Yohane 13
13
Yesu asamfya amakasa aabakusambila bakwe
1Nomba kwashele akasuba kamo kutalafika ukulya kwa Chakulya Chakuchilila. Yesu alishibile ukuti inshita yafika iyakufuma muli nchino chalo nokuya kuli Bawishi. Atemenwe abantu bakwe lonse abali muno chalo. Alibatemenwe ukufikila nakumupwilo.
2Yesu nabakusambila bakwe bali pakulya umulalilo, Satana ye kale ayinjile mumutima wakwa Yuda Isikaliyoti, mwana waku Simoni, ukuti embule Yesu kubalwani bakwe. 3Yesu alishibile ati Bawishi balimupele ifiso pafintu fyonse. Alishibile ukuti Ye afumine kuli Lesa nakambi akubwelela kuli Ye. 4Echo ayimakene pamulalilo, afulila ilaya lyali kunse nokukaka insalu iyakupukutilako mumusana wakwe. 5Elo ayitile amenshi mwibeseni nokutendeka ukusamfya amakasa abakusambila bakwe nokubasumuna kunsalu iyo apombele mumusana wakwe. 6Ulo ayishile kuli Simoni Petulo, naye asosele kuli Yesu ati, “Bashikulu, napo nimwe munga samfya amakasa anji?”
7Yesu alimwasukile ati, “Webo tauchishibilepo icho nkochita, kuntu wakwisa kuchishiba panuma.”
8Petulo alikaninine ndi ati, “Nangu chibe shani nebo tamwasamfyepo amakasa anji!”
Yesu alimwasukile ati, “Nga nebo tanshakusamfyepo amakasa obe, tawabepo uwakusambila wanji.”
9Pakumfwa mfi, Petulo alyasukile ati, “Obe! Kati efyo Bashikulu, mwinsamfyapo amakasa bwaka, kuntu namaboko anji nomutwi kumo!”
10Yesu asosele ati, “Muntu onse uwasamba kale aba uwawamikwa. Mba nindo angasambila nakambi, kuntu kusamba bwaka kumakasa akwe. Mwebo bonse muliwamikilwe, kuntu temwepo bonse iyowo.” ( 11Yesu alishibile kale uyo uwakwisa kumwembula. Echo asosele ati, “Mwebo bonse mwawamikwa, kuntu temwepo bonse iyowo.”)
12Panuma ulo Yesu asamfishe amakasa abo, afwele ilaya lyakwe ilyakunse nokubwelela kuchifulo chakwe kwitebulu. Elo asosele ati, “Napo mwachishiba icho nachita kuli mwe? 13Mwebo mukonjita ati, ‘Musambishi’ nakambi ati, ‘Bashikulu.’ Nachine mukolungika pakuti efyo naba. 14Nomba mwabona nebo Shikulunwe no Musambishi wenu, nasamba amakasa enu. Namwe kumo sambanenipo amakasa yenu. 15Nebo nachita ichakubwenapo kuli mwe. Echo namwe mulingile mulokuchita ukubati ifyo nebo namuchitila. 16Nachine nkomweba ati, takupo umusha uwachila wishikulu wakwe, nangu intumi ukuchila uyo uwamutumine. 17Nomba mwayishiba mfi, mukashuka nga mwakufichita.
18“Nshikososapo ifyakumwebo bonse, nalibeshiba abo nebo nasala. Nomba Amalembo Apatulika alingile alanga ukwebesha aakoti, ‘Umuntu uyo uukolya pamo nandibo ewambukila.’ 19Nkomweba kabela achitalachitika, elo mwakuchetekela ati, ‘Nebo nine uyo Uwayikalilila.’ 20Nachine nkomweba ati, umuntu onse uwapokelela onse uwo natuma, ekwebati apokelela nebo, nakambi uupokelela nebo, apokelela nowantumine.”
Yesu asosa ifyakwembulwa kwakwe
(Mat. 26.20-25; Mk. 14.17-21; Luk. 22.21-23)
21Panuma ulo Yesu asosele mfi, alisunshikile ukwinekantu mumutima wakwe nokusosa ati, “Nachine nkomweba ati, umo umunenu akonyembula.”
22Abakusambila bakwe balilolenshenye. Elo balishimbilwe ukwinekantu nokuti, “Mba ninani uwo akososapo?” 23Umo uwabakusambila bakwe uwo Yesu atemenwe, ayikele apepi na Yesu. 24Simoni Petulo alimuchebwishe nokweba ati, “Mufumbeni, mba ninani uwo akososapo?”
25Uwakusambila ngulya alipalamine kuli Yesu nokumufumba ati, “Mba ninani, Bashikulu?”
26Yesu alimwasukile ati, “Uyo nkopela akasunwa kamufuba ako natobesha mumuto eye.” Elo abulile akasunwa kamufuba nokutobesha mumuto, nokupela kuli Yuda, mwana wakwa Simoni Isikaliyoti. 27Bwangu-bwangu ulo Yuda abulile umufuba, Satana kayinjila muli ye. Yesu asosele kuli ye ati, “Endesha ukuchita ifyo uli nokuchita!” 28Tapali nangu umo pabakusambila bakwe abayikele petebulu abayishibilepo umulandu Yesu asosele mfi kuli Yuda. 29Pakuti Yuda ewalikusunga itumba lyandalama, bambi abakusambila bakwe balangulukile ati nangula Yesu amweba ukuya kushita ifyali kufwayikwa pakulya nangula ukupelako fimo kubachula.
30Ulo Yuda apokele akasunwa kamufuba ako, bwangu-bwangu alifumine panse. Yali ninshita yabushiku.
Ifunde ilyabwangu
31Panuma ulo Yuda ayile, Yesu asosele ati, “Nomba Mwana wa Muntu wachinshikwa, nomba Lesa naye achinshikilwa muli Ye. 32Kati Lesa achinshikilwa mu Mwana, ekwebati Lesa naye achinshika Umwana wakwe. Elo akochita bwangu-bwangu. 33Mwe bana banji, tanshayikalepo nenu inshita iitali. Mwakwisa kumfwayilila, kuntu nkomweba nomba ifyo na ebele intanjishi sha Bayuda ati, ‘Mwebo tekuti muyeko uko nebo nkoya.’ 34Nomba nkomupela ifunde ilyabwangu ilyakuti mulokutemwana umo nomunakwe. Ukubati nimfilya nebo namutemwa, efyo mulingile ukutemwana. 35Nga mukotemwana, abantu bakwisa kumwishiba ukuti muli bakusambila banji.”
Yesu asosa ifyo Petulo akumukana
(Mat. 26.31-35; Mk. 14.27-31; Luk. 22.31-34)
36Simoni Petulo afumbile Yesu ati, “Bashikulu, nikwisa uko mukoya?”
Yesu alimwasukile ati, “Tekuti munkonkepo nomba uko nebo nkoya, panuma elo mwakwisa kunkonka.”
37Elo Petulo alimufumbile ati, “Bashikulu, mba nindo ntangamukonkelapo nomba? Nebo ndiyiteyenye ukufwila mwebo!”
38Yesu alyasukile ati, “Kanshi webo uliyiteyenye ukufwila nebo? Nachine nkokweba ati, tambala atalalila bwenka mbuno bushiku, ukoyisa kunkana imiku itatu.
Currently Selected:
Yohane 13: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
