LEVITIKO 4
4
Ko Taulaga mō te Fakamagaloga o Agasala e Seki fai mo te Loto
1Ne fakatonu atu a te Aliki ki a Mose, 2ke fakailoa atu ki tino Isalaelu me i so se tino e ofa ne ia se fakatonuga a te Aliki, kae se ko tena loto eiloa ke ofa ne ia, e 'tau mo ia o tautali i tulafono konei.
3Kafai ko te Faitaulaga Pule ne ofa tulafono, tela ko agasala foki ei a tino e auala i a ia, e tau la mo ia o ofo atu ki te Aliki se tamā pulumakau e seai sena pona, mo te fakamagaloga o ana agasala. 4E 'tau o aumai ne ia te pulumakau ki te mataloa o te Faleie o te Aliki, tuku tena lima ki te ulu o te pulumakau, ko tamate ei i kona i mua o te Aliki. 5Ka oti ko puke ei ne ia ne mu toto o ave ki loto i te Faleie o te Aliki. 6Ka ufi ne ia tena matikao ki loto i te toto, ko apiapi atu ei ki mua o te pui laugatu malu, e fakafitu taimi. 7Ka oti ko tuku atu foki ei ne ia ne mu toto ki nifo kola i kaokao e fa o te fata-fai-taulaga tela e sunu ei mea manogi i loto i te Faleie o te Aliki. Ka oti ko ligi ei ne ia te toega o te toto ki te feitu ki lalo o te fata-fai-taulaga tela e sunu ei a taulaga manu, tela e tu i te mataloa o te Faleie o te Aliki. 8E tau o puke ne ia a te gako katoa o te pulumakau tena, e pela foki mo te gako i loto i ona totoga, 9mo ana nonu mo gako e piki i ei, mo te feitu taua ei o te ate. 10Ka puke te faitaulaga ki te gako tenei, ko sunu ei ne ia i luga i te fata-fai-taulaga tela e sunu sāle ei a saito, e pela eiloa mo tena faiga ki gako o te manu tela ne tamate mo taulaga fakafetai. 11Kae e tau mo ia o puke te pakili o te pulumakau, ana kano katoa, tena ulu, ana vae mo ana totoga katoa fakatasi mo tena gakau, 12o ave ki tua o te fa'kai ki te koga 'ma i faiga o tapuakiga, te koga e ligi sale ki ei a lefu, ko sunu ei ne ia i kona ki fafie.
13Kafai ko te fenua o Isalaelu ne agasala me ko ofa ne latou se fakatonuga a te Aliki, kae se ko te lotou loto o fai te agasala, 14ko te taimi foki tena e tau ei o aumai ne latou se tamā pulumakau mo fai te taulaga a latou mo te fakamagaloga o olotou agasala. E tau o aumai ne latou te pulumakau ki te Faleie o te Aliki; 15ka ko takitaki katoa o te fenua e tau o tuku olotou lima ki te ulu o te manu, ko tamate ei i te koga tena. 16E tau mo te Faitaulaga Pule o ave ne mu toto o te pulumakau ki loto i te Faleie o te Aliki, 17ufi ona lima ki loto kae apiapi atu ki mua o te pui laugatu, e fakafitu taimi. 18Ka oti, ko tuku atu foki ne ia ne mu toto ki nifo kola e fa o te fata-fai-taulaga tela e sunu ei a taulaga manogi, tela e tu i loto i te Faleie o te Aliki. A te toega o te toto e tau o ligi ne ia ki te feitu ki lalo o te fata-fai-taulaga tela e sunu ei a taulaga manu kae tu i te mataloa o te Faleie o te Aliki. 19Ka oti ko sunu ei ne ia a gako katoa o te pulumakau i luga i te fata-fai-taulaga. 20A te faiga e tau o fai ne te faitaulaga ki te pulumakau tenei, e pela eiloa mo te faiga o te pulumakau tela e ofo atu mo te fakamagaloga o agasala. Tena la, ko te faiga tena e ofo atu ei ne ia mo te fakamagaloga o agasala a te fenua, ko magalo ei a olotou agasala. 21Ka oti ko ave ei ne ia te pulumakau o sunu i tua o te fa'kai, e pela eiloa mo te sunuga ne ia a te pulumakau tela ne ofo atu mo te fakamagaloga o ana agasala. A te mea tena ko te taulaga mo te fakamagaloga o agasala a te fenua.
22Kafai se takitaki ne agasala me ko ofa ne ia se tulafono i tulafono a te Aliki, kae se ko tena loto ke ofa ne ia, 23e tau mo ia o aumai se kouti tagata kae seai sena pona mo fai tena taulaga, i te taimi eiloa tela ko iloa ei ne ia i a ia ko oti ne agasala. 24Ka tuku tena lima ki te ulu o te kouti, ko tamate ei i te feitu ki matu o te fata-fai-taulaga, te koga tela e ta sale ei a manu mo fai taulaga sunu. A te mea tena, se taulaga mo te fakamagaloga o agasala. 25A te faitaulaga ka ufi ona lima ki loto i te toto o te manu, o nani atu ki nifo i tulimanu o te fata-fai-taulaga. A te toega o te toto ke ligi ki te feitu ki lalo o te fata-fai-taulaga. 26Ka oti ko sunu ei ne ia a gako katoa o te kouti i luga i te fata-fai-taulaga, e pela eiloa mo te sunuga ne ia a gako o manu kola ne ta mo fai taulaga fakafetai. E fai pena te taulaga e ofo atu ne te faitaulaga mo te fakamagaloga o agasala a te takitaki, tena ko magalo ei a ia.
27 #
Nume 15.27,28 Kafai se tino tokotasi mai te vaitino ne ofa ne ia se tulafono a te Aliki, kae e se ko tena loto ke ofa ne ia, 28e tau o aumai ne ia se kouti fafine kae seai sena pona mo fai tena taulaga; i te taimi eiloa tela ko iloa ei ne ia i a ia ko oti ne agasala. 29Ka tuku tena lima ki te ulu o te kouti, ko tamate ei, i te feitu ki matu o te fata-fai-taulaga, te koga tela e ta sale ei a manu mo fai taulaga sunu. 30A te faitaulaga ka ufi ona lima ki loto i te toto o te manu, o nani atu ki nifo i tulimanu o te fata-fai-taulaga. A te toega o te toto ke ligi ki te feitu ki lalo o te fata-fai-taulaga. 31Ka oti ko tapale ei ne ia a gako katoa o te kouti, e pela eiloa mo manu kola e tamate mo fai taulaga fakafetai. Ka sunu ne ia a te gako o te kouti i luga i te fata-fai-taulaga, ko te manogi e fiafia ki ei te Aliki. E pena te taulaga e ofo atu ne te faitaulaga mo te fakamagaloga o agasala a te tagata tena, tena ko magalo ei a ia.
32Kafai e aumai ne se tagata se mamoe mo fai tena taulaga mo te fakamagaloga o agasala, e tau se mamoe fafine kae seai sena pona. 33E tau o tuku tena lima ki te ulu o te mamoe, ko tamate ei i te feitu ki matu o te fata-fai-taulaga, te koga tela e ta sale ei a manu mo taulaga sunu. 34A te faitaulaga ka ufi ona lima ki loto i te toto o te manu, o nani atu ki nifo i tulimanu o te fata-fai-taulaga. A te toega o te toto ke ligi ki te feitu ki lalo o te fata-fai-taulaga. 35Ka oti ko tapale ei ne ia a gako katoa o te mamoe, e pela mo gako e tapale keatea mai mamoe kola e ta mo fai taulaga fakafetai. Ka oti, ko sunu ei ne ia a gako o te mamoe tena i luga i te fata-fai-taulaga, fakatasi mo taulaga meakai kola ne ofo atu ki te Aliki. E pena te taulaga e ofo atu ki te Aliki mo te fakamagaloga o agasala a te tagata tena, tena ko magalo ei a ia.
Currently Selected:
LEVITIKO 4: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific