Luka 24

Yesu Ɔ́ta Ɔ́lɛ Kekpine

1Na Kwasida ɔtanta tutuutu ni, beleku bammɔ bésie kaƒiɔtɔ kɔtu na bada ala ani ƒui na báklibi bése. 2Mmɔ ni, bánu ka kaƒiɔtɔ kammɔ kenye kewi na lɛtabi bonwu lɛni na béti bákalɛ mmɔ lɛlɛ kɔmadɔ. 3Anwuɔsu béduo bésie kaƒiɔtɔ kammɔ kemmo, nsu bátanu Blɔti Yesu ukpine ɔmmɔ. 4Ɔmɛni ɔ́bla-ma dɛye dɛye. Na kɔnakunwi ni, nkyuli inyɔ badi báda bálɛ-ma lɛlɔ. Na bakya lɛwu lɛni muukeye na lɛɛtu anumi. 5Liƒu lɛ́da-ma geen ɔni na béboku lɛlɔ kalɔ béte bekyuli bammɔ. Na bekyuli bammɔ béye-ma banini, “Bi ɔsu na bɛɛwia ukyuli ɔni nli ngba na bekpine akɔ? 6Uuubo mɛni. Katɔti ɔ́gyila-nwu! Binyimo lɛla lɛni na ɔ́su-mii uwi ɔni na ɔkya Galilea ɔnii 7ɔlɛka bekyuli beti Ukyuli Ɔyawine Ubi bakya bekyuli bekpidi enu kemmo. Na bakana-nwu bamana ugyii lɛlɔ. Na emeyi atɛ kama ni, ɔdubɔsɔ ɔta ɔlɛ bekpine akɔ.” 8Mmɔ ni, beleku bammɔ bényimo nwuna etemila ammɔ.

9Na básɔ bénwini bási kaƒiɔtɔ kammɔ kudɔ na bátásu batalane leevu-unwi bammɔ ku bakladi ƒui lɛnɔ ala amɛni. 10Beleku bammɔ ndi Maria Magdalene ku Yohana ku Maria ɔni ndi Yakobo uni. Ama ku beleku babambadi násu batalane bammɔ ala amɛni. 11Nsu batalane bammɔ bákali banii ala ani na beleku bammɔ básu-ma adi kɔdɔlɔ etemila. Na bátaƒɔ bátadi. 12Nsu Petro ɔ́ta na úkeli úsie kaƒiɔtɔ kudɔ mmɔ. Na ka úbo kalɔ ɔ́nu kaƒiɔtɔ kammɔ kemmo ni, ɔ́nu ukpine kɔvadi, nsu ɔ́sɔ útanu lɛla lɛdi. Na ɔ́sɔ únwini ɔni na ɔ́bla-nwu dɛye dɛye na ala ani nálɛ ɔ́su.

Badi Bánu Yesu Na Emaus Ulu Lɛlɔ

13Na limeyi lɛmmɔ kani lɛlɔ ni, Yesu basiakune inyɔ badi bakɛ ulu bésela lɛkpaklɔ lɛdi baalɔ banii Emaus kemmo. Na ɔdubɔbla aani eluku maatɛ ɔ́si mmɔ útédu Yerusalem. 14Na bakya baatɛmiku lɛlɔ na ala ani ƒui nálɛ lɛlɔ. 15Ka bakɛ baatɛmi na béduo atɛ amɛni kemmo ni, Yesu ɔlati úsie útásiaku-ma na anwu ku-ma bakɛ. 16Bánu-nwu, nsu bátati banii anwu na ɔdi.

17Amu na Yesu úye-ma ɔnini, “Bi na bɛkɛ bɛɛsu na ulu na kɔnyana kúƒie-mii lɛni?”

Mmɔ na bédi bénye, na bana anumi aatina ka bana lɛlɔ lɛ́ɛkywi kaƒɔ. 18Na bana akɔ unwi ɔni baalɔ banii Kleopa úye Yesu ɔnini, “Awɔ lɛti pɛ ndi ɔƒɔ na Yerusalem na átati ala ani nátaalɛ mmɔ emeyi klukui amɛni kemmo yoo?”

19Amu na Yesu úye-ma ɔnini, “Bi ala?”

Na bédie kenye banii, “Ala ani nálɛku Yesu Nasareni. Ukyuli ɔmɛni ɔdi Katɔti kenye udiene ɔni na Katɔti ku bekyuli ƒui bánu ka ubo ɔyikun geen na nwuna ablala ku ala ani na ɔ́su ƒui kemmo. 20Yudaƒuɔ Katɔti bakpane benengu ku bula lɛlɔ badine béti-nwu bákya Roma aban unengu enu kemmo na ɔ́du-nwu kukpi kɔtɔ na bákana-nwu bámana ugyii lɛlɔ. 21Nsu abu bɔ́kya bútaasia anu bɔnii anwu ndi ukyuli ɔni ndubɔƒɔ Israel bekyuli ƒui. Na ɔmmɔ kama ni, ɔmwi ndi limeyi lɛtɛdi ka ala amɛni álɛ. 22Bula lɛkpa lɛmɛni akɔ beleku badi báya na bula kayi kábla kalɛ kadi. Ɔsika bésie nwuna kaƒiɔtɔ kammɔ kudɔ ɔtanta tutuutu ɔmɛni. 23Nsu bátatánu ukpine ɔmmɔ. Na bénwini bábasu-bu banii Katɔti batu badi bédie lɛlɔ bátina-ma. Na básu-ma banii Yesu uli ngba. 24Bula badi akɔ badi bésie kaƒiɔtɔ kudɔ mmɔ na bátánu kalɛ na beleku bammɔ básu pɛpɛɛpɛ, nsu bátanu-nwu.”

25Amu na Yesu ɔ́su-ma ɔnini, “Bɛ́dɔlɔ! Na bina bɔƒɔtaadi na ala ani na Katɔti kenye bediene básu-mii lɛlɔ bɔba! 26Bɛɛɛgyi bɛnii ɔlɛka Ukyuli Ɔƒunadi ɔmmɔ ubo abi amɛni udu asa na uduo nwuna lɛga bɔdi bukeye kemmo?” 27Na Yesu údie ala ammɔ kalɔ úte-ma ɔ́si ala ani na bénweni bákya Bunweni Kedee Ɔku kemmo ɔ́si Mose ɔku ku ala ani ƒui na Katɔti kenye bediene bénweni ɔkɛnku anwu Yesu ɔmmɔ lɛlɔ.

28Ka badaku lɛkpaklɔ lɛmmɔ budu ni, Yesu ɔ́bla aani si ɔ́vi úsela anumi. 29Nsu bábala-nwu básu banini, “Kadi káasa ɔsu ni, sɔ kya-bu kudɔ mɛni.” Anwuɔsu úsie útéduo-ma kudɔ mmɔ.

30Úlie kalɔ ɔnii ɔɔdiku-ma. Na úti bodobodo na ɔ́gya Katɔti enu, na ɔ́bwɛ-nwu kemmo na úti úte-ma. 31Mmɔ na bana anumi ébimi na bánu-nwu báti. Nsu ɔ́yii-ma anumi. 32Amu na básu lɛlɔ banii, “Uwi ɔni na ɔkya ɔɔtɛmiku-bu na uudie Bunweni Kedee Ɔku etemila kalɔ teete-bu na ulu lɛlɔ ni, ebiti adi udu áda-bu kayi kemmo.”

33Mmɔ na báta kɔnakunwi na básɔ bénwini bésie Yerusalem. Na bátánu batalane leevu-unwi bammɔ ka básala lɛlɔ ku bekyuli bamba lɛnɔ. 34Na básu-ma banini, “Blɔti ɔ́ta ɔ́lɛ kekpine sɔsɔ, na údie lɛlɔ ɔ́tina Simon.” 35Amu na nkyuli inyɔ bammɔ lɛnɔ bédie kalɔ básu-ma ala ani nálɛ na ulu lɛlɔ ku kalɛ na bánu-nwu báti uwi ɔni na ɔ́bwɛ bodobodo ɔmmɔ úte-ma.

Yesu Údie Lɛlɔ Ɔ́tina Nwuna Batɛyane

36Ka nkyuli inyɔ bamɛni badaku bana litemi bɔsu ni, kɔnakunwi Yesu úbo úbenye-ma ntɛ. Na ɔ́su-ma ɔnini, “Keyi buɛɛ kasiaku-mii.”

37Liƒu lɛ́da-ma geen, na básu banii ukpine kɔyu na baanu. 38Nsu ɔ́su-ma ɔnini, “Liƒu litada-mii lɛni! Na bina kasusu lɛnɔ keteƒu. 39Bɛnu-mi enu ku lɛgba. Na bituku-mi na bɛnu bɛti ka ami na ɔdi. Ɔsika ukpine kɔyu kuuubo ɔlɔna ku ekubi aani kalɛ na bɛɛnu-mi ka mbo mɛni.”

40Ka ɔ́su lɛni ni, úti nwuna enu ku lɛgba ɔ́tina-ma. 41Ebiti áda-ma geen na ɔ́bla-ma kalɛ kadi ɔni na bátati kalɛ baƒɔ badi muedi! Mmɔ na Yesu úye-ma ɔnini, “Adila adi ese?” 42Amu na béti kakpaku keƒidi kadi béte-nwu. 43Na ɔ́ƒɔ-ka ɔ́kun na bana anumi.

44Amu na ɔ́su-ma ɔnini, “Ala amɛni lɛlɔ kɔtɛ geen na lɛ́tɛmiku-mii ɔni na lɛ́kya-mii kudɔ. Ala ani ƒui na bénweni na Mose ɔda bubo ɔku kemmo ku Katɔti kenye bediene ala ani bénweni ku kɔgya ɔku kemmo ni, ɔlɛka ebo-nwu kemmo lɛni.”

45Mmɔ na ɔ́lɛmi-ma kasusu kalɛ na benu Bunweni Kedee Ɔku kemmo etemila ammɔ kalɔ. 46Na ɔ́su-ma ɔnini, “Lɛni na bénweni banii Ukyuli Ɔƒunadi ɔmmɔ ɔdububo abi na ɔdubɔta ɔlɛ bekpine akɔ limeyi lɛtɛdi lɛlɔ. 47Na nwuna basiakune badubɔkɔ lɛsa na nwuna lɛnyi kemmo bete kalɔ ƒui bekyuli banii benwini kayi kalɛ na Katɔti uti bana ekpidi ɔkyiɛ-ma. Na lɛsa bɔkɔ bɔmmɔ bɔdubuse kalɔ bɔsi Yerusalem. 48Amii na ɔlɛka bidie litemi lɛmɛni kenye kesii biala. 49Na ami ɔlati ndubuti lɛla lɛni na Katɔti ɔ́su-mii úse limene-mii. Nsu ɔlɛka binye bɛgya Katɔti ɔyikun ɔmɛni na Yerusalem wetédu uwi ɔni na ɔyikun ɔmmɔ ɔsi katɔ ubeduo-mii lɛlɔ kemmo.”

Katɔti Úti Yesu Úsienku Katɔ

50Amu na ɔ́tɔnku-ma na bálɛ Yerusalem ɔma kemmo bésie Betania. Mmɔ na ɔ́kɔliku nwuna enu katɔ na úte-ma kusɛ kusɛ. 51Na uwi ɔni kani na uute-ma kusɛ kusɛ mɛni ni, ɔ́tɔlɔ-ma kudɔ na Katɔti úti-nwu úsienku katɔ. 52Amu na bémwi-nwu na bénwini bésie Yerusalem ku ebiti sɔɔn. 53Na beesié Katɔti kakpakɔ busie busie taatágya Katɔti enu uwi biala.

Currently Selected:

Luka 24: lef

Highlight

Copy