Yohane Amashiwi akwambilapo
Amashiwi akwambilapo
Ubutumi Bwawama ukulingana nomo Yohane alembele bwalondolola ukwebati Yesu e shiwi lyaku Lesa, “uwayishileba umuntu nokwikala nafwe.” Ngomo ibuku iline likososela, mbu Butumi bwalembelwe ukwebati abakupenda bachetekele ukuti Yesu e Mupulushi uwalayilwe, Umwana waku Lesa, elo nokuti ukupitila muchetekelo muli Ye abantu bengakwatilamo ubumi (20.31).
Panuma amashiwi akwambilapo aakolinganya ichebo chaku Lesa chitashilapo na Yesu. Ichiputulwa cha Butumi ichakwambilako chikolondola ifyafiso ifikulu ifipusene-pusene ifikolangisha ukwebati Yesu e Mupulushi uwalayilwe, Umwana waku Lesa. Elo kambi pakonkapo nokusambisha ubukolondolola ifyasokololwa mufiso ifikulu. Ulu lubali lukolondolola ifyo abantu bambi bachetekele muli Klistu nokusanguka abasambi bakwe. Bambi nabo balimutalikile nokukana muchetekela. Ifiputulwa 13—17 fikolondolola mukutantalila isenge Yesu akwete nabasambi bakwe mubushiku bamwikete. Musangwa namashiwi akupekanya nokubakoselesha ulo talasamikwa pamutashi, ukubuka kubafwa nokubonekela kubasambi bakwe panuma yakubuka.
Ilyashi lyamwanakashi uwayiketwe mubuchende (8:1-11) libikilwe mukati () pakuti talisangwamo mumabuku ambi akwamba, kuntu abalikupilibula amashiwi enka nga abakwamba baliyashile chibe bambi nabo balikubikamo munchende shimo shimo.
Yohane akonkobesha pachabupe chabumi bwamuyayaya ukupitila muli Klistu, ichabupe ichamba nduno, elo ichisa kuli bo abachetekela Yesu nge nshila, ichine, elo nobumi. Ichintu chimbi ichikobonekesha mumilembele yaku Yohane ukulangilila kwafintu ifyo tubomfya chilabushiku pakusonta kufyaku mupashi ifili nga amenshi, shinkwa, ulubuto, chembela nembelele shakwe, elo nebala lya myangashi nefitwalo fyauko.
Ifyalembwa mwibuku ndi mukwipifya
a. Ukwishibisha ukwantanshi 1.1-18
b. Yohane Mubatishi nabasambi baku Yesu abantanshi 1.19-51
c. Imilimo yaku Yesu iyakushimika 2.1—12.50
d. Inshiku ishakulekelesha mu Yelusalemu namupepi 13.1—19.42
e. Ukubuka nokubonekela kwaku Bashikulu Yesu 20.1-31
f. Ukusondolwela: Ukubonekela nakambi mu Galili 21.1-25
Currently Selected:
Yohane Amashiwi akwambilapo: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.