Yohane 20
20
Yesu abuka kubafwa
(Mat. 28.1-10; Mk. 16.1-8; Luk. 24.1-12)
1Lwali uluchelo-chelo tapalatuba pakasuba akakwamba aka Mulungu, Maliya Magadala alishile kumanda. Elo abwene ibwe lilikunkulukilepo pamanda. 2Alibutukile ulubilo nokwisa kuli Simoni Petulo nowakusambila umbi uwo Yesu atemenwe. Asosele kuli bo ati, “Balibafumishemo Bashikulu mumanda. Elo tatwishibilepo uko bababikile.”
3Elo Simoni Petulo afumine nowakusambila umbi ngulya nokuya kumanda. 4Bonse babili balibutukile pamo, kuntu uwakusambila umbi ngulya alibutukishe ukuchila pali Simoni Petulo, ewabalilepo ukufika kumanda. 5Ulo afikile nkulya, ayineme nokuchenchenta mukati. Abwene insalu ishambafuta shili panshi, kuntu mukati tayinjilemo iyowo. 6Bwangu-bwangu Simoni Petulo naye alifikile nokwinjila mukati. Abwene insalu shili apalele Yesu. 7Insalu iyali kumutwi waku Yesu tayali pamo nensalu shimbi, kuntu yapetelwe apayenka. 8Panuma uwakusambila uwabalilepo ukufika kumanda alinjilile mukati. Elo abwene nokuchetekela fyasosele Maliya. ( 9Pakuti panshita njilya tabalaumfwikisha ifyo Amalembo asosa ukuti Yesu akubuka kubafwa.)#Amal. 16.8-11; Mil. 2.24-31 10Elo abakusambila babili mbalya balibwelelemo kumwabo.
Yesu aboneka kuli Maliya Magadala
(Mat. 28.9-10; Mk. 16.9-11)
11Maliya Magadala alimakene nkulya kumanda nokulila. Ulo alikulila alinamine nokuchenchenta mumanda. 12Abwene abangelo babili bafwite ifyabuta tutu, balikele umo kumutwi nomunakwe kumolu apo ichitumbi chaku Yesu chalele. 13Balisosele kuli ye ati, “We mwanakashi, findo ukolila?”
Naye abasukile ati, “Pakuti balibafumishe Bashikulu banji, tanshishibilepo noko bababikile!”
14Ulo asosa mfi, alyalukile nokubona Yesu alimakene, kuntu tayishibilepo ukuti eye. 15Yesu afumbile ati, “We mwanakashi, findo ukolila? Ninani ukofwaya?”
Maliya alangulukile ukuti eye umulimi wamwibala. Elo asosele ati, “Mwe bashikulu, kati nimwe mumufumishemo, nangeni uko mumubikile ukwebati nje kumufumyako.”
16Yesu asosele nakwe ati, “Maliya!”
Alyalukile Maliya, asosele ati, “Laboni!” (Nchi Chihebele ichikoyalula ati, “Musambishi.”)
17Yesu asosele ati, “Winjikata pakuti nshilabwelela kuli Bata. Nomba koya kuli bawesu ukasose nabo ati nkoya kuli Bata abali e Bashinwe, kuli Lesa wanji uuli e Lesa wenu.”
18Maliya Magadala alishile nokusosha abakusambila ati, “Nababona nebo Bashikulu. Balibukile kubafwa. Ebanjeba namfi fintu fyonse.”
Yesu abonekela kubakusambila bakwe
(Mat. 28.16-20; Mk. 16.14-18; Luk. 24.36-49)
19Kwatile ukuba ichungulo, pali mbulya bushiku bwakwamba ubwa Mulungu, ninshi nefiseko fyananda filiselwe umwalongene abakusambila pamulandu wakutina abakulu ba Bayuda. Yesu alishile nokwimakana mukati kabo. Elo asosele ati, “Umutende ube namwebo.” 20Pakusosa mfi, alibalangile amaboko akwe nechitumba chakwe. Elo abakusambila balisekelele pakubona Bashikulu. 21Yesu asosele nabo nakambi ati, “Mutende ube namwebo. Ukubati nimfilya Bata bantumine, nandibo nkomutuma mwebo.” 22Ulo Yesu asosele mfi, alibapemene nokusosa ati, “Pokeleleni Umupashi Wabuta. 23Bantu bonse mukonakilila amabifyo abo, epela bakunakililwa. Elo bonse abo mutakonakililapo, tabakanakililwepo iyowo!”
Yesu na Tomasi
24Nomba Tomasi umo uwabekumi na babili (ukoyitwa Mpundu), talipo ulo Yesu ayishile kubakusambila bambi. 25Elo abakusambila banakwe balisosele nakwe bati, “Twababona Bashikulu!”
Nomba ye asosele ati, “Nga nshabonepo ifipunda ifyamisumali mumaboko abo, nokubika umunwe wanji mufipunda ifyamisumali nokubika ukuboko kwanji kuchitumba chakwe, nshachetekelepo iyowo.”
26Nomba papitilepo ishiku shisano nashitatu. Abakusambila baku Yesu bali munanda mwenka mulya nakambi, na Tomasi emo ali. Ifiseko fyaliselwe. Yesu ayimakene pakati kabo nokusosa ati, “Mutende ube namwebo.” 27Elo asosele kuli Tomasi ati, “Bika umunwe obe mpa, lolesha nakumaboko anji wishibe ukuti ninebo. Tambulula ukuboko kobe wikate pachitumba chanji ukuti wikayikapo, kuntu uchetekele bwaka!”
28Tomasi alimwasukile ati, “Mwe Shikulu wanji, na Lesa wanji!”
29Yesu asosele ati, “Pakuba wambona epo wachetekela. Balishuka abakochetekela nangu tabambwenepo.”
Ukulembwa kwaku ndi buku
30Yesu achitile ifyakushimbwisha ifinji ukwinekantu pamenso abakusambila bakwe. Fimbi tafyalembwapo muli ndi buku. 31Nomba mfi fyalembwa ukwebati muchetekele ukuti Yesu e Wasubwa, Umwana waku Lesa, nokuti nga mwamuchetekela mube nobumi butapwapo.
Currently Selected:
Yohane 20: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
