Luka 9
9
Yesu Ɔ́tala Nwuna Batɛyane Leevu-inyɔ Bammɔ
1Ɔmmɔ kama ni, Yesu ɔ́lɔ nwuna batɛyane leevu-inyɔ bammɔ ɔ́sala na úte-ma kuƒi ku ɔyikun ɔni na beti bagya ayu ekpidi ƒui na babwi lɛlɛ lidu lɛnɔ. 2Amu na ɔ́tala-ma ɔnii beteesie na batásu Katɔti lɛga kadikɔ etemila bete bekyuli na babwi balɛne. 3Asa na badubɔgyu ni, Yesu ɔ́su-ma ɔnini, “Biteti lɛla lɛdi bitada na bina ulu busie kemmo aani ugyii ɔdadi iye ala bevelene koƒo iye adila iye egulabi. Na awu ɔbambadi muedi ni, bitasu bɛnii biiti ɔdi. 4Kesii biala na báƒɔ-mii ni, bɛsɔ bɛkya kaduli kammɔ kemmo utédu uwi ɔni na ɔlɛka bɛtɔlɔ ɔma ɔmmɔ kemmo. 5Na kesii kani na bátaƒɔ-mii ni, bɛtɔlɔ ɔma ɔmmɔ kemmo na biveli bina lɛgba kalɔ ɔtumu muedi biwi ɔma ɔmmɔ kemmo aani Katɔti kɔtu bɔni kati bute.” 6Amu na batɛyane bammɔ bátɔlɔ na bátávi akpaklɔ ani ƒui kemmo na baasu Katɔti litemi buni na baabwi balɛne lɛnɔ.
Herode Kasusu Kékpoku-nwu Na Yesu Lɛlɔ
7Ka Herode ɔni mɔɔdi Galilea lɛlɔ únu ala ani ƒui mɔɔlɛ́ mɛni ni, úbeƒu ɔsika bekyuli badi baasu ka Ntu Ɔkpilane Yohane násɔ ɔ́ta úbo uli ngba. 8Na babambadi lɛnɔ baasu banii Elia násɔ únwini úbo. Na badi lɛnɔ banii Katɔti kenye bediene bakukudi bammɔ akɔ unwi násɔ úbo uli ngba. 9Amu na Herode ɔ́su ɔnini, “Lɛ́ya na békulo Yohane lili, na ɔma na ɔdi nsɔ nkɛ mɔɔbla ala amɛni na muunú-nwu kɔku?” Anwuɔsu Herode ɔkya ɔɔwia ulu ɔni na ɔsia na ɔnu Yesu.
Yesu Úte Banana Mpim Ɛlɔ Adila Na Bádi Bémo
10Batɛyane bammɔ bénwini bébo na bábasu Yesu ala ani ƒui na bábla. Amu na útiku-ma na bátɔlɔ bésie ɔma ɔni baalɔ banii Betsaida kakɛ. 11Ka bekyuli pii bénu lɛni ni, básia-nwu kama bésie mmɔ. Yesu lɛnɔ ɔ́ƒɔ-ma na ɔ́tɛmi úte-ma ɔ́si Katɔti lɛga kadikɔ ala lɛlɔ, na ɔ́bwi bani na ɔlɛ ɔda.
12Lebo lɛni na ɔƒɛ úsela bɔnu ni, Batɛyane leevu-inyɔ bammɔ bébo Yesu kudɔ na básu-nwu banini, “Ya na bekyuli bamɛni batɔlɔ na beteesie akpaklɔ ani nde amadɔ mɛni kemmo, kalɛ na bakɛ adila ku keduokɔ, ɔsika mɛni ɔdi ketele ntɛ.”
13Amu na Yesu ɔ́su-ma ɔnini, “Amii alati bite-ma lɛla lɛdi na badi.”
Mmɔ na básu-nwu banii, “Adila ani ƒui na bɔda mɛni ndi bodobodo ɛlɔ ku kɔbɛ inyɔ. Aawia ka busie butéye adila bute bekyuli pii bamɛni?” 14Na banana bammɔ babla mpim ɛlɔ na mmɔ.
Amu na Yesu ɔ́su nwuna batɛyane ɔnini, “Bɛya na bekyuli bammɔ belie esu esu aani nkyuli liti liti.” 15Na ka batɛyane bábla lɛni ni, 16Yesu úti bodobodo ɛlɔ ku kɔbɛ inyɔ bɔmmɔ na ɔ́kɔliku anumi ɔ́nu katɔ. Amu na ɔ́gya Katɔti enu úte-ma, na ɔ́bwɛ-nwu kɔkɛ kɔkɛ na úti úte nwuna batɛyane ɔnii beti bele bete bekyuli bammɔ. 17Na bana ƒui bádi bémo na batɛyane bammɔ básala kɔkɛ wɛlɛ wɛlɛ kɔni nébu na kúyi kɔgyigyɛ leevu-inyɔ.
Petro Ɔ́su Ka Yesu Ndi Ukyuli Ɔƒunadi Ɔmmɔ
18Ka Yesu lɛti ɔkya ɔɔkpali katɔ limeyi lɛdi ni, nwuna batɛyane bébo-nwu kudɔ. Amu na úye-ma ɔnini, “Ɔma na bekyuli baasu banii anwu na ndi?”
19Amu na bédie kenye banii, “Badi baasu banii awɔ ndi Ntu Ɔkpilane Yohane. Na badi lɛnɔ banii awɔ ndi Elia. Na badi lɛnɔ baasu taatina banii Katɔti kenye bediene bakukudi bammɔ akɔ unwi násɔ únwini úbo uli ngba.”
20Amu na úye-ma ɔnini, “Na amii nɔɔ? Ɔma na bɛɛsu ka anwu na ndi?”
Mmɔ na Petro údie kenye ɔnii, “Awɔ ndi Katɔti Ukyuli Ɔƒunadi ɔmmɔ.”
Yesu Ɔ́tɛmi Ɔ́siku Nwuna Kukpi Ku Bɔsɔ Taata Lɛlɔ
21Amu na Yesu úbo-ma ɔda kpakplaa ɔnii batasu ukyuli ɔdi kenye kamɛni. 22Yesu ɔ́sɔ ɔ́su-ma ɔnii, “Ɔlɛka ami, Ukyuli Ɔyawine Ubi, libo abi geen na kadi benengu ku bakpane benengu ku ɔda bubo ala batinane enu kemmo na beni-mi, na badu-mi. Nsu na emeyi atɛ kama ni, Katɔti ɔdubɔgyila-mi ɔlɛku bekpine akɔ mbelie ngba.”
23Amu na ɔ́su-ma ɔnii, “Si ukyuli ɔdi ɔɔwia ka ɔsiaku-mi ni, ɔlɛka udie lɛlɔ atu na ubo abi limeyi ndi limeyi na ɔsiaku-mi kama. 24Ɔsika ukyuli biala ɔni mɔɔwia ka ɔƒɔ nwuna lili ngba ute lɛlɔ ni, ɔdubɔyila-mu. Na ukyuli biala ɔni nányonu nwuna ngba ka ɔsiaku-mi ɔsu ni, ɔdubɔkɛ ngba geen. 25Bi kɔsia na ukyuli ɔdubɔkɛ si ɔ́kɛ kayawi ala ƒui na ɔ́yila ngba geen bɔmmɔ? 26Si ami ku mina ala ani mɔɔtina ƒui ékpo ukyuli ɔdi kɔƒa ni, anwu lɛnɔ ɔdubukpo ami Ukyuli Ɔyawine Ubi kɔƒa uwi ɔni na mebo na mina bukeye ku Katɔti ku nwuna batu kedee ƒui bukeye kemmo. 27Mɔɔsu-mii geen nnii bina akɔ badi na mɛni ni, belekpi wetédu uwi ɔni na Katɔti wedie nwuna lɛga bɔdi ɔyikun keyi na limeyi likplodi lɛmmɔ lɛlɔ.”
Yesu Udu Bɔ́vumana Na Kɔbi Lili
28Ɔ́bla aani Kwasida unwi ɔni na Yesu ɔ́su ala amɛni kama ni, útiku Petro ku Yohane ku Yakobo na bákɔ bésie kɔbi lili batákpali katɔ. 29Ka ɔdaku katɔ bɔkpali ni, nwuna anumi bɔnu bɔ́vumana na nwuna adala eekeye na aatu anumi. 30Na kɔnakunwi ni, banana inyɔ badi bébenye-nwu kudɔ bani ndi Mose ku Elia na baatɛmi. 31Báda bálɛ na Katɔ Ɔga Ɔma bukeye kemmo na bátɛmi ku Yesu na ulu ɔni lɛlɔ na ɔdubɔsia na ɔwɔlɔ lɛla lɛni na Katɔti ɔɔwia na nwuna kukpi na Yerusalem kemmo. 32Petro ku nwuna bakpana béduo lɛlɛɛ kemmo geen, nsu bágyinya bábanu lɛlɔyɔ bukeye bɔni kemmo na Yesu ɔkya ku nkyuli inyɔ bani nnye-nwu kudɔ. 33Ka bekyuli bammɔ baagyú ni, Petro ɔ́su Yesu ɔnini, “Ati, bula mɛni bubo bɔdia geen! Ya bɔtu nvo ɛtɛ na mɛni. Kenwi kadi ƒula kadi, kenwi kadi Mose kadi, na kenwi kadi Elia lɛnɔ kadi.” Na ala ani na ɔɔsu mɛni ƒui ni, tati tati kemmo na ɔ́su-nya.
34Lebo lɛni na ɔmu unye ɔɔtɛmi ni, ɔdi ɔ́yu úbewi-ma lɛlɔ. Na batɛyane bammɔ báyia uwi ɔni na ɔmɛni ɔ́da ɔ́lɛ-ma lɛlɔ. 35Amu na bénu Katɔti lɛdi na ɔmmɔ kemmo ka lɛɛsu lɛnini, “Ɔmɛni ndi mina Ubi Ɔƒunadi. Binu-nwu litemi!” 36Amu ka lɛdi lɛmmɔ lɛ́da bɔtɛmi lɛ́ya ni, bánu ka Yesu lɛti nébu unye. Amu na batɛyane bammɔ béti ala ani na bánu mmɔ bábala, na bátasu-nya ukyuli ɔdi uwi ɔmmɔ.
Yesu Ɔ́gya Kɔyu Kukpidi Ɔ́lɛku Ɔnanabi Ɔdi Lɛlɔ Kemmo
37Ka kadi kégye ni, Yesu ku nwuna batɛyane ɛtɛ bammɔ bási báyu kɔbi kɔmmɔ lɛlɔ. Na bábasiaku bekyuli pii badi. 38Mmɔ na ɔnana ɔdi ɔ́va momoomo ɔ́su ɔnini, “Ala ɔtinane! Buvele nda-a, nu mina ubi! Anwu kani ndi-mi ubi! 39Kɔyu kukpidi kɔdi kuukpóku-nwu na kɔɔyá na ɔɔva momoomo kɔnakunwi. Ɔɔsinsi lɛlɔ na uuti lɛlɔ taaƒiɛmi kalɔ na avlɔvɔ aalɛ́-nwu kenye. Lɛni na ɔɔbla-nwu laa ɔkplu kemmo asa na kɔyu kɔmmɔ kɔɔnyonu-nwu. 40Lívele ƒula batɛyane nnii bagya kɔyu kukpidi kɔmmɔ bete-mi, nsu bátakana-ku bɔgya.”
41Amu na Yesu ɔ́su-ma ɔnini, “Amii, ɔmwi limeyi bekyuli, bi ɔsu na bilaƒɔ-mi taadi na bɛɛyu atu ɔkplu? Uwi ɛlɛ sɔɔn na ndubɔkɛku-mii kayi? Na uwi ɔmani na ndubɔda-mii ntálɛ?” Amu na ɔ́su ɔnana ɔmmɔ ɔnini, “Ti ƒ'ubidi boku mɛni.”
42Ka ɔnamu ɔmmɔ ɔ́si ɔdubo ni, anwu kani na kɔyu kɔmmɔ kúbo-nwu kɔ́va kalɔ na ɔ́sinsi. Amu na Yesu ɔ́bɔku kɔyu kukpidi kɔmmɔ na ɔ́bwi ɔnamu ɔmmɔ, na ɔ́sɔku-nwu úte ɔti. 43Katɔti ɔyikun bonwu ɔmɛni ɔ́bla bekyuli bammɔ ƒui dɛye dɛye.
Yesu Ɔ́sɔ Ɔ́tɛmi Ɔ́siku Nwuna Kukpi Lɛlɔ
Yesu ala bɔbla átakɔsi na aabla-ma dɛye dɛye uwi ɔni na Yesu ɔ́su nwuna batɛyane ɔnini, 44“Bitayiƒala lɛla lɛni na líse kalɔ ndaku-mii bɔsu! Badubo Ukyuli Ɔyawine Ubi buti bɔkya bekyuli enu kemmo.” 45Nsu batɛyane bammɔ bétenu ɔmɛni kalɔ. Ɔdi lɛla lɛni na béti bábala-ma, nsu baayia-nwu lɛla lɛdi buye bɔsiku litemi lɛmmɔ lɛlɔ.
Yesu Údie Ukyuli Ɔni Ntulo Ɔ́tina
46Unyeƒi ɔdi úbeduo batɛyane bammɔ ntɛ ɔni ndi bana akɔ ɔni náƒɔ kuye utulo lɛlɔ. 47Amu ka Yesu ɔ́ti-ma kasusu ɔsu ni, úti ɔnamu ɔdi úbenyene-ma anumi na nwuna kudɔ. 48Mmɔ na ɔ́su-ma ɔnii, “Ukyuli ɔni náƒɔ ɔnamu ɔmɛni na mina lɛnyi kemmo ni, ɔ́ƒɔ ami lɛnɔ. Na ukyuli ɔni mɔɔƒɔ́-mi ni, ɔ́ƒɔ ukyuli ɔni nátala-mi. Ɔsika ukyuli ɔni néboku lɛlɔ kalɔ ƒui na bina akɔ ni, anwu ndi ukyuli ɔni náƒɔ kuye utulo ƒui.”
Ukyuli Ɔni Neeekisi-ɔ Ni, Unye-ɔ Kama
49Amu na Yohane ɔ́su-nwu ɔnini, “Ati, bɔ́nu ka ukyuli ɔdi ɔkya ɔɔgyá ayu ekpidi na ƒula lɛnyi kemmo na bɔ́su-nwu bɔnii ɔda ɔya, ɔsika ɔɔɔdi bula akɔ unwi.”
50Amu na Yesu ɔ́su nwuna batɛyane ɔnini, “Bitabala-nwu. Ɔsika si ukyuli ɔdi útata útenye-mii lɛlɔ ni, bɛti bɛnii unye-mii kama.”
Samaria Bekyuli Badi Béni Yesu
51Amu ka uwi ɔni na ɔlɛka Katɔti uti Yesu usienku katɔ ɔdaku budu ni, ɔ́lɛ ugyii ka uteesie Yerusalem. 52Ɔ́tala batu badi ɔnii bagyu batɔ lɛkpaklɔ lɛdi kemmo na Samaria na batáklibi lɛla biala bese bete-nwu. 53Nsu ka ɔma ɔmmɔ bekyuli báti ka bɔvi na ɔ́vi úsela Yerusalem ɔsu ni, bétenu kalɔ. 54Amu na ka batɛyane bani ndi Yohane ku Yakobo bánu lɛni ni, béye Yesu banii, “Ati, aawia ka bɔkpali ogya bɔsi katɔ bubewi-ma lɛlɔ na ɔkyula-ma?” 55Mmɔ na Yesu únwini na ɔ́dɔnku-ma, na ɔ́su ɔnini, “Bilenu Kɔyu kɔni mɔɔdi-mii lɛlɔ kalɔ! Ami, Ukyuli Ɔyawine Ubi, ńtebo nnii mbakyula bekyuli, mmomu líbo nnii mbaƒɔ-ma ngba.” 56Na anwu ku batɛyane bammɔ bébo bávi bésie lɛkpaklɔ bamba.
Bekyuli Badi Báyɔ Ka Basiaku Yesu Kama
57Ka bakɛ bésela ni, ɔnana ɔdi ɔ́su Yesu ɔnini, “Ndubɔsiaku-ɔ kesii biala na ésela.”
58Amu na Yesu ɔ́su-nwu ɔnini, “Beƒiebuo bebo libu lɛni kemmo na baatɛ, na baasɛ lɛnɔ bebo ayu. Nsu Ukyuli Ɔyawine Ubi ni, anwu uuubo katɛnkɔ muedi.”
59Na Yesu ɔ́su ukyuli bamba ɔnini, “Siaku-mi.”
Nsu ukyuli ɔmmɔ ɔnini, “Ati, ya na lɛka mina ɔti busie butáva asa.”
60Amu na Yesu ɔ́su-nwu ɔnini, “Ya na ama bani neeebo Katɔti ngba geen bɔmmɔ bataava bana bekpine. Na awɔ eteesie na atásu Katɔti lɛga bɔdi litemi.”
61Ukyuli bamba lɛnɔ ɔnii, “Blɔti, masiaku-ɔ. Nsu ya-mi lɛka mina lɛlɔ bekyuli busie butákada asa.”
62Amu na Yesu ɔ́su-nwu ɔnini, “Ukyuli ɔni naaabla nwuna kabla ku kayi ƒui ni, útamanku Katɔ Ɔga Ɔma.”
Currently Selected:
Luka 9: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
