
5“A Simeona mo Levi se tautaina.
E fakaaoga la mea tau o fakasaua.
6Au e se fia kau i la faipatiga funa,
E se kau foki a au i la maopoopoga.
Me e tamate ne laua a tino i o la kaitaua
Kae sona fakapa'kia foki ne laua a pulumakau tagata i la tafaoga.
7Ke malaia o la loto ita, me ko to fakamataku,
Ke malaia foki o la loto kaitaua, me e seai se alofa i ei.
Ka fakasalalau ne au a laua i te fenua katoa o Isalaelu.
Ka fakasalalau ne au a latou i luga i Isalaelu.
8“Iuta, ka tavae koe ne ou taina.
E mautakitaki ou lima i ua o ou fili.
A ou taina ka ifo atu ki a koe.
9 #
Nume 24.9; Faka 5.5 A Iuta e pela me se leona,
E ta tena tino, ko toe foki atu ei ki tena pu,
O falo tena foitino kae takato ki lalo.
Kae seai se tino e fakalavelave ki a ia.
10A Iuta ka puke ne ia te tokotoko fakatupu,
Ka ko tena gafa e tupu faeloa.
A malo e o'mai mo meaalofa tupe ki a ia, ke taugasoa latou.#49.10: Te fuliga pili atuMalo e o'mai mo meaalofa; te faka Epelu e se maina.
Kae e ifo mo te fakalogo ki a ia.
11E sai ne ia tena asini ki te lakau ko te vine,
Ki vine tafasili i te lei.
E ta ne ia ona gatu i te sua o te uaina, tela e kula pela me se toto.
12A ona mata ko kulatamimi eiloa mai i tena inuga ki uaina.
A ona nifo ko kena i tena inuga ki susu.#49.12: A ona mata ... susu. Io me A ona mata ko pouli atu i te uaina, a ona nifo ko 'kena atu i lo o susu.
13“A Sepulona ka nofo pili ki te tai.
A te matafaga tena e nofo ei a ia ka fai mo koga e afe ki ei a vakamutu.
A tena laufenua ka oko atu eiloa ki Saitonu.
14“Isakala e pau eiloa me se asini paie,
Tela e moe fakalava i luga i te laukele,
Mo taga kola e ave i tena tua e takato
I feitu takitasi o ia.
15E matea ne ia a te gali o te koga
Tela e manava ei a ia,
Mo te fenua foki, se fenua e gali.
Tela la, e fakapiko ifo tena tua o amo te amoga,
Kae ne faimalo ke galue e pela me se pologa.
16“A Tanu ka fai mo takitaki o tena fenua.
Ka pela eiloa mo nisi matakaiga o Isalaelu.
17A Tanu ka pela me se gata i tafa o te auala,
Ka pela me se gata poisini i tafatafa o te auala,
Tela e fakaoso tena poisini ki te mulivae o te solofanua
Ko te mea eiloa ko to te tino e sopo i te tua o te solofanua.
18“Te Aliki, au e fakatalitali atu ki tau fakaolataga.
19“A tino kaisoa ka o'mai o faitaua ki a Kato.
Kae ka afuli latou ne Kato.
20“A meakai lei eiloa ka maua mai te laukele o Asela
Ka maua mai i a ia a meakai e tau ki te tupu.
21“A Nafatali se tia tela e teletele saoloto fua,
Tela e fai tama 'gali.#49.21: Nafatali e fai tama 'gali io me Nafatali se lakau ola malumalu kae 'gali ana kaula.
22“A Iosefa e pela me se asini vao i tafa o se vaitafe foliki;
Se tamā asini vao i tafa mauga foliki.#49.22: Iosefa e pela me se lakau i tafa o se vaitafe foliki, se lakau e fua faeloa kae e 'solo i luga o se 'pui.
23E faitaua ki a ia a ona fili
Kae tuli ne latou a ia mo olotou kausana mo matasana.
24Kae ko tena kausana e 'toka faeloa,
Mo ana lima e fakamalosigina#49.24: Kae ko ana lima e fakamalosigina; io me Kae ko olotou kausana ko fatifati kae tatelatela, kae ko kano o olotou lima ko pakiakia valevale.
Ki te mana o te Atua Malosi o Iakopo,
Te Tausi Mamoe, te Puiga o Isalaelu.
25Ko te Atua o tou tamana tela e fesoasoani ki a koe,
Ko te Atua Malosi e fakamanuia ne ia a koe,
Ki vaiua mai luga mo vai mai lalo o te laukele.
E fakamanuia foki ne ia a koe o avatu pulumakau e uke pela foki mo tamaliki.
26Fakamanuiaga o saito mo pulalakau,#49.26: Te fuliga pili atu saito mo pula lakau; faka Epelu.A otou tamana ko siliga atu i te ma'fi.
Fakamanuiaga o mauga taumua,#49.26: Tasi o 'fuliga taumua ko mauga taumua; faka Epelu oku tupuga foki.
Mo mea gali mai mauga foliki kola e tu ki te se gata mai.
Ke i luga i a Iosefa a fakamanuiaga konei,
Ke i luga i fulumata o ia tela ne fakakese mai i ona taina.
27“A Peniamina e pela me se kuli vao fakamataku.
E ta kae folo faeloa ne ia a tino i taeao mo afiafi.”
28Kona a te tinogafulu mo te tokolua a matakaiga o Isalaelu, kae kona foki a pati a te lotou tamana i tena fakamavaega ki a latou takitokotasi.
Ko te Mate mo te Tanuga o Iakopo
29Ne fakatonu atu a Iakopo ki ana tama penei, “Nei, au ko pili o mate, masaua la o tanu toku foitino i tafa o oku tupuga i te tanuga tela e tu i te manafa o Efelona te tagata Heti, 30#Kene 23.3-20i te koga e igoa ko Makapelu, i te feitu ki te saegala o Mamele, i te fenua o Kanana. A te koga tena ne togi ne Apelaamo mai i a Efelona mo fai te tanuga. 31#Kene 25.9,10; Kene 35.29Tena te koga ne tanu ei a Apelaamo mo tena avaga ko Sala, ne tanu foki ei a Isaako mo tena avaga ko Lepeka; tena foki te koga ne tanu ei ne au a Lea. 32A te manafa tena, mo te ana tena i ei ne togi mai, mai tino Heti. Ave foki au o tanu i ei.” 33#Galu 7.15I te otiga o fakatonuga mo akoakoga a Iakopo ki ana tama, ne takato ifo a ia ki lalo te mea eiloa ko mate.
Currently Selected:
KENESE 49: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
