LEVITIKO 13
13
Ko Tulafono e Uiga ki te Masaki ko te Lepela
1Konei a fakatonuga ne tuku atu ne te Aliki ki a Mose mo Alona. 2Kafai se tino e isi se matakili i tena pakili, io me se fakafoa, io me se mea fulafula tela e mafai o mafua mai ei te masaki lepela, e tau ke ave a ia ki se faitaulaga i te gafa o Alona. 3Ka iloilo ne te faitaulaga a te matakili, kae kafai te matakili ko 'poko mo fulu i ei ko kena, tena uiga ko maua te lepela i te tino tena, tela la, ka fakailoa ne te faitaulaga i te tino tena e lailai. 4Kae kafai e kena eiloa a te matakili tena, kae se galo ki lalo mo te pakili, mo fulu foki i ei e se kena, ka 'vae a ia keatea ne te faitaulaga i aso e fitu. 5I te fitu o aso ka toe iloilo a ia ne te faitaulaga kae kafai e fakatau ifo te faitaulaga i te matakili e tumau eiloa kae se gasolo o lasi, ka toe vae keatea foki a ia i sua fitu o aso. 6Ka toe iloilo foki a ia ne te faitaulaga i te fitu o aso, kae kafai te matakili ko fano o mafu, ka fakailoa atu ne te faitaulaga i a ia e 'ma eiloa; a te mea tena se matakili fua. Ka fano te tino tena o 'ta faka'lei ona gatu ko 'ma ei a ia i feitu faka tapuakiga. 7Kae kafai ko toe gasolo o lasi te matakili tena mai tua o te taimi ne iloilo ei a ia ne te faitaulaga kae fai pela i a ia e 'ma, e tau o toe fano a ia ki te faitaulaga. 8Ka toe iloilo a ia ne te faitaulaga, kae kafai te matakili ko gasolo eiloa o lasi, ka fakailoa atu ne te faitaulaga i te tagata tena ko lailai; ko maua ne te lepela.
9Kafai se tino e lepela, e tau ke aumai ki te faitaulaga, 10tela ka iloilo ne ia. Kafai e isi se faka'sina i tena pakili ka ko kena foki a fulu i ei, kae fonu i te aukau, 11a te mea tena ko te tina lepela eiloa. Ka fakailoa atu ne te faitaulaga i te tino tena e lailai; e se tau o vae keatea te tagata tena me ko iloa eiloa i a ia e se 'ma. 12Kafai ko fonu te foitino o te tino tena i te lepela, mai tena ulu ki ona vae, 13ka toe iloilo a ia ne te faitaulaga. Kafai ko matea ne ia me ko soko eiloa tena foitino i te lepela, ka fakailoa atu i a ia ko 'ma. Kafai ko kena katoa a tena pakili, a ia ko 'ma eiloa. 14Kae kafai eiloa ko sae ake se matakili, ko lailai foki a ia. 15Ka toe iloilo a ia ne te faitaulaga, kae kafai ko matea atu se matakili 'pala, tena ka fakaasi atu ei ne te faitaulaga i a ia e se 'ma. A te matakili pala tena, se matakili lepela, tela la, a te tino tena e se 'ma. 16Kae kafai ko mafu te matakili tena, kae ko kena foki, ko toe fano ei a te tino tena ki te faitaulaga, 17tela ka toe iloilo ne ia a ia. Kafai ko kena eiloa te matakili tena, ko te tino tena ko 'ma, kae ka taku a ia ne te faitaulaga me ko 'ma.
18Kafai se tino e isi sena fakafoa kae ko mafu, 19kae fakamuli ifo ko 'sae aka a mea fakafua kena, io me se mea kulakula i te koga ne tu ei a te fakafoa e tau mo ia o fano ki te faitaulaga. 20Ko iloilo a ia ne te faitaulaga, kae kafai e tai 'poko eiloa te fakafoa tena, mo fulu i ei ko kena, ka taku a ia ko se 'ma. A te mea tena ko te lepela tela ne kamata aka i te fakafoa. 21Kae kafai ne iloilo aka ne te faitaulaga kae matea atu ne ia i fulu i ei e se kena, kae e se 'poko atu foki i pakili i ana tafa, kae e pela me e lanu mama foki, ka 'vae fakaatea a ia ne te faitaulaga i aso e fitu. 22Kafai ko solo te lepela tena, ka fakailoa atu i a ia e se 'ma; a ia e lepela. 23Kae kafai e tumau eiloa kae se gasolo o lasi, ko tena uiga pulāga fua o te fakafoa tela ko mafu, tela la, ka fakailoa atu ne te faitaulaga i a ia e 'ma.
24Kafai se tino ne 'paku, kafai ko kena a te koga ne paku, io me fa'kulakula, 25ka iloilo te tagata tena ne te faitaulaga. Kafai ko kena a fulu i luga i te koga tena ne 'paku, kae ko poko atu foki i te pakili, a te mea tena se lepela tela ne kamata i te koga ne 'paku, tela la, ka taku a ia ne te faitaulaga e se 'ma. 26Kae kafai e seki mafuli ki te kena a fulu i luga i te koga ne paku kae e se poko atu foki i te pakili, kae e lanu 'mama, ka 'vae fakaatea a ia ne te faitaulaga i aso e fitu. 27I te fitu o aso, ka toe iloilo a ia ne te faitaulaga, kae kafai ne gasolo o lasi a te koga ne paku ko tena uiga e isi te lepela i ei, tela la, ka fakailoa atu ne te faitaulaga i a ia ko se 'ma. 28Kae kafai te koga 'paku tena e tumau eiloa kae e se gasolo o lasi, kae e lanu 'mama foki, ko tena uiga seai se manu lepela i ei, ka fakailoa atu ne te faitaulaga i a ia e 'ma, me i te mea tela se 'pulaga fua o te koga ne paku.
29Kafai se tagata io me se fafine e isi se matakili i tena ulu io me ko tena kauvae, 30ka iloilo a ia ne te faitaulaga. Kafai te matakili ko poko atu i te pakili, mo fulu i ei ko lanu sega, kae ko vikiviki foki, ko tena uiga e isi te manu lepela i ei, ka fakailoa atu ne te faitaulaga te tino tena ko se 'ma. 31Kafai ne iloilo a ia ne te faitaulaga kae matea atu i te matakili e se poko atu i te pakili, kae e pela e seki ai foki eiloa ne fulu olaola i ei, e tau o 'vae keatea a ia i aso e fitu. 32I te fitu o aso ka toe iloilo a te tino tena ne te faitaulaga, kae kafai e seki solo eiloa a te matakili tena, kae ko se lanu segasega foki a fulu i ei, kae pela e se poko atu foki i te pakili, 33e tau mo te tino o vele a tafatafa o te matakili. Tena, ka toe 'vae keatea atu ei a ia i aso e toe fitu. 34I te fitu o aso ka toe iloilo ne te faitaulaga a te matakili. Kafai e se gasolo o lasi, kae e se poko atu foki i te pakili, ka fakailoa ne te faitaulaga a ia e 'ma. Ka 'ta ne te tino a ona gatu, tena ko 'ma ei a ia. 35Kae kafai ne gasolo o lasi a te matakili ka ko oti ne fakailoa atu a ia e 'ma, 36e tau o toe vau te faitaulaga o iloilo a ia. Kafai ne gasolo eiloa o lasi a te matakili, e se tau mo te faitaulaga o onoono ki fulu me e sega me ikai; me i te tino tena ko se 'ma eiloa. 37Kae kafai ko faka'tau atu a te faitaulaga i te matakili e seki gasolo o lasi, ka ko fulu fou ko ola aka i ei, ko tena uiga ko mafu te matakili, tela la, ka fakailoa atu ne te faitaulaga a te tino tena e 'ma faeloa.
38Kafai se tagata me se fafine e isi ne tane kena i tena pakili, 39e tau ke iloilo ne te faitaulaga. Kafai e tai kefukefu a tane kona, ko tena uiga, ne mea fua ne sae aka i te pakili; tela la, a te tino e 'ma faeloa.
40-41Kafai se tagata ne ma'lili ona laulu i te feitu ki mua o tena ulu,e se fai pela a ia ko se 'ma. 42Kae kafai e isi se matakili kulakula kae kena e sae ake i te koga tena, ko tena uiga se lepela. 43Ka iloilo a ia ne te faitaulaga, kae kafai e isi se matakili kulakula kae kena, 44ka taku a ia ne te faitaulaga e se 'ma e pogai mai i te lepela i tena ulu.
45A te tino e maua ne te lepela e tau o pei ki gatu masaesae, a tena ulu ke mo a e selu, kae ufi te feitu ki lalo o ona mata, kae kalaga penei, “Se 'ma! Se 'ma!” 46A ia e se 'ma eiloa i aso e nofo ei a te masaki tena i a ia, kae e tau a ia o nofo i tua o te fa'kai, keatea mai tino.
Ko Tulafono e Uiga ki te Ila Lepela
47Kafai e isi ne ila lepela#13.47: Ila lepela: taelago. Te pati faka-Epelu ki te “ila lepela” mo te “taelago” e pau ko te pati lepela. i luga i otou gatu, me ne gatu vulu io me ne gatu lino, 48io me i luga i se potu laugatu vulu io me se laugatu lino, io me i luga i se pakili manu, io me se mea ne faite ki pakili manu; 49kafai e lanu kula io me lanu usi, ko tena uiga se ila lepela e solo i ei, kae tau o fakaasi atu ki te faitaulaga. 50Ko iloilo ne te faitaulaga a te mea tena, ko tuku fakaatea ei ne ia i aso e fitu. 51I te fitu o aso, ka toe iloilo ne te faitaulaga a te mea tena, kae kafai ne 'solo te ila lepela i te laugatu, ko tena uiga ko se 'ma a te laugatu tena. 52Ka sunu ne te faitaulaga a te laugatu tena, me i te mea tena se ila lepela e solo i ei, kae tau o sunu.
53Kae kafai ne matea ne te faitaulaga me e seki solo i luga i te laugatu, 54ka fakatonu atu a ia ke 'ta te laugatu kae ke tuku aka pela i aso e fitu. 55Ka toe iloilo ne te faitaulaga a te laugatu tena, kae kafai e seki mafuli eiloa a te lanu o te ila lepela kae e ui eiloa e seki gasolo o lasi, e tumau eiloa te se 'ma; tela la, e tau o sunu te laugatu tena, tiga eiloa me pala i te feitu ki mua io me ko te feitu ki tua. 56Kae kafai ko matea atu ne te faitaulaga me ko gasolo o matafi a te ila lepela, e tau o sae keatea ne ia mai te laugatu io me ko te gatu pakili manu. 57Kae kafai ko toe sae aka a te ila lepela tenei, ka ko solo foki, tela la, e tau mo te tino e a ia te laugatu o sunu te laugatu tena. 58Kafai ne ta ne ia a te laugatu, kae ko matafi a te ila lepela, e tau o toe ta ne ia ko 'ma ei.
59Tena te tulafono e uiga ki ila lepela i luga i gatu; me ne laugatu vulu, me ne laugatu lino, io me ne gatu e faite ki pakili manu.
Currently Selected:
LEVITIKO 13: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific