Luka 22
22
Bapinga ukwipaya Yesu
(Mat. 26.1-5; Mk. 14.1-2; Yoh. 11.45-53)
1Nomba inshita yalipalamine iya Kasuba kakulu akakulya Imifuba Iitatutumuka iyalikwitwa Chakulya Chakuchilila.#Ukuf. 12 2Intungulushi shabachipupila nabasambishi ba Mafunde balikutina abantu, elo balikufwayilisha inshila yakwipayilamo Yesu mubumfinshi.
Yuda asumina ukwembula Yesu
(Mat. 26.14-16; Mk. 14.10-11)
3Elo Satana ayinjile muli Yuda, uwali kwitwa Isikaliyoti, uwali umo uwabakusambila ikumi na babili. 4Echo Yuda alile nokusosa nentungulushi shabachipupila nabafilolo abakunanda yaku Lesa umo angembwila Yesu kuli bo. 5Nabo balitemenwe nokulaya ukumupela indalama. 6Naye Yuda alisumine pali nchi nokutatika ukufwaya inshila iiweme iyakwembwilamo Yesu ukwambula abantu ukwishiba.
Yesu apekanya Chakulya Chakuchilila
(Mat. 26.17-25; Mk. 14.12-21; Yoh. 13.21-30)
7Akasuba kalifikile akakulyamo Imifuba Iitatutumuka ako balikwipayamo umwana wambelele ukuba nga ipupo lya Chakulya Chakuchilila. 8Yesu atumine Petulo na Yohane nokubeba ati, “Kamuya mukatuwamishishe Chakulya Chakuchilila.”
9Nabo balimufumbile ati, “Kanshi nikwisa uko mukofwaya ukuti tumuwamishishe chakulya nchi?”
10Naye alyasukile ati, “Ulo mukoya kwinjila mumusumba, mukoya kukumanya umwalalume umo uupintile umutondo wamenshi. Mumukonke kunanda uko akoya kwinjila. 11Elo mwebe umwine wananda ati, ‘Umusambishi akokufumba ati, mba chipinda chabalwendo icho nebo nabakusambila banji twakulilamo Chakulya Chakuchilila chili kwisa?’ 12Naye akoya kumulanga ichipinda chapamulu ichikulu ichayanshikwa. Mwenka mulya emo mukawamishishe.”
13Balile nokusanga ifintu fyonse fili bwaka mwenka umo Yesu asosele. Nabo baliwamishishe Chakulya Chakuchilila.
Umulalilo waku Bashikulu
(Mat. 26.26-30; Mk. 14.22-26; 1 Kol. 11.23-25)
14Ulo inshita yafikile, Yesu abulile ichifulo chakwe petebulu pakulya pamo nabatumwa bakwe ikumi na babili. 15Elo asosele kuli bo ati, “Ndifwayishe ukwinekantu ukulya pamo nenu Chakulya Chakuchilila nchi ulo ntalachushiwa! 16Nomba nkomweba ati, tanshayise kulya nenu Chakulya nchi chimbi ukufikila ulo mfi fyakuchitika mu Bufumu bwaku Lesa.”
17Elo Yesu abulile inkombo, alitotele kuli Lesa nokuti, “Buleni ulukombo ndu mwabane. 18Nkomweba ati ukufuma nduno tanshayise kunwapo amenshi afitwalo fya mpesha ukufikila Ubufumu bwaku Lesa bukese.”
19Elo abulile umufuba nokutota kuli Lesa, aliusunawile, epo alibapele nokuti, “Ngu mubili wanji, [uwapelwa pamulandu wenu. Chiteni nchi mukunjibukisha.” 20Munshila imo yenka alibapele nenkombo panuma yamulalilo, nokuti, “Ngu mulopa wanji uwachipangano ichabwangu chamumulopa wanji uwayitikilwe pamulandu waku mwebo.”]
21“Nomba, boneni! Uyu uukonyembula ali mpano petebulu pamo nandibo! 22Umwana wa Muntu akufwa ukulingana nomo Lesa alangulukile, kuntu ishamo kuli uyo umuntu ukomwembula!”
23Elo abakusambila batatikile ukufumbashanya bati, “Ninani wakwisa kuchita nchi?”
Ifyo umukulu alingile ukuba
24Mwali ukutalikishanya mukati kabakusambila baku Yesu ichakuti beshibe mba ninani uungaba umukulu mukati kabo. 25Yesu asosele kuli bo ati, “Imfumu shabenafyalo shalikwata ifiso pabantu babo abamuno chalo, nabakapingula bakoyitwa ‘Ifibusa fyabantu.’ 26Nomba nji tenshilapo chingabelamo nakuli mwebo. Echo umukulu mukati kenu alingile ukuba nga mwayiche, nomutanjishi alinga ukuba nga umupyungi. 27Mba umukulu ninani, uwikala panshi nokulya nangula uyo uukobapyungila? Chakwebesha, ningulya uwikala panshi nokulya. Nomba nebo ndi mukati kenu ukubati mupyungi.
28“Mwebo mwayikala nandibo munshita shonse ishakwesheka kwanji. 29Echo mwenka umo Bata bampelela ifiso fyakuteka, epo nafipela nakuli mwe. 30Mwakwisa kunwa nokulya petebulu lyanji mu Bufumu bwanji. Elo mwakwisa kwikala pafipuna ifyabufumu nokupingula pamikowa ikumi na ibili ya Baisilaeli.
Yesu asosa ifyakukanwa na Petulo
(Mat. 26.31-35; Mk. 14.27-31; Yoh. 13.36-38)
31“Simoni! Simoni! Umfwa! Satana asuminishiwa ukuti amweshe mwe bonse, ukupatula ubune ukufuma kububi, ukubati nimfilya umulimi apatula umusungu kuli tiligu. 32Nomba we Simoni nakulombela ukwebati ukuchetekela kobe kwibwelelapo kunuma. Ulo wakubwelela kuli nebo, ulingile ukukosha bawenu.”
33Petulo alyasukile ati, “Bashikulu, nebo ndi uwayipekanya ukuya namwe kuchifungo, nokufwila pamo nenu.”
34Yesu asosele ati, “Nkokweba Petulo nati, tambala atalalila mbuno bushiku bwenka, ukoyisa kunkana imiku itatu ukuti tawanjishibapo.”
Ichikwama, itumba nomwele
35Elo Yesu afumbile abakusambila bakwe ati, “Ulo namutumine njilya nshita ukwambula ichikwama, itumba nangu inkwabilo, napo mwalichulilepo akantu?”#Luk. 9.3; 10.4
Nabo bayasukile ati, “Tatwachulilepo akantu iyowo.”
36Elo Yesu asosele ati, “Kuntu nomba, uyo onse uuli nechikwama nangula itumba alingile ukupinta, na uyo uutakwetepo umwele kashitishe ilaya lyakwe ukuti ashite. 37Pakuti nkomubusha Amalembo Apatulika ngalya ayasosa ati, ‘Ye balimupendele pamo notupondo,’ ukwebati filange ukwebesha nefyalembelwe pali nebo, pakuti ifyalembelwe pali nebo fili apepi nokufikilishiwa.”#Esa. 53.12
38Abakusambila bakwe basosele ati, “Boneni, Bashikulu! Nkuno tukweteko imyele ibili!”
Yesu aasukile ati, “Chalinga.”
Yesu alomba palupili lwa Maolife
(Mat. 26.36-46; Mk. 14.32-42)
39Yesu alifuminemo mumusumba nokuya nga mfilya alikuchita lonse, ku Lupili lwa Maolife, nabakusambila bakwe bayile nakwe. 40Ulo afikile kuchifulo nchilya asosele ati, “Lombeni ukuti mwiwila mukweshewa.”
41Yesu afuminepo pali bo, ayileko panini pantanshi apakuti ibwe alyaposwa kuti lyafikapo. Elo alifukeme nokulomba. 42Elo Yesu alombele ati, “Bata, nga mukofwaya, fumyenipo ndu lukombo lwamachushi pali nebo. Nomba tekufwayapo kwanji, kuntu kufwaya kwenu eko kuchitikwe.” [ 43Elo umungelo ayishile kuli Ye nokumukosha. 44Mukupenga ukukulu ukwamutima, Yesu alilombele ukuchisha napakubala, ichibe chakwe chapalile ati mulopa walikuswila panshi!]
45Ulo Yesu ayimine apo ali mukulomba, abwelele kubakusambila bakwe nokubasanga balilele utulo, pantu bali nechikonko. 46Elo asosele ati, “Nindo mwalalila? Bukeni nokulomba ukuti mwiwila mukweshewa.”
Bayikata Yesu
(Mat. 26.47-56; Mk. 14.43-50; Yoh. 18.3-11)
47Yesu ulo alimukusosa, ibumba lyabantu lyalishile. Lyatanjililwe na Yuda, umo uwabakusambila ikumi na babili. Ayishile kuli Yesu nokumufyomfyonta.#22.37-48 nokumufyomfyonta: kumishobo iimbi ukufyontonta ninshila imbi iyakulanga ukutemwa pakupelana umutende. 48Nomba Yesu asosele ati, “Yuda, kanshi nku kufyomfyonta eko ukoyembwilako Umwana wa Muntu?”
49Ulo abakusambila bali pamo na Yesu babwene ichikofwaya kuchitika, balifumbile bati, “Bashikulu, napo nafwe tubomfye imyele?” 50Umo uwaku bo asolomwene umwele akwempula ukutwi kwakukulyo ukwamusha wakwa chipupila mukulu.
51Nomba Yesu asosele ati, “Emfilya, leka!” Elo ayikete ukutwi kwaku ngulya umwalalume nokukuposha.
52Elo Yesu asosele kuntungulushi shabachipupila nakuli bafilolo abalikulinda inanda yaku Lesa, nakubakulu abayishileko ukumupinta ati, “Napo nebo ndi chipondo apo mwayisa nemyele nenkoli mukunjikata, bayi? 53Inshiku shonse nalikwikala namwebo nkosambisha munanda yaku Lesa, nokuti munjikatepo, yii. Nomba nji enshita yenu nakambi iyafiso fyamfishi.”
Petulo akana Yesu
(Mat. 26.57-58,69-75; Mk. 14.53-54,66-72; Yoh. 18.12-18,25-27)
54Elo balimwikete Yesu nokumutwita kunanda yakwa chipupila mukulu. Petulo alikonkele akatalamukila. 55Nomba balikoseshe umulilo mwisano na Petulo alipamo nambalya abalikonta umulilo. 56Ulo umo uwabapyungi abanansungu abwene Petulo alikele pamulilo, alimulolekeshe nokusosa ati, “Ngu muntu naye aali pamo na Yesu!”
57Nomba Petulo alikene ati, “We mwanakashi, nshamwishibapo nokumwishiba!”
58Panuma ulo papitile akashita kanini, umbi umwalalume naye alimubwene Petulo nokwebati, “Namwe muli umo waku mba!”
Petulo alyasukile ati, “We mwalalume, tenepo!”
59Elo ukubati papitile ola umo umwalalume umbi alishininkishe ati, “Tekuti pabepo nokukayika. Nachine ngu muntu aali pamo na Yesu, pantu naye mwina Galili!”
60Nomba Petulo alyasukile ati, “We mwalalume, tanshishibilepo nefyo ukusosa!”
Lwenkolo, ulo achili akososa, tambala alililile. 61Bashikulu balyalukile nokulolesha pali Petulo. Elo Petulo ayibukishe ifyo Bashikulu basosele kuli ye ati, “Tambala atalalila mbuno bushiku, ukonkana imiku itatu ati tawanjishibapo.” 62Elo Petulo afumine panse nokulila ukwinekantu.
Yesu bamusekuluka nokumupama
(Mat. 26.67-68; Mk. 14.65)
63Nomba abantu abalikulindila Yesu balimusekulukile nokumupama. 64Balimufimbile pamenso nokumufumba ati, “Lota! Ninani wakupama?” 65Basosele ifintu ifinji ifyakumusalula.
Yesu aletwa kuchilye
(Mat. 26.59-66; Mk. 14.55-64; Yoh. 18.19-24)
66Ulo bwachele, abakulu Babayuda, intungulushi shabachipupila nabasambishi ba Mafunde bakumene pamo, na Yesu aletelwe pachilye. 67Balimufumbile bati, “Twebe, napo ewe Uwasubwa waku Lesa?”
Yesu alibasukile ati, “Nga namweba, tamwanchetekelepo. 68Elo nga namufumbapo ifumbo, tekuti mwasukepo. 69Ukufuma nomba Umwana wa Muntu akwikala kukuboko kwamulyo ukwaku Lesa#22.69 kukuboko kwamulyo ukwaku Lesa: Nchi chifulo chafiso nomuchinshi. Uwafiso fyonse.”
70Elo bonse bamufumbile ati, “Kanshi, nachine, uli Mwana waku Lesa?”
Naye alibasukile ati, “Ifyo mwasosa efyo naba.”
71Nabo basosele ati, “Mulandu ndo tukofwayilapo nabakamboni bambi? Fwebo fwenka twayumfwila ifyo asosele!”
Currently Selected:
Luka 22: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
