Yohane 17
17
Yesu ayilombela umwine
1Ulo Yesu ashilile ukusosa amashiwi ngalya, aloleshe kumulu nokusosa ati, “Bata, inshita yafika. Chinshikeni Umwana wenu, ukuti naye amuchinshike. 2Ukubati nimulya mwamupela insambu pabantu bonse, ukuti bonse abo mwamupela abapele ubumi butashila. 3Elo ubumi butashila ekwishiba mwebo, mwe Lesa wachine, nokwishiba Yesu Klistu uwo mwatumine. 4Nalimuchinshika muno chalo pakushilisha umulimo uwo mwampele ukuchita. 5Nomba Bata namwe nchinshikeni nebo, nga mfilya nachinshikilwe ulo twali bonse, ichalo chitalatatikwa.
6“Nalimulondolola ukuti abantu bamwishibe. Bali abenu, kuntu mwabapele kuli nebo. Elo balilamine amashiwi enu. 7Nomba balishibile ukuti ifintu fyonse ifyo mwampele fyafuma kuli mwe. 8Pakuti nalibasambisha amashiwi ayo mwampele, nabo balipokelele. Nomba balishibile ukwebesha ukuti nafuma kuli mwe. Echo balichetekela ukuti nimwe mwantumine.
9“Mba ebo nkolombela. Nshikolombelapo abamuchalo iyowo, kuntu abo mwampele pakuti benu. 10Bonse abanji, benu, nabenu banji. Elo nkochinshikilwa muli bo. 11Nomba nkoyisa kuli mwebo. Tanshilipo wamuno chalo iyowo, kuntu mba bamuno chalo. Bata mwe Babuta, mwishina lyenu basungeni abo mwampele ukuti bakabe umo ukubati nimfilya twaba umo. 12Ulo nali nabo nalibasungile mwishina lyenu ndilya mwampele. Elo nalikubalama, tapapo nangu umo uwaku bo uwaonayikile, kuntu ngulya uwali nokonayika ukuti Amalembo afikilishiwe.#Amal. 41.9 13Nomba nkoyisa kuli mwe. Nangu chibe mfi, nkososa mfi fintu ulo nchili muchalo ukuti basekelele ukubati nimfilya nasekelela. 14Nalibasambisha amashiwi enu, elo ichalo chalibapatile pakuti tabalipo bamwibumba lyabo, ukubati nimfilya nandibo tanshilipo wamuli bo. 15Tanshikolombapo ukuti mubafumyemo muli nchino chalo iyowo, kuntu ukuti mubachingilile kumubi ngulya. 16Tabali bamuchalo, ukubati nimfilya nandibo tanshilipo uwamuchalo. 17Balengeni ukuba abenu ukupitila mukwebesha, pakuti amashiwi enu ekwebesha. 18Ukubati nimulya mwantumine muchalo, echo nandibo nabatuma muchalo. 19Pamulandu wabo nkoyipela kuli mwebo ukuti nabo bakayipele bonse kuli mwebo mukwebesha.
Yesu alombela bonse abakamuchetekela
20“Nomba nshikolombelapo mba benka iyowo, kuntu nambalya abakwisa kuchetekela muli nebo ukupitila mumashiwi awo mba balikubilisha. 21Nkobalombela ukuti babe umo. Bata, babe muli fwebo ukubati nimfilya mwaba muli ne, nandibo muli mwebo ukuti ichalo chonse chisumine ukuti nimwe mwantumine. 22Ukubati nimfilya mwanchinshika, nandibo nkobachinshika ukuti babe umo ukubati nimfilya nafwe twaba umo. 23Nebo muli bo, namwe muli ne, ukuti bakabe umo ukuchilapo, ukuti abantu bonse abamuchalo beshibe ukuti nimwe mwantumine, nokuti mwalibatemwa ukubati nimfilya mwantemenwe.
24“Bata! Nkofwayisha ukwinekantu ukuti abo mwampela, bakabe nandibo uko nakuba ukwebati bakabone umuchinshi wanji uwo mwampela. Pakuti mwantemenwe ichalo tachilatatika. 25Bata, mwe baololoka, abantu bamuchalo tabamwishibapo, kuntu nebo nalimwishiba. Elo naba balishibile ukuti nimwe mwantumine. 26Nalibasambisha ukuti bamwishibe nakambi nshaleke ukuti ukutemwa uko mwantemenwe kube muli bo, nandibo muli bo.”
Currently Selected:
Yohane 17: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
