Marko 7
7
Biteni Katɔti Ka Bɛsiaku Bina Ɔdi Bɔbla Kama Ɔsu
1Ƒarisiƒuɔ ku ɔda bubo ala batinane badi bási Yerusalem bébo bábaka bámana Yesu. 2Bánu ka nwuna batɛyane belie baadi, na badi bátaƒɔ bana enu aani kalɛ na ama Ƒarisiƒuɔ baatina bekyuli ka bataaƒɔ. 3Bánu ɔmɛni báti ɔsika Ƒarisiƒuɔ ku Yudaƒuɔ babambadi ƒui baasiaku bana bati kuuku ɔdi ala bɔbla bɔni na báda bése-ma. Amu ntu báƒɔ bana enu kalɛ na bátina-ma asa badi. 4Na si béye lɛla lɛdi básiku kuye lɛnɔ ni, ɔlɛka baƒɔ bana enu asa na badi. Na baasiaku ɔda bubo pii lɛnɔ lɛni na bálɛ lili bábanu aani kalɛ na baaƒɔ lɛɛƒɛɛ ku kutubui ku ebwi.
5Anwuɔsu Ƒarisiƒuɔ ku ala batinane bammɔ béye Yesu banini, “Bi ɔsu na ƒula basiakune balásiaku bula bati kuuku ɔdi ala bɔbla kama? Na ama baadi si bátaƒɔ enu muedi!”
6Yesu údie kenye ɔnini, “Anumi lɛlɔ bekyuli bɛdi! Yesaia únweni ɔ́su ala ɔ́siku-mii lɛlɔ na úbo lɛni sɔsɔ! Ɔ́su-bu ka Katɔti ɔ́su ɔnii,
“ ‘Bekyuli bamɛni bada bana kenye kani baabu-mi,
nsu balayɔ-mi na bana kayi kemmo.
7Keeke kani na baabla-mi kabla.
Baatina kayawi lɛlɔ ala aani si mina ɔda bubo bɔdi.’
8Ɔɔtina ka bɛ́da Katɔti ɔda bubo bɛ́va, na bíti bayawine ɔda bubo ɔni bátina-mii bɛda.”
9Yesu ɔ́sɔ ɔ́su-ma ɔnini, “Bibo kakwɛ kani lɛlɔ bɛɛsia taanyonu Katɔti ɔda bubo taava kalɛ na bɛsiaku bina bati kuuku ɔdi ala bɔbla kama. 10Mose únweni úse ɔnii, ‘Bu ƒ'ɔti ku ƒ'ini. Na ukyuli ɔni muudumi ɔti iye uni ni, ɔlɛka badu-nwu.’ 11Nsu bɛɛsu ka, si ukyuli ɔdi ubo lɛla lɛdi lɛni na ɔkana na uti ubunku nwuna bawɔne ni, ɔkana ɔsu ka úse lɛla lɛmɛni kenye ɔni kalɔ ndi ukyuli ɔmɛni ɔ́da litela lɛmmɔ úse ka uti ɔkpa ute Katɔti. 12Na bítete-nwu ulu ka ɔka litela lɛmɛni buti bubunku nwuna bawɔne muedi! 13Lɛni na biiti bina bati kuuku ɔdi ala bɔbla teebile Katɔti ɔda bubo bɔmmɔ. Na bɛɛbla ala abambadi pii lɛnɔ aani ɔmɛni udu.”
14Ɔmmɔ kama ni, Yesu ɔ́sɔ ɔ́lɔ bekyuli lisu lɛmmɔ ɔnii bakpɛ bede-nwu. Amu na ɔ́su-ma ɔnini, “Bina ƒui bise atu na binu. 15Lɛla biala lɛni na ukyuli ɔ́di na líduo-nwu lɛlɔ kemmo ni, lilaya na uusé lɛlɔ na Katɔti anumi. 16Mmomu ni, lɛla lɛni nálɛ-nwu kayi kemmo ni, ani ndi lɛla lɛni mɔɔyá na uusé lɛlɔ.”
17Nwuna kama uwi ɔni na ɔ́tɔlɔ bana kudɔ na úsie kaduli ni, nwuna batɛyane béye-nwu banii udie litemi lɛmmɔ kalɔ ɔtina-ma.
18Yesu ɔ́su-ma ɔnini, “Si bítenu litemi lɛmɛni kalɔ ni, na bina kasusu kalákana ala buƒie! Use nwaa ka lɛla biala lɛni muuduo ukyuli lɛlɔ kemmo ni, lilaya na ukyuli uusé lɛlɔ. Ɔsika líteduo-nwu kayi kemmo. 19Mmomu nwuna kaƒɔ kemmo na líduo, na lɛɛsɔ taalɛ-nwu ɔlɔna kemmo aani lɛla lɛni nébie.” Na lɛla lɛni na Yesu ɔ́su mɛni ni, ɔ́tina ka adila biala adia éte bɔdi.
20Na ɔ́sɔ úsie anumi na ɔ́su ɔnini, “Lɛla lɛni nálɛ ukyuli kayi kemmo ni, ani mɔɔyá na uusé lɛlɔ. 21Ɔsika ukyuli kayi kemmo na kasusu kekpidi kaasí, na aka mɔɔyá na ɔɔbla ala ani naaadia. Na ala ammɔ ndi lɛyalɛ bɔbla ku kuyu ku ukyuli bɔdu ku kɔsɔnɔ bɔdi ku 22ɔdivo ku kasusu kekpidi buti ku ɔkɔ bɔnyi ku ɔlɔna ala ɔkwɛ bɔda bɔni muukpó kɔƒa ku lɛnungyie na bekyuli bamba ala lɛlɔ ku linyeda ku lɛlɔ bɔtina ku kɔdɔlɔ. 23Ala ekpidi amɛni ƒui ási ukyuli lɛlɔ kemmo na aayá na uusé lɛlɔ.”
Uleku Ɔni Nási Ƒoinike Ɔ́ƒɔ Yesu Ɔ́di
24Ɔmɛni kama ni, Yesu ɔ́tɔlɔ úsie kalɔ kani nde ɔma ɔni baalɔ Tiro kemmo. Úsie kaduli kadi na útayɔ ka ukyuli ɔdi ɔti ka ɔkya mmɔ, nsu útakana bɔbɛ. 25Mmɔ ka uleku ɔdi na kɔyu kukpidi kɔsiaku ubidi únu ɔnii Yesu ɔkya mmɔ ni, úbo-nwu kudɔ na úbalɛ akɔnkɔ na nwuna anumi. Uleku ɔmɛni ɔdi ɔƒɔ ɔni na Yudaƒuɔ balayɔ. Báwɔ-nwu na ɔma ɔni baalɔ Ƒoinike na Siria kalɔ lɛlɔ. 26Na úvele Yesu ɔnii ɔbɔku kɔyu kɔmmɔ ɔ́lɛku ubidi lɛlɔ kemmo.
27Nsu Yesu údie kenye ɔnini, “Ya bɔka banamu adila bute asa. Ɔɔɔdia ka buti banamu adila bubo buwi bana bakpɛwe.”
28Mmɔ na uleku ɔmɛni lɛnɔ údie kenye ɔnini, “Ao, Ati, bakpɛwe bani mbi kalɔ na kadikɔ mmɔ ni, bebo kuƒi ka badi adila ani na banamu baadi teewi kalɔ.”
29Amu na Yesu ɔ́su-nwu ɔnini, “Na ƒula kenye kani nédie mɛni ɔsu ni, teesie kaduli. Na adubɔnu ka kɔyu kɔmmɔ kɔ́tɔlɔ ƒ'ubidi lɛlɔ!”
30Amu na uleku ɔmɛni úsie kaduli. Na mmɔ ni, útánu ka ubidi ɔtɛ nwuna katɛnkɔ na kɔyu kukpidi kɔmmɔ kɔsɔ kuuulie-nwu lɛlɔ.
Yesu Ɔ́bwi Ɔnana Ɔni Neeenu Na Ulétemi
31Yesu ɔ́tɔlɔ Tiro amadɔ mmɔ, na ɔkɛ Sidon ɔ́vi úsie Galilea Ɛpu kudɔ na ɔvi ɔni nésie lɛma leevu kakɛ mmɔ. 32Na mmɔ ni, bekyuli badi béti ukyuli ɔni na atu éti-nwu na ulakana butemi lɛnɔ béboku-nwu, na bévele-nwu ka uti enu ɔsia-nwu lɛlɔ.
33Anwuɔsu Yesu ɔ́kpanku-nwu úsienku kɔƒɛlɛ kesii kani na bekyuli beeebo, na úti nwuna animi ɔ́kya-nwu atuƒi kemmo. Útuo lisuo na útuku ɔnana ɔmmɔ unyemi. 34Amu na Yesu ɔ́talaku anumi ɔ́nu katɔ na údumo geen, na ɔ́su ɔnana ɔmmɔ ɔnini, “Heƒata,” ɔni kalɔ ndi “Lɛmi!” 35Kɔnakunwi ni, ɔnana ɔmɛni atu álɛmi, na nwuna unyemi kabuli lɛnɔ káƒɛnimi-nwu na ɔ́kana butemi!
36Yesu ɔ́bala bekyuli bani nnye mmɔ ka batasu ukyuli ɔdi lɛla lɛdi batasiku lɛla lɛni na bánu mɛni lɛlɔ. Nsu ɔ́bala-ma keeke, ɔsika bana ƒui bakɛ baasu lɛla lɛmɛni taavi. 37Na bekyuli bani ƒui nénu ala ammɔ ni, ɔ́bla-ma yaa! Na básu lɛlɔ banini, “Ɔɔbla ala ani ƒui kaduɛ sɔsɔ! Ɔɔyá na bamumu baatɛmi, na batutine lɛnɔ beenú!”
Currently Selected:
Marko 7: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
