LEVITIKO 20
20
Ko Ikuga o te se Fakalogo
1Ne faipati mai te Aliki ki a Mose 2ke fai atu ki tino Isalaelu penei, “So se tino i a koutou, io me se tino fakaalofa e nofo tasi koutou e tuku atu sena tamaliki ke fai mo taulaga ki te atua ko Moloka, e tau o peipei ki fatu ke mate ne te fenua katoa. 3Kafai se tino ne tuku atu sena tamaliki ki a Moloka, kae ko fakalailai ne ia toku Faleie tapu, kae fakamasiasi foki ne ia toku igoa tapu; ko au ka kaitaua ki a ia kae se toe taku ne au se tino o toku fenua. 4Kafai se saga te fenua ki tena mea ne fai, kae se fakasala ne latou ki te mate, 5ko tena uiga ko au ka kaitaua ki te tagata tena mo tena kaiga katoa, pela foki ki tino katoa kola e kau ki a ia, kola e se fakamaoni mai ki a au, kae tapuaki atu ki a Moloka. Ka se toe taku ne au a latou ne tino o toku fenua.
6“So se tino e fano o sala fesoasoani ki tino fakataulaitu, ka se toe taku ne au a ia se tino o toku fenua. 7Tausi otou foitino ke 'malu, me i a au ko te Aliki te otou Atua. 8Faka'logo ki aku tulafono, me i a au ko te Aliki, kae ko au e fai ne au koutou ke 'malu.”
9 #
Eso 21.17; Mata 15.4; Male 7.10 Konei a fakatonuga ne tuku mai ne te Aliki. So se tino e muna masei ki tena tamana io me ko tena matua e tau o tamate; ko tena 'se eiloa e mate ei a ia.
10 #
Eso 20.14; Levi 18.20; Teu 5.18 So se tagata Isalaelu e moe mo te avaga a te sua tino Isalaelu ka tamate, fakatasi mo te fafine tena ne moe mo ia. 11#Levi 18.8; Teu 22.30; 27.20 So se tagata e moe mo se fafine i avaga a tena tamana, e fakamasiasi ne ia tena tamana, tela la, e tau a ia mo te fafine ne moe mo ia o ta ke mate. Ko te 'se eiloa o laua tena ko mate ei laua. 12#Levi 18.15 Kafai se tagata e moe mo te avaga a tena tama tagata, e tau o tamate fakatasi te tagata tena mo te fafine ne moe laua. Ko oti ne agasala laua i te mataifale, tela la, ko te 'se eiloa o laua tena ko mate ei laua. 13#Levi 18.22 Kafai se tagata e moe mo te sua tagata, e tau laua o tamate me ko oti ne fai ne laua se mea tafasili i te matagā, ko te 'se eiloa o laua ne tamate ei laua. 14#Levi 18.17; Teu 27.23 Kafai se tagata e avaga ki te fafine mo te matua o te fafine tena, a te tokotolu kona e sunu katoa ke mate e tusa mo te matagā o te lotou mea ne fai; e tapu eiloa se vaega mea pena e fai ne koutou. 15#Eso 22.19; Levi 18.23; Teu 27.21 Kafai se tagata e moe mo se manu, ka tamate te tagata tena fakatasi mo te manu. 16Kafai se fafine e taumafai o moe mo se manu, a te fafine tena mo te manu e tamate katoa. Ko te 'se eiloa o laua ko ala ei o tamate laua.
17 #
Levi 18.9; Teu 27.22 Kafai se tagata e avaga ki tena tuagaene io me se afā tuagaene o ia, e tau o fakamasiasi i mata o tino ko afuli ei keatea mai te fenua. Ko oti a ia ne moe mo tena tuagaene, tela la, e tau eiloa o fakasala. 18#Levi 18.19 Kafai se tagata e moe mo se fafine e maua i te masaki fafine, e tau te tokolua kona ke afuli keatea mai te fenua, me ko oti ne ofa ne laua a fakatonuga e uiga ki te olaga 'ma faka te lotu.
19 #
Levi 18.12-14
Kafai se tagata e moe mo te tuagaene o tena tamana, io me ko te taina o tena matua, ka fakasala laua ki te sala o te agasala ko te mataifale. 20Kafai se tagata e moe mo te avaga a te taina o tena tamana io me ko te avaga a te tuagaene o tena matua, e fakamasiasi ne ia te taina o tena tamana io me ko te tuagaene o tena matua, tela la, e tau o fakasala a ia mo te fafine tena ne moe laua; ka seai ne tamaliki e maua ne laua. 21#Levi 18.16 Kafai se tagata e avaga ki te avaga a tena taina, ka mate laua seai eiloa ne la tamaliki. Ko oti ne fai ne ia se mea lailai i feitu fakatapuakiga kae fakamasiasi foki ne ia tena taina.
22Muna a te Aliki, “Tausi aku tulafono mo fakatonuga katoa, ko te mea ke se teke atu ki a koutou a te fenua o Kanana, tenei e aumai ne au koutou ki ei. 23Sa tau'tali ki tu a tino e nofo i kona. Tenei ko afuli ne au a tino fapaupau e nofo i kona ko te mea ke ulu atu koutou ki te fenua tena. Ko oko eiloa i toku se fiafia i faifaiga masei a latou. 24Ko oti ne tauto atu au ke tuku atu te fenua maumea kae laukele ola tenei ke fai mo otou tofi, tenei la ka tuku atu ne au. Au ko te Aliki te otou Atua, kae ne fakakese ne au koutou mai nisi malo. 25Tela la, e tau o fakakese ne koutou a manu vae fa mo manu eva kola e 'ma, mai manu vae fa mo manu eva kola e lailai. Sa kai ki manu vae fa mo manu eva kola e lailai, me ko oti ne fakailoa atu ne au me e lailai; kafai e kai koutou ki ei, ko koutou ka lailai. 26E tau mo koutou o faka'malu otou foitino, kae tavini mai ki a au tokotasi, me i a au ko te Aliki 'malu. Ko oti ne fakakese ne au koutou mai nisi malo ko te mea ke fai au mo Atua o koutou, kae seai aka foki.
27“So se tagata me se fafine e talo ki agaga o tino mate e tau o peipei ki fatu ke mate; so se tino e fai ne ia se mea pena, e salasala eiloa a ia ki tena mate.”
Currently Selected:
LEVITIKO 20: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific